Weta 48
Aihọn Yọyọ Jijọhonọ Jiwheyẹwhe Tọn—Hiẹ Sọgan Nọ E Mẹ
JIWHEYẸWHE ze Adam po Evi po do jipa Edẹni tọn mẹ. Dile yewlẹ tlẹ vẹtoli bo kú sọ, Jiwheyẹwhe ko hẹn ẹn yọnbasi na ovi yetọn lẹ, gọna mílọsu to egbehe nado nọgbẹ̀ kakadoi to Paladisi mẹ. Biblu dopagbe dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:29.
Biblu dọho “olọn yọyọ lẹ” po “aigba yọyọ de” tọn po. (Isaia 65:17; 2 Pita 3:13) Gandudu gbẹtọ lẹ tọn wẹ yin “olọn” dintọn lẹ, ṣigba “olọn yọyọ lẹ” nọtena Jesu Klisti po mẹhe na dugán hẹ ẹ to olọn mẹ lẹ po. Lehe homẹ mítọn na hùn do sọ to whenuena olọn yọyọ lẹ, he yin gandudu dodonọ Jiwheyẹwhe tọn he na hẹn jijọho wá na dugán do aigba pete ji!
Ṣigba, etẹwẹ “aigba yọyọ” lọ yin?— Aigba yọyọ lọ yin gbẹtọ dagbe lẹ he yiwanna Jehovah. Eyin Biblu zan hogbe lọ “aigba,” to whedelẹnu e nọ zẹẹmẹdo gbẹtọ he to aigba ji lẹ, e mayin aigba lọ lọsu gba. (Gẹnẹsisi 11:1; Psalm 66:4; 96:1) Enẹwutu aigba ji file wẹ mẹhe aigba yọyọ lọ nọtena lẹ na nọ.
To whenẹnu, aihọn dintọn he yin mẹylankan lẹ tọn ma na tin ba. Flindọ, Singigọ azán Noa gbè tọn và aihọn mẹylankan lẹ tọn sudo. Podọ, dile mí ko plọn do, aihọn ylankan dintọn ehe na yin vivasudo to Amagẹdọni mẹ. Todin, gbọ mí ni pọ́n gbẹzan he nkọtọn mí na zan to aihọn yọyọ Jiwheyẹwhe tọn mẹ to Amagẹdọni godo.
Be hiẹ jlo na nọgbẹ̀ kakadoi to Paladisi mẹ to aihọn yọyọ jijọhonọ Jiwheyẹwhe tọn mẹ ya?— Doto depope ma sọgan hẹn mí dogbẹ̀ kakadoi gba. Amasinkún depope ma sọgan glọnalina mí nado kú gba. Aliho dopo gee lọ he sọgan hẹn mí nọgbẹ̀ kakadoi wẹ nado dọnsẹpọ Jiwheyẹwhe. Podọ Mẹplọntọ Daho lọ ko dọ lehe mí sọgan wà ehe gbọn na mí.
Gbọ mí ni ze Biblu mítọn bo hùn Johanu weta 17, wefọ 3. Mí mọ hogbe Mẹplọntọ Daho lọ tọn ehelẹ to finẹ dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.”
Todin, etẹwẹ Jesu dọ mí dona wà nado nọgbẹ̀ kakadoi?— Tintan, mí dona tindo oyọnẹn Otọ́ mítọn olọn mẹ, Jehovah tọn, podọ Ovi etọn, he ze ogbẹ̀ etọn do sanvọ́ na mí tọn ga. Ehe zẹẹmẹdo dọ mí dona plọn Biblu. Owe ehe, Plọnnu sọn Mẹplọntọ Daho lọ Dè, to alọgọna mí nado wà enẹ.
Ṣigba nawẹ nupinplọn dogbọn Jehovah dali na gọalọna mí nado nọgbẹ̀ kakadoi gbọn?— Do glido, kẹdẹdile mí tindo nuhudo núdùdù tọn to azán lẹpo gbè do, mí dona plọnnu dogbọn Jehovah dali to azán lẹpo gbè ga. Biblu dọmọ: ‘Gbẹtọ ma dona nọgbẹ̀ gbọn akla dopokẹdẹ dali gba, ṣigba gbọn ohó he wá sọn onù Jehovah tọn mẹ lẹpo dali.’—Matiu 4:4.
Mí sọ dona tindo oyọnẹn dogbọn Jesu Klisti dali na Ovi Jiwheyẹwhe tọn ehe wẹ e dohlan nado de ylando mítọn lẹ sẹ̀. Biblu dọmọ: “Whlẹngán masọ tin to mẹdevo dè.” Podọ Biblu sọ dọmọ: “Mẹhe yise to Ovi mẹ tindo ogbẹ̀ madopodo.” (Owalọ lẹ 4:12; Johanu 3:36) Todin, etẹwẹ e zẹẹmẹdo nado ‘yí yise zan’ to Jesu mẹ?— E zẹẹmẹdo dọ mí ni tindo yise to Jesu mẹ nugbonugbo bo yọnẹn dọ mí ma sọgan nọgbẹ̀ matin ewọ. Be mí yí enẹ sè ya?— Eyin mí yí enẹ sè, mí na zindonukọn nado to nuplọn sọn Mẹplọntọ Daho lọ dè to azán lẹpo gbè, bo nasọ nọ wà nuhe e dọ lẹ.
Aliho dagbe dopo nado plọnnu sọn Mẹplọntọ Daho lọ dè wẹ nado hia owe ehe to gbesisọmẹ bo nọ pọ́n yẹdide he to e mẹ lẹpo bosọ nọ lẹnnupọndo yé ji. Tẹnpọn nado na gblọndo na kanbiọ he yin kinkanbiọ do yẹdide lẹ ji. Podọ, nọ hia owe ehe dopọ hẹ onọ̀ towe kavi otọ́ towe. Eyin mẹjitọ towe lẹ ma to finẹ, nọ hia ẹ dopọ hẹ mẹdevo he ko whẹ́n mẹho lẹ podọ hẹ yọpọvu devo lẹ. Be homẹ towe ma na hùn eyin hiẹ sọgan gọalọna mẹdevo lẹ nado plọnnu sọn Mẹplọntọ Daho lọ dè nado yọ́n nuhe yé dona wà nado nọgbẹ̀ kakadoi to aihọn yọyọ Jiwheyẹwhe tọn mẹ ya?—
Biblu dọna mí dọmọ: ‘Aihọn to jujujei.’ Ṣigba Biblu sọ dọ nuhe mí dona wà nado nọgbẹ̀ kakadoi to aihọn yọyọ Jiwheyẹwhe tọn mẹ. E dọmọ: “Ewọ he to ojlo Jiwheyẹwhe tọn wà wẹ na nọte kakadoi.” (1 Johanu 2:17) Enẹwutu, nawẹ mí sọgan wagbọn do nọgbẹ̀ kakadoi to aihọn yọyọ Jiwheyẹwhe tọn mẹ?— Mí sọgan wàmọ, gbọn tintindo oyọnẹn Jehovah tọn po Ovi yiwanna etọn Jesu tọn po dali. Ṣigba mí sọ dona nọ wà, kavi yí nuhe mí plọn lẹ do yizan mẹ ga. Gbọ na nupinplọn towe to owe ehe mẹ ni gọalọna we nado wà onú helẹ.