Weta 13

Nupinplọn sọn Whlepọn Jesu Tọn lẹ Mẹ

TLOLO to baptẹm etọn godo, Jesu yin anadena gbọn gbigbọ Jiwheyẹwhe tọn dali yì zungbo Judé tọn mẹ. E tindo onú susu nado lẹnnupọn deji, na to baptẹm etọn whenu “yè hùn olọn do nùvo,” na e nido sọgan mọ onú olọn mẹ tọn lẹ. Nugbo wẹ dọ, onú susu wẹ tin na ẹn nado lẹnayihamẹpọn deji!

Jesu zan okle 40 podọ ozán 40 to zungbo lọ mẹ bo ma dù nudepope to ojlẹ helẹ gblamẹ. Enẹgodo, to whenuena huvẹ hù Jesu taun, Lẹgba dọnsẹpọ ẹ nado whlé e pọ́n, dọmọ: “Eyin hiẹ yin Ovi Jiwheyẹwhe tọn, degbena zannu helẹ ni lẹzun akla.” Ṣigba Jesu yọnẹn dọ e ma sọgbe gba nado yí huhlọn azọ́njiawu tọn etọn lẹ zan nado hẹn pekọ wá na ojlo mẹdetiti tọn etọn lẹ. Enẹwutu e gbẹ́ nado yin whiwhlepọn.

Ṣigba Lẹgba ma gbọjọ gba. E tẹ́n mẹdọnsẹpọ devo pọ́n. E diọavùnnukunsọ Jesu nado lọ́n sọn adó tẹmpli tọn ji na angẹli Jiwheyẹwhe tọn lẹ nido whlẹn ẹn. Ṣigba Jesu ma yin whiwhlepọn nado basi dohia nupinpọn tọn mọnkọtọn gba. To hoyidọ sọn Owe-wiwe lẹ mẹ, Jesu dohia dọ e ma sọgbe gba nado whlé Jiwheyẹwhe pọ́n to aliho ehe mẹ.

To whlepọn atọ̀ntọ mẹ, Lẹgba do ahọluduta aihọn tọn lẹpo hia Jesu to aliho jiawu delẹ mẹ bo dọmọ: “Onú helẹ pó wẹ yẹn na na we, eyin hiẹ na jẹklo bo litai na mi.” Ṣigba whladopo dogọ Jesu gbẹ́ nado jai jẹ whlepọn mẹ bo wà nuhe ma sọgbe, bo dè nado gbọṣi nugbonọ-yinyin mẹ hlan Jiwheyẹwhe.

Mí sọgan plọnnu sọn whlepọn Jesu tọn helẹ mẹ. Di apajlẹ, yé dohia, dọ Lẹgba ma yin jẹhẹnu walọ ylankan tọn de poun, dile mẹdelẹ nọ dọ do gba, ṣigba dọ e yin omẹ tangan, mayọnmọ de. Whlepọn Jesu tọn sọ dohia ga dọ gandudu aihọn tọn lẹpo yin nutindo Lẹgba tọn. Na nawẹ zize yé donukọnnamẹ Lẹgba tọn hlan Klisti na ko yin whlepọn jọ whlepọn de gbọn eyin yé ma yin etọn nugbonugbo?

Podọ lẹnnupọn do ehe ji: Lẹgba dọ dọ emi jlo nado suahọ Jesu na nuyiwa sinsẹ̀n-bibasi tọn dopo, yèdọ nina ẹn ahọluduta aihọn tọn lẹpo ga. Lẹgba sọgan tẹnpọn nado whlé mí pọ́n to aliho mọnkọtọn mẹ, vlavo hùnhùn dotẹnmẹ dagbe he mí tindo ojlo na lẹ dote na mí nado tindo adọkun, huhlọn, kavi otẹn aihọn tọn. Ṣigba lehe mí na yin nuyọnẹntọ do sọ nado hodo apajlẹ Jesu tọn gbọn gbigbọṣi nugbonọ-yinyin mẹ dali hlan Jiwheyẹwhe mahopọnna depope he whlepọn lọ sọgan yin! Matiu 3:16; 4:1-11; Malku 1:12, 13; Luku 4:1-13.

▪ Etẹlẹ ji wẹ e họnwun dọ Jesu lẹnayihamẹpọn do to azán 40 he e yizan to zungbo mẹ lẹ whenu?

▪ Nawẹ Lẹgba dovivẹnu nado whlé Jesu pọ́n gbọn?

▪ Etẹwẹ mí sọgan plọn sọn whlepọn Jesu tọn lẹ mẹ?