“Ehe Wẹ Visunnu Ṣie”

EYIN ovi lẹ wà nudagbe, homẹ mẹhe to nukunpedo yé go tọn nọ hùn. Eyin viyọnnu de wà nudagbe, homẹ otọ́ etọn tọn nọ hùn nado sọgan dọna mẹdevo lẹ dọ: “Viyọnnu ṣie wẹ.” Kavi eyin visunnu de wà nudagbe, homẹ otọ́ etọn tọn nọ hùn nado dọmọ: “Visunnu ṣie wẹ.”

Jesu nọ wà nuhe hùnhomẹ na Otọ́ etọn to whepoponu. Enẹwutu homẹ Otọ́ etọn tọn nọ hùn do e go. Be a flin nuhe Otọ́ Jesu tọn wà to gbèdopo to whenuena Jesu tin po hodotọ etọn atọ̀n delẹ po ya?⁠— Mọwẹ, Jiwheyẹwhe dọho sọn kaka olọn mẹ bo dọna yé dọmọ: “Ehe wẹ Ovi yiwanna ṣie, mẹhe mẹ yẹn yin homẹhunnọ te tlala.”​—⁠Matiu 17:⁠5.

Jesu nọ jaya to whepoponu nado wà nuhe nọ hẹn homẹ Otọ́ etọn tọn hùn lẹ. Be a yọ́n nuhe zọ́n ya? Na e yiwanna Otọ́ etọn ganji wutu wẹ. Eyin mẹde yin hinhẹn po huhlọn po nado wà nuhe e ma jlo nado wà, onú lọ wiwà nọ vẹawu na ẹn. Ṣigba eyin e tindo ojlo nado wà ẹ, onú lọ nọ bọawu na ẹn. Be a yọ́n nuhe e zẹẹmẹdo nado tindo ojlo ya?⁠— E zẹẹmẹdo ojlo tintindo sọn ahun mẹ wá nado wà nude.

Whẹpo Jesu tlẹ do wá aigba ji, e nọ jlo nado wà nudepope he Otọ́ etọn dọna ẹn nado wà. Na e yiwanna Otọ́ etọn, Jehovah Jiwheyẹwhe wutu wẹ. Jesu tindo otẹn dagbe de to Otọ́ etọn de to olọn mẹ. Ṣigba Jiwheyẹwhe tindo azọ́n vonọtaun de he e jlo dọ Jesu ni wà. Nado wà azọ́n enẹ, Jesu dona tọ́nsọn olọn mẹ whẹ́. E dona yin jiji di viyẹyẹ de do aigba ji. Jesu jlo nado wà ehe na Jehovah wẹ jlo dọ e ni wà ẹ wutu.

Whẹpo Jesu dona yin jiji di viyẹyẹ de to aigba ji, e dona tindo onọ̀ de. Be a yọ́n mẹhe yin onọ̀ etọn ya?⁠— Malia wẹ e nọ yin. Jehovah do angẹli etọn he nọ yin Gabliẹli hlan sọn olọn mẹ nado dowẹn Malia. Gabliẹli dọna ẹn dọ e na ji viyẹyẹ de. Viyẹyẹ lọ na yin yiylọdọ Jesu. Ṣigba mẹnu wẹ na yin otọ́ viyẹyẹ lọ tọn?⁠— Angẹli lọ dọ dọ Jehovah Jiwheyẹwhe lọsu wẹ na yin Otọ́ viyẹyẹ lọ tọn. Enẹ wẹ zọ́n bọ Jesu na yin yiylọdọ Ovi Jiwheyẹwhe tọn.

Etẹwẹ a lẹndọ e yin numọtolanmẹ Malia tọn gando ehe go?⁠— Be e dọ dọ, “Yẹn ma jlo na yin onọ̀ Jesu tọn” wẹ ya? Lala, Malia kẹalọyi nado wà nuhe Jiwheyẹwhe jlo. Ṣigba nawẹ Ovi Jiwheyẹwhe tọn he ko to olọn mẹ sọgan wá yin jiji to aigba ji di viyẹyẹ de gbọn? Nawẹ jiji Jesu tọn gbọnvona viyẹyẹ devo lẹpo tọn gbọn? Be a yọnẹn?⁠—

Jiwheyẹwhe dá mẹjitọ mítọn tintan lẹ, heyin Adam po Evi po, bọ yé sọgan tindo kọndopọ to aliho jiawu de mẹ. Enẹgodo, viyẹyẹ de sọgan jẹ whinwhẹ́n ji to onọ̀ etọn homẹ. Gbẹtọ lẹ dọ dọ azọ́njiawu de wẹ ehe yin! N’deji dọ hiẹ lọsu na yigbe domọ.

Todin, Jiwheyẹwhe basi nude he tlẹ jiawu tlala. E yí ogbẹ̀ Ovi etọn tọn sọn olọn mẹ bo ze e do Malia homẹ. Jiwheyẹwhe ma ko basi ehe pọ́n gba, podọ e ma ko sọ basi devo sọn whenẹnu gbọ́n. Todin, Jesu jẹ whinwhẹ́n ji to ohò Malia tọn mẹ kẹdẹdile viyẹyẹ devo lẹ nọ whẹ́n to onọ̀ yetọn homẹ do. Enẹgodo, Malia wlealọ hẹ Josẹfu.

Dlapọn wẹ Malia po Josẹfu po basi yì tòdaho Bẹtlẹhẹm tọn mẹ bọ ojlẹ sọ nado ji Jesu. Ṣigba gbẹtọ lẹ gọ́ tòdaho lọ mẹ. Malia po Josẹfu po ma tlẹ mọ abò dopo he mẹ yé na nọ̀, enẹwutu yé dona yì nọ̀ kanlinpó mẹ. Finẹ wẹ Malia jivi do, bọ Jesu yin zizedo otò de mẹ, dile a sọgan mọ ẹn do tofi. Otò yin fie yè nọ bà núdùdù do na oyìn lẹ po kanlin devo lẹ po nado dùnú te.

Homẹhunnu delẹ jọ to ozán he mẹ Jesu yin jiji te. Angẹli de sọawuhia lẹngbọhọtọ lẹ sẹpọ Bẹtlẹhẹm. E dọna yé dọ gbẹtọ vonọtaun de wẹ Jesu yin. Angẹli lọ dọmọ: ‘Pọ́n! Yẹn to wẹndagbe de dọna mì he na hẹn gbẹtọ lẹ jaya. Ovi de yin jiji to egbehe he na whlẹn gbẹtọ lẹ gán.’​—Luku 2:​10, 11.

Angẹli lọ dọna lẹngbọhọtọ lẹ dọ yé sọgan mọ Jesu to Bẹtlẹhẹm, bọ e yin titẹ́ do otò he mẹ kanlin nọ dùnú te de mẹ. Enẹgodo, to ajijimẹ, angẹli devo lẹ to olọn mẹ kọnawudopọ hẹ angẹli tintan lọ nado pà Jiwheyẹwhe. Angẹli lọ lẹ jihàn dọ “Gigo hlan Jiwheyẹwhe,” bosọ zindonukọn dọ, ‘podọ jijọho to aigba ji to gbẹtọ ojlo dagbenọ lẹ ṣẹnṣẹn.’​—⁠Luku 2:​12-14.

To whenuena angẹli lọ lẹ yì, lẹngbọhọtọ lọ lẹ yì Bẹtlẹhẹm bo mọ Jesu. Yé sọ dọ onú dagbe he yé ko sè lẹpo na Josẹfu po Malia po. Be a sọgan yí nukun homẹ tọn do pọ́n lehe e na ko vivi na Malia do sọ dọ emi kẹalọyi nado yin onọ̀ Jesu tọn ya?

To godo mẹ, Josẹfu po Malia po ze Jesu yì tòdaho Nazalẹti tọn mẹ. Finẹ wẹ Jesu whẹ́n te. To whenuena e whẹ́n, e bẹ azọ́n daho mẹpinplọn tọn etọn jẹeji. Ehe yin apadewhe to azọ́n he Jehovah Jiwheyẹwhe jlo dọ Ovi etọn ni wà to aigba ji lẹ mẹ. Jesu jlo nado wà azọ́n lọ na e yiwanna Otọ́ olọn mẹ tọn etọn taun wutu.

Whẹpo Jesu do bẹ azọ́n etọn jẹeji taidi Mẹplọntọ Daho lọ, e yin bibaptizi gbọn Johanu Baptizitọ lọ dali to Otọ̀ Jọdani tọn mẹ whẹ́. To finẹ onú jiawu de jọ! Dile Jesu to tintọ́n jẹgbonu sọn osin lọ mẹ, Jehovah dọho sọn olọn mẹ dọmọ: “Ehe wẹ Visunnu ṣie; mẹvivẹ ṣie, mẹhe mẹ homẹ ṣie vivi te tlala.” (Matiu 3:17) Be homẹ towe ma nọ hùn eyin mẹjitọ towe lẹ dọna we dọ yé yiwanna we ya?⁠— Mí sọgan deji dọ homẹ Jesu lọsu tọn hùn ga.

Jesu nọ wà nuhe sọgbe to whepoponu. E ma nọ wayẹnu gbede. E ma nọ dọna gbẹtọ lẹ dọ emi wẹ Jiwheyẹwhe gba. Angẹli Gabliẹli ko dọna Malia dọ Jesu na yin yiylọdọ Ovi Jiwheyẹwhe tọn. Jesu lọsu sọ dọ dọ Ovi Jiwheyẹwhe tọn wẹ emi yin. Podọ e ma dọna gbẹtọ lẹ dọ emi yọnnuin hú Otọ́ emitọn gba. Kakatimọ e dọmọ: “Otọ́ yin kiklo hú mi.”​—⁠Johanu 14:⁠28.

To whenuena Jesu tlẹ to olọn mẹ, eyin Otọ́ etọn na ẹn azọ́n de nado wà, e nọ wà ẹ. E ma nọ dọ dọ emi na wà ẹ bo nọ gọ̀n ma wà ẹ gba. E yiwanna Otọ́ etọn. Enẹwutu e nọ setonuna nuhe Otọ́ etọn dọ. Enẹgodo to whenuena Jesu wá aigba ji, e wà nuhe Otọ́ etọn olọn mẹ tọn do e hlan nado wà. E ma yí whenu etọn zan nado wà nudevo gba. Abajọ homẹ Jehovah tọn do hùn do Ovi etọn go!

Mílọsu jlo na hẹn homẹ Jehovah tọn hùn ga, kavi e mayin mọwẹ?⁠— Eyin mọwẹ, mí dona dohia dọ mí nọ setonuna Jiwheyẹwhe nugbonugbo, dile Jesu basi do. Jiwheyẹwhe nọ dọho na mí gbọn Biblu gblamẹ. E ma na sọgbe nado basi taidi dọ mí to tonusena Jiwheyẹwhe ṣigba bo nọ wà kavi yí nuhe jẹagọdo Biblu lẹ sè gba, kavi e mayin mọwẹ?⁠— Podọ flindọ eyin mí yiwanna Jehovah nugbo, mí na nọ tindo ayajẹ nado hẹn homẹ etọn hùn.