Nuhewutu Jí Dona Nọ Jonamẹ

BE MẸDE ko ṣinuwa do we pọ́n ya?⁠— Be mẹlọ wà nuhe vẹna we wẹ kavi e zùn we?⁠— Be hiẹ lọsu dona yiahọsu to e go wẹ ya?⁠—

Mẹsusu wẹ nọ yiahọsu eyin mẹde wà nude do yé. Ṣigba Jesu plọnmẹ dọ mí dona nọ jona mẹhe ṣinuwa do mí lẹ. (Matiu 6:12) Ṣigba etẹwẹ mí na wà eyin mẹde nọ dinho mí whlasusu? Whla nẹmu wẹ mí dona jona ẹn?⁠—

Nuhe Pita jlo na yọnẹn niyẹn. Enẹwutu, e kanbiọ Jesu to gbèdopo dọmọ: ‘Be dandan wẹ yẹn dona jona mẹde kaka yì whla ṣinawe ya?’ Ṣigba whla ṣinawe ma ko pé gba. Jesu dọmọ: ‘A dona jona mẹlọ whla kandegbàn-atọ́n-nukunawe’ eyin e to nuṣiwa do gowe kakajẹ sọha enẹ.

Sọha enẹ sù taun! Mí ma tlẹ sọgan penugo nado hia nuṣiwa kavi nuwayindo mẹdevo tọn kakajẹ sọha enẹ gba, kavi e mayin mọwẹ? Podọ nuhe Jesu to didọna mí wẹ yindọ: Mí ma dona tẹnpọn nado nọ flin whla nẹmu he mẹdevo lẹ ṣinuwa do mí go gba. Eyin yé biọ jona, mí dona nọ jona yé.

Jesu jlo na dohia devi etọn lẹ lehe eyin nujọnu nado nọ jonamẹ do. Enẹwutu to whenuena e ko na gblọndo kanbiọ Pita tọn pó godo, e pìntàn de na hodotọ etọn lẹ. Be a jlo na sè otàn lọ ya?⁠—

Ahọlu dagbe de tin to ojlẹ de mẹ wayi. E jọmẹ taun. E tlẹ nọ yàn akuẹ na afanumẹ etọn lẹ eyin yé tindo nuhudo alọgọ tọn. Ṣigba to whenuena azán lọ pé bọ ahọlu lọ jlo dọ afanumẹ he duahọ do e lẹ ni sú ahọ́ he yé dù lẹ, dopo to afanumẹ heyin hinhẹnwa lọ lẹ mẹ dù akuẹ livi donu 60 do ahọlu lọ. Akuẹ lọ sù taun!

Ṣigba afanumẹ lọ ko zan akuẹ he ahọlu yàn na ẹn lẹpo bo ma sọgan suahọ he e dù do ahọlu ba. Enẹwutu ahọlu lọ degbè dọ afanumẹ lọ ni yin sisà. Ahọlu lọ sọ dọ dọ asi etọn po ovi etọn lẹ po gọna nuhe e tindo lẹpo ni yin sisà. To whenẹnu, akuẹ he yemẹpo yin sisà yin na yin yiyido suahọ he e dù do ahọlu. Etẹwẹ hiẹ lẹndọ e na yin numọtolanmẹ afanumẹ ehe tọn?⁠—

E jẹklo to ahọlu lọ nukọn bo vẹvẹ dọmọ: ‘Jaale, na mi whenu pẹvide dogọ, yẹn na suahọ towe lẹpo we.’ Eyin hiẹ wẹ yin ahọlu lọ, etẹwẹ a na wà na afanumẹ lọ?⁠— Lẹblanu afanumẹ lọ tọn wà ahọlu lọ. Enẹwutu ahọlu lọ jona ẹn. E dọna afanumẹ lọ dọ emi jo akuẹ livi donu 60 lọ lẹpo na ẹn mlẹnmlẹn. Lehe enẹ dona ko hẹn afanumẹ lọ jaya do sọ!

Ṣigba etẹwẹ afanumẹ ehe basi to enẹgodo? To whenuena e tọ́njẹgbonu, e mọ afanumẹ hatọ etọn devo he dù akuẹ kanweko tata do e. E wle awù dokọna afanumẹ hatọ ehe bo jẹ okọ̀ finyọ́n na ẹn ji, bo dọmọ: ‘Sú akuẹ kanweko he a dù do mi lọ na mi!’ Be a lẹndọ gbẹtọ sọgan wàmọ na hatọ etọn, titengbe to whenuena ahọ́ daho he ewọ dù do ahọlu ko yin jijona ẹn pó godo ya?⁠—

E blawu dọ afanumẹ he dù akuẹ kanweko do e lọ yin hẹntọnọ de. E ma sọgan suahọ lọ to afọdopolọji. Enẹwutu e jẹklo to nukọn na afanumẹ hatọ etọn bo vẹvẹ na ẹn dọ: ‘Jaale, na mi whenu pẹvide dogọ, yẹn na suahọ towe lẹpo we.’ Be dawe lọ na whenu afanumẹ hatọ etọn dogọ wẹ ya?⁠— Eyin hiẹ wẹ, etẹwẹ a na ko wà?⁠—

Dawe ehe ma jọmẹ di ahọlu lọ gba. E jlo na yí akuẹ etọn to afọdopolọji. Ṣigba na afanumẹ hatọ etọn ma penugo nado suahọ lọ wutu, e wle e do gànpamẹ. Afanumẹ devo lẹ mọ nuhe jọ lẹpo, bọ homẹ yetọn ma hùn dego. Lẹblanu afanumẹ he yin wiwle do gànpamẹ lọ tọn wà yé. Enẹwutu yé yì jẹwhẹ na ahọlu.

Homẹ ahọlu lọ lọsu tọn ma hùn na nuhe jọ. Homẹgble e tlala do afanumẹ he ma jonamẹ lọ go. Enẹwutu e ylọ ẹ bo dọna ẹn dọ: ‘Hiẹ afanumẹ ylankan, be yẹn ma jo ahọ́ he a dù do mi lẹpo na we ya? Be hiẹ lọsu ma dona jona afanumẹ hatọ towe ya?’

Afanumẹ he ma jonamẹ lọ dona ko plọnnu sọn ahọlu dagbe lọ dè. Ṣigba e ma wàmọ. Enẹwutu ahọlu degbè dọ afanumẹ he ma jonamẹ lọ ni yin wiwle do gànpamẹ kakajẹ whenuena e na sú akuẹ livi donu 60 he e dù lẹpo. Podọ na nugbo tọn, e ma sọgan mọ akuẹ depope to gànpamẹ nado suahọ he e dù do ahọlu gba. Enẹwutu gànpamẹ wẹ e na kú do.

To whenuena Jesu pìntàn lọ fó, e dọna hodotọ etọn lẹ dọmọ: “Mọkẹdẹ ga wẹ Otọ́ ṣie olọn tọn na wà hlan mì do, eyin dopodopo mìtọn sọn ayiha mìtọn mẹ ma jona mẹmẹsunnu [mìtọn] lẹ.”—Matiu 18:21-35.

Todin, a sọgan mọdọ mímẹpo wẹ duahọ daho do Jiwheyẹwhe. Na nugbo tọn, Jiwheyẹwhe dè wẹ ogbẹ̀ mítọn lọsu wá sọn! Enẹwutu ahọ́ vude poun wẹ mẹdevo lẹ nọ dù do mí, eyin mí yí ì jlẹdo dehe mí dù do Jiwheyẹwhe go. Ahọ́ he mẹdevo lẹ dù do mí tin taidi akuẹ kanweko he afanumẹ diẹ lọ dù do awetọ etọn. Ṣigba ahọ́ he mí dù do Jiwheyẹwhe na ylando mítọn lẹ wutu tin taidi akuẹ livi donu 60 he afanumẹ lọ dù do ahọlu lọ.

Jiwheyẹwhe yin homẹdagbenọ taun. Eyin mí tlẹ waylando, e nọ jona mí. E ma nọ hẹn mí nado suahọ lọ gbọn ogbẹ̀ mítọn yíyí kakadoi dali gba. Ṣigba nuplọnmẹ he mí dona nọ flin lọ wẹ yindọ: Jiwheyẹwhe na nọ jona mí eyin mí nọ jona mẹhe ṣinuwa do mí go lẹ. E jẹ dọ mí ni lẹnnupọndo ehe ji, kavi e mayin mọwẹ?⁠—

Enẹwutu eyin mẹde wà nude jẹagọdo we ṣigba bo vẹvẹna we to godo mẹ, etẹwẹ a na wà? Be a na jona ẹn ya?⁠— Ṣigba etẹwẹ a na basi eyin mẹlọ wà onú dopolọ whlasusu? Be a na gbẹ́ jona ẹn ya?⁠—

Eyin hiẹ wẹ to jona biọ, a na jlo dọ mẹlọ ni jona we, kavi e mayin mọwẹ?⁠— Enẹwutu mílọsu dona nọ jona mẹdevo lẹ. Mí ma dona nọ dọ po onù po poun dọ mí ko jona ẹn gba, ṣigba mí dona nọ jonamẹ sọn ahun mítọn mẹ. Eyin mí nọ wàmọ, mí to didohia dọ mí jlo na yin hodotọ Mẹplọntọ Daho lọ tọn nugbonugbo.