Jiwheyẹwhe Tindo Oyín De

EYIN a jlo nado yọ́n mẹde ganji, nuhe sọgbe wẹ nado kàn yinkọ etọn sè. Mímẹpo wẹ tindo oyín de. Jiwheyẹwhe dó oyín na sunnu tintan he yin didá do aigba ji. E ylọ ẹ dọ Adam. Asi Adam tọn yin yiylọdọ Evi.

Ṣigba, e mayin gbẹtọ lẹ kẹdẹ wẹ nọ tindo yinkọ gba. Lẹnnupọndo onú devo he nọ tindo yinkọ lẹ ji. Eyin mẹde họ̀ bébévi kavi kanlin de na we, be a ma na dó yinkọ na ẹn ya?⁠— Mọwẹ, oyín de tintindo yin nujọnu taun.

Pọ́n sunwhlẹvu susugege he to aga lẹ to zánmẹ. Be a yọnẹn dọ yé tindo oyín ya?⁠— Mọwẹ, Jiwheyẹwhe dó oyín na sunwhlẹvu he to agahomẹ lẹ dopodopo. Biblu dọna mí dọ: “E hia sọha sunwhlẹvu lẹ tọn; bosọ ylọ yé oyín yetọn-yetọn.”​—⁠Psalm 147:⁠4.

Mẹnu wẹ hiẹ lẹndọ e yin omẹ nukundeji hugan to wẹkẹ lọ pete mẹ?⁠— Matin ayihaawe, Jiwheyẹwhe wẹ. Be a lẹndọ e tindo oyín de ya?⁠— Jesu dọ E tindo oyín. Jesu dọ to odẹ̀ mẹ hlan Jiwheyẹwhe dọ: ‘Yẹn ko hẹn oyín towe zun yinyọnẹn na hodotọ ṣie lẹ.’ (Johanu 17:26) Be hiẹ yọ́n oyín Jiwheyẹwhe tọn ya?⁠— Jiwheyẹwhe lọsu dọ oyín etọn na mí. “Jiwheyẹwhe sọ dọhlan Mose, bo dọ hlan ẹn, dọmọ, Yẹn Jehovah wẹ.” Enẹwutu oyín Jiwheyẹwhe tọn wẹ JEHOVAH.​—Eksọdusi 6:⁠2.

Etẹwẹ nọ yin numọtolanmẹ towe to whenuena mẹdevo lẹ flin oyín towe?⁠— Homẹ towe nọ hùn, kavi e mayin mọwẹ?⁠— Jehovah lọsu jlo dọ gbẹtọ lẹ ni yọ́n oyín emitọn ga. Enẹwutu mí dona nọ yí oyín lọ Jehovah zan to whenuena mí to hodọ dogbọn Jiwheyẹwhe dali. Mẹplọntọ Daho lọ yí oyín Jiwheyẹwhe tọn, yèdọ Jehovah zan to whenuena e to hodọ na gbẹtọ lẹ. To gbèdopo Jesu dọmọ: ‘Hiẹ dona yiwanna Jehovah Jiwheyẹwhe towe po ayiha towe lẹpo po.’​—⁠Malku 12:⁠30.

Jesu yọnẹn dọ “Jehovah” yin oyín titengbe de. Enẹwutu e plọn hodotọ etọn lẹ nado yí oyín Jiwheyẹwhe tọn zan. E tlẹ plọn yé nado nọ dọho dogbọn oyín Jiwheyẹwhe tọn dali to odẹ̀ yetọn mẹ. Jesu yọnẹn dọ Jiwheyẹwhe jlo dọ mẹlẹpo ni yọ́n oyín Etọn, heyin Jehovah.

Sọn ojlẹ dindẹn die gbọ́n wẹ Jiwheyẹwhe ko do nujọnu-yinyin oyín etọn tọn hia Mose, yèdọ dawe lọ he yin ovi Islaeli tọn de. Ovi Islaeli tọn lẹ he nọ yin yiylọdọ Islaelivi lẹ nọ̀ aigba lọ ji he nọ yin yiylọdọ Egipti. Mẹhe nọ nọ̀ aigba Egipti tọn ji lẹ nọ yin yiylọdọ Egiptinu lẹ. Yé hẹn Islaelivi lẹ zun afanumẹ bo nọ fiẹ do yé go. To whenue Mose whẹ́n, e tẹnpọn nado gọalọna dopo to omẹ etọn lẹ mẹ. Ehe hẹn Falo heyin ahọlu Egipti tọn gblehomẹ. E jlo nado hù Mose! Enẹwutu Mose họnyi sọn Egipti.

Mose họnyi otò Midiani tọn mẹ. Mose dà asi to finẹ bo tindo whẹndo etọn. E nọ penukundo lẹngbọ lẹ go to finẹ. To gbèdopo, dile Mose to nukunpedo lẹngbọ etọn lẹ go to osó de kọ̀n, e mọ onú dabla de. Nukàn de to miyọ́n ji, ṣigba e ma fiọ! Mose dọnsẹpọ ẹ ganji nado pọ́n ẹn tlintlin.

Be a yọ́n nuhe jọ ya?⁠— Mose sè ogbè de to hodọ sọn nukàn he to miyọ́n ji lọ mẹ. Ogbè lọ dọmọ, “Mose, Mose.” Mẹnu wẹ to hodọ?⁠— Jiwheyẹwhe wẹ! Jiwheyẹwhe tindo azọ́n susu na Mose nado wà. Jiwheyẹwhe dọna ẹn dọmọ: ‘Wá ma dó we hlan Falo, ahọlu Egipti tọn dè, na hiẹ nido plan omẹ ṣie lẹ, ovi Islaeli tọn lẹ tọ́n sọn Egipti.’ Jiwheyẹwhe dopagbe dọ emi na gọalọna Mose nado wà ehe.

Ṣigba Mose dọna Jiwheyẹwhe dọmọ: ‘Eyin yẹn yì ovi Islaeli tọn lẹ dè to Egipti bo dọna yé dọ Jiwheyẹwhe wẹ do mi hlan, bọ yé kanse mi dọ, “Etẹwẹ oyín etọn?” Etẹwẹ yẹn na dọna yé?’ Jiwheyẹwhe dọna Mose nado dọna ovi Islaeli tọn lẹ dọmọ: ‘Jehovah wẹ do mi hlan mì dè. Jehovah wẹ oyín ṣie kakadoi.’ (Eksọdusi 3:​1-15) Ehe dohia dọ Jiwheyẹwhe ma na diọ oyín etọn Jehovah pọ́n gbede. Jiwheyẹwhe jlo dọ emi ni yin yinyọnẹn gbọn oyín emitọn, Jehovah dali kakadoi.

To whenuena Mose lẹkọyi Egipti, Egiptinu lẹ lẹndọ yẹwhe pẹvi de poun wẹ Jehovah Islaelivi lẹ tọn yin. Yé ma yọnẹn dọ Jiwheyẹwhe aihọn lọ pete tọn wẹ e yin gba. Enẹwutu Jehovah dọna ahọlu Egipti tọn dọmọ: ‘Yẹn na hẹn oyín ṣie zun yinyọnẹn to aigba lẹpo ji.’ (Eksọdusi 9:16) Na nugbo tọn, Jehovah hẹn oyín etọn zun yinyọnẹn. Be a yọ́n lehe e wà enẹ gbọn ya?⁠—

E gọalọna Mose nado plan Islaelivi lẹ sọn Egipti. To whenuena yé jẹ Ohù Vẹẹ kọ̀n, Jehovah de ali gbọn ohù lọ mẹ. Islaelivi lẹ zinzọnlin awuyẹyẹ-afọyẹyẹ gbọn aigba húhú ji. Ṣigba to whenuena Falo po awhànpa etọn lẹpo po dlí biọ aigba húhú lọ ji to ohù lọ mẹ godo, osin he ko yin ginglọndo adà awe lọ lẹ ji họ́ jẹ Egiptinu lẹ ji, bọ yemẹpo kú.

To enẹgodo, mẹhe nọ nọ̀ aigba ji lẹpo jẹ nuhe Jehovah ko basi to Ohù Vẹẹ mẹ lọ sè ji. Nawẹ mí wagbọn do yọnẹn dọ yé sè?⁠— To nudi owhe 40 godo, Islaelivi lẹ wá Kenani, ehe yin aigba he Jehovah dopagbe nado na yé. Yọnnu jọja de he nọ yin Lahabi dọna sunnu Islaelivi awe delẹ to finẹ dọmọ: “Mí ko sè le OKLUNỌ hẹn osin Ohù Vẹẹ tọn hú to mì nukọn do, whenuena mì tọ́nsọn Egipti.”​—⁠Jọṣua 2:⁠10.

To egbehe, mẹsusu wẹ taidi Egiptinu nẹlẹ. Yé ma yise dọ Jehovah wẹ yin Jiwheyẹwhe aigba lẹpo tọn gba. Enẹwutu Jehovah jlo dọ omẹ emitọn lẹ ni dọ ehe na mẹdevo lẹ. Nuhe Jesu lọsu wà niyẹn. Sẹpọ vivọnu gbẹzan etọn tọn to aigba ji, e dọna Jehovah to odẹ̀ mẹ dọmọ: “Yẹn [ko] hẹn oyín towe zun yinyọnẹn hlan yé.”​—⁠Johanu 17:⁠26.

Be hiẹ jlo na nọ yinuwa di Jesu ya? Eyin mọwẹ, nọ dọna mẹdevo lẹ dọ oyín Jiwheyẹwhe tọn wẹ Jehovah. A na mọdọ mẹsusu wẹ ma tlẹ yọ́n ehe dai. Enẹwutu a sọgan do wefọ lọ hia yé to Biblu mẹ to Psalm 83:18 mẹ. Gbọ na mí ni ze Biblu todin bo dín wefọ enẹ dopọ. E dọmọ: “Na yé nido yọnẹn dọ, hiẹ, oyín mẹhe tọn dopokẹdẹ nọ yin Jehovah, wẹ Gigogán to wẹkẹ lẹpo ji.”

Etẹwẹ hiẹ plọn sọn fihe mí hia ehe mẹ?⁠— Mí plọn dọ Jehovah wẹ yin oyín titengbe hugan lọ. Oyín Jiwheyẹwhe Gigogán lọ tọn niyẹn, Otọ́ Jesu tọn podọ Mẹhe dá onú lẹpo. Podọ flindọ, Jesu dọ dọ mí dona yí ahun mítọn lẹpo do yiwanna Jehovah Jiwheyẹwhe. Be hiẹ yiwanna Jehovah ya?⁠—

Nawẹ mí sọgan dohia dọ mí yiwanna Jehovah gbọn?⁠— Aliho dopo wẹ nado yọ́n ẹn di Họntọn mítọn. Aliho devo wẹ nado nọ lá oyín etọn na mẹdevo lẹ. Mí sọgan dohia yé tlọlọ sọn Biblu mẹ dọ Jehovah wẹ oyín etọn. Mí sọgan sọ dọna yé dogbọn onú jiawu he Jehovah dá lẹ po onú dagbe he e ko wà lẹ po dali. Ehe nọ hẹn homẹ Jehovah tọn hùn taun na e jlo dọ gbẹtọ lẹ ni yọ́n mẹhe nkọ emi yin. Mí sọgan tindo mahẹ to ehe wiwà mẹ, kavi e mayin mọwẹ?⁠—

Ṣigba, e mayin mẹlẹpo wẹ na jlo nado dotoaina mí eyin mí to hodọ dogbọn Jehovah dali gba. E mayin mẹsusu wẹ dotoaina Jesu, Mẹplọntọ Daho lọ to whenuena e to ohó Jiwheyẹwhe tọn dọ gba. Etomọṣo, enẹ ma hẹnalọdotena Jesu nado dọho dogbọn Jehovah dali.

Enẹwutu gbọ na mí ni taidi Jesu. Gbọ mí ni nọ to hodọ dogbọn Jehovah dali zọnmii. Eyin mí nọ wàmọ, homẹ Jehovah Jiwheyẹwhe tọn na hùn do mí go na mí to owanyi dohia na oyín etọn wutu.