Weta Fọtọ̀n-nukun-ẹnẹ
To Ohó Jiwheyẹwhe Tọn Dọ po Adọgbigbo po Zọnmii
1. (a) Wẹndagbe tẹwẹ devi Jesu tọn lẹ lá, ṣigba nawẹ Ju delẹ yinuwa gbọn? (b) Kanbiọ tẹlẹ wẹ mí dona kanse?
DIBLAYI owhe 2 000 die wayi, Ovi Jiwheyẹwhe tọn, Jesu Klisti, yin yiyiamisisadode taidi Ahọlu sọgodo tọn do aigba pete ji. Na kẹntọ etọn sinsẹ̀nnọ lẹ wutu, Jesu yin hùhù, ṣigba Jehovah fọ́n ẹn sọn oṣiọ lẹ mẹ. Gbọn Jesu gblamẹ, e yọnbasi nado tindo ogbẹ̀ madopodo. Ṣigba to whenuena devi Jesu tọn lẹ lá wẹndagbe ehe to gbangba, homẹkẹn fọndote. Delẹ to yé mẹ yin wiwle do ganpamẹ, bo tlẹ yin hihò bosọ yin kikọ na ma nado dọho to oyín Jesu tọn mẹ ba. (Owalọ lẹ 4:1-3, 17; 5:17, 18, 40) Etẹwẹ yé na wà? Etẹwẹ hiẹ na ko wà? Be hiẹ na ko zindonukọn nado to kunnude po adọgbigbo po ya?
2. (a) Owẹ̀n jiawu tẹwẹ dona yin lilá to egbehe? (b) Mẹnu lẹ wẹ tindo azọngban lọ nado dọyẹwheho wẹndagbe lọ tọn?
2 Jesu Klisti he yin Ahọlu Ahọluduta Jiwheyẹwhe tọn yin zizedo ofìn ji to olọn mẹ to 1914 nado dugán ‘to kẹntọ etọn lẹ ṣẹnṣẹn.’ (Psalm 110:2) Enẹgodo, Satani po aovi etọn lẹ po yin yinyan wá aigba ji. (Osọhia 12:1-5, 7-12) Azán godo tọn titonu ylankan ehe tọn ko bẹjẹeji. To whenuena ojlẹ ehe na wá vivọnu, Jiwheyẹwhe na và titonu Satani tọn ehe sudo gbidigbidi. (Daniẹli 2:44; Matiu 24:21) Mẹhe luntọ́n lẹ na tindo nukundido lọ nado nọgbẹ̀ kakadoi to aigba he na lẹzun paladisi de ji. Eyin hiẹ ko kẹalọyi wẹndagbe ehe, hiẹ na jlo nado má ẹn hẹ mẹdevo lẹ. (Matiu 24:14) Ṣigba nuyiwa tẹwẹ hiẹ sọgan donukun?
3. (a) Nawẹ gbẹtọ lẹ nọ yinuwa hlan owẹ̀n Ahọluduta lọ tọn gbọn? (b) Kanbiọ tẹwẹ mí dona pannukọn?
3 To whenuena hiẹ lá wẹndagbe Ahọluduta lọ tọn, mẹdelẹ sọgan kẹalọyi, ṣigba mẹsusu na jẹagọdo. (Matiu 24:37-39) Mẹdelẹ sọgan ṣàn we kò kavi diọnukunsọ we. Jesu na avase dọ nukundiọsọmẹ sọgan wá sọn hẹnnumẹ towe titi lẹ dè. (Luku 21:16-19) E sọgan fọndote to azọ́nwatẹn towe kavi to wehọmẹ. To otò delẹ mẹ, gandudu delẹ tlẹ nọ doalọtena nuwiwa Kunnudetọ Jehovah tọn lẹ tọn. Eyin hiẹ pannukọn ninọmẹ mọnkọtọn lẹ, be a na zindonukọn nado to ohó Jiwheyẹwhe tọn dọ po adọgbigbo po bo “nọte gli to yise mẹ” ya?—1 Kọlintinu lẹ 16:13.
Mí Ma Dona Ganjẹ Huhlọn Míde Tọn Go
4. (a) Etẹwẹ yin nubiọtomẹsi titengbe lọ nado do mídelẹ hia taidi devizọnwatọ nugbonọ Jiwheyẹwhe tọn. (b) Naegbọn opli Klistiani tọn lẹ do yin nujọnu taun?
4 Eyin mí na yin devizọnwatọ nugbonọ Jehovah tọn, onú titengbe lọ wẹ nado ganjẹ awuwledainanu etọn lẹ go. Dopo to ehelẹ mẹ wẹ opli agun tọn lẹ. Owe-wiwe dotuhomẹna mí ma nado gbẹkọ yé go. (Heblu lẹ 10:23-25) Mẹhe to Kunnudetọ Jehovah tọn nugbonọ yin zọnmii lẹ ko dovivẹnu susu nado nọ sọgbe to opli lẹ ji hẹ sinsẹ̀n-basitọ hatọ lẹ. Opli ehelẹ nọ hẹn oyọnẹn Owe-wiwe tọn mítọn jideji. Podọ ga, nukunnumọjẹnumẹ mítọn gando nugbo he yin yinyọnẹn taun lẹ go nọ sudeji, podọ aliho he mẹ mí na yí yé zan te sọ nọ yin hinhẹn họnwun. E nọ hẹn mí dọnsẹpọ mẹmẹsunnu Klistiani mítọn lẹ to sinsẹ̀n-bibasi pọmẹ tọn mẹ bo nọ hẹn mí lodo nado wà ojlo Jiwheyẹwhe tọn. Gbigbọ Jehovah tọn nọ wleawuna anademẹ gbọn agun lọ gblamẹ, podọ gbọn gbigbọ enẹ dali, Jesu nọ tin to ṣẹnṣẹn mítọn.—Matiu 18:20; Osọhia 3:6.
5. Eyin Kunnudetọ Jehovah tọn lẹ yin alọhẹndotena, nawẹ opli lẹ nọ yin bibasi gbọn?
5 Be hiẹ nọ yì opli lẹpo to gbesisọmẹ, bo nọ yí nuhe yin hodọdeji lẹ do yizan mẹ ya? To whedelẹnu, eyin Kunnudetọ Jehovah tọn lẹ yin alọhẹndotena, e nọ yin dandan dọ sọha kleun de wẹ nọ pli na opli lẹ to owhé mẹdetiti tọn lẹ gbè. Nọtẹn po ojlẹ he mẹ opli lẹ nọ yin bibasi te po nọ gbọnvo bo sọgan nọ ma bọawu to whepoponu, opli delẹ nọ yin bibasi to zánmẹ. Ṣigba mahopọnna awusinyẹnnamẹnu mẹdetiti tọn kavi owù lẹ, mẹmẹsunnu po mẹmẹyọnnu nugbonọ lẹ po nọ dovivẹnu vẹkuvẹku nado yì opli lẹ to gbesisọmẹ.
6. Nawẹ mí nọ do ginganjẹ Jehovah go mítọn hia gbọn, podọ nawẹ ehe sọgan gọalọna mí nado to hodọ po adọgbigbo po zọnmii gbọn?
6 Ginganjẹ Jehovah go nọ yin awuwlena eyin mí nọ lẹhlan ẹn to odẹ̀ mẹ po ahundopo po, to yinyọnẹn mẹ dọ mí tindo nuhudo alọgọ Jiwheyẹwhe tọn. Be hiẹ nọ wà enẹ ya? Jesu hodẹ̀ pludopludo to lizọnyizọn etọn to aigba ji whenu. (Luku 3:21; 6:12, 13; 22:39-44) Podọ to ozán he jẹnukọnna whiwhedo-núgo etọn mẹ, e dotuhomẹna devi etọn lẹ dọmọ: “Mì nọ họ́ali, na mì ni sọ nọ hodẹ̀ na mì ma nado biọ whlepọn mẹ.” (Malku 14:38) Eyin gbẹtọ lẹ jẹagọdo owẹ̀n Ahọluduta lọ tọn, mí sọgan yin whiwhlepọn nado dekanpona vivẹnudido mítọn to lizọnyizọn lọ mẹ. Eyin gbẹtọ lẹ ṣàn mí kò kavi dohomẹkẹn mí, mí sọgan yin whiwhlepọn nado doalọtena yẹwhehodidọ nado sọgan dapana nuhahun lẹ. Ṣigba eyin mí hodẹ̀ vẹkuvẹku bo biọ alọgọ gbigbọ Jiwheyẹwhe tọn dọ e ni gọalọna mí nado to hodọ po adọgbigbo po zọnmii, mí na yin hihọ́-basina bọ mẹtẹnpọn mọnkọtọn lẹ ma na duto mí ji.—Luku 11:13; Efesunu lẹ 6:18-20.
Kandai Kunnudide po Adọgbigbo po Tọn
7. (a) Naegbọn mí dona tindo ojlo vonọtaun to kandai owe Owalọ lẹ tọn mẹ? (b) Na gblọndo na kanbiọ he yin sislẹ do vivọnu hukan ehe tọn lẹ, bo zinnudo lehe nudọnamẹ lọ lẹ sọgan hẹn ale wá na mí do ji.
7 Mímẹpo wẹ na tindo ojlo vonọtaun to kandai he tin to owe Owalọ lẹ tọn mẹ. E dọho gando lehe apọsteli lẹ po devi fliflimẹ tọn devo lẹ po—mẹhe tindo numọtolanmẹ taidi mílọsu lẹ—duto aliglọnnamẹnu lẹ ji bo do yede hia nado yin adọgbotọ podọ kunnudetọ nugbonọ Jehovah tọn lẹ go. Mì gbọ mí ni gbadopọnna adà kleun kandai lọ tọn po alọgọ kanbiọ he bọdego lẹ tọn po gọna wefọ he yin dide lẹ. Dile mí to mọwà, lẹnnupọndo lehe hiẹ lọsu sọgan mọaleyi sọn nuhe hia a te lẹ mẹ do ji.
Be wesetọ taun wẹ apọsteli lẹ yin ya? Be adọgbotọ wẹ dopodopo yetọn to jọwamọ-liho, mahopọnna ninọmẹ depope ya? (Johanu 18:17, 25-27; 20:19; Owalọ lẹ 4:13)
Etẹwẹ hẹn Pita penugo nado dọho po adọgbigbo po to whẹdatẹn Juvi lẹ tọn he dawhẹ okú tọn na Ovi Jiwheyẹwhe tọn titi? (Matiu 10:19, 20; Owalọ lẹ 4:8)
Etẹwẹ apọsteli lẹ nọ wà to osẹ lẹ gblamẹ whẹpo do yin hinhẹn yì Tohodọtọ Ju lẹ tọn nukọn? (Owalọ lẹ 1:14; 2:1, 42)
To whenuena togán lẹ dosẹ́n na apọsteli lẹ nado doalọtena yẹwhehodidọ to oyín Jesu tọn mẹ, etẹwẹ Pita po Johanu po gblọn? (Owalọ lẹ 4:19, 20)
To whenuena yé ko yin tuntundote godo, mẹnu dè wẹ apọsteli lẹ dín alọgọ sọn? Be yé hodẹ̀ dọ homẹkẹn lọ ni doalọte wẹ, kavi etẹwẹ yé wà? (Owalọ lẹ 4:24-31)
Etẹwẹ Jehovah yizan nado gọalọ to whenuena agọjẹdomẹtọ lẹ tẹnpọn nado doalọtena azọ́n yẹwhehodidọ tọn? (Owalọ lẹ 5:17-20)
Nawẹ apọsteli lẹ dohia dọ yé mọnukunnujẹ whẹwhinwhẹ́n he wutu yé yin tuntundote mẹ gbọn? (Owalọ lẹ 5:21, 41, 42)
To whenuena devi susu tlẹ gbàpe na homẹkẹn wutu, etẹwẹ yé zindonukọn nado to wiwà? (Owalọ lẹ 8:3, 4; 11:19-21)
8. Kọdetọn ayajẹ tọn tẹwẹ wá sọn lizọnyizọn devi fliflimẹ tọn lẹ tọn mẹ, podọ nawẹ mílọsu wá tindo mahẹ to e mẹ gbọn?
8 Azọ́n yẹwheho wẹndagbe lọ tọn didọ mayin to ovọ́ mẹ gba. Nudi devi 3 000 wẹ yin bibaptizi to Pẹntikọsti owhe 33 W.M. “Yisenọ susu wẹ yè sọ to dide dogọ yé, sunnu po yọnnu po.” (Owalọ lẹ 2:41; 4:4; 5:14) To ojlẹ vude godo, Saulu Talsu tọn, he dohomẹkẹn omẹ Jiwheyẹwhe tọn lẹ badabada, lẹzun Klistiani de bosọ to kunnude na nugbo lọ po adọgbigbo po. E wá yin yinyọnẹn taidi apọsteli Paulu. (Galatianu lẹ 1:22-24) Azọ́n he bẹjẹeji to owhe kanweko tintan whenu ma ko doalọte gba. E ko gbloada taun to azán godo tọn ehelẹ mẹ bo ko jẹ aigba lẹpo ji. Mí tindo lẹblanulọkẹyi nado tindo mahẹ to e mẹ, podọ dile mí to mọwà, mí sọgan plọnnu sọn apajlẹ he kunnudetọ nugbonọ he ko wà sinsẹ̀nzọn jẹnukọnna mí lẹ zedai mẹ.
9. (a) Dotẹnmẹ hundote tẹlẹ wẹ Paulu yizan nado dekunnu? (b) Aliho tẹlẹ mẹ wẹ hiẹ nọ hẹn owẹ̀n Ahọluduta lọ tọn gbayipe jẹ mẹdevo lẹ dè te?
9 To whenuena Paulu plọn nugbo lọ gando Jesu Klisti go, etẹwẹ ewọ wà? “To afọdopolọji e dọyẹwheho Klisti tọn . . . dọ, Ovi Jiwheyẹwhe tọn wẹ ewọ.” (Owalọ lẹ 9:20) E dopẹ́ na nukundagbe majẹhẹ he Jiwheyẹwhe dohia ẹ, podọ ewọ yọnẹn dọ mẹlẹpo wẹ tindo nuhudo wẹndagbe he e ko mọyi lọ tọn. Paulu yin Ju de, podọ sọgbehẹ aṣa ojlẹ enẹ mẹ tọn, e nọ yì sinagọgu lẹ mẹ nado dekunnu. E sọ dọyẹwheho sọn whédegbè-jẹ-whédegbè bosọ yihojlẹdohogo hẹ gbẹtọ lẹ to ahimẹ. Podọ ewọ tindo ojlo nado yì aigba-denamẹ yọyọ lẹ ji nado dọyẹwheho wẹndagbe lọ tọn.—Owalọ lẹ 17:17; 20:20; Lomunu lẹ 15:23, 24.
10. (a) Nawẹ Paulu dohia dọ dile etlẹ yindọ emi tindo adọgbigbo, emi sọ nọ yí wuntuntun zan to aliho he mẹ emi nọ dekunnu te mẹ gbọn? (b) Nawẹ mí sọgan do jẹhẹnu Paulu tọn lẹ hia to whenuena mí to kunnudena hẹnnumẹ lẹ, azọ́nwatọgbẹ́ lẹ, kavi wehọmẹvigbẹ́ lẹ gbọn?
10 Paulu yin adọgbotọ ṣigba e sọ tindo wuntuntun, enẹ wẹ mílọsu dona tindo. Nado fọnjlodotena Ju lẹ, e nọ dọhodo opagbe Jiwheyẹwhe tọn na tọgbo yetọn lẹ ji. Podọ e nọ dọho hẹ Glẹki lẹ do nuhe yé jẹakọhẹ lẹ ji. To whedelẹnu e nọ yí numimọ lehe ewọ lọsu plọn nugbo lọ gbọn tọn zan nado dekunnu. E dọmọ: “Na wẹndagbe tọn wutu wẹ yẹn to ehe wà, na yẹn nido yin mimátọ to e mẹ hẹ mì.”—1 Kọlintinu lẹ 9:20-23; Owalọ lẹ 22:3-21.
11. (a) Etẹwẹ Paulu wà nado dapana pipehẹ agọjẹdomẹtọ lẹ gbọzangbọzan. (b) Whetẹnu wẹ mí sọgan hodo apajlẹ Paulu tọn, podọ gbọnna? (c) Fie wẹ huhlọn nọ wá sọn nado to hodọ po adọgbigbo po zọnmii?
11 To whenuena nukundiọsọmẹ hẹn Paulu nado dọyẹwheho to lẹdo devo mẹ na ojlẹ de, ewọ mọdọ e pọnte nado wàmọ kakati nado to pipehẹ avùnnukundiọsọmẹ agọjẹdomẹtọ lẹ tọn gbọzangbọzan. (Owalọ lẹ 14:5-7; 18:5-7; Lomunu lẹ 12:18) Ṣigba winyan wẹndagbe tọn ma hù i pọ́n gbede gba. (Lomunu lẹ 1:16) Dile e ma tlẹ bọawu na Paulu nado pehẹ mẹdèpo po danuwiwa po sọn agọjẹdomẹtọ kanylantọ lẹ dè, e ‘wleawuna adọgbigbo gbọn Jiwheyẹwhe mítọn dali’ bo zindonukọn to yẹwhehodidọ mẹ. E dọmọ: “OKLUNỌ nọte to dè e, bosọ na huhlọn mi; dọ gbọn yẹn mẹ yè nido lá yẹwheho lọ to gigọ́mẹ.” (1 Tẹsalonikanu lẹ 2:2; 2 Timoti 4:17) Tatọ́ agun Klistiani tọn, Jesu, zindonukọn nado to awuwlena huhlọn he mí tindo nuhudo etọn nado wazọ́n he e ko dọ jẹnukọn na azán mítọn.—Malku 13:10.
12. Etẹwẹ dohia dọ Klistiani lẹ tindo adọgbigbo, podọ etẹwẹ nọ na yé adọgbigbo?
12 Mí tindo whẹwhinwhẹ́n lẹpo nado to ohó Jiwheyẹwhe tọn dọ zọnmii po adọgbigbo po, kẹdẹdile Jesu po devizọnwatọ Jiwheyẹwhe tọn nugbonọ devo lẹ po wà do to owhe kanweko tintan whenu. Ehe ma zẹẹmẹdo dọ mí na yin mẹtọnmahopọntọ kavi na nọ tẹnpọn nado zín owẹ̀n lọ do mẹhe ma tindo ojlo lẹ ji gba. Ṣigba mí ma nọ gbọjọ na gbẹtọ lẹ ma kẹalọyi owẹ̀n mítọn wutu; mọjanwẹ mí ma nọ bọnùdo na nukundiọsọmẹ wutu do niyẹn. Taidi Jesu, mí nọ dlẹnalọdo Ahọluduta Jiwheyẹwhe tọn taidi gandudu lọ he tindo jlọjẹ nado dugán do aigba pete ji. Mí nọ dọho po adọgbigbo po na mí to afọ Jehovah, Ganhunupotọ Wẹkẹ tọn lọ zedai, podọ na owẹ̀n he mí nọ lá lọ mayin mítọn ṣigba ewọ tọn wẹ. Podọ owanyi mítọn na Jehovah wẹ dona whàn mí tlala nado to pipà ẹ zọnmii.—Filippinu lẹ 1:27, 28; 1 Tẹsalonikanu lẹ 2:13.
Hodọdopọ Dogbapọn Tọn
• Etẹwutu e do yin nujọnu nado má owẹ̀n Ahọluduta lọ tọn hẹ mẹlẹpo dile e sọgan yọnbasi do, ṣigba nuyiwa tẹwẹ mí dona donukun?
• Nawẹ mí sọgan dohia dọ mí ma ganjẹ huhlọn mídetiti tọn go nado sẹ̀n Jehovah gbọn?
• Nuplọnmẹ họakuẹ tẹlẹ wẹ mí plọn sọn owe Owalọ lẹ tọn mẹ?
Yẹdide to weda 173]
Dile e te to ojlẹ he wayi mẹ, devizọnwatọ Jehovah tọn lẹ nọ dọ ohó Jiwheyẹwhe tọn po adọgbigbo po to egbehe