Etẹwẹ Yin Nujọnu Hugan?

DAWE de wá Jesu dè to gbèdopo. E yọnẹn dọ Jesu yọnnuin taun, enẹwutu e dọna ẹn dọmọ: ‘Mẹplọntọ, dọna nọvisunnu ṣie ni na mi delẹ to nuhe e tindo lẹ mẹ.’ Dawe lọ mọdọ e jẹ dọ emi ni yí delẹ to nuhe to nọvisunnu emitọn si lẹ mẹ.

Eyin hiẹ wẹ yin Jesu, etẹwẹ a na ko dọ?⁠— Jesu mọdọ dawe lọ tindo nuhahun de. Ṣigba nuhahun lọ mayin dọ e tindo nuhudo nuhe tin to nọvisunnu etọn si lẹ tọn gba. Nuhahun dawe lọ tọn wẹ yindọ e ma yọ́n nuhe yin nujọnu hugan to gbẹ̀mẹ.

Gbọ mí ni lẹnnupọn dopọ. Etẹwẹ dona yin nujọnu hugan na mí? Be aihundanu dagbe lẹ tintindo wẹ ya, kavi avọ̀ yọyọ lẹ, kavi onú mọnkọtọn lẹ?⁠— Lala, onú devo tin he yin nujọnu hugan. Podọ ehe wẹ yin nuhe Jesu jlo na plọn dawe lọ. Enẹwutu e pìntàn dawe de tọn he wọnji Jiwheyẹwhe go. Be a jlo na sè otàn lọ ya?⁠—

Dawe de tin bo yin adọkunnọ taun. E tindo aigba po zínhọ susu po. Jinukun he e dó lẹ de sinsẹ́n susu tọ́n. Bọ otẹn he tin to zínhọ etọn lẹ mẹ ma pé nado hẹn sinsẹ́n lọ lẹ. Enẹwutu, etẹwẹ e na wà? Todin, e lẹnnupọn to ede mẹ dọ: ‘Yẹn na họ́ zínhọ ṣie lẹ liai bo na gbá daho devo lẹ. Enẹgodo yẹn na bẹ sinsẹ́n ṣie lẹ po onú dagbe ṣie lẹpo po do zínhọ yọyọ ehelẹ mẹ.’

Dawe adọkunnọ ehe lẹndọ afọdide he yin nuyọnẹnnu hugan lọ niyẹn. E lẹndọ emi yọnnuin taun wẹ zọ́n bọ emi do bẹ onú susu pli. Enẹwutu e dọna ede dọ: ‘Yẹn ko bẹ nususu pli. Adọkunnu lọ lẹ na hẹn mi na owhe susu. Yẹn sọgan vò fẹẹ todin. Bo na to dùdù, bo to nùnù, bosọ to gbẹdu.’ Ṣigba nude jẹdò to nulẹnpọn dawe adọkunnọ lọ tọn mẹ. Be a yọ́n nulọ ya?⁠— E to nulẹnpọn dogbọn edetiti po gbẹdudu etọn po kẹdẹ dali. E wọnji Jiwheyẹwhe go.

Enẹwutu Jiwheyẹwhe dọho na dawe adọkunnọ lọ. E dọna ẹn dọmọ: ‘Hiẹ dawe nulunọ. Hiẹ na kú to ozán ehe mẹ. To whenẹnu mẹnu tọn wẹ adọkunnu he a bẹpli lẹ na yin?’ Be dawe adọkunnọ enẹ sọgan zan adọkun enẹlẹ to okú etọn godo ya?⁠— Lala, mẹdevo wẹ na dugu nulọ lẹ tọn. Jesu dọmọ: “Mọkẹdẹ wẹ [e na yin na] ewọ he bẹ adọkunnu pli na ede, bo ma yin adọkunnọ gbọn Jiwheyẹwhe dali.”—Luku 12:13-21.

Hiẹ ma na jlo nado di dawe adọkunnọ ehe, kavi e mayin mọwẹ ya?⁠— Yanwle etọn lẹpo to gbẹ̀mẹ wẹ yin nutindo agbasa tọn lẹ. Nuṣiwa de wẹ enẹ yin. E nọ jlo nado to adọkun bẹpli to whepoponu. Ṣigba e mayin “adọkunnọ gbọn Jiwheyẹwhe dali.”

Mẹsusu wẹ taidi dawe adọkunnọ enẹ to egbehe. Yé nọ jlo nado to adọkun bẹpli to whepoponu. Ṣigba ehe sọgan planmẹ biọ nuhahun daho lẹ mẹ. Di apajlẹ, a tindo aihundanu lẹ, kavi e mayin mọwẹ?⁠— Aihundanu tẹlẹ wẹ a tindo? Dọna mi.⁠— Eyin dopo to họntọn towe lẹ mẹ tindo bọlu kavi bebevi de kavi aihundanu devo de he hiẹ ma tindo, etẹwẹ a na wà? Be e jẹ dọ a ni dotukla mẹjitọ towe lẹ nado họ̀ aihundanu ehe na we ya?⁠—

To whedelẹnu, aihundanu de sọgan taidi nuhe yin nujọnu taun de. Ṣigba etẹwẹ nọ jọ dego to ojlẹ vude godo?⁠— E nọ dohó. E sọgan gble, bọ a ma na yiwanna ẹn ba. Na nugbo tọn, a tindo nude he họakuẹ taun hugan aihundanu lẹ. Be a yọ́n nulọ ya?⁠—

Ogbẹ̀ towe lọsu wẹ. Ogbẹ̀ towe yin nujọnu taun na eyin a ma tin to ogbẹ̀, a ma sọgan wà nudepope. Ṣigba nado sọgan nọgbẹ̀ a dona wà nuhe nọ hẹn homẹ Jiwheyẹwhe tọn hùn lẹ, kavi e mayin mọwẹ?⁠— Enẹwutu mí ma dona yinuwa di dawe adọkunnọ nulunọ enẹ he wọnji Jiwheyẹwhe go.

E mayin yọpọvu lẹ kẹdẹ wẹ sọgan wà nulunu he dawe adọkunnọ enẹ basi gba. Susu mẹhe ko whẹ́n mẹho lẹ tọn nọ wàmọ ga. Delẹ to yé mẹ nọ jlo nususu hugan nuhe yé tindo. Yé sọgan tindo núdùdù gbèdopo tọn, avọ̀ he yé na dó, po ohọ̀ he mẹ yé na nọ̀ po. Ṣigba ehelẹ ma nọ pé yé. Yé nọ jlo avọ̀ susu. Podọ yé nọ jlo ohọ̀ daho lẹ. Onú ehelẹ nọ biọ akuẹ susu. Enẹwutu yé nọ wazọ́n sinsinyẹn nado mọ akuẹ susu. Podọ lehe akuẹ he yé to mimọ sù sọ, mọwẹ nuhe yé to jijlo lẹ nọ to susu deji do.

Mẹhe ko whẹ́n mẹho delẹ nọ yí whenu susu zan nado to akuẹ dín sọmọ bọ yé ma nọ tindo whenu nado nọpọ́ hẹ whẹndo yetọn. Podọ yé ma nọ tindo whenu he yé na yizan na Jiwheyẹwhe. Be akuẹ yetọn sọgan hẹn yé dogbẹ̀ wẹ ya?⁠— Lala. Be yé sọgan zan akuẹ lọ lẹ to whenuena yé ko kú wẹ ya?⁠— Gbede pọ́n. Na oṣiọ lẹ ma sọgan wà nudepope.—Yẹwhehodọtọ 9:5, 10.

Be ehe dohia dọ e ma sọgbe nado tindo akuẹ wẹ ya?⁠— Lala. Akuẹ wẹ mí nọ yí do họ̀ núdùdù po avọ̀ po. Biblu dọ dọ akuẹ yin hihọ́ de. (Yẹwhehodọtọ 7:12) Ṣigba eyin mí yiwanna akuẹ, mí na jai jẹ nuhahun sinsinyẹn lẹ mẹ. Mí na taidi dawe adọkunnọ nulunọ enẹ he bẹ adọkunnu lẹ pli na ede ṣigba bo ma yin adọkunnọ to nukun Jiwheyẹwhe tọn mẹ.

Etẹwẹ e zẹẹmẹdo nado yin adọkunnọ to nukun Jiwheyẹwhe tọn mẹ?⁠— E zẹẹmẹdo nado ze Jiwheyẹwhe do otẹn tintan mẹ to gbẹzan mítọn mẹ. Mẹdelẹ dọ dọ yé yise to Jiwheyẹwhe mẹ. Yé lẹndọ nado yise kẹdẹ ko pé wẹ. Ṣigba be yé yin adọkunnọ to nukun Jiwheyẹwhe tọn mẹ nugbo ya?⁠— Lala, yé taidi dawe adọkunnọ lọ he wọnji Jiwheyẹwhe go.

Jesu ma wọnji Otọ́ etọn olọn mẹ tọn go pọ́n gbede. E ma tẹnpọn nado dín akuẹ susu gba. Podọ e ma bẹ agbasanu pli gba. Jesu yọ́n nuhe yin nujọnu hugan to gbẹ̀mẹ. Be hiẹ yọ́n nuhe e nẹ yin ya?⁠— Nuhe yin nujọnu hugan lọ wẹ nado yin adọkunnọ to nukun Jiwheyẹwhe tọn mẹ.

Dọna mi, nawẹ mí sọgan yin adọkunnọ to nukun Jiwheyẹwhe tọn mẹ gbọn?⁠— Mí sọgan wàmọ gbọn nuhe nọ hùnhomẹ na Jiwheyẹwhe wiwà dali. Jesu dọmọ: ‘Yẹn nọ wà nuhe nọ hùnhomẹ na ẹn lẹ to whepoponu.’ (Johanu 8:29) Homẹ Jiwheyẹwhe tọn nọ hùn eyin mí wà nuhe e jlo dọ mí ni wà lẹ. Todin dọna mi, etẹlẹ wẹ a sọgan wà nado hẹn homẹ Jiwheyẹwhe tọn hùn?⁠— Mọwẹ, a sọgan hia Biblu, yì opli Klistiani tọn lẹ, hodẹ̀ hlan Jiwheyẹwhe, bo gọalọna mẹdevo lẹ nado plọnnu dogbọn ewọ dali. Ehelẹ wẹ yin nujọnu hugan to gbẹ̀mẹ.

Na Jesu yin adọkunnọ to nukun Jiwheyẹwhe tọn mẹ wutu, Jehovah penukundo e go. E na ale gbẹninọ kakadoi tọn Jesu. Eyin mí yinuwa di Jesu, Jehovah na yiwanna mí bo na penukundo mí go ga. Enẹwutu gbọ mí ni nọ yinuwa di Jesu bo ma taidi dawe adọkunnọ he wọnji Jiwheyẹwhe go lọ gbede blo.