Be Hiẹ Yin “Adọkunnọ Gbọn Jiwheyẹwhe Dali” Ya?
“Mọkẹdẹ wẹ ewọ he bẹ adọkunnu pli na ede bo ma yin adọkunnọ gbọn Jiwheyẹwhe dali.”—LUKU 12:21.
1, 2. (a) Na etẹlẹ wutu wẹ gbẹtọ lẹ nọ yigbe nado basi avọ́sinsan dahodaho lẹ? (b) Avùnnukundiọsọmẹ po owù tẹ po wẹ Klistiani lẹ dona pehẹ?
ADỌKUNNU DINDIN ma yin aihun yọpọvu tọn de poun gba; nujijọ jọnun de wẹ e yin he ko jọ whlasusu to ojlẹ voovo lẹ mẹ to otò susu mẹ. Di apajlẹ, sika dindin he wá aimẹ to owhe kanweko 19tọ whenu to Australie, Afrique du Sud, Canada po États-Unis po dọ̀n gbẹtọ lẹ sọn fidindẹn lẹ. Yé yigbe bo jo owhé po mẹyiwanna yetọn lẹ po do nado yì dín adọkun to otò he yé ma tlẹ yọnẹn lẹ mẹ, ehe sọgan bẹ owù hẹn to whedelẹnu. Mọwẹ, mẹsusu wẹ nọ yigbena owù sinsinyẹn lẹ bo nọ basi avọ́sinsan he sẹhundaga lẹ nado mọ adọkunnu he ahun yetọn to jijlo lẹ.
2 Dile etlẹ yindọ suhugan gbẹtọ lẹ tọn ma to mahẹ tindo to adọkunnu dindin paa de mẹ to egbehe, yé dona wazọ́n sinsinyẹn nado mọ dandannu gbẹ̀mẹ tọn lẹ. Nado wà enẹ to aihọn egbezangbe tọn mẹ sọgan yin avùnnukundiọsọmẹnu, apọṣimẹnu, po agbanpẹnmẹnu po. E bọawu nado jẹ nuhà ji zẹjlẹgo gando núdùdù, avọ̀, po adọtẹn po go sọmọ bọ nuhe yin nujọnu hugan lẹ na yin vọdona kavi tlẹ yin jiwọn e go. (Lomunu lẹ 14:17) Jesu na apajlẹ kavi oló de he do ayilinlẹn gbẹtọvi tọn ehe hia hezeheze. Oló ehe tin to Luku 12:16-21 mẹ.
3. Dọ oló Jesu tọn he yin kinkàndai to Luku 12:16-21 to kleun mẹ.
3 Jesu dó oló lọ to ojlẹ dopolọ he mẹ e dọho gando nuhudo lọ nado payi do nukunkẹn go, ehe mí gbadopọnna to gigọ́ mẹ to hosọ he jẹnukọn mẹ. To avase nina sọta nukunkẹn godo, Jesu dọho gando dawe adọkunnọ de go, he ma tindo pekọ to zínhọ etọn he gọ́ na onú dagbe he e ko tindo to alọnu lẹ mẹ, ṣigba họ́ yé liai bo gbá daho devo lẹ nado bẹ sinsẹ́n susu pli dogọ. To whelọnu pẹẹ he e lẹndọ ojlẹ ko sọ̀ nado gbọjẹ bo duvivi gbẹzan awuvivo tọn, Jiwheyẹwhe dọna ẹn dọ ogbẹ̀ etọn na wá vivọnu podọ nuhe e ko bẹpli lẹpo na lẹzun mẹdevo tọn. Enẹgodo Jesu dotana dọmọ: “Mọkẹdẹ wẹ ewọ he bẹ adọkunnu pli na ede, bo ma yin adọkunnọ gbọn Jiwheyẹwhe dali.” (Luku 12:21) Etẹwẹ mí sọgan plọn sọn oló ehe mẹ? Nawẹ mí sọgan yí nuplọnmẹ lọ zan to gbẹzan mítọn titi mẹ gbọn?
Dawe He Pannukọn Nuhahun De
4. Gbẹtọ wunmẹ tẹwẹ mí sọgan dọ dọ e yin zẹẹmẹ basina to oló Jesu tọn mẹ?
4 Apajlẹ he Jesu na lọ ma yin nuyọyọ na mí. Mí doayi e go dọ Jesu bẹ otàn lọ jẹeji po hogbe helẹ po poun dọmọ: “Aigba dawe adọkunnọ de tọn hẹn sinsẹ́n susu jẹgbonu.” Jesu ma dọ dọ aliho oklọ tọn he ma sọgbe hẹ osẹ́n lẹ wẹ dawe lọ yizan nado mọ adọkunnu etọn lẹ gba. To hogbe devo mẹ, dawe lọ ma yin didohia taidi mẹylankan de gba. Na nugbo tọn, sọn nuhe Jesu dọ lẹ mẹ, e sọgbe hẹ lẹnpọn dagbe nado lẹndọ dawe he yin zẹẹmẹ basina to oló lọ mẹ ko wazọ́n sinsinyẹn. E whè gbau mí sọgan mọnukunnujẹemẹ dọ mẹde wẹ e yin he nọ basi tito hlan nukọn bo nọ wleawudai na sọgodo, vlavo na e nọ hò dagbemẹninọ whẹndo etọn tọn pọ́n wutu. Enẹwutu, sọn pọndohlan aihọn tọn mẹ, e sọgan yin pinpọnhlan taidi dawe azọ́n sinsinyẹn watọ de he nọ ylọ azọngban etọn lẹ dọ nujọnu.
5. Nuhahun tẹwẹ dawe he yin nùdego to oló Jesu tọn mẹ lọ pannukọn?
5 Depope he whẹho lọ yin, Jesu ylọ dawe he yin nùdego to oló lọ mẹ dọ dawe adọkunnọ de, ehe dohia dọ mẹde wẹ e yin he ko tindo agbasanu susugege to alọnu. Ṣigba, dile Jesu dọ do, dawe adọkunnọ lọ pannukọn nuhahun de. Aigba etọn de sinsẹ́n tọ́n taun hugan nuhe e donukun, ehe sù tlala hú nuhe e tindo nuhudo etọn kavi nuhe go e sọgan penukundo. Etẹwẹ e dona ko wà?
6. Nudide tẹlẹ wẹ devizọnwatọ Jiwheyẹwhe tọn susu nọ pannukọn to egbehe?
6 Susu devizọnwatọ Jehovah tọn lẹ tọn wẹ nọ pehẹ ninọmẹ he taidi dawe adọkunnọ lọ tọn nkọ to egbehe. Klistiani nugbo lẹ nọ dovivẹnu nado yin azọ́nwatọ nugbodọtọ, vivẹnunọ podọ ahundoponọ. (Kọlọsinu lẹ 3:22, 23) Vlavo yé yin mẹyidoazọnmẹ kavi yelọsu tindo ajọ́ yetọn titi, yé nọ saba tindo kọdetọn dagbe, bo tlẹ nọ tọ́nta to nuhe wà yé te mẹ. Eyin dotẹnmẹ nukọnyiyi tọn kavi dotẹnmẹ hundote yọyọ devo lẹ wá yin zizedonukọnna yé, yé nọ pannukọn nudide. Be yé na kẹalọyi nukọnyiyi lọ nado mọ akuẹ susu dogọ wẹ ya? Mọdopolọ, jọja Kunnudetọ susu nọ wazọ́n ganji to wehọmẹ. Taidi kọdetọn de, nunina akuẹ tọn kavi godonọnamẹ ahọlu tọn sọgan yin zizedonukọnna yé nado yì plọnwe dogọ to wehọmẹ diyin lẹ vọnu. Be yé na yigbe poun dile mẹsusu nọ wà do bo kẹalọyi nuzedonukọnnamẹ lọ wẹ ya?
7. Nawẹ dawe he yin nùdego to oló Jesu tọn mẹ lọ didẹ nuhahun etọn gbọn?
7 Mì gbọ mí ni lẹkọwa oló Jesu tọn lọ ji. Etẹwẹ dawe adọkunnọ lọ wà to whenuena aigba etọn de sinsẹ́n tọ́n sọmọ bọ e ma yọ́n fie e na bẹ yé pli do? E basi dide nado họ́ zínhọ he e ko tindo lẹ liai bo gbá daho devo lẹ nado bẹ jinukun po agbàn lankan lọ lẹ po pli. E họnwun dọ tito enẹ hẹn ẹn tindo numọtolanmẹ hihọ́ po pekọ po tọn sọmọ bọ e lẹn to ede mẹ dọ: “Yẹn nasọ dọhlan ayiha ṣie, dọ, Ayiha, hiẹ tindo agbàn susu he yè bẹpli na owhe susu: yí awubọ towe, to dùdù, to nùnù, bo to ayajẹ.”—Luku 12:19.
Naegbọn E do Yin “Nulunọ”?
8. Onú tangan tẹ go wẹ dawe he yin nùdego to oló Jesu tọn mẹ lọ gbẹkọ?
8 Ṣigba, dile Jesu do e hia do, numọtolanmẹ hihọ́ oklọ tọn de poun wẹ tito dawe adọkunnọ lọ tọn hẹnwa. Mahopọnna lehe e sọgan ko taidi nuhe sọgbe hẹ lẹnpọn dagbe do, e gbẹkọ onú tangan dopo go—enẹ wẹ ojlo Jiwheyẹwhe tọn. Dawe lọ to nulẹnpọndo edetiti ji, yèdọ lehe e na wagbọn bo na voawu, bo to dùdù, bo to nùnù, bosọ to ayajẹ. E lẹndọ na emi tindo “agbàn susu” wutu, emi nasọ tindo “owhe susu.” Ṣigba, e blawu dọ nulẹ ma wá yì do lehe e lẹn do. Kẹdẹdile Jesu dọ jẹnukọn do, “eyin mẹde tlẹ tindo susugege, ogbẹ̀ etọn ma wá sọn nuhe e tindo lẹ mẹ gba.” (Luku 12:15, NW ) To ozán enẹ dopolọ mẹ, nuhe dawe lọ ko jẹtukla na lẹpo wá vivọnu to ajijimẹ, na Jiwheyẹwhe dọna ẹn dọmọ: “Hiẹ nulunọ, ozán he mẹ yè na kàn ogbẹ̀ towe biọ sọn dè we: be mẹnu tọn wẹ nuhe hiẹ wleawu etọn dai helẹ na yin?”—Luku 12:20.
9. Naegbọn dawe he yin nùdego to oló lọ mẹ do yin yiylọdọ nulunọ?
9 Ehe wẹ hẹn mí wá nuagokun tangan lọ kọ̀n to oló Jesu tọn mẹ. Jiwheyẹwhe ylọ dawe lọ dọ nulunọ. Wezẹhomẹ lọ Exegetical Dictionary of the New Testament basi zẹẹmẹ dọ wunmẹ hogbe Glẹki tọn he yin yiyizan lọ tọn lẹ “nọ dlẹnalọdo awugbopo nukunnumọjẹnumẹ tọn to whepoponu.” E dọ dọ to oló ehe mẹ, Jiwheyẹwhe yin didohia taidi mẹhe to hogbe enẹ yizan nado de “ovọ́-yinyin tito he adọkunnọ lọ to bibasi hlan sọgodo lẹ tọn” hia. Hogbe lọ ma dlẹnalọdo mẹhe gbọagba nuyọnẹn tọn gba, ṣigba “mẹhe gbẹ́ nado kẹalọyi dọ emi dona ganjẹ Jiwheyẹwhe go.” Zẹẹmẹ he Jesu basi gando dawe adọkunnọ lọ go hẹn mí flin nuhe e dọ to godo mẹ hlan Klistiani agun Laodikea tọn lẹ, to Asia Pẹvi to owhe kanweko tintan whenu dọ: “Hiẹ dọmọ, Adọkunnọ wẹ yẹn, bosọ tindo adọkun susu, bo ma gbọagba nude tọn . . . bo ma yọnẹn dọ tapònọ wẹ hiẹ, lèlènọ, agbátọnọ, nukuntọ́nnọ, omẹ́nọ.”—Osọhia 3:17.
10. Naegbọn “agbàn susu” tintindo ma namẹ jide nado tindo “owhe susu”?
10 E jẹ dọ mí ni lẹnayihamẹpọn do nuplọnmẹ lọ ji. Be mí sọgan taidi dawe he yin nùdego to oló lọ mẹ—bo nọ wazọ́n sinsinyẹn nado hẹn ẹn diun dọ mí na tindo “agbàn susu” ṣogan bo gboawupo nado wà nuhe yin dandannu nado hẹn mí donukun “owhe susu” to gbẹ̀mẹ ya? (Johanu 3:16; 17:3) Biblu dọ dọ: “Adọkun ma doale to azán homẹgble tọn gbè,” podọ “ewọ he dotudo adọkun etọn go na jai.” (Howhinwhẹn lẹ 11:4, 28) Enẹwutu, Jesu yí tudohomẹnamẹ godo tọn ehe dogọ oló lọ dọmọ: “Mọkẹdẹ wẹ ewọ he bẹ adọkunnu pli na ede, bo ma yin adọkunnọ gbọn Jiwheyẹwhe dali.”—Luku 12:21.
11. Naegbọn e do yin ovọ́ nado ze todido po jidide mítọn po sinai do nutindo agbasa tọn lẹ ji?
11 To whenuena Jesu dọ dọ “mọkẹdẹ wẹ,” e to nùzindeji dọ nuhe jọ do dawe adọkunnọ lọ go to oló lọ mẹ wẹ nasọ jọ do mẹhe ze ogbẹ̀ yetọn—yèdọ todido po jidide yetọn po—sinai do nutindo agbasa tọn lẹ kẹdẹ ji lẹ go. E ma yin ‘adọkunnu bibẹpli na mẹdetiti’ wẹ yin nuhahun lọ gba, ṣigba awugbopo nado yin “adọkunnọ gbọn Jiwheyẹwhe dali.” Devi Jakobu na avase mọnkọtọn de to whenuena e wlan dọmọ: “Mì wá dinvie, mì he to didọmọ, Egbé kavi osọ, mí na yì tòdaho he mẹ, mí na nọ̀ finẹ họ̀ owhe dopo, mí na to ajọwa, bo na to ale dù: whenuena mìwlẹ ma yọ́n nuhe na jọ to osọ.” Etẹwẹ yé dona ko wà? “Ehe wẹ jẹ mì ni nọ dọ, dọmọ, Eyin [Jehovah] jlo, mí na tin, bo wà ehe kavi enẹ.” (Jakobu 4:13-15) Mahopọnna obá he mẹ mẹde yin adọkunnọ jẹ kavi lehe nutindo etọn lẹ sọgan sù sọ, popolẹpo wẹ na zun ovọ́ eyin e ma yin adọkunnọ gbọn Jiwheyẹwhe dali. To whelọnu lo, etẹwẹ e zẹẹmẹdo nado yin adọkunnọ gbọn Jiwheyẹwhe dali?
Nado Yin Adọkunnọ Gbọn Jiwheyẹwhe Dali
12. Etẹ wiwà wẹ na hẹn mí zun adọkunnọ gbọn Jiwheyẹwhe dali?
12 To hodidọ Jesu tọn mẹ, adọkunnọ yinyin gbọn Jiwheyẹwhe dali yin didohia taidi adà awetọ pete adọkunnu agbasa tọn bibẹpli na mẹdetiti. Gbọnmọ dali, nuhe dọ Jesu te wẹ yindọ ahunmẹdunamẹnu tangan mítọn to gbẹ̀mẹ ma dona yin nado bẹ agbasanu lẹ pli kavi nado to vivi nuhe mí sọgan tindo lẹ tọn dù gba. Kakatimọ, mí dona yí nutindo mítọn lẹ zan to aliho de mẹ nado yidogọna haṣinṣan mítọn hẹ Jehovah kavi hẹn ẹn lodo. Na jide tọn, mọwiwà na hẹn mí zun adọkunnọ gbọn Jiwheyẹwhe dali. Etẹwutu? Na e nọ hùnali dote na mí nado mọ dona susu yí sọn ewọ dè. Biblu dọna mí dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.”—Howhinwhẹn lẹ 10:22.
13. Nawẹ dona Jehovah tọn “nọ hẹnmẹ wàdọkun” gbọn?
13 Eyin Jehovah kọ̀n dona jẹgbonu do omẹ etọn lẹ ji, nunina dagbe hugan lẹ wẹ e nọ na yé to whepoponu. (Jakobu 1:17) Di apajlẹ, to whenuena Jehovah na fininọ de hlan Islaelivi lẹ, “aigba . . . he yí oyìnnọ po owín po do to sisà” de wẹ e na yé. Dile etlẹ yindọ aigba Egipti tọn lọsu ko yin zẹẹmẹ basina to aliho enẹ mẹ, aigba he Jehovah na Islaelivi lẹ gbọnvo e whè gbau to aliho tangan dopo mẹ. Mose dọna Islaelivi lẹ dọ ‘aigba de he Jehovah Jiwheyẹwhe towe to nukunpedego’ wẹ e yin. To hogbe devo mẹ, yé na tindo kọdetọn dagbe na Jehovah na to nukunpedo yé go wutu. Dile Islaelivi lẹ gbọṣi nugbonọ-yinyin mẹ hlan Jehovah dẹnsọ, yé yin didona susugege gbọn ewọ dali bo duvivi aliho gbẹninọ de tọn he yiaga tlala hú akọta he lẹdo yé pé lẹ tọn. Mọwẹ, dona Jehovah tọn wẹ “nọ hẹnmẹ wàdọkun”!—Osọha lẹ 16:13; Deutelonomi 4:5-8; 11:8-15.
14. Etẹwẹ mẹhe yin adọkunnọ gbọn Jiwheyẹwhe dali lẹ nọ duvivi etọn?
14 Hodidọ lọ “adọkunnọ gbọn Jiwheyẹwhe dali” sọ yin lilẹdo “adọkunnọ to nukun Jiwheyẹwhe tọn mẹ.” (La Bible en français courant ) To paa mẹ, mẹhe yin adọkunnọ to agbasa-liho lẹ nọ yin ahunmẹduna dogbọn lehe yé na sọawuhia to nukun mẹdevo lẹ tọn mẹ do dali. Ehe nọ saba sọawuhia to aliho gbẹninọ tọn yetọn mẹ. Yé nọ jlo nado yí nuhe Biblu ylọdọ “gigovọ́ ogbẹ̀ tọn” do yinuwado gbẹtọ lẹ ji. (1 Johanu 2:16) To vogbingbọn mẹ, mẹhe yin adọkunnọ gbọn Jiwheyẹwhe dali lẹ nọ mọ alọkẹyi po nukundagbe majẹhẹ Jiwheyẹwhe tọn po yí to gigọ́ mẹ bo nọ duvivi haṣinṣan mẹdetiti tọn dagbe de hẹ ẹ. E họnwun dọ tintin to ninọmẹ họakuẹ mọnkọtọn mẹ nọ hẹn yé tindo numọtolanmẹ dagbemẹninọ po hihọ́ po tọn tlala hú dehe adọkunnu agbasa tọn depope sọgan hẹnwa. (Isaia 40:11) Kanbiọ lọ todin wẹ yindọ, Etẹwẹ mí dona wà nado yin adọkunnọ to nukun Jiwheyẹwhe tọn mẹ?
Adọkunnọ to Nukun Jiwheyẹwhe Tọn Mẹ
15. Etẹwẹ mí dona wà nado yin adọkunnọ gbọn Jiwheyẹwhe dali?
15 To oló Jesu tọn mẹ, dawe lọ basi tito bo wazọ́n sinsinyẹn kiki nado jẹ adọkun, podọ e yin yiylọdọ nulunọ. Enẹwutu, nado yin adọkunnọ gbọn Jiwheyẹwhe dali, mí dona dovivẹnu nado wazọ́n sinsinyẹn bo tindo mahẹ gigọ́ to nuwiwa he họakuẹ bosọ doale nugbonugbo to nukun Jiwheyẹwhe tọn mẹ lẹ mẹ. Dopo to ehelẹ mẹ wẹ nuhe Jesu degbè etọn dọmọ: “Enẹwutu mì yì, bo hẹn akọta lẹpo zun nuplọntọ.” (Matiu 28:19) Yíyí whenu, huhlọn po nugopipe mítọn lẹ po zan, e ma yin na nukọnyiyi mẹdetiti tọn, ṣigba to azọ́n yẹwhehodidọ Ahọluduta lọ tọn po mẹhẹnzun-devi po tọn mẹ, sọgan yin yiyijlẹdo akuẹ viva do ajọwiwa de mẹ go. Mẹhe wàmọ lẹ ko duale susu to gbigbọ-liho, dile numimọ he bọdego lẹ dohia do.—Howhinwhẹn lẹ 19:17.
16, 17. Numimọ tẹlẹ wẹ hiẹ sọgan na nado do aliho gbẹninọ tọn he nọ hẹnmẹ zun adọkunnọ to nukun Jiwheyẹwhe tọn mẹ hia?
16 Lẹnnupọndo apajlẹ mẹmẹsunnu de tọn ji to otò Asie tọn de mẹ. E tindo agbasazọ́n he pekuẹ ganji de taidi ọdinatẹẹ-jladotọ. Ṣigba, agbasazọ́n etọn nọ dibla yí whenu etọn lẹpo bo hẹn ẹn tindo numọtolanmẹ hẹntọnọ-yinyin tọn to gbigbọ-liho. To godo mẹ, kakati nado tẹnpọn bo yinukọn to agbasazọ́n etọn mẹ, e jo azọ́n lọ do bo jẹ awuwlena glase-vivi lẹ ji bo nọ sà to alihogbó lẹ ji nado sọgan tindo whenu dogọ nado penukundo nuhudo gbigbọmẹ tọn po azọngban etọn lẹ po go. Azọ́nwatọgbẹ́ etọn dai tọn lẹ nọ ṣàn ẹn kò, ṣigba nawẹ nulẹ wá yì do? “Nado dọ hójọhó, ninọmẹ ṣie pọnte taun to akuẹzinzan-liho hugan whenue n’to ọdinatẹẹ-zọ́n wà,” wẹ e dọ. “E ko hẹn mi tindo ayajẹ dogọ na n’ma nọ mọ apọ̀ bo nọ hanú taidi to agbasazọ́n ṣie dai tọn lọ mẹ. Podọ dehe yin nujọnu hugan lọ wẹ yindọ, n’mọ dọ n’sẹpọ Jehovah todin hugan.” Diọdo lọ hẹn Klistiani ehe penugo nado biọ lizọnyizọn whenu-gigọ́ tọn mẹ, podọ todin e to devizọnwa to wekantẹn alahọ Kunnudetọ Jehovah tọn lẹ tọn to otò etọn mẹ. Na nugbo tọn, dona Jehovah tọn “nọ hẹnmẹ wàdọkun.”
17 Apajlẹ devo wẹ yọnnu de he whẹ́n to whẹndo he mẹ wepinplọn nọ yin pinpọn po nukun nujọnu tọn po te de mẹ. E yì wehọmẹ alavọ tọn lẹ to France, Mexique, po Suisse po bo to nukọnpọnhlan agbasazọ́n dagbe de. E dọmọ: “N’tindo kọdetọn dagbe; sisi po nukundagbe po nọ yin didohia mi, ṣigba to ohò ṣie mẹ dọ́n, n’mọ dọ n’jẹdò nude tọn bo masọ tindo pekọ.” Enẹgodo e plọnnu gando Jehovah go. E dọmọ: “Dile n’to nukọnyi to gbigbọ-liho, ojlo ṣie nado hẹn homẹhun Jehovah podọ nado gọ̀ vude na ẹn sọn nuhe e ko na mi lẹ mẹ gọalọna mi nado mọ aliho he n’dona gbọ̀n lọ hezeheze—enẹ wẹ nado yí whenu-gigọ́ do sẹ̀n ẹn.” E jo agbasazọ́n etọn do bo yí baptẹm to madẹnmẹ. Na owhe 20 he wayi lẹ, e ko sẹ̀n po ayajẹ po to lizọnyizọn whenu-gigọ́ tọn mẹ. “Mẹdelẹ lẹndọ n’ko hẹn nugopipe ṣie lẹ gú,” wẹ e dọ, “ṣigba yé nọ yigbe dọ n’tindo ayajẹ, podọ yé nọ na sisi nunọwhinnusẹ́n he n’nọ hodo to gbẹzan ṣie mẹ lẹ. Egbesọegbesọ n’nọ hodẹ̀ hlan Jehovah dọ e ni gọalọna mi nado whiwhẹ dee bo mọ nukundagbe etọn yí.”
18. Taidi Paulu, nawẹ mí sọgan yin adọkunnọ gbọn Jiwheyẹwhe dali gbọn?
18 Agbasazọ́n dagbe de hùndonuvo na Saulu, he wá lẹzun apọsteli Paulu. Ṣogan, e wlan to godo mẹ dọmọ: “Nugbo, yẹn ko lẹn onú lẹpo do nugúgú na whanpẹ oyọnẹn Klisti Jesu Oklunọ ṣie tọn.” (Filippinu lẹ 3:7, 8) Na Paulu, adọkunnu he e mọyi gbọn Klisti gblamẹ lẹ yọ́n hugan nudepope he aihọn sọgan ko zedonukọnna ẹn. Mọdopolọ, gbọn ojlo ṣejannabi tọn lẹ gbigbẹdai po afọdidona gbẹzan mẹdezejo na Jiwheyẹwhe tọn po dali, mílọsu sọgan duvivi gbẹzan de tọn he na hẹn mí zun adọkunnọ to nukun Jiwheyẹwhe tọn mẹ. Ohó Jiwheyẹwhe tọn na mí jide dọmọ: “Ale whiwhẹ tọn po osi OKLUNỌ tọn po wẹ adọkun, yẹyi, po ogbẹ̀ po.”—Howhinwhẹn lẹ 22:4.
Be Hiẹ Sọgan Basi Zẹẹmẹ Ya?
• Nuhahun tẹwẹ dawe he yin nùdego to oló Jesu tọn mẹ lọ pannukọn?
• Naegbọn dawe he yin nùdego to oló lọ mẹ yin yiylọ dọ nulunọ?
• Etẹwẹ e zẹẹmẹdo nado yin adọkunnọ gbọn Jiwheyẹwhe dali?
• Nawẹ mí sọgan lẹzun adọkunnọ gbọn Jiwheyẹwhe dali gbọn?
[Yẹdide to weda 26]
Naegbọn dawe adọkunnọ lọ do yin yiylọ dọ nulunọ?
[Yẹdide to weda 27]
Nawẹ dotẹnmẹ hundote nukọnyiyi tọn lẹ sọgan lẹzun whlepọn de gbọn?
[Yẹdide to weda 28]
“Dona OKLUNỌ tọn, e nọ hẹnmẹ wàdọkun”