Mẹplọntọ Daho lọ Yilizọn Na Mẹdevo Lẹ

BE HOMẸ towe nọ hùn eyin mẹde wà nudagbe de na we ya?⁠— Mọwẹ, homẹ mẹdevo lẹ tọn nọ hùn ga eyin mẹde wà nudagbe de na yé. Mọwẹ e te na mẹlẹpo. Mẹplọntọ Daho lọ yọ́n ehe, podọ e nọ to dagbe wà na gbẹtọ lẹ to whepoponu. E dọmọ: ‘Yẹn ma wá nado yin lizọnyi na gba, ṣigba nado yilizọn namẹ.’​—⁠Matiu 20:⁠28.

Enẹwutu eyin mí jlo na taidi Mẹplọntọ Daho lọ, etẹwẹ mí dona nọ wà?⁠— Mí dona nọ yilizọn na mẹdevo lẹ. Mí dona nọ wà dagbe na mẹdevo lẹ. Nugbo wẹ dọ mẹsusu ma nọ wà ehe gba. Kakatimọ, suhugan gbẹtọ lẹ tọn nọ jlo dọ mẹdevo lẹ ni yilizọn na yé. To ojlẹ de mẹ, hodotọ Jesu tọn lẹ lọsu tindo gbigbọ ehe. Dopodopo yetọn jlo nado yin ogán kavi nukọntọ de.

To gbèdopo, Jesu to yìyì to aliho ji hẹ hodotọ etọn lẹ. To whenuena yé biọ tòdaho Kapẹlnaumi tọn mẹ, sẹpọ Ohù Galili tọn, yemẹpo biọ ohọ̀ de mẹ. Todin Jesu kanbiọ yé dọ: “Etẹwẹ mì to nudọ̀n na to mìde ṣẹnṣẹn to aliho?” Mẹdepope to yé mẹ ma kẹnù, na yé ko dọ̀nnu to aliho ji dogbọn mẹhe yin nukọntọ dali.​—⁠Malku 9:​33, 34.

Jesu yọnẹn dọ e ma sọgbe na depope to devi etọn lẹ mẹ nado lẹn ede di nukọntọ gba. Enẹwutu, dile mí mọ to weta tintan owe ehe tọn mẹ do, Jesu ze ovi pẹvi de ṣite to yé ṣẹnṣẹn bo dọna yé dọ yemẹpo dona whiwhẹ yede di ovi pẹvi enẹ. Etomọṣo, yé ma diọ janwẹ. Enẹwutu ojlẹ vude jẹnukọnna okú Jesu tọn, e plọn yé nuplọnmẹ de he yé ma sọgan wọnji gbede. Etẹwẹ e basi?⁠—

Dile yemẹpo sinai bo to núdù dopọ, Jesu fọnṣite sọn tafo lọ kọ̀n bo de awugbó etọn dai. E ze awusúnsúnnu de, bo sìn in do alinkàn. Enẹgodo e ze sinhẹnnu de bo bàsin do e mẹ. Nuhe e jlo na wà na ko paṣa hodotọ etọn lẹ. Dile yé to pinpọ́n ẹn, Jesu yì dopodopo yetọn lẹ dè bo fẹ̀ yìdo bo klọ afọ na dopodopo yetọn lẹ. Enẹgodo e yí awusúnsúnnu lọ do súnsún afọ na yé. Lẹnnupọn do enẹ ji! Eyin hiẹ tin to finẹ wẹ, etẹwẹ na ko yin numọtolanmẹ towe?⁠—

Hodotọ etọn lẹ lẹndọ e ma sọgbe na Mẹplọntọ Daho lọ nado yilizọn na emilẹ to aliho ehe mẹ. Winyan hù yé. Ṣigba e ma jlo Pita dọ Jesu ni yilizọn mẹdepò tọn ehe na emi gba. Enẹwutu Jesu dọna ẹn dọ onú titengbe de wẹ e yin na emi nado wàmọ.

Mí ma nọ saba klọ afọ na ode awetọ mítọn to egbehe gba. Ṣigba gbẹtọ lẹ nọ wàmọ to whenue Jesu tin to aigba ji. Be a yọ́n nuhewutu wẹ?⁠— To otò he mẹ Jesu po hodotọ etọn lẹ po nọ nọ̀ to whenẹnu, gbẹtọ lẹ nọ dó afọpa he ma nọ bú afọ yetọn lẹ. Enẹ zọ́n bọ eyin yé zinzọnlin gbọn aliho afínfínnọ lẹ ji, afínfín nọ hẹn afọ yetọn lẹ kudiho. Enẹwutu homẹdagbe didohia wẹ e yin nado klọ afínfín sọn afọ go na jonọ he wá owhé mẹtọn gbè lẹ.

Ṣigba to gbènẹgbè, dopo tata to devi Jesu tọn lẹ mẹ ma ze ede jo nado klọ afọ na mẹhe pò lẹ gba. Enẹwutu Jesu lọsu gbọ bo wàmọ. Gbọn ehe wiwà dali, Jesu plọn onú titengbe de hodotọ etọn lẹ. E jẹ dọ yé ni plọn ehe nugbo. Podọ nuplọnmẹ de wẹ he mílọsu lẹ dona plọn to egbehe.

Be a yọ́n nuplọnmẹ lọ?⁠— To whenuena Jesu vọ́ awugbó etọn ze dó bo wá sinai do otẹn etọn mẹ to tafo lọ kọ̀n godo, e basi zẹẹmẹ dọmọ: “Be mì yọ́n nuhe yẹn wà hlan mì? Mìwlẹ to yiylọ mi dọ Mẹplọntọ, bo to yiylọ mi dọ Oklunọ; mì dọ dagbe; na mọwẹ yẹn yin. Enẹwutu eyin yẹn mẹhe yin Oklunọ mìtọn, bosọ yin Mẹplọntọ mìtọn klọ afọ mìtọn; e sọ jẹ na mìwlẹ nisọ klọ afọ mìnọzo tọn ga.”​—⁠Johanu 13:​2-14.

Mẹplọntọ Daho lọ dohia tofi dọ emi jlo dọ hodotọ emitọn lẹ ni nọ yilizọn na ode awetọ yetọn. E ma jlo dọ yé ni yin ṣejannabinọ gba. E ma jlo dọ yé ni nọ pọ́n yedelẹ hlan di mẹjọmẹ sọmọ bọ mẹdevo lẹ dona nọ yilizọn na yé gba. E jlo dọ yé ni nọ yilizọn na mẹdevo lẹ.

Be e mayin nuplọnmẹ dagbe de wẹ enẹ yin?⁠— Be hiẹ na hodo apajlẹ Mẹplọntọ Daho lọ tọn bo na nọ yilizọn na mẹdevo lẹ ya?⁠— Mímẹpo wẹ sọgan nọ wà dagbe na mẹdevo lẹ. Ehe na hẹn homẹ yetọn hùn. Ṣigba hú popolẹpo, e na hẹn homẹ Jesu po Otọ́ etọn tọn po hùn.

E ma vẹawu nado yilizọn na mẹdevo lẹ gba. Eyin a lẹnnupọn, a na mọdọ onú susu wẹ emi sọgan wà na mẹdevo lẹ. Lẹnnupọndeji todin: Be nude tin he a sọgan wà nado gọalọna onọ̀ towe ya? A yọnẹn dọ onú susu wẹ e nọ basi na we podọ na whẹndo lọ blebu. Be a sọgan gọalọna ẹn ya?⁠— A sọgan kanbiọ ẹ.

Vlavo whẹpo mì nado dùnú a sọgan nọ tò núdùgbán lẹ do tafo he ji whẹndo lọ na dùnú te. Kavi to núdùdù godo, a sọgan bẹ núdùgbán lẹ sẹ̀ bo súnsún tafo he ji whẹndo lọ dùnú te. Ovi delẹ nọ yì kọ̀n ogbó to azán lẹpo gbè. Nudepope he a nọ wà, lizọnyi wẹ a te na mẹdevo lẹ, dile Jesu lọsu basi do.

Be a tindo nọvi pẹvi lẹ he a sọgan yilizọn na ya? Flindọ, Jesu heyin Mẹplọntọ Daho lọ yilizọn, etlẹ yin na hodotọ etọn lẹ. Eyin a nọ yilizọn na nọvi towe lẹ, be a to apajlẹ Jesu tọn hodo. Etẹlẹ wẹ a sọgan wà na yé?⁠— Vlavo a sọgan plọn yé nado nọ gọ̀ aihundanu yetọn lẹ do otẹn yetọn mẹ to whenuena yé ko daihun pó godo. Kavi a sọgan nọ sọnú na yé. Kavi vlavo a sọgan nọ jla adọ́zan yetọn do. Etẹwẹ a lẹndọ emi sọgan sọ basi na yé?⁠— Yé na yiwanna we eyin a nọ wà onú helẹ na yé, kẹdẹdile hodotọ Jesu tọn lẹ yiwanna ẹn do.

A sọgan yilizọn na mẹdevo lẹ to wehọmẹ ga. E sọgan yin klasigbẹ́ towe lẹ kavi mẹplọntọ towe. Eyin owe mẹde tọn jai, e na yọ́n eyin a gọalọ nado ze e na ẹn. A sọgan desọn ojlo mẹ nado súnsún owhlẹ yuu he ji mẹplọntọ mìtọn nọ kannu do kavi wà onú devo lẹ na ẹn. Nado hùn ohọ̀n dote na mẹdevo lẹ yin lizọnyinamẹ ga.

To whedelẹnu, mí na mọdọ mẹdelẹ ma nọ dopẹna mí na dagbe he mí wà na yé lẹ. Be a lẹndọ ehe dona hẹnalọdotena mí nasọ do wà dagbe wẹ ya?⁠— Lala! Mẹsusu wẹ ma dopẹna Jesu na dagbe he e wà na yé lẹ. Ṣigba enẹ ma hẹnalọdotena ẹn nado wà dagbe gba.