Jọja lẹ Emi—Nuplọnmẹ Mẹnu Tọn go Wẹ Mì Nọ Payì?
“Mẹdelẹ na jai sọn yise mẹ, bo nasọ na otó ... oplọ́n aovi tọn.”—1 TIMOTI 4:1.
1. (a) Nudide tẹwẹ jọja lẹ tindo? (b) Nawẹ Jehovah nọ plọnmẹ gbọn?
KANBIỌ lọ he yin zizedonukọnna jọja lẹ tofi wẹ yin, Nuplọnmẹ mẹnu tọn go wẹ mì nọ payì? Ehe zẹẹmẹdo dọ mì jọja lẹ tindo nudide de. Nudide lọ tin to alọkẹyi nuplọnmẹ sọn olọn mẹ wá po nuplọnmẹ aovi tọn lẹ po hihodo ṣẹnṣẹn. Jehovah nọ plọnmẹ gbọn Ohó etọn gblamẹ, yèdọ Biblu, gọna lizọnyizọn mẹhe e nọ yizan taidi afọzedaitọ etọn lẹ to aigba ji tọn dali. (Isaia 54:13; Owalọ lẹ 8:26-39; Matiu 24:45-47) Ṣigba be e paṣa we dọ aovi lẹ lọsu nọ plọnmẹ ga wẹ ya?
2. Naegbọn e do yin onu titengbe de nado tin to aṣeji sọta nuplọnmẹ aovi tọn lẹ titengbe to ojlẹ ehe mẹ?
2 Apọsteli Paulu wlan dọmọ: “To ojlẹ godo tọn lẹ mẹ mẹdelẹ na jai sọn yise mẹ, bo nasọ na otó gbigbọ oklọ, po oplọ́n aovi tọn po.” (1 Timoti 4:1) To whenuena e yindọ mí to gbẹ̀nọ to “azán lẹ godo” whenuena Satani po aovi etọn lẹ po na taun tọn to kànván, be hiẹ yọn nuhewutu mí do kan kanbiọ lọ, Nuplọnmẹ mẹnu tọn go wẹ mì nọ payì sè ya? (2 Timoti 3:1-5; Osọhia 12:7-12) Na Satani po aovi etọn lẹ po yin ayiha wintinwintinnọ sọmọ wutu, bọ aliho nuyiwa yetọn lẹ tọn ko yin nuhe gọna oklọ taun, onu titengbe wẹ e yin dọ mì ni gbadopọnna kanbiọ ehe po sọwhiwhe po.—2 Kọlintinu lẹ 11:14, 15.
Aovi lẹ po Nuplọnmẹ Yetọn lẹ Po
3. Mẹnu wẹ aovi lẹ, etẹwẹ yin lẹndai yetọn, podọ nawẹ yé nọ dín ali nado hẹn ẹn di gbọn?
3 Aovi lẹ to ojlẹ de mẹ wayì ko yin angẹli Jehovah tọn lẹ, ṣigba yé ṣiatẹ sọta Mẹdatọ yetọn bo gbọnmọ dali lẹzun awhànvipẹ́ Satani tọn lẹ. (Matiu 12:24) Lẹndai yetọn wẹ nado hẹn gbẹtọ lẹ gble bo lẹkọ na yé sọn Jiwheyẹwhe sinsẹ̀n mẹ. Nado basi wàdotana ehe tọn, aovi lẹ nọ yí mẹplọntọ gbẹtọvi lẹ tọn zan nado zé aliho gbẹzan ṣejannabi, fẹnnuwiwa tọn he Jehovah gblewhẹdo daga. (Yijlẹdo 2 Pita 2:1, 12-15 go.) Dogbapọnna lehe angẹli nugbonọ hohowhenu tọn delẹ lẹzun aovi lẹ gbọn na gọalọna we nado yọn nuplọnmẹ yetọn lẹ po aliho gbẹzan he nuplọnmẹ ehelẹ nọ zedaga po.
4. (a) Naegbọn angẹli tolivẹtọ lẹ do wá aigba ji to azán Noa tọn gbè? (b) Etẹwẹ jọ do angẹli ylankan lọ lẹ po ovi yetọn lẹ po go to Sìngigọ lọ whenu?
4 To azán Noa tọn lẹ gbè, angẹli delẹ yin dindọn pete gbọn viyọnnu whanpẹnọ gbẹtọ lẹ tọn dali sọmọ bọ nudida gbigbọnọ ehelẹ jó otẹn olọn mẹ tọn yetọn lẹ do nado wá aigba ji. Kọndopọ zanhẹmẹ yetọn tọn po yọnnusi lẹ po dekọtọn do ovi flusọ he nọ yin yiylọ dọ Nẹfilimi lẹ mẹ. To whenuena e ma yin jọwamọnu na nudida gbigbọnọ lẹ nado nọpọ taidi asu po asi po hẹ gbẹtọvi lẹ, nuhe angẹli tolivẹtọ enẹlẹ dosin hẹ yọnnusi enẹlẹ yin nuhe jẹagọ pẹpẹ taidi walọ zanhẹmẹ sunnu po sunnu po tọn he yin bibasi to nukọnmẹ gbọn sunnu po dẹpẹ Sọdọmi tọn lẹ po dali. (Gẹnẹsisi 6:1-4; 19:4-11; Juda 6, 7) Dile e tlẹ yindọ asi po ovi flusọ angẹli lọ lẹ tọn po yin vivasudo to osìngigọ lọ mẹ, angẹli ylankan lọ lẹ klọ́n agbasa gbẹtọ tọn yetọn dai bo lẹkọyi olọn mẹ to fie yé lẹzun aovi gbẹdohẹmẹtọ Satani Lẹgba tọn te.—2 Pita 2:4.
5. Nudida nankọtọn lẹ wẹ aovi lẹ yin, podọ nawẹ yé nọ tẹnpọn nado diọadana osẹ́n Jiwheyẹwhe tọn lẹ gbọn?
5 To pọndohlanmẹ na bẹjẹeji whenuho ehe tọn, be hiẹ mọnukunnujẹ wunmẹ nudida alọpa he aovi lẹ yin mẹ na nugbo tọn ya? Yé yin wantuntunnọ to zanhẹmẹ liho bo yin mayọnmọ he to ayiha wintinwintin yizan nado deanana aihọn he zanhẹmẹ ko hẹn lẹzun alẹnọ ehe. Dile e tlẹ yindọ yé ko yin alọhẹndotena ma nado zé gbasa gbẹtọ tọn do whladopo dogọ, yé nọ mọ pekọ sọn wantuntun mẹhe sọgan hẹn aigba gble lẹ tọn mẹ. (Efesunu lẹ 6:11, 12) Aovi lẹ to tintẹnpọn nado diọadana osẹ́n Jehovah tọn lẹ gando wiwejininọ po walọdagbe po go gbọn hinhẹn yé taidi nuhe hẹnalọdotenamẹ zẹjlẹgo. Angẹli ylankan ehelẹ nọ nọgodona fẹnnuwiwa zanhẹmẹ tọn taidi aliho gbẹzan tọn he jlọ, bosọ vivi.
Nuplọnmẹ Aovi tọn lẹ Zizedaga
6. Naegbọn e ma dona paṣa mí dọ aovi lẹ nọ nọgodona nuplọnmẹ yetọn lẹ to aliho oklọ tọn mẹ?
6 Dọ aovi lẹ na zé nuplọnmẹ yetọn lẹ daga to aliho ayiha wintinwintin tọn mẹ ma dona paṣa mí gba, to whenuena e yindọ aliho nuwiwa ehe tọn wẹ nukọntọ yetọn, Satani Lẹgba, yizan nado klọ Evi. Flindọ e dọho hlan ẹn taidi dọ e jlo na gọalọna ẹn nkọtọn. Satani kanse dọmọ: “[Be] Jiwheyẹwhe [ka] dọmọ mì ma na dù to atin lẹ mẹ he tin to ojipa mẹ lẹ depope?” Enẹgodo e yí ayiha wintinwintin zan nado dovọ́na nuplọnmẹ Jiwheyẹwhe tọn gbọn didọna Evi dọ ewọ na mọaleyi to dùdù sọn atin he yè dosẹ́n gando e go lọ mẹ dali. Lẹgba dopagbe dọmọ, “Azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onu dagbe po oylan po.” (Gẹnẹsisi 3:1-5) Gbọnmọ dali Evi yin kiklọ, mọwẹ yin linlẹndiọna, nado vẹtolina Jiwheyẹwhe.—2 Kọlintinu lẹ 11:3; 1 Timoti 2:13, 14.
7. Etẹwẹ ko yin kọdetọn nuplọnmẹ oklọnọ aovi tọn lẹ tọn, podọ avase tẹwẹ ehe wleawu etọn?
7 To ojlẹ agọe tọn lẹ mẹ, ga, mẹsusu wẹ ko yin kiklọ. Aovi lẹ ko gbọn ayiha wintinwintin dali do zé fẹnnuwiwa zanhẹmẹ tọn daga sọmọ bọ e ko lẹzun alọkẹyi gbọn susu mẹhe ko gblewhẹdo e dai tọn lẹ dali. Di apajlẹ, to whenuena linlinwekantọ ayinamẹtọ he yè yọnẹn ganji de to Etats-Unis na gblọndo wekanhlan de tọn do whẹho zanhẹmẹ tintindo mẹhe ma ko wlealọ tọn lẹ ji, e wlan dọmọ: “Yẹn ma lẹndọ yẹn sọgan diọ pọndohlan ṣie do whẹho ehe ji gba, ṣigba yẹn yise todin dọ asu po asi po he yí alọwle do do nujọnu lẹ dona zingbejizọnlin sẹfifo tọn vude lẹ dopọ nado dindona lehe yé sọgbe hẹ yede do.” Enẹgodo e yidogọ dọmọ: “E paṣa mi dọ yẹn wẹ kan enẹ!” Yèdọ e ma tlẹ yise dọ emi ko na mẹ ayinamẹ galilọ tọn, ṣigba e ko wà mọ! E họnwun dọ, mí dona họ́ míde na nuplọnmẹ aovi tọn lẹ ma nado yinuwa do pọndohlan mítọn ji gando nuyiwa he Jiwheyẹwhe gblewhẹdo lẹ go.—Lomunu lẹ 1:26, 27; Efesunu lẹ 5:5, 10-12.
8. (a) Nawẹ hogbe lọ “aihọn” yin yiyizan to Biblu mẹ gbọn? (b) Mẹnu wẹ to gandu do aihọn ji, podọ nukun tẹwẹ hodotọ Jesu tọn lẹ dona yí do pọn aihọn?
8 Mí ma dona wọnji e go gbede dọ Satani wẹ “ahọvi aihọn he tọn.” Na nugbo tọn, apọsteli Johanu dọ dọ “aihọn lẹpo sọ mlọnai to omẹ ylankan lọ mẹ.” (Johanu 12:31; 1 Johanu 5:19) Nugbo, Jesu nọ yí hogbe lọ “aihọn” zan to whedelẹnu nado dlẹnalọdo gbẹtọvi lẹpo. (Matiu 26:13; Johanu 3:16; 12:46) Ṣigba, whlasusu hugan, é yí hogbe lọ “aihọn” zan nado dlẹnalọdo ogbẹ́ gbẹtọvi lẹ tọn he yin titobasina lẹpo he tin to gbonu agun Klistiani nugbo tọn. Di dohia, Jesu dọ dọ hodotọ emitọn lẹ ma dona yin “aihọn tọn” (ogbẹ́ gbẹtọvi mawadodonọ lẹ tọn) podọ na yé ma yin apadewhe aihọn tọn wutu, aihọn na gbẹwanna yé. (Johanu 15:19; 17:14-16) Biblu na avase yinukọn dogọ dọ mí dona dapana lilẹzun họntọn aihọn ehe tọn he yin gandudeji gbọn Satani dali.—Jakobu 4:4.
9, 10. (a) Onu aihọnmẹ tọn tẹlẹ wẹ nọ fọ́n ojlo agọ̀ zanhẹmẹ tọn dote? (b) Podọ nawẹ e yọnbasi nado yọn mẹhe tin to godona nuhe ayidedai aihọn tọn lẹ nọ plọnmẹ gbọn?
9 Apọsteli Johanu dotuhomẹnamẹ dọmọ: “Mì yiwanna aihọn blo, kavi onu he tin to aihọn mẹ. Eyin mẹde yiwanna aihọn, owanyi Otọ́ tọn ma tin to ewọ mẹ gba. Na onu he tin to aihọn mẹ lẹpo, wantuntun agbasalan tọn, wantuntun nukun tọn, po gigovọ́ ogbẹ̀ tọn po, e ma tin to Otọ́ tọn mẹ gba.” (1 Johanu 2:15, 16) Lẹnnupọn dogbọn ehe dali. Etẹwẹ yin onu lọ to aihọn mẹ to egbehe he nọ fọ́n ojlo agọ dote, taidi na zanhẹmẹ he ma sọgbe hẹ osẹ́n? (1 Tẹsalonikanu lẹ 4:3-5) Etẹwẹ dogbọn suhugan hànjiji aihọn tọn lẹ dali? Pònọ de he nọ wazọ́n taidi mẹhe nọ gbadopọnna sẹnhẹngba to Californie dọmọ: “Na titengbe tọn, ohàn nọ plọnmẹ dọ hiẹ ma dona dotoai hlan mẹjitọ towe lẹ, podọ hiẹ dona zán gbẹzan dile hiẹ jlo do.” Be hiẹ yọn asisa nuplọnmẹ he nọ yin nina gbọn ohàn mọnkọtọn lẹ dali ya?
10 Flindọ Satani, to godomẹ, dọna Evi dọmọ: ‘A to nuhe yin alenu na we de hẹngu. Zan gbẹzan dile a jlo do. Basi dide na dewe gando nuhe yọn po nuhe ylan po go. Hiẹ ma tindo nuhudo nado dotoai hlan Jiwheyẹwhe gba.’ (Gẹnẹsisi 3:1-5) Be enẹ ma wẹ yin wunmẹ wẹndomẹ he nọ yin mimọ to suhugan hànjiji aihọn tọn mẹ ya? Ṣigba aovi lẹ ma nọ plọnmẹ gbọn ohàn kẹdẹ dali gba. Yé sọ nọ yí ajọjijla televiziọn, yẹdide to okanji lẹ, po video lẹ po zan nado plọnmẹ ga. Naegbọn e do yinmọ? Eyọn, nuyizan hodọdopọ aihọn tọn lẹ nọ zé ayidedai he nọ hẹn nuplọnmẹ walọdagbe Jiwheyẹwhe tọn sọawuhia nado yin nuhe sinyẹn gbau donukọnnamẹ. Yé nọ nọgodona galilọ gbọn nuzindeji po zize e donukọnnamẹ taidi nuhe dọnmẹdogo dali.
11. To walọ dagbe liho, etẹwẹ televiziọn nọ saba plọnmẹ?
11 Linlinwe U.S.News & World Report dọmọ: “To 1991, azọ́nwhé televiziọn [Etats-Unis tọn] atọ̀n he nọ wazọ́n dopọ zé nujijọ 10 000 zanhẹmẹ donukọnnamẹ to ojlẹ whèjai tọn whenu; to nupinpọn dopodopo he to dido zanhẹmẹ to mẹhe ko wlealọ lẹ ṣẹnṣẹn mẹ dali, azọ́nwhé televiziọn tọn helẹ do nupinpọn 14 zanhẹmẹ to gbonu alọwle tọn hia.” Gbọn dido nujijọ 9 000 zanhẹmẹ he ma sọgbe hẹ osẹ́n lẹ hia to ojlẹ whèjai tọn mẹ to owhe dopo mẹ, etẹwẹ hiẹ sọgan dọ dọ televiziọn to pinplọnmẹ? Barry S. Sapolsky, mẹhe tindo mahẹ to kinkan linlin lọ “Zanhẹmẹ Ojlẹ Whèjai Tọn to Televiziọn mẹ: 1979 to Yiyijlẹdo 1989 Go” mẹ, dọmọ: “Eyin jọja aflanmẹ de ko pọn televiziọn na owhe susu to fie gbẹtọ lẹ nọ doalọ to walọ zanhẹmẹ he gọna aihun alọsadomẹgo tọn mẹ te, fọtọ́n susu yẹdide ehelẹ tọn to owhe lẹ gblamẹ na plọn yé dọ zanhẹmẹ yin nuhe vivinamẹ—podọ he ma tindo kọdetọn ylankan de.” Kanbiọ depope matin dogbọn ehe dali: Ayidedai aihọn mẹ tọn lẹ nọ plọn jọja lẹ dọ nunọwhinnusẹ́n depope matin, dọ galilọ yin alọkẹyi, podọ kọdetọn ylankan depope matin to zinzan gbẹzan he Jiwheyẹwhe gblewhẹdo mẹ gba.—1 Kọlintinu lẹ 6:18; Efesunu lẹ 5:3-5.
12. Naegbọn ayidedai aihọn tọn do to nukunvando jọja lẹ ji na taun tọn?
12 Ohàn, sinimọto lẹ, yẹdide to okanji lẹ, po televiziọn aihọn mẹ tọn lẹ po yin awuwlena nado dọ̀n jọja lẹ dogo. Yé nọ zé nuplọnmẹ gbigble aovi tọn lẹ daga! Ṣigba be ehe dona paṣamẹ wẹ ya? Lẹnnupọn dogbọn dali etọn. Eyin sinsẹ̀n lalo po tonudidọ po yin apadewhe aihọn Satani tọn—bọ yé yin mọ nugbo nugbo—be e sọgbe hẹ lẹnpọn dagbe nado yise dọ ayidedai he nọ yin zizedonukọnnamẹ gbọn aihọn dali yin nuhe ma nọ yin nuyiwadeji depope gbọn aovi dali ya? Mì jọja lẹ na titengbe tọn dona tin to aṣeji ma nado “dike na aihọn he lẹdo mì ni diọ mì zun ede.”—Lomunu lẹ 12:2, Kuen.
Basi Dogbapọn Mẹdetiti Tọn
13. Dogbapọn mẹdetiti tọn tẹwẹ dona yin bibasi?
13 Whẹho nuplọnmẹ mẹnu tọn go wẹ hiẹ na payì yin yinyọnẹn e ma yin gbọn hodidọ towe tọn kẹdẹ gba ṣigba gbọn walọyizan towe lẹ dali ga. (Lomunu lẹ 6:16) Enẹwutu kanse dewe dọmọ, ‘Be walọyizan ṣie po aliho gbẹzan ṣie tọn lẹ po yin gingan dego to aliho he ma jẹ mẹ gbọn nuhe yẹn nọ plọn sọn aliho nujijla aihọn tọn lẹ mẹ ya? Be nuplọnmẹ aovi tọn lẹ to aliho dòglọ́ tọn de basi to gbẹzan ṣie mẹ ya?’ Nado gọalọna we nado na gblọndo kanbiọ enẹlẹ tọn, naegbọn hiẹ ma do yí sọha ojlẹ po vivẹnu he hiẹ nọ yizan nado plọn Biblu, opli Klistiani tọn lẹ yìyì, po hodọna mẹdevo lẹ po dogbọn Ahọluduta Jiwheyẹwhe tọn dali jlẹdo dehe nọ yin yiyizan nado pọn televiziọn, todoai hlan ohàn, alọdido to aihundida lanmẹyiya he hiẹ yiwanna mẹ, kavi mahẹ tintindo to nuwiwa he taidi enẹ lẹ nkọtọn mẹ go? To whenuena e yindọ—na nugbo tọn, yèdọ gbẹzan towe titi—tin to owù mẹ taun, yí nugbo homẹ tọn do whle dewe pọ́n.—2 Kọlintinu lẹ 13:5.
14. Etẹwẹ na yinuwa do dagbemẹninọ gbigbọmẹ tọn mítọn ji, podọ linlẹn he nọ hẹnmẹ lẹnnupọn sisosiso tẹwẹ mí dona hẹn do ayiha mẹ?
14 Hiẹ yọnẹn ganji dọ núdùdù agbasa tọn he hiẹ nọ dù na yinuwa do dagbemẹninọ agbasamẹ towe tọn ji. Mọdopolọ, dagbemẹninọ gbigbọmẹ tọn towe nọ yin nuyiwa deji gbọn nuhe hiẹ nọ na ayiha po ahun towe po nado dù dali. (1 Pita 2:1, 2) To whenuena e yindọ hiẹ sọgan klọ dewe gando nuhe ojlo nujọnu towe tọn lẹ yin go, hiẹ ma sọgan klọ Whẹdatọ mítọn, Jesu Klisti gba. (Johanu 5:30) Enẹwutu kanse dewe, ‘Eyin Jesu tin to aigba ji, be winyan na hù mi eyin e biọ ohọ̀ ṣie mẹ bo sè ohàn ṣie kavi mọ nuhe yẹn to pinpọn ya?’ Nugbo hẹnmẹ lẹnnupọn sisosiso lọ wẹ yindọ Jesu to pinpọn bosọ yọn nuyiwa mítọn lẹ.—Osọhia 3:15.
Nọavunte Sọta Nuplọnmẹ Aovi tọn Lẹ
15. Naegbọn Klistiani lẹ dona hoavun sinsinyẹn nado nọavunte sọta nuplọnmẹ aovi tọn lẹ?
15 Kọgbidinamẹnu he aovi lẹ nọ yizan do jọja lẹ ji na yé nido payi nuplọnmẹ yetọn lẹ po sẹhundaga. Gbigbọ ylankan ehelẹ nọ taidi mẹhe nọ zé gbẹzan pekọhẹnwana mẹdetiti afọdopolọji tọn—dehe yin gbẹdudu he vivinamẹ tọn. Nado sọgan hẹn homẹ Jiwheyẹwhe tọn hun, Moṣe hohowhenu tọn gbẹ́ “nado dugbẹ ylando tọn to ojlẹ pẹvide mẹ” dai taidi hagbẹ́ nukundeji whédo Falo tọn de. (Heblu lẹ 11:24-27) E ma bọawu nado gbẹ́ nuhe aovi lẹ nọ zedonukọnnamẹ dai gba, enẹwutu hiẹ dona hoavun sinsinyẹn nado wà nuhe jlọ. Ehe na titengbe tọn yin nugbo na mí ko dugu ylando tọn podọ ahún mítọn lẹ nọ saba jlo nado wà nuhe ylan. (Gẹnẹsisi 8:21; Lomunu lẹ 5:12) Na ayilinlẹn ylando tọn ehelẹ wutu, yèdọ e lẹzun dandannu na apọsteli Paulu lọsu nado sinyẹn nukun do ede ji bo ma na dotẹnmẹ ojlo agbasa tọn lẹ nado dugan do e ji.—1 Kọlintinu lẹ 9:27; Lomunu lẹ 7:21-23.
16. Nawẹ jọja lẹ sọgan nọavunte sọta kọgbidinamẹnu lẹ nado doalọ to walọ mawe mẹ gbọn?
16 Dile e tlẹ yindọ hiẹ sọgan yin whiwhlepọn nado “hodo agundaho de nado wà oylan,” Jiwheyẹwhe sọgan gọalọna we nado nọavunte sọta kọgbidinamẹnu sọn hagbẹ́ towe lẹ si nado doafọna yanwle agọ yetọn lẹ. (Eksọdusi 23:2; 1 Kọlintinu lẹ 10:13) Ṣigba hiẹ dona dotoai hlan anademẹ Jiwheyẹwhe tọn lẹ, bo hẹn nudọnamẹ etọn lẹ zun adọkunnu to ahun towe mẹ. (Psalm 119:9, 11) Hiẹ dona yọnẹn dọ to whenuena jọja lẹ tin to yede ṣokẹdẹ, ojlo zanhẹmẹ tọn lẹ sọgan fọndote bo dekọtọn do osẹ́n Jiwheyẹwhe tọn lẹ gbigbà mẹ. Jọja dopo dọmọ: “To whenuena yẹn tin yẹn ṣokẹdẹ po họntọn ṣie sunnu po, agbasa ṣie nọ jlo nado wà onu de bọ apọ̀n ṣie nọ dọna mi nado wà onu devo.” Enẹwutu yọn dogbo towe lẹ bo mọnukunnujẹemẹ dọ ayiha towe yin oklenọ. (Jẹlemia 17:9) Ma klan dewe do ovò blo. (Howhinwhẹn lẹ 18:1) Mì zé dogbo lẹ dai na owanyi didohia. Podọ dehe yin nujọnu hugan, hẹn haṣinṣan pẹkipẹki go hẹ mẹhe yiwanna Jehovah podọ mẹhe tindo osi he siso na osẹ́n etọn lẹ.—Psalm 119:63; Howhinwhẹn lẹ 13:20; 1 Kọlintinu lẹ 15:33.
17. Etẹwẹ sọgan gọalọna jọja Klistiani lẹ nado mọ huhlọn yí nado nọavunte sọta nuplọnmẹ aovi tọn lẹ?
17 Yíyí sọwhiwhe do plọn owe Klistiani tọn lẹ he yin awuwlena na huhlọn tintindo gbigbọmẹ tọn towe na gọalọna we. Di dohia, lẹnnupọn do owe lọ Jọja Whenu Towe—Mimọ Dagbe Hugan Lọ Yí Sọn e Mẹ podọ weta lọ “Avunhiho lọ Nado Wà Nuhe Jlọ” to owe Hiẹ Sọgan Nọgbẹ̀ Kakadoi to Paladisi mẹ to Aigba Ji mẹ. Gbọna nuplọnmẹ Owe wiwe tọn he yin awuwlena lẹ ni biọ ayiha po ahún towe po mẹ, podọ e na hẹnwe lodo. Nugbo he hiẹ ma dona wọnji e go gbede wẹ yin dọ to aihọn he yin anadena gbọn aovi dali ehe mẹ nuhe jlọ wiwà ma nọ bọawu gba. Enẹwutu hoavun sinsinyẹn. (Luku 13:24) Hẹn huhlọn gbigbọmẹ towe tọn lodo. Ma doafọna gbẹtọ madogannọ, buditọ he nọ payì nuhe agundaho lọ nọ basi lẹ go blo.
Mọaleyi sọn Mẹpinplọn sọn Olọn Mẹ Wá Mẹ
18. Etẹwẹ yin delẹ to alemọyinu pipayì mẹpinplọn sọn olọn mẹ wá go tọn lẹ mẹ?
18 Flin ga, dọ hiẹ ma na gbọ nudepope he yin dagbe go gbọn pipayì nuplọnmẹ Jehovah tọn go gba. Ewọ yiwanna we na nugbo tọn, podọ enẹwutu wẹ e do to ‘pinplọn we na ale.’ (Isaia 48:17) Enẹwutu payì nuplọnmẹ Jehovah tọn go, bo dapana ayimajai ayìhadawhẹnamẹnu kúkú tọn, hẹnbu osi mẹdetiti tọn, homimọ he yè ma jlo lẹ, asamẹzọn lẹ, kavi nugbajẹmẹji taidi ehe nkọtọn lẹ. Homẹ Jehovah tọn nọ hùn to whenuena devizọnwatọ etọn lẹ wleawu gblọndo lọ tọn na ẹn hlan avùnnukundiọsọmẹnu Satani tọn lọ dọ gbẹtọvi lẹ ma na gbọṣi nugbonọ-yinyin mẹ hlan Jiwheyẹwhe to whlepọn glọ. (Job 1:6-12) Eyin hiẹ hẹn homẹ Jehovah tọn hun gbọn nugbonọ-yinyin hlan ẹn dali, hiẹ na lùntọ́n to whenue e na hẹn whẹdida nukunbibia tọn ṣẹ sọta aihọn ehe, to whenuena mẹhe vẹtoli na osẹ́n etọn lẹpo na yin vivasudo.—Howhinwhẹn lẹ 27:11; 1 Kọlintinu lẹ 6:9, 10; 1 Johanu 2:17.
19. Etẹwẹ yin nuhọakuẹ gbẹdido hẹ mẹhe yọn pinpẹn alemọyinu nuplọnmẹ Jehovah tọn lẹ?
19 Eyin hiẹ nọ dogbẹ́ pẹkipẹki hẹ mẹhe yọn pinpẹn nuhe Jehovah ko wà na yé lẹ tọn, hiẹ sọgan plọnnu sọn numimọ yetọn mẹ. Mẹhe ko peve to amasin adínọ ṣiṣizan mẹ dai de podọ he ko doalọ to walọ mawe mẹ basi zẹẹmẹ dọmọ: “Eyin yẹn ma ko dotoai hlan Jehovah wẹ, yẹn na ko kú. Mẹhe yẹn na ko wlealọ hẹ ko kú na SIDA wutu. Gbẹdohẹmẹtọ aihọnmẹnu ṣie dai tọn lẹpo ko kú na SIDA kavi tin to aliho okú tọn ji. Yẹn nọ saba mọ yé to alihogbo lẹ ji, podọ yẹn nọ dọnudo Jehovah egbesọ egbesọ na osẹ́n etọn lẹ he nọ deanana omẹ etọn lẹ podọ na hẹn mí gbọṣi wiwenọ-yinyin mẹ eyin mí sọgan yí yé do yizan mẹ kẹdẹ. Yẹn ma ko tindo ayajẹ, pekọ, po hihọ́ po sọle to gbẹzan ṣie mẹ pọn gbede gba.” Na nugbo tọn, nuplọnmẹ Jehovah tọn lẹ hihodo nọ saba yin alenu na mí!
Basi Nudide he Sọgbe
20, 21. (a) Nudide awe tẹlẹ wẹ jọja lẹ tindo? (b) Alemọyinu tẹgbẹ tọn tẹ wẹ na dekọtọn sọn pipayì nuplọnmẹ sọn olọn mẹ wá go mẹ?
20 Mí vẹ mì jọja lẹ: Mì basi nudide he sọgbe lẹ gbọn Jehovah sinsẹ̀n dali. Enẹgodo magbè nado tẹdo nudide enẹ go. (Jọṣua 24:15) Na taun tọn, nudide dopo gee wẹ mì sọgan basi to nudide awe ṣẹnṣẹn. Jesu dọ dọ aliho gbigblo gblagada de tin—dehe bọawu lọ na wiwà nuhe jlo mẹdetiti. Aliho enẹ planmẹ sọyì vivọnu okú tọn, yèdọ vasudo. Aliho awetọ bó. Eyin aliho he vẹawu de nado zingbejizọnlin gbọn e ji to aihọn walọ mawe, he yin anadena gbọn aovi dali ehe mẹ. Ṣigba to godomẹ aliho enẹ na plan mẹhe to gbejizọnlin zìn gbọn e ji lẹ sọyi aihọn yọyọ jiawu Jiwheyẹwhe tọn mẹ. (Matiu 7:13, 14) Aliho detẹ wẹ hiẹ na hodo? Nuplọnmẹ mẹnu tọn go wẹ hiẹ na payì?
21 Jehovah jó dide lọ do do alọ towe mẹ. E ma nọ tẹnpọn nado hẹnwe po huhlọn po nado sẹ̀n ẹn gba. “Yẹn ko zé ogbẹ̀ po okú po ... do nukọn towe,” wẹ yẹwhegan Jiwheyẹwhe tọn Moṣe dọ, bo vẹvẹ dọmọ: “De ogbẹ̀.” Nudide ehe nọ yin bibasi “nado nọ yiwanna Oklunọ lọ Jiwheyẹwhe towe, nado setonuna ogbè etọn, podọ nado nọ dọnsẹpọ jẹ e de.” (Deutelonomi 29:2; 30:19, 20) Na hiẹ ni basi nudide po nuyọnẹn po nado nọ payì nuplọnmẹ sọn olọn mẹ wá go bo duvivi ogbẹ̀ mavọmavọ tọn to aihọn yọyọ gigonọ Jiwheyẹwhe tọn mẹ. (Pọ́n w-F 15/5/94, weda 15.)
Nawẹ Hiẹ Na Na Gblọndo Gbọn?
◻ Mẹnu wẹ aovi lẹ yin, podọ etẹwẹ yé nọ plọnmẹ?
◻ Nawẹ aovi lẹ nọ nọgodona nuplọnmẹ yetọn lẹ to egbehe gbọn?
◻ Nawẹ e yọnbasi nado nọavunte sọta nuplọnmẹ aovi tọn lẹ gbọn?
◻ Etẹwẹ yin alemọyinu nuplọnmẹ Jehovah tọn lẹ go pipayì tọn?
[Yẹdide to weda 10]
Jẹnukọnna Sìngigọ lọ, angẹli tolivẹtọ lọ lẹpo ovi yetọn lẹ po nọgodo na danuwiwa po wantuntun po
[Yẹdide to weda 12]
Be winyan na hù we eyin Jesu sè ohàn he hiẹ yiwanna hugan ya?