Weta Wiatọ̀n
Gbẹtọ Susugege de to Ofìn Jehovah Tọn Nukọn
1. (a) Whẹpo devizọnwatọ Jiwheyẹwhe tọn lẹ he nọgbẹ̀ jẹnukọnna ojlẹ Klistiani tọn kavi gbẹtọ 144 000 lẹ na mọ ale yetọn yí, etẹwẹ dona jọ do yé go whẹ́? (b) Etẹwẹ na yọnbasi na “gbẹtọ susugege” he to ogbẹ̀ to ojlẹ ehe mẹ lẹ?
DEVIZỌNWATỌ nugbonọ Jiwheyẹwhe tọn lẹ bẹsọn Abẹli ji wá jẹ Johanu Baptizitọ ji ze ojlo Jiwheyẹwhe tọn wiwà do otẹn tintan mẹ to gbẹzan yetọn mẹ. Ṣogan, yemẹpo wẹ kú, bo to tenọpọn fọnsọnku do aihọn yọyọ Jiwheyẹwhe tọn mẹ to aigba ji. Gbẹtọ 144 000 he na dugán hẹ Klisti to Ahọluduta olọn tọn Jiwheyẹwhe tọn mẹ lẹ lọsu dona kú whẹpo do mọ ale yetọn yí. Etomọṣo, Osọhia 7:9 dohia dọ to azán godo tọn ehelẹ mẹ, “gbẹtọ susugege” de na tin he na tọ́n sọn akọta lẹpo mẹ he ma na kú ṣigba bo na tindo nukundido gbẹninọ kakadoi to aigba ji tọn. Be hiẹ tin to yé mẹ ya?
Gbẹtọ Susugege lọ Yinyọnẹn
2. Etẹwẹ gọalọna mí nado tindo nukunnumọjẹnumẹ he họnwun gando mẹhe gbẹtọ susugege he Osọhia 7:9 dọho etọn lọ yin go?
2 To 1923, devizọnwatọ Jehovah tọn lẹ wá yọnẹn dọ “lẹngbọ” he Jesu dọho etọn to oló etọn he tin to Matiu 25:31-46 mẹ podọ “lẹngbọ devo” he e dlẹnalọdo to Johanu 10:16 mẹ lẹ wẹ mẹhe na tindo dotẹnmẹ hundote lọ nado nọgbẹ̀ kakadoi to aigba ji lẹ. Yé sọ doayi e go to 1931 dọ mẹhe Ezekiẹli 9:1-11 basi zẹẹmẹ dọ yé yin hiadogona do nukọn yetọn lẹ lọsu tindo todido aigba ji tọn ga. Enẹgodo to 1935 e yin ayidego dọ gbẹtọ susugege lọ wẹ wleawuna hagbẹ lẹngbọ devo lẹ tọn lọ he Jesu dọho etọn. To egbehe, sọha gbẹtọ susugege heyin nukundagbe dohia lọ tọn ko yì livi susu todin.
3. Naegbọn hogbe lọ “ṣite to ofìn lọ nukọn” ma dlẹnalọdo hagbẹ olọn mẹ tọn de?
3 Osọhia 7:9 ma dọ dọ gbẹtọ susugege lọ tin to olọn mẹ gba. ‘Teṣiṣi yetọn to ofìn’ Jiwheyẹwhe tọn nukọn ma biọ to yé si nado tin to olọn mẹ gba. Onú lọ poun wẹ yindọ, yé tin to fie Jiwheyẹwhe sọgan mọ yé te. (Psalm 11:4) Eyin mí yí sọha mado-dogbó gbẹtọ susugege lọ, “he mẹdepope ma sọgan hia,” tọn jlẹ do nuhe yin kinkàndai to Osọhia 7:4-8 po Osọhia 14:1-4 po mẹ go, e na hẹn nugbo lọ họnwun dọ yé mayin hagbẹ olọn mẹ tọn gba. Mí mọ to finẹ dọ sọha he yin ṣinṣinyan sọn aigba ji yì olọn mẹ yin didehia nado yin 144 000.
4. (a) Etẹwẹ yin “nukunbibia daho” lọ he gbẹtọ susugege lọ luntọ́n? (b) Dile e yin didọ to Osọhia 7:11, 12 mẹ do, mẹnu lẹ wẹ doayi gbẹtọ susugege lọ go bo kọnawudopọ hẹ yé to sinsẹ̀n-bibasi mẹ?
4 Osọhia 7:14 dọho gando gbẹtọ susugege lọ go dọmọ: “Ehelẹ wẹ yé he tọ́n sọn nukunbibia daho mẹ.” Yé lùn ojlẹ sinsinyẹn he ylan hugan to whenuho gbẹtọvi tọn mẹ lọ tọ́n. (Matiu 24:21) To whenuena gbẹtọ susugege lọ na gbọn pẹdido dali dohia dọ whlẹngán yetọn wá sọn Jiwheyẹwhe po Klisti po dè, whenẹnu wẹ nudida gbigbọnọ lẹpo to olọn mẹ na kọnawudopọ hẹ yé nado dọmọ: “Niṣẹ: Dona, po gigo po, nuyọnẹn po opẹ́ po, yẹyi, huhlọn, po hlọnhlọn po ni tin hlan Jiwheyẹwhe mítọn kakadoi. Niṣẹ.”—Osọhia 7:11, 12.
Dido Yedelẹ Hia Nado Jẹna Lunluntọ́n
5. Nawẹ mí sọgan yọ́n nuhe yin bibiọ to mí si nado kọnawudopọ hẹ gbẹtọ susugege lọ gbọn?
5 Hihọ́-bibasina gbẹtọ susugege lọ nado lùn nukunbibia daho lọ tọ́n yin bibasi to kọndopọmẹ hẹ nujinọtedo dodo Jehovah tọn. Jẹhẹnu heyin bibiọ to mẹhe na yin whinwhlẹngán lẹ si yin zẹẹmẹ etọn basi hezeheze to Biblu mẹ. Enẹwutu, e yọnbasi na mẹhe yiwanna dodowiwa lẹ nado yinuwa todin nado do yede hia taidi mẹhe jẹna lunluntọ́n. Etẹwẹ omẹ ehelẹ dona wà?
6. Naegbọn e do sọgbe nado yí gbẹtọ susugege lọ jlẹdo lẹngbọ go?
6 Lẹngbọ yin kanlin abọẹ-abọẹ de bosọ nọ hodo anademẹ. Enẹwutu whenuena Jesu dọ dọ emi tindo lẹngbọ devo he mayin hagbẹ olọn mẹ tọn lẹ tọn, e ma to alọdlẹndo gbẹtọvi he na jlo nado nọgbẹ̀ kakadoi lẹ poun gba, ṣigba mẹhe na setonuna nuplọnmẹ etọn lẹ ga. E dọmọ: “Lẹngbọ ṣie lẹ sè ogbè ṣie, yẹn sọ yọ́n yé, yé sọ nọ hodo mi.” (Johanu 10:16, 27) Ehelẹ wẹ mẹhe dotoai bo gbọn tonusise dali wà nuhe Jesu dọ, bo lẹzun devi etọn lẹ.
7. Jẹhẹnu tẹlẹ wẹ hodotọ Jesu tọn lẹ dona wleawuna?
7 Jẹhẹnu devo tẹlẹ wẹ hodotọ Jesu tọn ehelẹ dopodopo dona wleawuna? Ohó Jiwheyẹwhe tọn na gblọndo dọ: “Mì ni klọ́n do apadopo owalọ ogbẹ̀ mìtọn hoho tọn, gbẹtọ hoho lọ . . . na mì ni sọ ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn mẹ.” (Efesunu lẹ 4:22-24) Yé wleawuna jẹhẹnu he nọ hẹn pọninọ devizọnwatọ Jiwheyẹwhe tọn lẹ tọn lodo—yèdọ “owanyi, ayajẹ, jijọho, linsinyẹn, homẹdagbe, dagbewà, [yise], walọmimiọn, mawazẹjlẹgo.”—Galatianu lẹ 5:22, 23.
8. Etẹwẹ gbẹtọ susugege lọ na pehẹ dile yé to godonọna pipòtọ lọ?
8 Gbẹtọ susugege lọ nọgodona sọha pẹvi he tindo todido olọn mẹ tọn lẹ, he yin nukọntọ to azọ́n yẹwhehodidọ tọn mẹ. (Matiu 24:14; 25:40) Lẹngbọ devo lẹ nọgodona lẹngbọpa pẹvi lọ, dile etlẹ yindọ yé yọnẹn dọ yé na pehẹ nukundiọsọmẹ na Klisti Jesu po angẹli etọn lẹ po ko yàn Satani po aovi etọn lẹ po sọn olọn mẹ to bẹjẹeji azán godo tọn ehelẹ tọn mẹ wutu. Ehe zẹẹmẹdo “dindọn hlan aihọnmẹnu lẹ . . . na Lẹgba lọ ko jẹte wá mì dè, po homẹgble daho po wutu, na e yọnẹn dọ whenu gli de wẹ e tindo.” (Osọhia 12:7-12) Enẹwutu, Satani nọ hẹn nukundiọsọmẹ sinyẹn deji na devizọnwatọ Jiwheyẹwhe tọn lẹ dile opodo titonu ehe tọn to dindọnsẹpọ.
9. Kọdetọn dagbe tẹwẹ devizọnwatọ Jiwheyẹwhe tọn lẹ tindo to yẹwheho wẹndagbe tọn didọ mẹ, podọ etẹwutu?
9 Mahopọnna homẹkẹn sinsinyẹn, azọ́n yẹwhehodidọ tọn to nukọnzindo. Fọtọ́n vude poun wẹ sọha lilatọ Ahọluduta lọ tọn lẹ to vivọnu Wẹkẹ Whàn I tọn, ṣigba sọha yetọn ko yì livi susu todin, na Jehovah dopagbe dọmọ: “Avùnhonu depope he yè jlẹ do ogo we ma na wà nude.” (Isaia 54:17) Azọ́nwatọ whẹdatẹn daho Juvi lẹ tọn de tlẹ yọnẹn dọ azọ́n Jiwheyẹwhe tọn ma sọgan yin alọhẹndotena. E dọna Falesi owhe kanweko tintan tọn lẹ gando devi lẹ go dọmọ: “[Mì] gbọ sọn yé go abọẹ: na eyin hónamẹ he kavi azọ́n he yin gbẹtọ tọn, e na yin hihọliai: ṣigba eyin Jiwheyẹwhe tọn wẹ, mìwlẹ ma na sọgan họ́ ẹ liai gba; na e nika yin dọ, yè mọ mì to avùnho hẹ Jiwheyẹwhe.”—Owalọ lẹ 5:38, 39.
10. (a) Etẹwẹ “hiadonu lọ” he tin to gbẹtọ susugege lọ go zẹẹmẹdo? (b) Nawẹ devizọnwatọ Jiwheyẹwhe tọn lẹ setonuna ‘ogbè he tọ́n sọn olọn mẹ’ lọ gbọn?
10 Hagbẹ gbẹtọ susugege lọ tọn lẹ yin didohia taidi mẹhe yin hiadogona na lunluntọ́n. (Ezekiẹli 9:4-6) “Hiadonu lọ” yin kunnudenu dọ yé ko basi klandowiwe hlan Jehovah, bo yí baptẹm taidi devi Jesu tọn lẹ, bosọ vánkan nado wleawuna gbẹtọ-yinyin he taidi Klisti tọn. Yé setonuna ‘ogbè he tọ́n sọn olọn mẹ lọ’ he dọ gando ahọluigba lẹdo aihọn pé Satani tọn heyin sinsẹ̀n lalo tọn go dọmọ: “Mì tọ́n sọn e mẹ, mì omẹ ṣie emi, dọ mì yin mahẹtọ to ylando etọn mẹ blo, dọ mì yí to azọ̀nylankan etọn mẹ blo.”—Osọhia 18:1-5.
11. Aliho titengbe tẹmẹ wẹ mẹhe yin hagbẹ gbẹtọ susugege lọ tọn lẹ dohia te dọ devizọnwatọ Jehovah tọn wẹ yé yin?
11 Podọ ga, Jesu dọna hodotọ etọn lẹ dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:35) To vogbingbọnmẹ, hagbẹ sinsẹ̀n aihọn ehe tọn lẹ nọ hù hagbẹ sinsẹ̀n dopolọ tọn devo lẹ to awhàn mẹ, na yé yin akọta devo poun wutu! Ohó Jiwheyẹwhe tọn dọmọ: “Ehe mẹ wẹ yè to ovi Jiwheyẹwhe tọn lẹ sọhia te, po ovi [Lẹgba] tọn lẹ po: mẹdepope he ma wà dodo, e ma jọ sọn Jiwheyẹwhe dè gba, kavi ewọ he ma yiwanna mẹmẹsunnu etọn. . . . Mí ni yiwanna mínọzo. E ma yin taidi Kaini, he jọ sọn mẹylankan lọ dè, bo hù nọvisunnu etọn gba.”— 1 Johanu 3:10-12.
12. To nukunbibia daho lọ mẹ, etẹwẹ Jehovah na wà sọta ‘atin-sinsẹ́n’ he sinsẹ̀n ylankan lẹ detọ́n?
12 Jesu lá dọmọ: “Atin dagbe lẹpo nọ hẹn sinsẹ́n dagbe jẹgbonu; ṣigba atin yìnyọ̀n lọ hẹn sinsẹ́n ylanylan jẹgbonu. Atin dagbe ma sọgan hẹn sinsẹ́n ylanylan jẹgbonu gba, mọ atin ylanylan ma sọ sọgan hẹn sinsẹ́n dagbe jẹgbonu. Atin he ma hẹn sinsẹ́n dagbe jẹgbonu lẹpo, yè na sán ẹn liai, bosọ dọ̀n ẹn dlan miyọ́n mẹ. Enẹwutu gbọn sinsẹ́n yetọn mẹ wẹ mì na yọ́n yé te.” (Matiu 7:17-20) Sinsẹ́n he sinsẹ̀n aihọn ehe tọn lẹ ko detọ́n do yé hia taidi “atin” yìnyọ̀n lẹ, he na yin vivasudo gbọn Jehovah dali to nukunbibia daho lọ mẹ to madẹnmẹ.—Osọhia 17:16.
13. Nawẹ gbẹtọ susugege lọ dohia dọ yé ‘ṣite to pọmẹ to ofìn Jehovah tọn nukọn’ gbọn?
13 Osọhia 7:9-15 dọ̀n ayidonugo wá nuhewutu gbẹtọ susugege lọ do yin hihọ́-basina ji. Yé yin didohia taidi mẹhe “ṣite” to pọmẹ ‘to ofìn Jehovah tọn nukọn,’ bo to nupojipetọ-yinyin wẹkẹ mẹ tọn etọn zedaga. Yé ko “yàn aṣọ́vọ̀ yetọn bosọ hẹn yé zun wewe to ohùn Lẹngbọvu lọ tọn mẹ,” he dohia dọ yé yọ́n pinpẹn avọ́sinsan ovẹsè ylando tọn he Jesu basi. (Johanu 1:29) Yé ko klan yede do wiwe hlan Jiwheyẹwhe bo ko basi yẹhiadonu ehe tọn gbọn baptẹm osin tọn dali. Enẹwutu yé tindo haṣinṣan dagbe de hẹ Jiwheyẹwhe, enẹ wẹ aṣọ́vọ̀ wewe lọ nọtena, bo to “sinsẹ̀n ẹn to okle po ozán po.” Be aliho delẹ tin he mẹ hiẹ sọgan vọ́ gbẹzan towe hẹn wá kọndopọmẹ hẹ nuhe yin zẹẹmẹ basina tofi ya?
Alemọyi lẹ Todin
14. Alemọyi vonọtaun tẹlẹ wẹ devizọnwatọ Jehovah tọn lẹ nọ mọyi todin?
14 Hiẹ sọgan ko doayi alemọyi vonọtaun he sinsẹ̀n basitọ Jehovah tọn lẹ nọ tindo todin go. Di apajlẹ, to whenuena hiẹ plọnnu dogbọn lẹndai dodowiwa Jehovah tọn lẹ dali, hiẹ mọnukunnujẹemẹ dọ todido whanpẹnọ de tin na sọgodo. Enẹwutu hiẹ tindo lẹndai nujọnu tọn de todin—nado sẹ̀n Jiwheyẹwhe nugbo lọ po nukundido ayajẹ tọn po heyin ogbẹ̀ mavọmavọ to paladisi mẹ to aigba ji. Mọwẹ, Ahọlu Jesu Klisti na “plan [gbẹtọ susugege lọ] jẹ fie asisa osin ogbẹ̀ tọn lẹ te.”—Osọhia 7:17.
15. Ale tẹlẹ wẹ titẹdo nunọwhinnusẹ́n Biblu tọn lẹ gando whẹho tonudidọ po walọyizan tọn po go ko hẹnwa na Kunnudetọ Jehovah tọn lẹ?
15 Alemọyi jiawu he gbẹtọ susugege lọ to vivi etọn dù lẹ wẹ owanyi, pọninọ, po kọndopọ he tin to devizọnwatọ Jehovah tọn lẹ ṣẹnṣẹn lẹdo aihọn pé po. To whenuena e yindọ mímẹpo wẹ nọ dù núdùdù gbigbọmẹ tọn dopolọ, mímẹpo wẹ nọ setonuna osẹ́n po nunọwhinnusẹ́n dopolọ heyin mimọ to Ohó Jiwheyẹwhe tọn mẹ lẹ po ga. Enẹwẹ zọ́n bọ whẹho tonudidọ kavi akọta tọn lẹ ma nọ klan mí gba. Podọ ga, mí tindo nujinọtedo walọdagbe tọn he yiaga he Jiwheyẹwhe biọ sọn omẹ etọn lẹ si. (1 Kọlintinu lẹ 6:9-11) Enẹwutu, kakati nado jiya nudindọn, gbemanọpọ, po fẹnnuwiwa he gbayipe to aihọn lọ mẹ lẹ po tọn, devizọnwatọ Jehovah tọn lẹ to vivi nuhe sọgan yin yiylọdọ paladisi gbigbọmẹ tọn de tọn dù. Doayi zẹẹmẹ heyin bibasi gando ehe go to Isaia 65:13, 14 mẹ.
16. Mahopọnna nuhahun he gbayipe to gbẹ̀mẹ lẹ, todido tẹwẹ gbẹtọ susugege lọ tindo?
16 E họnwun dọ gbẹtọvi heyin devizọnwatọ Jehovah tọn lẹ ma yin mẹpipe gba. Nuhahun he gbayipe to aihọn ehe mẹ lẹ nọ gando yé go, yèdọ ojlẹ awusinyẹn tọn kavi yajiji to awhàn akọta lẹ tọn mẹ. Yé sọ nọ pehẹ azọ̀njijẹ, yajiji, po okú po. Ṣigba yé tindo yise dọ to aihọn yọyọ lọ mẹ, Jiwheyẹwhe na “súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba.”—Osọhia 21:4.
17. Mahopọnna nudepope he sọgan jọ do mí go todin, sọgodo jiawu tẹwẹ to tenọpọn mẹhe sẹ̀n Jiwheyẹwhe nugbo lọ lẹ?
17 Eyin hiẹ tlẹ hẹn ogbẹ̀ towe bu todin na yọnhowhe, azọ̀n, owùnu-jijọ ajiji, kavi homẹkẹn wutu, Jehovah na fọ́n we dogbẹ̀ nado nọ Paladisi mẹ. (Owalọ lẹ 24:15) To whenẹnu hiẹ na zindonukọn nado to vivi hunwhẹ gbigbọmẹ tọn de tọn dù to Gandudu Owhe Fọtọ́n Klisti tọn whenu. Owanyi towe na Jiwheyẹwhe na siso deji dile hiẹ mọ lẹndai etọn lẹ to hẹndi gigonọ de tindo. Podọ dona agbasanu lẹ tọn he Jehovah na wleawu etọn to whenẹnu nasọ hẹn owanyi towe na ẹn siso dogọ. (Isaia 25:6-9) Sọgodo jiawu nankọ die to sẹdotẹnmẹ na omẹ Jiwheyẹwhe tọn lẹ!
Hodọdopọ Dogbapọn Tọn
• Onú vonọtaun tẹwẹ Biblu dọ gando gbẹtọ susugege lọ go?
• Eyin mí jlo nado tin to gbẹtọ susugege he to vivi nukundagbe Jiwheyẹwhe tọn dù lẹ mẹ, etẹwẹ mí dona wà todin?
• Nawẹ dona he gbẹtọ susugege lọ to vivi etọn dù todin bo nasọ duvivi etọn to aihọn yọyọ Jiwheyẹwhe tọn mẹ yin nujọnu na we sọ?
Yẹdide to weda 123]
Livi susu gbẹtọ susugege lọ lẹ tọn to Jiwheyẹwhe nugbo lọ sẹ̀n to pọmẹ