Họntọn Mítọn lẹ Dona Yiwanna Jiwheyẹwhe

HỌNTỌN yin mẹhe mí nọ yawu dọho hẹ bo nọ dọnsẹpọ hugan lẹ. Ṣigba e jẹ dọ mí ni tindo họntọn dagbe lẹ. Mẹnu wẹ hiẹ lẹndọ e dona yin họntọn vivẹ́ mítọn?⁠— Jehovah Jiwheyẹwhe wẹ.

Be mí sọgan yin họntọn Jiwheyẹwhe tọn nugbonugbo ya?⁠— Biblu dọ dọ Ablaham, dawe he nọgbẹ̀ to ojlẹ dindẹn die wayi, yin “họntọn Jiwheyẹwhe tọn.” (Jakobu 2:23) Be a yọ́n nuhe hẹn ẹn yin họntọn Jiwheyẹwhe tọn ya?⁠— Biblu dọ dọ, na Ablaham setonuna Jiwheyẹwhe wutu wẹ. E setonu to whenuena nuhe yin bibiọ to e si ma tlẹ bọawu. Enẹwutu eyin mí jlo na yin họntọn Jehovah tọn, mí dona nọ wà nuhe nọ hẹn homẹ etọn hùn lẹ, kẹdẹdile Ablaham basi do podọ kẹdẹdile Mẹplọntọ Daho lọ nọ basi do to whepoponu.—Gẹnẹsisi 22:1-14; Johanu 8:28, 29; Heblu lẹ 11:8, 17-19.

Jesu dọna apọsteli etọn lẹ dọmọ: ‘Họntọn ṣie wẹ mìwlẹ, eyin mì wà nuhe yẹn degbena mì lẹ.’ (Johanu 15:14) To whenuena e yindọ onú lẹpo he Jesu plọn gbẹtọ lẹ wẹ wá sọn Jehovah dè, nuhe dọ Jesu te wẹ yindọ mẹhe nọ wà nuhe Jiwheyẹwhe biọ to yé si lẹ wẹ yin họntọn emitọn. Mọwẹ, họntọn etọn lẹpo wẹ yiwanna Jiwheyẹwhe.

Delẹ to họntọn vivẹ́ Mẹplọntọ Daho lọ tọn lẹ mẹ wẹ apọsteli etọn, he a mọ fọto yetọn to weda 75 owe ehe tọn mẹ lẹ. Yé zingbejizọnlin hẹ ẹ bo gọalọna ẹn to azọ́n yẹwhehodidọ tọn mẹ. Jesu yí suhugan whenu etọn lẹ tọn zan hẹ sunnu ehelẹ. Yé nọ dùnú dopọ. Bo nọ dọho gando Jiwheyẹwhe go dopọ. Bosọ nọ wà onú devo lẹ dopọ. Ṣigba Jesu sọ tindo họntọn susu devo lẹ ga. E nọ saba nọpọ́ hẹ yé, bọ yé nọ jaya dopọ.

Whẹndo dopo he Jesu nọ yawu kọnawudopọ hẹ tin to otò Bẹtani tọn mẹ, to gbonu otò Jelusalẹm tọn. Be a gbẹsọ flin hagbẹ whẹndo lọ tọn lẹ ya?⁠— Malia, Malta po nọvisunnu yetọn Lazalọsi po wẹ. Jesu ylọ Lazalọsi dọ họntọn emitọn. (Johanu 11:1, 5, 11) Nuhewutu Jesu do yiwanna whẹndo lọ bo nọ yawu dla yé pọ́n wẹ yindọ yé yiwanna Jehovah bo nọ sẹ̀n Ẹn.

Ehe ma dohia dọ Jesu nọ ylanhùn do mẹhe ma nọ sẹ̀n Jiwheyẹwhe lẹ go gba. E nọ do homẹdagbe hia yé ga. E tlẹ nọ yì owhé yetọn gbè bo nọ dùnú hẹ yé. Ehe hẹn mẹdelẹ nado ylọ Jesu dọ “họntọn tòkuẹ-ṣinyantọ po ylandonọ lẹ po tọn.” (Matiu 11:19) Ṣigba nuhe mí dona yọnẹn wẹ yindọ, Jesu ma yì owhé omẹ ehelẹ tọn gbè na e kẹalọyi walọ ylankan yetọn lẹ wutu gba. Kakatimọ, e dla yé pọ́n nado sọgan dọ ohó Jehovah tọn na yé. E tẹnpọn nado gọalọna yé na yé nido gbẹ́ walọ ylankan yetọn lẹ dai bo sẹ̀n Jiwheyẹwhe.

Ehe jọ to otò Jẹliko tọn mẹ to gbèdopo. Jesu gbọn finẹ poun wá jei Jelusalẹm. Gbẹtọgun daho de tin to finẹ, bọ dawe de he nọ yin Zaṣe tin to gbẹtọgun lọ mẹ. E jlo na pọ́n Jesu. Ṣigba na Zaṣe yin mẹhe whègli taun de wutu, gbẹtọgun lọ glọnalina ẹn nado mọ Jesu. Enẹwutu e họ̀nwezun yì nukọn to aliho lọ tó bo hẹ atin de ji nado sọgan mọ Jesu ganji to whenuena e na juwajei.

To whenuena Jesu jẹ atin lọ sá, e pọ́n aga bo dọmọ: ‘Yawu bo jẹte wá, na yẹn na yì owhé towe gbè to egbehe.’ Ṣigba Zaṣe yin dawe adọkunnọ de he ko waylan susu. Etẹwutu wẹ Jesu jlo nado yì owhé dawe ylanwatọ enẹ tọn gbè?⁠—

E mayin dọ Jesu yiwanna walọ ylankan he dawe lọ ko zan lẹ wutu wẹ gba. Ṣigba e yì finẹ nado dọ ohó Jiwheyẹwhe tọn na Zaṣe. E mọ lehe dawe lọ ko dovivẹnu sọ nado mọ ẹn. Enẹwutu e yọnẹn dọ Zaṣe sọgan dotoai. Dotẹnmẹ hundote dagbe de die nado dọhona ẹn dogbọn walọ he Jiwheyẹwhe jlo dọ gbẹtọ lẹ ni zan dali.

Etẹwẹ yin kọdetọn lọ?⁠— Zaṣe yiwanna nuplọnmẹ Jesu tọn lẹ. E vẹ́na ẹn dọ e ko tafu gbẹtọ lẹ, podọ e sọ dopagbe nado gọ̀ akuẹ he e ko tafu gbẹtọ lẹ bo ko yí sọn yé si lẹ jo. To enẹgodo, e lẹzun hodotọ Jesu tọn. To whenẹnu wẹ Jesu po Zaṣe po lẹzun họntọn.—Luku 19:1-10.

Eyin mí plọnnu sọn apajlẹ Mẹplọntọ Daho lọ tọn mẹ, be mí na nọ dla mẹhe ma yin họntọn mítọn lẹ pọ́n ya?⁠— Mọwẹ. Ṣigba mí ma na nọ yì owhé yetọn gbè na mí yiwanna walọ ylankan yetọn lẹ wutu gba. Podọ mí ma na nọ kọnawudopọ hẹ yé to walọ ylankan yetọn lẹ mẹ gba. Ṣigba mí na nọ yì yé dè nado dọ ohò Jiwheyẹwhe tọn na yé.

Ṣigba mẹhe mí nọ yí whenu susu zan hẹ lẹ wẹ yin họntọn vivẹ́ mítọn lẹ. Eyin yé na yin họntọn dagbe, yé dona yin mẹhe Jiwheyẹwhe yiwanna lẹ. Mẹdelẹ tlẹ sọgan gọ̀n ma yọ́n Jehovah. Ṣigba eyin yé jlo na plọnnu dogbọn Jehovah dali, mí sọgan gọalọna yé. Podọ eyin yé wá lẹzun mẹhe yiwanna Jehovah dile mí yiwanna Ẹn do, to whenẹnu mí sọgan jihọntọn pẹkipẹki hẹ yé.

Aliho devo sọ tin nado yọnẹn eyin mẹlọ yin mẹhe mí sọgan de di họntọn dagbe. Nọ doayi nuhe e nọ wà lẹ go. Be e nọ wà nuhe ma sọgbe lẹ na mẹdevo lẹ bo nọ konu to enẹgodo wẹ ya? Enẹ ma sọgbe, kavi e mayin mọwẹ?⁠— Be e nọ fọ́n nuhahun dote na ede to whepoponu wẹ ya? Mí ma na jlo nado nọ biọ nuhahun mẹ hẹ ẹ gba, kavi e mayin mọwẹ?⁠— Kavi be e nọ wà onú ylankan lẹ sọn ojlo mẹ bo nọ lẹndọ emi bikan bọ mẹdepope ma gbò e dó wẹ ya? Eyin mẹde ma tlẹ gbò mẹlọ dó, Jiwheyẹwhe mọ nuhe e wà lọ, kavi e mayin mọwẹ?⁠— Be a lẹndọ mẹhe nọ wàmọ lẹ na yin họntọn dagbe de na mí ya?⁠—

Jaale, ze Biblu towe. Dike mí ni pọ́n nuhe e dọ gando lehe gbẹdido mítọn lẹ nọ yinuwado walọ mítọn ji do. Hùn 1 Kọlintinu lẹ weta 15, wefọ 33. Be a ko mọ ẹn ya?⁠— E hia dọmọ: “Yè klọ mì blo: ogbẹ́ ylankan nọ hẹn walọ dagbe gble.” Enẹ dohia dọ eyin mí dogbẹ́ hẹ mẹylankan lẹ, mí sọgan lẹzun mẹylankan ga. Podọ e sọ yin nugbo dọ họntọn dagbe lẹ nọ gọalọna mí nado tindo walọ dagbe.

Ṣigba dike mí ni ma wọn gbede blo dọ Omẹ titengbe hugan lọ to gbẹzan mítọn mẹ wẹ Jehovah. Mí ma na jlo nado hẹn họntọnjiji mítọn hẹ ẹ gble gba, kavi e mayin mọwẹ?⁠— Enẹwutu, mí dona to aṣeji nado jihọntọn hẹ mẹhe yiwanna Jiwheyẹwhe lẹ kẹdẹ.