HOSỌ HE JẸNUKỌN | NAEGBỌN MÍ DONA PLỌN BIBLU?

Tito Biblu Pinplọn Tọn Na Mẹlẹpo

Mẹsusu yọ́n Kunnudetọ Jehovah tọn lẹ na yẹwhehodidọ yetọn. Ṣigba, be a yọnẹn dọ mí sọ tindo tito Biblu pinplọnmẹ tọn de lẹdo aihọn pé ya?

Yè to Biblu plọn hẹ dawe de to azọ́nwatẹn etọn

To owhe 2014 tọn mẹ, Kunnudetọ 8 000 000 linlán to otò 240 mẹ wẹ nọ plọn Biblu hẹ diblayi gbẹtọ 9 500 000 to osun dopodopo mẹ.a Na nugbo tọn, sọha mẹhe mí to Biblu plọn hẹ lẹ tọn zẹ̀ sọha tòvi otò voovo 140 tọn go!

Nado sọgan wà azọ́n mẹpinplọn tọn ehe, Kunnudetọ Jehovah tọn lẹ nọ zín Biblu, owe lẹ, linlinwe lẹ po owe sinai do Biblu ji devo lẹ po tọ́n, ehe sọha yetọn nọ yì liva dopo daa to whemẹwhemẹ to nudi ogbè 700 mẹ! Vivẹnudido nado zín owe lẹ tọ́n to ogbè susu enẹlẹ mẹ zọ́n bọ gbẹtọ lẹ sọgan plọn Biblu to ogbè he jlo yé mẹ.

“To wehọmẹ n’ma yiwanna nupinplọn paali, ṣigba nupinplọn ehe vivi taun. Podọ nuhe n’plọn lẹ miọnhomẹna mi taun!”—Katlego, Afrique du Sud.

“Nupinplọn lọ na gblọndo na kanbiọ ṣie lẹpo gọna susu devo lẹ.”—Bertha, Mexique.

“Owhé ṣie gbè wẹ mí nọ plọn Biblu te to ogàn he yọ́n na mi mẹ. Etẹwẹ sọ yọ́n hugan mọ?”—Eziquiel, Brésil.

“To whedelẹnu, oplọn lọ nọ dẹn na nukunwhiwhe 15 jẹ 30, bo nọ dẹn humọ to ojlẹ devo lẹ mẹ, sọgbe hẹ tito ṣie lẹ.”—Viniana, Australie.

“Vọnu wẹ oplọn lọ, ehe jiawu taun!”—Aimé, Bénin.

“Mẹhe plọn Biblu hẹ mi nọ fahomẹ bosọ jọmẹ taun. Mí lẹzun họntọn vivẹ́.”—Karen, Irlande du Nord.

“Mẹsusu wẹ nọ plọn Biblu bo ma nọ lẹzun Kunnudetọ.”—Denton, Angleterre.

GBLỌNDO NA KANBIỌ HE MẸSUSU NỌ KANSE GANDO TITO BIBLU PINPLỌNMẸ TỌN MÍTỌN GO LẸ

Nawẹ oplọn lọ nọ yì do?

Mí nọ yí hosọ Biblu tọn voovo lẹ bo nọ gbadopọnna wefọ Biblu tọn he tindo kanṣiṣa hẹ hosọ enẹlẹ. Di apajlẹ, Biblu na gblọndo kanbiọ delẹ tọn taidi: Mẹnu wẹ yin Jiwheyẹwhe? Omẹ nankọ wẹ ewọ yin? Be e tindo oyín de ya? Fie wẹ e nọ nọ̀? Be mí sọgan dọnsẹpọ ẹ ya? Ṣigba, nawẹ mí sọgan mọ wefọ he na gblọndo kanbiọ lọ lẹ tọn to Biblu mẹ gbọn?

Nado gọalọna gbẹtọ lẹ nado mọ gblọndo lẹ, mí nọ saba zan owe lọ Etẹwẹ Biblu Plọn Mí Taun?b he tindo weda 224. Owe ehe yin awuwlena titengbe nado gọalọna gbẹtọ lẹ nado mọnukunnujẹ nuplọnmẹ dodonu tọn Biblu tọn lẹ mẹ. Nupinplọn owe lọ tọn lẹ gando Jiwheyẹwhe, Jesu Klisti, yajiji gbẹtọvi lẹ tọn, fọnsọnku, odẹ̀ po hosọ susu devo lẹ po go.

Whetẹnu podọ fie wẹ oplọn lọ sọgan yin bibasi te?

E sọgan yin bibasi to ogàn he jlo we mẹ, podọ to fie yọ́n na we.

Nawẹ oplọn dopodopo nọ dẹnsọ?

Mẹsusu nọ de nudi gànhiho dopo dovo to osẹ dopodopo mẹ nado plọn Biblu. Ṣigba, oplọn lọ sọgan nọ yin bibasi sọgbe hẹ tito towe lẹ. Mẹdelẹ nọ plọnnu na nukunwhiwhe 10 kavi 15 poun to sẹmẹsẹmẹ.

Nẹmu wẹ yè nọ sú na oplọn lọ?

Vọnu wẹ oplọn lọ po owe he a na yizan lẹ po. Ehe sọgbe hẹ anademẹ he Jesu na devi etọn lẹ dọmọ: “Vọnu wẹ mì mọyi, vọnu wẹ mì ni namẹ.”—Matiu 10:8.

Osun kavi owhe nẹmu wẹ oplọn lọ nọ dẹn na?

Hiẹ wẹ na basi nudide lọ. Owe lọ Etẹwẹ Biblu Plọn Mí Taun? bẹ nupinplọn 19 hẹn. Mí sọgan plọn depope to nupinplọn lọ lẹ mẹ kavi popolẹpo, podọ sọgbe hẹ nugopipe towe.

Be n’dona lẹzun Kunnudetọ Jehovah tọn wẹ ya?

Lala. Mí yọnẹn dọ mẹdopodopo tindo jlọjẹ nado basi nudide sinsẹ̀n he jlo e tọn. Ṣigba, mẹhe ko yọ́n nuplọnmẹ dodonu tọn Biblu tọn lẹ sọgan basi nudide sọgbe hẹ nuhe yé ko plọn lẹ.

Fie wẹ n’sọgan mọ nudọnamẹ te dogọ?

Nọtẹn Intẹnẹt tọn jw.org bẹ nudọnamẹ he sọgbe lẹ hẹn gando nuyise po nuwiwa Kunnudetọ Jehovah tọn lẹ tọn po go.

Nawẹ n’sọgan biọ dọ mẹde ni wá plọn Biblu hẹ mi gbọn?

Kanwe gọ́ obiọwema he tin to www.pr2711.com ji.
De dopo to adlẹsi he tin to weda awetọ linlinwe ehe tọn ji lẹ mẹ bo kanwehlan mí sọgbe hẹ fie sẹpọ we hugan.
Dọnsẹpọ Kunnudetọ Jehovah tọn he tin to lẹdo towe mẹ lẹ.

a To paa mẹ, mí nọ plọn Biblu hẹ mẹdopo kavi pipli pẹvi gbẹtọ lẹ tọn.

b He Kunnudetọ Jehovah tọn lẹ zinjẹgbonu. Vọkan owe ehe tọn he lán to livi 230 ji wẹ yin zinzinjẹgbonu to ogbè 260 linlán mẹ.

ALỌGỌ DE NA WHẸNDO LẸ

“To whenue asi ṣie jẹ Biblu plọn ji, n’doayi e go dọ e diọ taun. Gbẹzan whẹndo mítọn tọn pọnte dogọ. Na n’jlo na yọ́n nuhe plọn e te wutu, yẹnlọsu jẹ nuplọn ji. Nuhe n’plọn lẹ zọ́n bọ n’lẹzun gbẹtọ-jọ-gbẹtọ. Podọ Biblu pinplọn zọ́n bọ mí tindo haṣinṣan pẹkipẹki dogọ to whẹndo mítọn mẹ.”—Eziquiel.

“To whenue n’jẹ Biblu plọn ji, n’doalọtena amà nùnù po ahàn nùnù zẹjlẹgo po, podọ n’sọ plọn ma nado nọ yawu gblehomẹ. Owhé ṣie nọ tin to wiweji podọ to titoji. N’nọ wlebòna hagbẹ whẹndo ṣie tọn lẹ todin taun bo nọ wà nuhe nọ hẹn homẹ yetọn hùn lẹ. Ayajẹ ṣie gọfla.”—Karen.

“Mẹdelẹ nọ mọhodọdo go e na n’to Biblu plọn wutu. Ṣigba, asu ṣie nọgodona nudide ṣie, bo nọ dọmọ: ‘Nuhe dọ gbẹtọ lẹ te ma de mú sọn múdọ mẹ na mi. Nuhe yin nujọnu na mi hugan wẹ yindọ a to didiọ. Zindonukọn to nuhe plọn a te mẹ.’ Gbẹzan whẹndo mítọn tọn ma ko pọnte dole pọ́n!”—Viniana.