Nuhe Nọ Namẹ Ayajẹ

MÍMẸPO wẹ nọ jlo na yin ayajẹnọ, kavi e mayin mọwẹ?⁠— Ṣigba mẹsusu ma nọ tindo ayajẹ gba. Be a yọ́n nuhe zọ́n ya?⁠—Na yé ma ko yọ́n nuhe nọ hẹnmẹ yin ayajẹnọ wutu wẹ. Yé lẹndọ nutindo agbasa tọn susu bibẹpli wẹ nọ namẹ ayajẹ. Ṣigba to whenuena yé wá tindo onú helẹ, ayajẹ yetọn ma nọ dẹn-to-aimẹ ba.

Mẹplọntọ Daho lọ dọ aṣli nuhe nọ hẹn ayajẹ wá namẹ tọn dọmọ: ‘Ayajẹ susu tin to nunamẹ mẹ hú nado mọyi.’ (Owalọ lẹ 20:35) Enẹwutu, etẹwẹ nọ namẹ ayajẹ?⁠— Onú nina mẹdevo lẹ po dagbewiwa na mẹdevo lẹ po wẹ. Be hiẹ yọ́n enẹ ya?⁠—

Gbọ mí ni lẹnnupọndo ehe ji sisosiso. Be Jesu dọ dọ mẹhe mọ nunina yí lọ ma na tindo ayajẹ wẹ ya?⁠— Lala, e ma dọmọ. Homẹ towe nọ hùn nado mọ nunina lẹ yí, kavi e mayin mọwẹ?⁠—Mọwẹ e te na mẹlẹpo. Homẹ mítọn nọ hùn to whenuena mẹde na mí nunina dagbe lẹ.

Ṣigba Jesu dọ dọ mí nọ yin ayajẹnọ hugan eyin mí namẹ. Enẹwutu mẹnu wẹ hiẹ lẹndọ e ko na nunina gbẹtọ lẹ hugan to gbẹ̀mẹ?⁠— Jehovah Jiwheyẹwhe wẹ.

Biblu dọ dọ Jiwheyẹwhe “wẹ yí ogbẹ̀ na omẹ pó, po gbọfufu po, po onú lẹpo po.” E sọ nọ na mí jikun po owhè po sọn olọn mẹ, na jinukun lẹ nido yọ́n bọ mí na mọ núdùdù nado dù. (Owalọ lẹ 14:17: 17:25) Abajọ Biblu ylọ Jehovah dọ ‘Jiwheyẹwhe ayajẹnọ’! (1 Timoti 1:11) Nunina mẹdevo lẹ yin dopo to nuhe nọ hẹn ayajẹ wá na Jiwheyẹwhe lẹ mẹ. Enẹwutu eyin mílọsu nọ nanumẹ, e sọgan hẹn ayajẹ wá na mí ga.

Eyọn, etẹlẹ wẹ mí sọgan na mẹdevo lẹ? Etẹwẹ hiẹ lẹn?⁠— To whedelẹnu, nunina de nọ biọ akuẹzinzan. Eyin nunina de he dona yin hihọ̀ to ahimẹ wẹ, a dona zan akuẹ. Enẹwutu eyin nunina mọnkọtọn wẹ a jlo na namẹ, e na biọ dọ a ni jọ akuẹ pli kakajẹ whenue e na pé nado họ̀ nunina lọ.

Ṣigba e mayin nunina lẹpo wẹ dona yin hihọ̀ gba. Di apajlẹ, to owhè ṣadádá de mẹ, osin fifá kọfo dopo nọ fakọnamẹ taun. Enẹwutu eyin a na osin fifá mẹhe nugbla to hùhù, a sọgan tindo ayajẹ he nunamẹ nọ hẹnwa.

To gbèdopo, vlavo hiẹ po onọ̀ towe po sọgan dà núdùdù dagbe de. Enẹ na vivi taun. Ṣigba etẹwẹ a sọgan wà bọ e na hẹn we tindo ayajẹ hugan dọ hiẹ kẹdẹ ni dù popolẹpo?⁠— A sọgan kán vude na họntọn towe lẹ. Be e na jlo we nado wàmọ to gbèdopo ya?⁠—

Mẹplọntọ Daho lọ po apọsteli etọn lẹ po yọ́n ayajẹ he nunamẹ nọ hẹnwa. Be a yọ́n nuhe yé na mẹdevo lẹ ya?⁠— Nuhe yọ́n hugan to gbẹ̀mẹ lọ wẹ! Yé yọ́n nugbo lọ dogbọn Jiwheyẹwhe dali, podọ yé yí ayajẹ do má wẹndagbe lọ hẹ mẹdevo lẹ. Yé wà ehe vọ́nu bo ma yí akuẹ to mẹdepope si.

To gbèdopo, apọsteli Paulu po họntọn etọn vivẹ heyin devi Luku po dukosọ hẹ yọnnu de he jlo nado tindo ayajẹ he nunamẹ nọ hẹnwa. Yé dukosọ hẹ ẹ to otọ̀ de tó. Paulu po Luku po yì finẹ na yé ko sè dọ filọ yin fie gbẹtọ lẹ nọ wá hodẹ̀ te. Podọ kẹdẹdile yé sè do, to whenuena yé jẹ finẹ, yé mọ yọnnu delẹ to dẹ̀ho to finẹ.

Paulu jẹ yẹwheho wẹndagbe Jehovah Jiwheyẹwhe tọn po Ahọluduta etọn po tọn dọna yọnnu lọ lẹ ji. Dopo to yọnnu lọ lẹ mẹ nọ yin Lidia, podọ ewọ dotoai ganji. To enẹgodo, Lidia jlo nado basi nude he na dohia dọ e yiwanna wẹndagbe he e sè lọ nugbonugbo. Enẹwutu e vẹ̀ Paulu po Luku po dọmọ: “Eyin mì yọ́n mi yin nugbonọ hlan [Jehovah], mì bo wá owhé ṣie gbè, na mì ni nọ nọ̀ finẹ.” Podọ e sọ plan yé wá owhé etọn gbè.—Owalọ lẹ 16:13-15.

Homẹ Lidia tọn hùn taun dọ devizọnwatọ Jiwheyẹwhe tọn ehelẹ wá owhé etọn gbè. E yiwanna yé na yé gọalọna ẹn nado plọnnu dogbọn Jehovah po Jesu po dali podọ gando lehe gbẹtọ lẹ sọgan nọgbẹ̀ kakadoi do go. Homẹ etọn hùn taun dọ e penugo nado na núdùdù Paulu po Luku po bosọ wleawu fihe yé sọgan nọ̀ tọn. Enẹwutu nunamẹ Lidia tọn hẹn ẹn jaya na e jlo e sọn ahun mẹ wá nugbonugbo. Enẹ yin nude he mí dona flin. Mẹde sọgan dọna mí nado nanumẹ. Ṣigba eyin e ma jlo mí sọn ahun mẹ wá, nunamẹ lọ ma na hẹn mí jaya gba.

Di apajlẹ, mí ni dọ dọ a tindo bọnun-bọnun sọha de he a jlo na dù. Eyin yẹn dọna we nado desọn e mẹ bo na ovi devo de, be homẹ towe na hùn nado na ẹn ya?⁠— Ṣigba etẹwẹ a na wà eyin a tindo bọnun-bọnun sọha de to whenuena a mọ họntọn towe de he a yiwanna ganji? Eyin hiẹ lọsu wẹ lẹnnupọn bọ e jlo we nado na vude họntọn towe sọn e mẹ, be enẹ ma na hẹn we jaya hugan ya?⁠—

To whedelẹnu, mí nọ yiwanna mẹde sọmọ bọ mí nọ jlo nado ze nuhe mí tindo lẹpo na ẹn bo ma nọ pò depope na míde. Dile mí to whinwhẹ́n to owanyi mítọn na Jiwheyẹwhe mẹ, owanyi mọnkọtọn wẹ mí dona tindo na Ẹn.

Mẹplọntọ Daho lọ yọ́n yọnnu wamọnọ de he tindo owanyi mọnkọtọn. Jesu mọ yọnnu lọ to tẹmpli mẹ to Jelusalẹm. Ṣẹngi flinflin awe gee wẹ e tindo; akuẹ he pò to e si lẹpo niyẹn. Ṣigba e bẹ popolẹpo do apotin nunina tọn mẹ taidi nunina de na tẹmpli. Mẹde ma hẹn ẹn po huhlọn po nado wàmọ. Suhugan mẹhe tin to finẹ lẹ tọn ma tlẹ mọdona nunina he e na. E wàmọ na e jlo e sọn ahun mẹ podọ na e yiwanna Jehovah taun wutu. E tindo ayajẹ dọ emi penugo bo nanumẹ.—Luku 21:1-4.

Aliho susu mẹ wẹ mí sọgan nanumẹ te. Be a sọgan lẹnnupọndo delẹ ji ya?⁠— Eyin mí nanú mẹde na mí jlo nado wàmọ wutu, e na hẹn mí jaya. Enẹ wẹ zọ́n bọ Mẹplọntọ Daho lọ dọna mí dọmọ: ‘Mì nọ nanumẹ.’ (Luku 6:38) Eyin mí nọ wàmọ, mí na nọ hẹn mẹdevo lẹ jaya. Podọ ayajẹ mítọn nasọ sù taun!