Mí Dona Nọavunte Sọta Whlepọn Lẹ

BE MẸDE ko dọna we nado wà nuhe ma sọgbe de pọ́n ya?⁠— Be mẹlọ vannukundo we nado wàmọ wẹ ya? Kavi e dọ dọ aihun poun wẹ podọ nude ma ylan to e mẹ nado wàmọ wẹ ya?⁠— Eyin mẹde dọmọ na we, e to tintẹnpọn nado hẹn we wà nuhe ma sọgbe wẹ.

Etẹwẹ a dona wà eyin mẹde whlé we pọ́n to aliho enẹ mẹ? Be a dona yigbe bo wà nuhe ma sọgbe wẹ ya?⁠— Enẹ ma na hẹn homẹ Jehovah Jiwheyẹwhe tọn hùn gba. Ṣigba be a yọ́n homẹ mẹhe tọn na hùn ya?⁠— Mọwẹ, homẹ Satani Lẹgba tọn na hùn.

Satani yin kẹntọ Jiwheyẹwhe tọn, podọ Satani sọ yin kẹntọ mítọn ga. Mí ma sọgan mọ ẹn na gbigbọ wẹ ewọ yin. Ṣigba ewọ sọgan mọ mí. To gbèdopo, Lẹgba dọho hẹ Jesu, Mẹplọntọ Daho lọ bo tẹnpọn nado whlé e pọ́n. Gbọ na mí ni pọ́n nuhe Jesu wà. Enẹgodo mí na yọ́n nuhe mí dona wà to whenuena mẹde whlé mí pọ́n.

Jesu nọ jlo nado wà ojlo Jiwheyẹwhe tọn to whepoponu. E do ehe hia to gbangba gbọn baptẹm yíyí to Otọ̀ Jọdani tọn mẹ dali. To baptẹm Jesu tọn godo tlolo wẹ Satani whlé E pọ́n. Biblu dọ dọ ‘olọn hùndonuvo’ na Jesu. (Matiu 3:16) Ehe sọgan zẹẹmẹdo dọ Jesu jẹ nulẹpo flin ji dogbọn gbẹzan etọn olọn mẹ tọn to Jiwheyẹwhe dè dali.

To baptẹm etọn godo, Jesu yì zungbo de mẹ nado lẹnayihamẹpọn do nuhe e to finflin lẹ ji. E nọ finẹ na okle kande, ozán kande. Jesu ma dù nudepope to ojlẹ ehe lẹpo gblamẹ, enẹwutu huvẹ ko to hùhù i taun. Whenẹnu wẹ Satani tẹnpọn nado whlé Jesu pọ́n.

Lẹgba dọna ẹn dọmọ: “Eyin hiẹ yin Ovi Jiwheyẹwhe tọn, degbena zannu helẹ ni lẹzun akla.” Pọ́n lehe akla nọ vivi do! Ṣigba be Jesu tindo huhlọn lọ nado lẹ́ zannu lẹ zun akla ya?⁠— Mọwẹ, e sọgan wàmọ. Etẹwutu? Na Jesu, Ovi Jiwheyẹwhe tọn tindo huhlọn vonọtaun lẹ wutu.

Eyin hiẹ wẹ Lẹgba dọna nado lẹ́ zannu zun akla, be a na ko wàmọ wẹ ya?⁠— Huvẹ to Jesu hù. Enẹwutu etẹwẹ na ko ylan to enẹ mẹ eyin Jesu wàmọ whladopo poun?⁠— Jesu yọnẹn dọ e jẹagọ nado yí huhlọn etọn zan to aliho enẹ mẹ. Jehovah wẹ na ẹn huhlọn lọ lẹ nado yí do dọ̀n gbẹtọ lẹ wá Jiwheyẹwhe dè, e mayin nado yí ì zan na edetiti gba.

Enẹwutu, kakati ni wàmọ, Jesu dọ nuhe yin kinkàndai do Biblu mẹ na Satani dọmọ: ‘Gbẹtọ ma dona nọgbẹ̀ gbọn akla dopo kẹdẹ sinmẹ gba, ṣigba gbọn ohó he tọ́nsọn onù Jehovah tọn mẹ kẹdẹ gblamẹ.’ Jesu yọnẹn dọ wiwà nuhe nọ hẹn homẹ Jehovah tọn hùn yin nujọnu hugan núdùdù.

Ṣigba Lẹgba sọ kàn ayiha devo. E ze Jesu yì Jelusalẹm bo hẹn ẹn ṣite to bẹbẹnu tẹmpli lọ tọn ji to aga. Enẹgodo Satani dọna ẹn dọmọ: ‘Eyin hiẹ yin ovi Jiwheyẹwhe tọn, lọ́n jẹte sọn fi. Na e ko yin winwlan dọ angẹli Jiwheyẹwhe tọn lẹ na basi hihọ́na we ma nado gbleawu.’

Naegbọn Satani do dọmọ?⁠— E dọ ehe nado whlé Jesu pọ́n nado wà nulunu. Ṣigba whladopo dogọ, Jesu ma setonuna Satani. E dọna Satani dọmọ: ‘Yè ko wlanwe etọn dọ, Hiẹ ma na whlé Jehovah Jiwheyẹwhe towe pọ́n.’ Jesu yọnẹn dọ e ma sọgbe nado whlé Jehovah pọ́n gbọn ogbẹ̀ mẹtọn zizedo owù mẹ dali.

Ṣogan, Satani ma jo e do gba. E sọ vọ́ ze Jesu yì osó he yiaga tlala de ji. To finẹ, e do ahọluduta, kavi gandudu aihọn tọn lẹpo po gigo yetọn po hia ẹ. Enẹgodo Satani dọna Jesu dọmọ: “Onú he lẹpo wẹ yẹn na na we, eyin hiẹ na jẹklo bo litaina mi.”

Lẹnnupọndo nuhe Lẹgba dọ emi na na ẹn lẹ ji. Be ahọluduta lẹ, kavi gandudu gbẹtọ tọn ehe lẹpo wẹ yin Satani tọn nugbo ya?⁠— Jesu ma gbẹ́ dọ yé ma yin Satani tọn gba. E na ko dọmọ eyin yé ma yin Satani tọn. Mọwẹ, na taun tọn, Satani wẹ yin ogán na akọta aihọn tọn lẹpo. Biblu tlẹ ylọ ẹ dọ ‘ogán aihọn ehe tọn.’​—⁠Johanu 12:⁠31.

Etẹwẹ hiẹ na wà eyin Lẹgba dopagbe nado na we nude eyin a sẹ̀n ẹn?⁠— Jesu yọnẹn dọ mahopọnna nudepope he Emi na mọyi, e ma sọgbe nado sẹ̀n Lẹgba. Enẹwutu Jesu dọna ẹn dọmọ: ‘Tọ́nsọn file, Satani! Na Biblu dọ dọ Jehovah Jiwheyẹwhe towe wẹ hiẹ dona nọ sẹ̀n podọ ewọ dopokẹdẹ wẹ hiẹ dona basi sinsẹ̀n na.’​—⁠Matiu 4:​1-10; Luku 4:​1-13.

Mílọsu nọ pannukọn whlepọn lẹ ga. Be a yọ́n delẹ to yé mẹ ya?⁠— Apajlẹ dopo die. Onọ̀ towe sọgan ko dà ablá kavi abló he vivi bo to owán vivi dè. E sọgan ko dosẹ́n na we dọ a ma hà bo dù sọn e mẹ kakajẹ núdùdù whenu. Ṣigba huvẹ to hùhù we, enẹwutu e sọgan jẹ jijlo we ji nado dù vude sọn e mẹ. Be a na setonuna onọ̀ towe ya?⁠— Satani ma jlo dọ a ni setonuna onọ̀ towe gba.

Flin Jesu. Huvẹ to hùhù i taun. Etomọṣo e yọnẹn dọ nado hẹn homẹ Jehovah tọn hùn yin nujọnu hugan núdùdù. A na dohia dọ emi to apajlẹ Jesu tọn hodo eyin a nọ wà nuhe onọ̀ towe dọna we.

Yọpọvu hatọ towe lẹ sọgan dọna we dọ a ni nù amasinkún delẹ. Yé sọgan dọna we dọ amasinkún lọ lẹ na hẹn awuya we. Ṣigba amasinkún lọ lẹ sọgan yin amasin-adínọ. Yé sọgan hẹn we jẹazọ̀n sinsinyẹn bo tlẹ sọgan hù we. Kavi mẹde sọgan na we siga, he sọ yin amasin-adínọ ga, bo vannukundo we nado nù. Etẹwẹ hiẹ na wà?⁠—

Flin Jesu. Satani tẹnpọn nado klọ Jesu nado ze ogbẹ̀ etọn do owù mẹ gbọn didọna ẹn dali nado lọ́n jẹte sọn bẹbẹnu tẹmpli lọ tọn ji. Ṣigba Jesu ma wàmọ. Etẹwẹ hiẹ lọsu na wà eyin mẹde vannukundo we nado wà owùnu de?⁠— Jesu ma setonuna Satani gba. Mọdopolọ hiẹ lọsu ma dona setonuna mẹdepope he tẹnpọn nado klọ we nado wà nuhe ma sọgbe.

Mẹde sọgan dọna we to gbèdopo nado basi sinsẹ̀n na yẹdide de. Ṣigba Biblu gbẹ́ dọ mí ma dona wàmọ. (Eksọdusi 20:​4, 5) E sọgan yin apadewhe nuwiwa lẹ tọn to wehọmẹ. Hiẹ sọgan yin didọna dọ eyin a ma wàmọ, a na yin yinyan sọn wehọmẹ. Etẹwẹ a na wà?⁠—

E nọ bọawu nado wà nuhe sọgbe to whenuena mẹlẹpo to onú lọ basi. Ṣigba e sọgan vẹawu taun nado wà nuhe sọgbe to whenuena mẹdevo lẹ to tintẹnpọn nado doyẹklọ mí nado wà nuhe ma sọgbe. Yé sọgan dọna we dọ nuhe basi yé te ma ylan sọmọ gba. Ṣigba kanbiọ titengbe lọ wẹ yindọ, Etẹwẹ Jiwheyẹwhe dọ gando onú lọ go? Ewọ wẹ yọnnuin hugan.

Enẹwutu, mahopọnna nudepope he mẹdevo lẹ dọ, mí ma dona wà nuhe Jiwheyẹwhe dọ e jẹagọ lẹ gbede. Gbọnmọ dali, mí na nọ hẹn homẹ Jiwheyẹwhe tọn hùn to whepoponu, podọ mí ma na hẹn homẹ Lẹgba tọn hùn pọ́n gbede.