Plọn Ovi Towe Lẹ

E Jlo Na Gọalọ

BE A ko mọ mẹde pọ́n bọ e to azọ̀n sinsinyẹn jẹ ya?— Be e jlo we nado wà nude do gọalọna ẹn ya?— Eyin otò devo mẹ wẹ e ka wá sọn kavi sinsẹ̀n devo mẹ wẹ e te lo? Be e na gbẹ́ jlo we nado gọalọna ẹn na e nido jẹgangan ya?— Viyọnnu pẹvi he nọ̀ otò Islaeli tọn mẹ to nudi owhe 3 000 die de wàmọ. Gbọ mí ni dọhodo nuhe jọ to whenẹnu ji.

Awhàn nọ saba tin to Islaeli hohowhenu tọn, he mẹ viyọnnu lọ nọ nọ̀, po otò Silia tọn he sẹpọ yé po ṣẹnṣẹn. (1 Ahọlu lẹ 22:1) To gbèdopo, Silianu lẹ wá Islaeli bo wle viyọnnu pẹvi lọ. Yé ze e yì Silia bọ e wá lẹzun deviyọnnu asi Naamani, awhàngán Silia tọn tọn. Naamani to azọ̀n ylankan de jẹ he nọ yin yiylọdọ pòzọ̀n, yèdọ awutu de he sọgan wọ̀ agbasa namẹ.

Deviyọnnu lọ dọna asi Naamani tọn nuhe asu etọn sọgan wà na azọ̀n etọn nido gbọ. E dọmọ: ‘Eyin Naamani dike bo yì Samalia, yẹwhegán Jehovah tọn Eliṣa sọgan hẹn pòzọ̀n etọn gbọ.’ Aliho he mẹ deviyọnnu lọ dọho Eliṣa tọn te hẹn Naamani yise dọ yẹwhegán lọ sọgan hẹn ẹn jẹgangan nugbonugbo. Enẹwutu, po alọkẹyi Bẹni-hadadi, ahọlu Silia tọn po, Naamani po devizọnwatọ etọn delẹ po zingbejizọnlin gaa he yì kilomẹtlu 150 nado dín Eliṣa mọ.

Jẹnukọn whẹ́, yé yì Jeholami, ahọlu Islaeli tọn dè. Yé do wekanhlanmẹ Ahọlu Bẹni-hadadi tọn hia ẹ, ehe mẹ e biọ alọgọ te do Naamani tamẹ. Ṣigba Jeholami ma tindo yise to Jehovah po yẹwhegán Eliṣa po mẹ. Jeholami lẹndọ Bẹni-hadadi to ayiha kàn nado hoavùn hẹ ẹ wẹ. Whenuena Eliṣa sè ehe, e dọna Ahọlu Jeholami dọmọ: “Gbọ e ni wá dè e dinvie.” Eliṣa jlo na dohia dọ Jiwheyẹwhe tindo huhlọn nado hẹn azọ̀n ylankan Naamani tọn gbọ na ẹn.—2 Ahọlu lẹ 5:1-8.

To whenuena Naamani wá owhé Eliṣa tọn gbè po osọ́ etọn lẹ po gọna awhànkẹkẹ lẹ, Eliṣa do wẹnsagun de hlan nado dọna ẹn dọmọ: ‘Yì lawu to Tọ̀sisa Jọdani mẹ whla ṣinawe, azọ̀n towe na gbọ.’ Naamani gblehomẹ. Nuhe e to nukundo dai wẹ yindọ Eliṣa na wá bo na mimí alọ etọn gbọn pòzọ̀n lọ ji bọ e na yì. Kakatimọ, wẹnsagun ehe poun wẹ e mọ! Enẹwutu, Naamani lẹ́ po adi po bo jlo na yì whé.—2 Ahọlu lẹ 5:9-12.

Eyin hiẹ yin dopo to devi Naamani tọn lẹ mẹ, etẹwẹ a na ko wà?— Devi lọ lẹ kanse e dọmọ: ‘Eyin onú daho de wẹ Eliṣa ko dọna we nado wà wẹ, be hiẹ ma na ko wà ẹ ya? Eyin mọ wẹ, etẹwutu a ma na wà onú tata ehe—yèdọ nado lawu bo jẹgangan?’ Naamani dotoaina yé. E “jẹte yì, bo siọ ede whla ṣinawe to Jọdani mẹ, . . . agbasalan etọn sọ vọ́ gọ̀ di . . . agbasalan ovivu de tọn.”

Naamani lẹkọyi Eliṣa dè bo dọna ẹn dọ: “Doayi e go, dinvie, yẹn yọnẹn dọ Jiwheyẹwhe de ma tin to aigba depope mẹ, adavo to Islaeli.” E dopagbe na Eliṣa dọ emi ma nasọ “na avọ́nunina mimẹ̀ kavi sanvọ́ hlan yẹwhe devo lẹ . . . ba, adavo hlan [Jehovah].”—2 Ahọlu lẹ 5:13-17.

Be e na jlo we nado gọalọna mẹde na e nido plọnnu dogbọn Jehovah po nuhe e sọgan wà po dali, dile viyọnnu enẹ wà do ya?— To whenuena Jesu tin to aigba ji, dawe he to pòzọ̀n jẹ de tindo yise to ewọ mẹ bo dọmọ: ‘Eyin hiẹ jlo nugbonugbo nado gọalọna mi, a sọgan wàmọ.’ Be a yọ́n nuhe Jesu gblọnna ẹn ya?— “Yẹn jlo.” Podọ Jesu hẹnazọ̀ngbọna ẹn, kẹdẹdile Jehovah hẹnazọ̀ngbọna Naamani do.—Matiu 8:2, 3.

Be a yọnẹn dogbọn aihọn yọyọ Jehovah tọn lọ dali, ehe mẹ gbẹtọ lẹpo na tindo agbasalilo dagbe bo nọgbẹ̀ kakadoi te ya?— (2 Pita 3:13; Osọhia 21:3, 4) Eyin mọ wẹ, ayihaawe ma tin dọ a na jlo nado dọhona mẹdevo lẹ gando onú jiawu ehelẹ go!

Kanbiọ Lẹ:

○ Nawẹ viyọnnu pẹvi de gọalọna Naamani gbọn, dile etlẹ yindọ awhànpa etọn lẹ wẹ wle e?

○ Naegbọn Naamani ma jlo na setonuna nuhe Eliṣa dọ to tintan whenu, podọ etẹwẹ hẹn ẹn diọlinlẹn?

○ Etẹwẹ hiẹ dona tindo ojlo nado wà to apajlẹ viyọnnu pẹvi lọ tọn hihodo mẹ?

○ Etẹwẹ Jesu tindo ojlo nado wà, podọ naegbọn gbẹninọ na yin awuvivinu to aihọn yọyọ Jiwheyẹwhe tọn mẹ?