Jesu Yin Jiji to Kanlinpa de Mẹ

BE HIẸ yọ́n mẹhe viyẹyẹ ehe yin ya? Mọwẹ, Jesu wẹ. E ṣẹṣẹ yin jiji to kanlinpa de mẹ. Kanlinpa de yin fie yè nọ penukundo kanlin lẹ go te. Malia to Jesu tẹ́ do otò de mẹ, fihe yè nọ bẹ núdùdù do na kẹtẹkẹtẹ po kanlin devo lẹ po nado dù. Ṣigba, naegbọn Malia po Josẹfu po do tin tofi hẹ kanlin lẹ? Finẹ ma yin otẹn dagbe de nado jivi do gba, kavi e ma yin mọ wẹ?

Mọwẹ. Ṣigba, nuhe zọ́n bọ yé do tin tofi wẹ yindọ: Togán Lomu tọn Sesali Augusti de osẹ́n de tọ́n dọ mẹdopodopo dona yì otò etọn titi mẹ nado wlan yinkọ etọn do owe de mẹ. Josẹfu yin jiji to Bẹtlẹhẹm. Ṣigba, to whenue ewọ po Malia po wá, yé ma mọ ohọ̀ he mẹ yé na nọ depope. Enẹwutu wẹ yé dona nọ fihe kanlin lẹ tin te. Podọ to azán enẹ lọ pẹpẹ gbè wẹ Malia ji Jesu! Etomọṣo, ovi lọ to ganji dile hiẹ sọgan mọ do.

Be hiẹ mọ lẹngbọhọtọ lẹ he ja nado wá pọ́n Jesu ya? Yé tin to danji to zánmẹ bo to nukunpedo kanlin yetọn lẹ go, hinhọ́n de sọ họnwun lẹdo yé. Angẹli de we! Lẹngbọhọtọ lọ lẹ sọ dibu taun. Ṣigba angẹli lọ dọmọ: ‘Mì dibu blo! Yẹn hẹn wẹndagbe de wá na mì. To egbehe, Klisti Oklunọ lọ yin jiji to Bẹtlẹhẹm. Ewọ na whlẹn gbẹtọ lẹ gán! Mì na mọ ẹn bọ yè bu avọ̀ do e bo ze e mlọnai do otò de mẹ.’ To ajiji mẹ, angẹli susu wá bo jẹ gigopana Jiwheyẹwhe ji. To afọdopolọji, lẹngbọhọtọ ehelẹ yawu nado yì dín Jesu, podọ yé ko mọ ẹn todin.

Be hiẹ yọ́n nuhewutu Jesu do yin omẹ titengbe sọmọ ya? Be hiẹ yọ́n mẹhe ewọ yin na taun tọn ya? Flindọ to otàn tintan owe ehe tọn mẹ, mí dọho gando Visunnu tintan Jiwheyẹwhe tọn go. Visunnu ehe wazọ́n hẹ Jehovah to olọn lẹ po aigba po gọna nuhe tin to yé mẹ lẹpo didá mẹ. Mẹhe Jesu yin lọ niyẹn!

Jehovah diọtẹnna ogbẹ̀ Visunnu etọn tọn sọn olọn mẹ wá ohò Malia tọn mẹ. To afọdopolọji viyẹyẹ de jẹ whinwhẹ́n ji to homẹ na ẹn dile viyẹyẹ devo lẹ nọ whẹ́n to homẹ na onọ̀ yetọn lẹ do. Ṣigba Ovi Jiwheyẹwhe tọn wẹ viyẹyẹ ehe yin. To godo mẹ, Jesu yin jiji tofi to kanlinpa de mẹ to Bẹtlẹhẹm. Be hiẹ ma mọ todin nuhewutu homẹ angẹli lọ lẹ tọn hùn sọmọ nado dọna gbẹtọ lẹ dọ Jesu yin jiji ya?