Ovi He Hẹn Homẹ Jiwheyẹwhe Tọn Hùn Lẹ

OVI tẹwẹ hẹn homẹ Jehovah tọn hùn hugan to aigba ji?⁠— Ovi etọn, Jesu wẹ. Dike mí ni dọhodo nuhe Jesu wà bo hẹn homẹ Otọ́ etọn olọn mẹ tọn hùn lẹ ji.

Gbejizọnlin azán atọ̀n tọn wẹ fie whẹndo Jesu tọn nọ nọ̀ yí do dẹ̀n do Jelusalẹm yèdọ fie tẹmpli whanpẹnọ Jehovah tọn tin te. Jesu ylọ tẹmpli lọ dọ “ohọ̀ Otọ́ ṣie tọn.” Ewọ po whẹndo etọn po nọ yì finẹ to whemẹwhemẹ na hùnwhẹ Juwayi tọn.

To owhe dopo mẹ, to whenuena Jesu do owhe 12, whẹndo etọn lẹkọ jei whé to Juwayi lọ godo. Ṣigba to whenuena yé jẹ fie yé na dọ́ wẹ yé doayi e go dọ Jesu ma tin to hẹnnumẹ lẹ po họntọn yetọn lẹ po ṣẹnṣẹn gba. Enẹwutu to afọdopolọji, Malia po Josẹfu po lẹkọyi Jelusalẹm nado dín Jesu pọ́n. Fie wẹ a lẹndọ Jesu tin te?⁠—

Yé mọ Jesu to tẹmpli mẹ. E to todoai na mẹplọntọ lẹ, bosọ to kanbiọ kanse yé. Podọ eyin yé kàn nudepope biọ ẹ, e nọ na gblọndo yé. E paṣa mẹplọntọ lẹ na gblọndo dagbe he e to nina lẹ. Todin, be a sọgan mọ nuhewutu homẹ Jiwheyẹwhe tọn hùn do Ovi etọn go ya?⁠—

Na nugbo tọn, whenuena Malia po Josẹfu po mọ Jesu wẹ ayiha yetọn wá jai. Ṣigba Jesu ma dibu. Na e yọnẹn dọ ofi dagbe de wẹ tẹmpli lọ yin na emi. Enẹwutu e kanse dọmọ: ‘Be mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ?’ E yọnẹn dọ ohọ̀ Jiwheyẹwhe tọn wẹ tẹmpli lọ yin, podọ e yiwanna finẹ.

To godo mẹ, Malia po Josẹfu po plan Jesu heyin owhe-12-mẹvi lọ yì whé po yé po to Nazalẹti. Nawẹ a lẹndọ Jesu yinuwahẹ mẹjitọ etọn lẹ gbọn?⁠— Do glido, Biblu dọ dọ e ‘whiwhẹ ede dai hlan yé.’ Etẹwẹ enẹ zẹẹmẹdo?⁠— E zẹẹmẹdo dọ e setonu na yé. Mọwẹ, e wà nuhe mẹjitọ etọn lẹ dọna ẹn nado wà, etlẹ yin whégbè-zọ́n lẹ taidi sindidà wá whégbè.—Luku 2:41-52.

Enẹwutu lẹnnupọndo ehe ji: Dile Jesu tlẹ yin gbẹtọ pipé de, e setonuna mẹjitọ mapenọ etọn lẹ. Be ehe hẹn homẹ Jiwheyẹwhe tọn hùn ya?⁠— Mọwẹ, na Ohó Jiwheyẹwhe tọn dọna ovi lẹ dọmọ: “Mì setonuna mẹjitọ mìtọn lẹ.” (Efesunu lẹ 6:1) Hiẹ lọsu na hẹn homẹ Jiwheyẹwhe tọn hùn eyin a setonuna mẹjitọ towe lẹ dile Jesu basi do.

Aliho devo he mẹ a sọgan hẹn homẹ Jiwheyẹwhe tọn hùn te wẹ nado dọ ohó etọn na mẹdevo lẹ. Mẹdelẹ sọgan dọ dọ e ma jẹ na yọpọvu lẹ ni nọ wà ehe gba. Ṣigba to whenuena gbẹtọ lẹ tẹnpọn nado glọnalina yọpọvu lẹ sọn ehe wiwà mẹ, Jesu dọmọ: ‘Be mì ma ko hia to Owe-wiwe mẹ gbede dọ, “Sọn onù yọpọvu lẹ tọn mẹ wẹ Jiwheyẹwhe na hẹn pipà jẹgbonu sọn”?’ (Matiu 21:16) Enẹwutu, eyin e jlo mí nado wàmọ, mímẹpo wẹ sọgan dọ ohó Jehovah tọn na mẹdevo lẹ bosọ dọho dogbọn lehe Jiwheyẹwhe jiawu do sọ dali. Podọ eyin mí wàmọ, mí na hẹn homẹ Jiwheyẹwhe tọn hùn.

Fie wẹ mí nọ plọn nuhe mí sọgan dọna mẹdevo lẹ dogbọn Jiwheyẹwhe dali te?⁠— Sọn Biblu pinplọn mítọn to whégbè mẹ wẹ. Humọ mí sọ nọ plọn nususu to fie omẹ Jiwheyẹwhe tọn lẹ nọ pli nado plọnnu te. Ṣigba nawẹ mí sọgan yọ́n mẹhe yin omẹ etọn nugbo lẹ gbọn?⁠—

Eyọn, etẹwẹ gbẹtọ lọ lẹ nọ wà to opli yetọn lẹ ji? Be nuhe tin to Biblu mẹ wẹ yé nọ plọnmẹ nugbonugbo ya? Be yé nọ hia ẹ bo nọ dọhodeji ya? Lehe mí nọ dotoaina Jiwheyẹwhe do niyẹn, kavi e mayin mọwẹ?⁠— Podọ mí nọ donukun nado sè nuhe Jiwheyẹwhe dọ lẹ to opli Klistiani tọn lẹ ji, kavi e mayin mọwẹ?⁠— Ṣigba etẹwẹ a na wà eyin gbẹtọ lẹ dọ dọ e mayin dandan nado setonuna nuhe Biblu dọ lẹ? Be a na dọ dọ omẹ enẹlẹ yin omẹ Jiwheyẹwhe tọn lẹ ya?⁠—

Nudevo de die he mí dona lẹnnupọndeji. Biblu dọ dọ omẹ Jiwheyẹwhe tọn lẹ na yin ‘gbẹtọ de na oyín etọn.’ (Owalọ lẹ 15:14) To whenuena e yindọ Jehovah wẹ oyín Jiwheyẹwhe tọn, mí sọgan kanse gbẹtọ lẹ eyin yé kẹalọyi Jehovah di Jiwheyẹwhe yetọn. Eyin yé dọ lala, to whenẹnu mí na yọnẹn dọ yé ma yin omẹ etọn lẹ. Mẹhe yin omẹ Jiwheyẹwhe tọn lẹ nasọ nọ lá Ahọluduta Jiwheyẹwhe tọn na mẹdevo lẹ. Podọ yé na nọ do owanyi yetọn na Jiwheyẹwhe hia gbọn tonusisena gbedide etọn lẹ dali.—1 Johanu 5:3.

Eyin hiẹ yọ́n pipli de he nọ wà onú ehe lẹpo, hiẹ dona nọ pli hẹ yé nado sẹ̀n Jiwheyẹwhe. A dona nọ dotoai ganji to opli ehelẹ ji bo nasọ nọ na gblọndo to whenuena kanbiọ lẹ yin kinkanse. Nuhe Jesu wà to whenuena e tin to ohọ̀ Jiwheyẹwhe tọn mẹ niyẹn. Podọ eyin hiẹ lọsu wà enẹ, a na hẹn homẹ Jiwheyẹwhe tọn hùn dile Jesu basi do.

Be a sọgan sọ flin yọpọvu devo lẹ to Biblu mẹ he hẹn homẹ Jiwheyẹwhe tọn hùn ya?⁠— Timoti yin apajlẹ dagbe de. Otọ́ etọn ma yise to Jehovah mẹ gba. Ṣigba onọ̀ etọn, Euniki, po onọ̀ daho etọn, Loisi po yin yisenọ. Timoti dotoaina yé bo plọnnu dọgbọn Jehovah dali.

To whenuena Timoti whẹ́n mẹho, apọsteli Paulu basi dlapọn yì otò he mẹ e nọ nọ̀. E doayi e go dọ Timoti jlo nado sẹ̀n Jehovah taun. Enẹwutu e basi oylọna Timoti nado hodo e bo sẹ̀n Jiwheyẹwhe to aliho he gbloada de mẹ. Fidepope he yé yì, yé nọ dọhona gbẹtọ lẹ dogbọn Ahọluduta Jiwheyẹwhe tọn po Jesu po dali.—Owalọ lẹ 16:1-5; 2 Timoti 1:5; 3:14, 15.

Ṣigba be apajlẹ jọja sunnu lẹ tọn kẹdẹ wẹ mí tindo to Biblu mẹ he hẹn homẹ Jiwheyẹwhe tọn hùn ya?⁠— Lala. Di apajlẹ, viyọnnu jọja Islaelivi de wàmọ. To ojlẹ etọn mẹ, okẹ̀n tin to akọta Silia tọn po Islaeli tọn po ṣẹnṣẹn. Enẹwutu to gbèdopo, Silianu lẹ funawhàn hẹ Islaeli bo ze viyọnnu pẹvi enẹ yì kanlinmọgbenu. E yin zize sọyi owhé awhàngán he nọ yin Naamani tọn gbè, bọ e lẹzun afanumẹ de na asi Naamani tọn.

Naamani to awutu de jẹ he nọ yin yiylọdọ pòzọ̀n. Doto depope ma penugo nado hẹnazọ̀ngbọna ẹn. Ṣigba viyọnnu pẹvi Islaeli tọn lọ yise dọ devizọnwatọ vonọtaun Jiwheyẹwhe tọn, heyin yẹwhegán de sọgan hẹnazọ̀ngbọna Naamani. Ṣigba Naamani po asi etọn po ma nọ sẹ̀n Jehovah. Enẹwutu be viyọnnu pẹvi lọ na dọ nuhe e tindo to linlẹn mẹ na yé wẹ ya? Eyin hiẹ wẹ, etẹwẹ a na ko wà?⁠—

Do glido, viyọnnu pẹvi lọ dọmọ: ‘Eyin Naamani sọgan yì yẹwhegán Jehovah tọn dè to Islaeli, to whenẹnu, e na hẹnazọ̀ngbọna Naamani sọn pòzọ̀n etọn mẹ.’ Naamani sè nuhe viyọnnu lọ dọ bosọ yì yẹwhegán Jehovah tọn dè. To whenuena e wà nuhe yẹwhegán lọ dọna ẹn, azọ̀n etọn gbọ. Ehe zọ́n bọ Naamani lẹzun Jiwheyẹwhe nugbo lọ sẹ̀ntọ.—2 Ahọlu lẹ 5:1-15.

Be hiẹ lọsu na jlo nado gọalọna mẹde nado yọ́n Jehovah po nuhe e sọgan wà po, dile viyọnnu pẹvi lọ basi do ya?⁠— Mẹnu lẹ wẹ hiẹ sọgan gọalọna?⁠— Nugbo wẹ dọ, to bẹjẹeji yé sọgan lẹndọ yé ma tindo nuhudo alọgọ tọn. Ṣigba a sọgan dọ onú dagbe he Jehovah nọ wà lẹ na yé. Yé sọgan dotoai. Podọ a sọgan deji dọ ehe na hẹn homẹ Jiwheyẹwhe tọn hùn.