Jesu Plọn Mí Nado Nọ Hodẹ̀

BE HIẸ nọ dọho hẹ Jehovah Jiwheyẹwhe ya?⁠— Ewọ jlo dọ hiẹ ni nọ dọho hẹ emi. Hodidọ hẹ Jiwheyẹwhe nọ yin yiylọdọ odẹ̀. Jesu nọ saba dọho hẹ Otọ́ etọn olọn mẹ tọn. E nọ jlo to whedelẹnu nado tin ede ṣokẹdẹ to whenuena e to hodọ hẹ Jiwheyẹwhe. Biblu dọ dọ, to gbèdopo, ‘E hẹji yì osó ji ewọ ṣokẹdẹ nado hodẹ̀. Whenuena ozán kú, ewọ dopokẹdẹ wẹ tin to finẹ.’—Matiu 14:23.

Fie wẹ hiẹ lọsu sọgan yì nado hodẹ̀ hiẹ ṣokẹdẹ hlan Jehovah?⁠— Vlavo hiẹ ṣokẹdẹ sọgan dọho hẹ Jehovah whẹpo do yìhọ to zánmẹ. Jesu dọmọ: “Whenuena hiẹ to dẹ̀ho, biọ abò towe mẹ, whenuena hiẹ sú ohọ̀n towe, hodẹ̀ hlan Otọ́ towe.” (Matiu 6:6) Be a nọ hodẹ̀ hlan Jehovah to ozán lẹpo mẹ whẹpo do yìhọ ya?⁠— A dona nọ wàmọ.

Jesu sọ hodẹ̀ to whenuena mẹdevo lẹ tin topọ hẹ ẹ. To whenuena họntọn etọn Lazalọsi kú, Jesu hodẹ̀ dopọ hẹ mẹdevo lẹ to fie yè dì Lazalọsi do. (Johanu 11:41, 42) Podọ Jesu sọ nọ hodẹ̀ to whenuena e to opli basi hẹ hodotọ etọn lẹ. Be hiẹ nọ yì opli lẹ to fie odẹ̀ nọ yin hihò te ya?⁠— Mẹhe ko whẹ́n de wẹ nọ saba hodẹ̀ to finẹ. Nọ dotoai ganji na nuhe e to didọ lẹ, na e to hodọ hẹ Jiwheyẹwhe do ota towe mẹ wẹ. Whenẹnu hiẹ na penugo nado dọ “Niṣẹ” na odẹ̀ lọ. Be a yọ́n nuhe “Niṣẹ” didọ to vivọnu odẹ̀ tọn zẹẹmẹdo ya?⁠— E zẹẹmẹdo dọ a yiwanna odẹ̀ lọ. E sọ zẹẹmẹdo dọ a kẹalọyi odẹ̀ lọ bo jlo dọ e ni yin odẹ̀ hiẹ lọsu tọn.

Jesu sọ nọ hodẹ̀ to núdùdù whenu. E nọ dopẹna Jehovah na núdùdù he e jlo na dù. Be hiẹ lọsu nọ hodẹ̀ to whepoponu whẹpo do dùnú ya?⁠— E jẹ dọ mí ni nọ dopẹna Jehovah whẹpo do jẹ núdù ji. E sọgan yin mẹdevo wẹ na hodẹ̀ to whenuena mí jlo na dùnú dopọ. Ṣigba eyin hiẹ dopo wẹ jlo na dùnú lo? Kavi eyin a jlo na dùnú hẹ mẹhe ma nọ dopẹna Jehovah whẹpo do dùnú lẹ, etẹwẹ a na basi?⁠— A dona hodẹ̀ na dewe.

Be dandan wẹ e yin nado nọ hodẹ̀ daga to whepoponu ya? Kavi be Jehovah sọgan sè nuhe dọ a te eyin a hodẹ̀ towe do ayiha mẹ ya?⁠— Mí sọgan mọ gblọndo lọ to nuhe jọ do Nẹhemia go mẹ. Nẹhemia yin Jehovah sẹ̀ntọ de he nọ wazọ́n to owhé Ahọlu Altakẹlikesi Pẹlsia tọn gbè. To gbèdopo, Nẹhemia blawu taun na e sè dọ adó Jelusalẹm tọn, heyin tòdaho omẹ etọn lẹ tọn ko yin hihọ́ liai.

To whenuena ahọlu lọ kanbiọ Nẹhemia nuhewutu e blawu sọmọ, Nẹhemia hodẹ̀ do ayiha mẹ whẹ́. Enẹgodo, e dọ nuhe zọ́n bọ e do blawu na ahọlu lọ, bo biọgbè ahọlu nado yì Jelusalẹm bo vọ́ adó lọ dó. Etẹwẹ yin kọdetọn lọ?⁠—

Jiwheyẹwhe sè odẹ̀ Nẹhemia tọn. Ahọlu yigbe dọ e sọgan yì! Ahọlu lọ tlẹ sọ na atin susu Nẹhemia nado yido dó adó lọ lẹ. Enẹwutu Jiwheyẹwhe sọgan sè odẹ̀ mítọn lẹ nugbonugbo, eyin mí tlẹ hodẹ̀ do ayiha mẹ.—Nẹhemia 1:2, 3; 2:4-8.

Todin, lẹnnupọndo ehe ji. Be a dona nọ dokọdò to whenuena a to dẹ̀ho wẹ ya? Kavi be a dona nọ jẹklo wẹ ya? Etẹwẹ a lẹn?⁠— Jesu nọ jẹklo to whedelẹnu eyin e to dẹ̀ho. To ojlẹ delẹ mẹ e nọ ṣite. Podọ to ojlẹ devo mẹ e ze ota etọn daga hlan olọn to whenuena e to dẹ̀ho, dile e basi do to whenuena e hodẹ̀ do ota Lazalọsi tọn mẹ.

Etẹwẹ ehe dohia?⁠— E dohia dọ lehe a nọ̀ do hodẹ̀ ma yin nujọnu lọ gba. E nọ yọ́n to whedelẹnu nado dokọdò bo miọn nukun towe lẹ. To whedevonu, a sọgan jlo nado jẹklo dile Jesu basi do. Ṣigba, flindọ mí sọgan hodẹ̀ hlan Jiwheyẹwhe to whedepopenu, vlavo to okle kavi to zánmẹ, bọ e na sè odẹ̀ mítọn. Nujọnu hugan lọ wẹ yindọ mí ni yise nugbonugbo dọ Jehovah to todoai na mí. Be hiẹ yise dọ Jehovah nọ sè odẹ̀ towe lẹ ya?⁠—

Etẹwẹ mí sọgan dọ to odẹ̀ mítọn lẹ mẹ hlan Jehovah?⁠— Dọna mi: Eyin a to dẹ̀ho, etẹwẹ a nọ dọna Jiwheyẹwhe?⁠— Jehovah nọ na mí onú dagbedagbe susu ehe mí dona dopẹna, kavi e mayin mọwẹ?⁠— Mí sọgan dopẹna ẹn na núdùdù he e nọ na mí. Ṣigba be a ko dopẹna ẹn pọ́n na agahomẹ whanpẹnọ lẹ, atin whanpẹnọ lẹ, po vounvoun dagbedagbe lẹ po ya?⁠— Ewọ wẹ basi onú helẹ ga.

To gbèdopo, hodotọ Jesu tọn lẹ biọ to e si nado plọn yé lehe yé sọgan hodẹ̀ gbọn. Enẹwutu Mẹplọntọ Daho lọ plọn yé, bo do nuhe yin nujọnu hugan he yé sọgan nọ biọ to odẹ̀ mẹ lẹ hia. Be a yọ́n onú lọ lẹ ya?⁠— Ze Biblu towe bo hùn Matiu weta 6. To wefọ 9 jẹ 13 mẹ, mí mọ odẹ̀ de he mẹsusu nọ ylọdọ Odẹ̀ Oklunọ tọn. Wá mí ni hia ẹ dopọ.

Mí plọn tofi dọ Jesu dọna mí nado nọ hodẹ̀ dogbọn oyín Jiwheyẹwhe tọn dali. E dọ dọ mí ni nọ hodẹ̀ dọ oyín Jiwheyẹwhe tọn ni yin kinklandowiwe, kavi yin hihiọ. Nawẹ yinkọ Jiwheyẹwhe tọn nọ yin?⁠— Jehovah wẹ, podọ mí dona yiwanna oyín lọ.

Awetọ, Jesu plọn mí nado nọ hodẹ̀ na wiwá Ahọluduta Jiwheyẹwhe tọn. Ahọluduta ehe yin nujọnu na e na hẹn jijọho wá aigba ji bo na diọ aigba zun paladisi.

Atọ̀ntọ, Mẹplọntọ Daho lọ dọ dọ mí ni nọ hodẹ̀ na ojlo Jiwheyẹwhe tọn nido yin wiwà to aigba ji dile e te do to olọn mẹ. Eyin mí nọ hodẹ̀ na ehe, e jẹ dọ mí ni nọ wà nuhe Jiwheyẹwhe jlo ga.

Humọ, Jesu plọn mí nado nọ hodẹ̀ na núdùdù he mí na dù egbesọegbesọ. E sọ dọ dọ mí dona nọ vẹvẹna Jiwheyẹwhe to whenuena mí ṣinuwa. Podọ mí dona nọ biọ dọ Jiwheyẹwhe ni jona mí. Ṣigba whẹpo e na jona mí, mí dona nọ jona mẹdevo lẹ eyin yé ṣinuwa do mí go. Be e nọ bọawuna we nado wà enẹ ya?⁠—

To godo mẹ, Jesu dọ dọ mí ni nọ hodẹ̀ dọ Jehovah Jiwheyẹwhe ni basi hihọ́na mí sọn mẹylankan, Satani Lẹgba si. Enẹwutu, onú ehe lẹpo wẹ yin onú dagbe he mí sọgan biọ Jiwheyẹwhe to odẹ̀ mẹ.

Mí dona yise dọ Jehovah nọ sè odẹ̀ mítọn lẹ. To yidogọmẹ na alọgọ etọn bibiọ, mí dona nọ dopẹna ẹn to whepoponu. Homẹ etọn nọ hùn eyin nuhe mí dọ to odẹ̀ mẹ lẹ wá sọn ahun mẹ podọ eyin nuhe mí biọ lẹ yin nuhe sọgbe. E nasọ na mí onú lọ lẹ. Be a yí ehe sè ya?⁠—