Mẹnu Wẹ Yin Jiwheyẹwhe Towe?

ETẸWUTU wẹ kanbiọ ehe, Mẹnu wẹ yin Jiwheyẹwhe towe? do yin kanbiọ titengbe de?⁠— Na gbẹtọ lẹ nọ sẹ̀n yẹwhe voovo lẹ wutu wẹ. (1 Kọlintinu lẹ 8:5) To whenuena apọsteli Paulu mọ huhlọn yí sọn Jehovah dè nado hẹnazọ̀ngbọna dawe de he ma ko zinzọnlin pọ́n, gbẹtọ lẹ dawhá dọmọ: “Yẹwhe lẹ wá mí dè to apajlẹ gbẹtọ tọn mẹ.” Gbẹtọ lẹ jlo na sẹ̀n Paulu po họntọn etọn Balnaba po. Yé ylọ Paulu dọ Helme bo ylọ Balnaba dọ Zeus, he yin oyín yẹwhe lalo lẹ tọn.

Ṣigba Paulu po Balnaba po ma dike gbẹtọ lẹ ni sẹ̀n yé gba. Yé họ̀nwezun biọ gbẹtọ lẹ ṣẹnṣẹn bo wọhẹ yé dọmọ: Mì “lẹ́ sọn onú vọ́ helẹ mẹ do Jiwheyẹwhe ogbẹ̀nọ dè.” (Owalọ lẹ 14:8-15) Mẹnu wẹ yin “Jiwheyẹwhe ogbẹ̀nọ,” he dá onú lẹpo?⁠— Mọwẹ, Jehovah wẹ, “Gigogán to wẹkẹ lẹpo ji.” Jesu ylọ Jehovah dọ ‘Jiwheyẹwhe nugbo dopokẹdẹ lọ.’ Enẹwutu, todin, mẹnu kẹdẹ wẹ e jẹ dọ mí ni sẹ̀n?⁠— Jehovah dopokẹdẹ wẹ!⁠—Psalm 83:18; Johanu 17:3; Osọhia 4:11.

Suhugan gbẹtọ lẹ tọn wẹ nọ sẹ̀n yẹwhe devo lẹ he gbọnvona ‘Jiwheyẹwhe nugbo dopokẹdẹ lọ.’ Yé nọ saba sẹ̀n nuhe yé yí atin, zannu, kavi gànmú do basi lẹ. (Eksọdusi 32:4-7; Levitiku 26:1; Isaia 44:14-17) Sunnu po yọnnu he tlẹ diyin lẹ po nọ yin yiylọ to whedelẹnu dọ yẹwhe, asuka, kavi vodun lẹ. Be e sọgbe nado nọ na gigo yé ya?⁠—

To whenuena Saulu lẹzun apọsteli Paulu godo, e wlan dọmọ: “Yẹwhe whenu he tọn ko tọ́nnukunna nuyọnẹn mẹhe ma yise lẹ tọn.” (2 Kọlintinu lẹ 4:4) Mẹnu wẹ yin yẹwhe ehe?⁠— Satani Lẹgba wẹ! Satani ko penugo bo klọ gbẹtọ lẹ nado nọ sẹ̀n gbẹtọ hatọ yetọn lẹ po onú devo lẹ po.

To whenuena Satani to tintẹnpọn nado hẹn Jesu litaina ẹn bosọ sẹ̀n ẹn, etẹwẹ Jesu dọna Satani?⁠— E dọna ẹn dọ: ‘Hiẹ na litaina Jehovah Jiwheyẹwhe towe, ewọ dopokẹdẹ wẹ hiẹ dona nọ sẹ̀n.’ (Matiu 4:10) Enẹwutu Jesu hẹn ẹn họnwun dọ Jehovah dopokẹdẹ wẹ e jẹ nado nọ sẹ̀n. Gbọ mí ni hia otàn jọja sunnu delẹ tọn he yọ́n ehe. Yé nọ yin Ṣadlaki, Mẹṣaki, po Abẹdi-nẹgo po.

Jọja Heblunu ehelẹ yin tòvi akọta Jiwheyẹwhe tọn he nọ yin Islaeli tọn, ṣigba yé ko yin bibẹ yì kanlinmọgbenu to Babilọni. Ahọlu Babilọni tọn he nọ yin Nẹbukadnẹzali basi boṣiọ daho sikanọ de. E degbè to gbèdopo dọ eyin gbẹtọ lẹ sè húnhiho, yemẹpo dona litaina boṣiọ lọ. E na avase dọ, ‘Mẹdepope he ma litai bo sẹ̀n ẹn na yin zizedlan zòhọ de mẹ.’ Eyin a tin to finẹ, etẹwẹ a na ko wà?⁠—

Ṣadlaki, Mẹṣaki, po Abẹdi-nẹgo po ko nọ saba setonuna gbedide ahọlu lọ tọn lẹpo dai. Ṣigba yé gbẹ́ nado setonuna gbedide ehe. Be a yọ́n nuhe zọ́n ya?⁠— Na Osẹ́n Jiwheyẹwhe tọn de ko dọmọ: ‘Hiẹ ma dona tindo yẹwhe devo gbọnvona mi. Hiẹ ma dona basi boṣiọ pipà de na dewe bo litaina gba.’ (Eksọdusi 20:3-5) Enẹwutu Ṣadlaki, Mẹṣaki, po Abẹdi-nẹgo po setonuna osẹ́n Jehovah tọn kakati nido yin gbedide ahọlu tọn.

Homẹgble ahọlu lọ tlala, enẹwutu e degbè to afọdopolọji dọ jọja Heblunu atọ̀n lọ lẹ ni yin hinhẹn wá nukọn emitọn. E kanse yé dọmọ: ‘Be nugbo wẹ dọ mìwlẹ ma sẹ̀n yẹwhe ṣie ya? Yẹn na na mì dotẹnmẹ hundote dopo dogọ. Todin, eyin mì sè húnhiho lọ, mì bo ṣinyọ́n nukunmẹ ai bo sẹ̀n boṣiọ he yẹn ko basi. Eyin mì ma wàmọ, mì na yin zizedlan zòhọ lọ mẹ. Podọ mẹnu wẹ yin yẹwhe lọ he sọgan whlẹn mì sọn alọ ṣie mẹ?’

Etẹwẹ jọja lọ lẹ na wà todin? Eyin hiẹ tọn wẹ, etẹwẹ a na ko wà?⁠— Yé dọna ahọlu lọ dọmọ: ‘Jiwheyẹwhe mítọn he mí to sinsẹ̀n penugo nado whlẹn mí. Ṣigba eyin e ma tlẹ wàmọ, míwlẹ ma to yẹwhe towe lẹ na sẹ̀n gba. Mí ma na litaina boṣiọ sika tọn towe gba.’

Homẹgble ahọlu lọ tlala. Enẹwutu e degbè dọmọ: ‘Zòhọ lọ ni yin hinhẹn hùnmiyọ́n whla ṣinawe hú lehe e te dai!’ Enẹgodo e degbena sunnu huhlọnnọ etọn lẹ nado blá Ṣadlaki, Mẹṣaki, po Abẹdi-nẹgo po bo ze yé dlan zòhọ lọ mẹ! Zòhọ lọ hùnmiyọ́n sọmọ bọ hihla etọn hù sunnu ahọlu tọn he dlan jọja lọ lẹ do miyọ́n mẹ lẹ! Etẹwẹ jọ do Heblunu atọ̀n lọ lẹ go?

Ṣadlaki, Mẹṣaki, po Abẹdi-nẹgo po yin dindlan do ṣẹnṣẹn miyọ́n lọ tọn. Ṣigba yé fọnṣite! Nude ma wà yé. Podọ okàn he blá yé lẹ tún sọn yé go. Nawẹ ehe jọ gbọn?⁠— Ahọlu lọ pọ́n miyọ́n lọ mẹ hlan, ṣigba nuhe e mọ dobuna ẹn taun. Enẹwutu, e kanse dọmọ: ‘Be e mayin omẹ atọ̀n wẹ mí ze dlan do miyọ́n lọ mẹ?’ Devizọnwatọ etọn lẹ gblọn dọmọ: “Ahọlu E, nugbo wẹ.”

Enẹwutu ahọlu lọ dọmọ: ‘Pọ́n! Yẹn mọ omẹ ẹnẹ to sadi danpé to finẹ, bọ miyọ́n lọ ma to awugblena depope to yé mẹ.’ Be a yọ́n mẹhe omẹ ẹnẹtọ lọ yin ya?⁠— Angẹli Jehovah tọn de wẹ. Ewọ wẹ basi hihọ́na Heblunu atọ̀n lọ lẹ bọ miyọ́n lọ ma do fiọ yé.

To whenuena ahọlu mọ ehe, e sẹpọ ohọ̀n zòhọ lọ tọn kọ̀n bo dawhá dọmọ: “Ṣadlaki, Mẹṣaki, po Abẹdi-nẹgo po, mì devi Jiwheyẹwhe Gigogán tọn lẹ, mì jẹgbonu wá, bo wá file.” To whenuena yé tọnjẹgbonu wá, mẹlẹpo mọdọ miyọ́n lọ ma fiọ yé. Miyọ́n ma tlẹ gbleawuna yé paali. To whenẹnu, ahọlu lọ dọmọ: ‘Donanọ wẹ Jiwheyẹwhe Ṣadlaki, Mẹṣaki po Abẹdi-nẹgo po tọn, mẹhe ko do angẹli etọn hlan nado whlẹn devizọnwatọ etọn lẹ na yé ma sẹ̀n yẹwhe devo depope adavo Jiwheyẹwhe yetọn titi wutu.’⁠—Daniẹli, weta 3.

Mí sọgan plọnnu sọn nuhe jọ to whenẹnu mẹ. Mọdopolọ to egbehe, gbẹtọ lẹ nọ basi yẹdide kavi boṣiọ lẹ bo nọ sẹ̀n yé. Otanwe glẹnsigbe tọn (The Encyclopedia Americana) dọmọ: “Asia yin nuhe jẹna sisi de dile satin yin do.” Yè sọgan yí atin, zannu, gànmú, kavi avọ̀ do basi boṣiọ lẹ. Devi hohowhenu Jesu tọn lẹ ma nọ basi ohia sinsẹ̀n-bibasi tọn hlan ogán Lomu tọn gba. Whenuho-kàntọ Daniel P. Mannix dọ dọ, walọ yetọn enẹ sọgan yin yiyijlẹdo “gbigbẹ́ nado dọnudo asia kavi gbigbẹ́ nado ji asia-hàn” go to egbehe.

Enẹwutu eyin yẹdide sinsẹ̀n tọn de yin bibasi po avọ̀, atin, zannu, kavi gànmú po, be a lẹndọ nukun he Jiwheyẹwhe nọ yí do pọ́n ẹn na gbọnvona dehe e nọ yí do pọ́n boṣiọ devo lẹ wẹ ya?⁠— Be e na sọgbe na devizọnwatọ Jehovah tọn de nado basi ohia sinsẹ̀n-bibasi tọn to yẹdide mọnkọtọn nukọn ya?⁠— Ṣadlaki, Mẹṣaki, po Abẹdi-nẹgo po ma wàmọ gba, podọ homẹ Jehovah tọn hùn do yé go. Nawẹ hiẹ sọgan hodo apajlẹ yetọn gbọn?⁠—