“Míwlẹ Ma Hà Nọma Setonuna Jiwheyẹwhe Hú Gbẹtọ”

‘Jiwheyẹwhe Mítọn Sọgan Whlẹn Mí’

NUJIJỌ lọ yin awuwlena nado hẹn awuji gbẹtọ lẹ. Boṣiọ daho blibata sika tọn de yin zize dote to danfafa Dula tọn ji, vlavo sẹpọ tòdaho Babilọni tọn. Boṣiọ lọ dona yin kinklandowiwe to hùnwhẹ vonọtaun de whenu. Azọ́nwatọ gbóogbó họ̀nmẹ tọn he tin to finẹ lẹ yin nukundo nado litaina boṣiọ lọ to nudidọ hànjinu voovo delẹ tọn sisè godo. Ahọlu Nẹbukadnẹzali Babilọni tọn ko degbè dọ mẹdepope he ma sẹ̀n boṣiọ lọ na kú to zòhọ he hùnmiyọ́n tlala de mẹ. Mẹnu wẹ na gboadọ bo vẹtolina gbedide mọnkọtọn?

Mẹhe tin to finẹ lẹ ma sọgan yí nukun yetọn lẹ sè nado mọ dọ sinsẹ̀n-basitọ Jehovah tọn atọ̀n he dibusi Jiwheyẹwhe—Ṣadlaki, Mẹṣaki, po Abẹdinẹgo po—ma litai gba. Jọja ehelẹ yọnẹn dọ mọwiwà na gbà osẹ́n he biọ dọ yé ni ze yedelẹ jo na Jehovah Jiwheyẹwhe mlẹnmlẹn. (Deutelonomi 5:8-10) To whenuena yé yin nukunvando nado basi zẹẹmẹ tenọgligo hinhẹn yetọn tọn, yé dọna Nẹbukadnẹzali madoadúdẹji dọmọ: “Doayi e go, Jiwheyẹwhe mítọn mẹhe míwlẹ to sinsẹ̀n tin sọgan nado whlẹn mí sọn zòhọ miyọ́n jiji lọ tọn mẹ; ewọ bo nasọ whlẹn mí sọn alọ towe mẹ, ahọlu E. Ṣigba eyin lala, ahọlu E, e ni yin yinyọnẹn hlan we, dọ míwlẹ ma na sẹ̀n yẹwhe towe lẹ gba, mọ litaina boṣiọ sika tọn lọ he hiẹ ko ze daga gba.”—Daniẹli 3:17, 18.

To whenuena Heblu atọ̀n lọ lẹ yin zizedlan zòhọ miyọ́n jiji lọ tọn mẹ, yé yin whinwhlẹn to azọ́njiawu-liho. Jiwheyẹwhe do angẹli de hlan nado basi hihọ́na devizọnwatọ nugbonọ Etọn lẹ. Ṣigba jẹnukọnna enẹ, yé ko de nado ze ogbẹ̀ yetọn lẹ do owù mẹ kakati nado vẹtolina Jehovah.a Teninọ yetọn taidi dehe apọsteli Jesu Klisti tọn lẹ ze nkọ to whenuena yé dọ to whẹdọhọsa daho Ju lẹ tọn nukọn to nudi owhe 600 godo dọmọ: “Míwlẹ ma hà nọma setonuna Jiwheyẹwhe hú gbẹtọ.”—Owalọ lẹ 5:29.

Nuplọnmẹ Titengbe lẹ Na Mí

Ṣadlaki, Mẹṣaki, po Abẹdinẹgo po ze apajlẹ dagbe dai to yise, tonusise, po nugbonọ-yinyin po mẹ. Heblu atọ̀n lọ lẹ yí yise zan to Jehovah mẹ. Ayihadawhẹnamẹnu yetọn he yin pinplọn gbọn Owe-wiwe dali ma na yé dotẹnmẹ nado doalọ to nuyiwa sinsẹ̀n-bibasi lalo tọn depope kavi mẹdezizejo na akọta mẹ gba. Mọdopolọ, Klistiani egbezangbe tọn lẹ nọ dejido Jiwheyẹwhe nugbo lọ go mlẹnmlẹn. Ayihadawhẹnamẹnu yetọn he yin pinplọn gbọn Biblu dali wẹ nọ deanana yé podọ yé ma nọ doalọ to nuyiwa sinsẹ̀n-bibasi lalo tọn lẹ kavi hùnwhẹ he gbà osẹ́n po nunọwhinnusẹ́n Jiwheyẹwhe tọn lẹ po mẹ gba.

Heblu nugbonọ atọ̀n lọ lẹ dejido Jehovah go bo gbẹ́ nado yí tonusise yetọn do sanvọ́ na yindidi, otẹn daho, kavi gigo he Ahọluigba Babilọni tọn sọgan zedonukọnna yé. Jọja enẹlẹ jlo nado jiya bo kú kakati nado hẹn haṣinṣan he yé tindo hẹ Jiwheyẹwhe gble. Taidi Mose he nọgbẹ̀ jẹnukọnna yé, yé ‘doakọnna taidi mẹhe mọ ewọ he yin mamọ lọ.’ (Heblu lẹ 11:27) Vlavo Jehovah de nado whlẹn yé sọn okú si kavi lala, Heblu atọ̀n lọ lẹ magbe nado hẹn tenọgli yetọn go dohlan ẹn kakati nado jogbe bo whlẹn ogbẹ̀ yetọn lẹ. E taidi dọ apajlẹ yetọn wẹ apọsteli Paulu to alọdlẹndo to whenuena e donù nugbonọ he “ṣizò huhlọn miyọ́n tọn” lẹ go. (Heblu lẹ 11:34) To egbehe, devizọnwatọ Jehovah tọn lẹ nọ do yise po tonusise mọnkọtọn po hia dile yé pehẹ whlepọn tenọgligo hinhẹn tọn lẹ.

Numimọ Ṣadlaki, Mẹṣaki, po Abẹdinẹgo po tọn sọ plọn mí dọ Jiwheyẹwhe nọ suahọ nugbonọ-yinyin tọn. Psalm-kàntọ lọ jihàn dọmọ: ‘Jehovah ma na gbẹ́ mẹwiwe kavi nugbonọ etọn lẹ dai.’ (Psalm 37:28) To egbehe, mí ma sọgan donukun dọ Jiwheyẹwhe ni whlẹn mí to azọ́njiawu-liho, dile e wà na Heblu atọ̀n lọ lẹ do gba. Ṣogan, mí sọgan deji dọ mahopọnna nuhahun he mí pehẹ, Otọ́ olọnmẹ tọn mítọn na gọalọna mí. Jiwheyẹwhe sọgan de nuhahun lọ sẹ̀, na mí huhlọn nado doakọnna ẹn, kavi fọ́n mí sọnku eyin mí hẹn tenọgli mítọn go kakajẹ okú. (Psalm 37:10, 11, 29; Johanu 5:28, 29) Yise, tonusise, po nugbonọ-yinyin po nọ gbawhàn to whepoponu he tenọgligo hinhẹn mítọn yin whiwhlepọn bọ mí de nado setonuna Jiwheyẹwhe hú gbẹtọ.

[Nudọnamẹ Odò Tọn]

[Apotin/Yẹdide to weda 9]

BE HIẸ YỌNẸN YA?

• Heblu atọ̀n lọ lẹ ko dibla tindo owhe 30 to whenuena tenọgligo hinhẹn yetọn yin whiwhlepọn.

• Kunnudenu dohia dọ zòhọ lọ yin hinhẹn hùnmiyọ́n taun dile e sọgan yọnbasi do.—Daniẹli 3:19.