Nuhudo He Ovi lẹ Tindo sọn Mẹjitọ lẹ Dè

MẸJITỌ lẹpo wẹ nọ tindo mahẹ to nujijọ de mẹ he gbẹtọvi lẹ ma sọgan mọnukunnujẹemẹ to gigọ́mẹ. Mẹjitọ dopodopo wẹ nọ na nude sọn agbasa etọn mẹ. Bọ to godo mẹ, gbẹtọ gbẹ̀te blebu de nọ yin awuwlena to onọ̀ lọ homẹ. Enẹwutu, e mayin nupaṣamẹ de dọ, to whenuena ovi de yin jiji, gbẹtọ lẹ nọ saba ylọ nujijọ lọ dọ “azọ́njiawu vijiji tọn.”

Ṣigba bẹjẹeji de poun wẹ vijiji yin to azọngban mẹjitọ lẹ tọn mẹ. To bẹjẹeji, ovivu lẹ nọ dibla ganjẹ mẹjitọ kavi mẹgopọntọ yetọn lẹ go to onú lẹpo mẹ, ṣigba eyin yé jẹ whinwhẹ́n ji, yé nọ tindo nuhudo nususu tọn hú nukunpedomẹgo agbasa tọn kẹdẹ. Yé nọ tindo nuhudo alọgọ tọn nado whẹ́n to apọ̀nmẹ, to numọtolanmẹ-liho, to walọyizan-liho, podọ to gbigbọ-liho.

Nado whẹ́n to aliho dagbe mẹ, ovi lẹ na taun tọn tindo nuhudo owanyi mẹjitọ yetọn lẹ tọn. Dile etlẹ yindọ hogbe owanyi tọn lẹ didọ sọn nùmẹ yin nujọnu, nuyiwa lẹ dona nọgodona hogbe lọ lẹ. Mọwẹ, ovi lẹ tindo nuhudo apajlẹ dagbe mẹjitọ lẹ tọn. Yé tindo nuhudo anademẹ tọn to walọyizan-liho, po nunọwhinnusẹ́n he yé dona hodo lẹ po. Podọ ehelẹ dona yin nina yé sọn ovu-whenu. Nujijọ awubla tọn lẹ sọgan jọ eyin ovi lẹ ma mọ alọgọ he jẹ lẹ yí sọn ovu-whenu whẹpo do whẹ́n.

Nunọwhinnusẹ́n dagbe hugan lẹ ma sọgan yin mimọ to fidevo hú Biblu mẹ. Anademẹ he sinai do Biblu ji lẹ wẹ nọ wà dagbe hugan. Anademẹ enẹlẹ nọ gọalọna ovi lẹ nado yọnẹn dọ nuhe yè to didọna yé lẹ ma yin nuhe gbẹtọ tata de dọ gba, ṣigba Mẹdatọ lọ, heyin Otọ́ olọn mẹ tọn yetọn wẹ dọ ẹ. Ehe nọ hẹn ayinamẹ lọ tindo pinpẹn he ma sọgan yọnjlẹ.

Biblu dotuhomẹna mẹjitọ lẹ nado wazọ́n sinsinyẹn nado dó nunọwhinnusẹ́n he sọgbe lẹ do ayiha mẹ na ovi yetọn lẹ. Ṣigba, dile ovi lẹ to whinwhẹ́n, e nọ saba vẹawu na mẹjitọ lẹ nado dọ nuhe yin nujọnu hugan lẹ na yé. Owe ehe, Plọnnu sọn Mẹplọntọ Daho lọ Dè, yin awuwlena nado glọnalina ninọmẹ mọnkọtọn. Eyin owe de he bẹ nudọnamẹ gbigbọmẹ tọn hẹn he hiẹ sọgan hia dopọ hẹ ovi towe lẹ. Ṣigba humọ, e sọ nọ hùn aliho hodọdopọ tọn dote to yọpọvu lẹ po mẹhe to owe ehe hia hẹ yé lẹ po ṣẹnṣẹn.

Hiẹ na doayi e go dọ owe lọ nọ biọ gblọndo sọn ovi lọ dè to whedelẹnu. Kanbiọ he sọgbe susu lẹ ko yin awuwlena do owe lọ mẹ. To whenuena a mọ kanbiọ ehelẹ, a na mọ ohù kleun ehe (—⁠) bọdego. Nuflinmẹ de wẹ ehe yin nado yì agbọji vude bo na dotẹnmẹ ovi lọ lọsu nado na gblọndo. Ovi lẹ nọ jlo nado tindo mahẹ to hodọdopọ mẹ. Eyin enẹ ma tin, agbọ́ na yawu pé ovi lọ bọ e ma na tindo ojlo ba.

Ṣigba, na taun tọn, kanbiọ ehelẹ na gọalọna we nado yọ́n nuhe tin to ayiha ovi lọ tọn mẹ. Ovi lọ sọgan na gblọndo he ma sọgbe. Ṣigba nudọnamẹ he bọdo kanbiọ dopodopo go to owe lọ mẹ yin awuwlena nado gọalọna ovi lọ nado sọgan plọn lehe e na nọ lẹnnupọn na ede gbọn.

Adà vonọtaun owe lọ tọn wẹ yẹdide he hugan 230 etọn lẹ. Zẹẹmẹ suhugan yẹdide lọ lẹ tọn nọ yin kanbiọ he na gọalọna ovi lọ nado dọ linlẹn etọn, sọgbe hẹ nuhe e mọ po nuhe e hia po. Enẹwutu dọhodo yẹdide lọ lẹ ji hẹ ovi lọ. Ehe sọgan yin aliho mẹpinplọn tọn dagbe de he na dó nuplọnmẹ lọ do ahun mẹ na ovi lọ.

Eyin ovi lọ yọ́n wehia, dotuhomẹna ẹn nado nọ hia owe lọ na we podọ na ede. Dile e na to hihia ẹ sọ, mọwẹ ayinamẹ dagbe he to e mẹ lẹ na biọ ayiha po ahun etọn po mẹ do niyẹn. Ṣigba nado hẹn kanṣiṣa owanyi po sisi po tọn he to hiẹ po ovi towe po ṣẹnṣẹn lodo ganji, tẹnpọn nado nọ hia owe lọ dopọ hẹ ẹ, podọ to gbesisọmẹ.

To owhe agọe tọn lẹ mẹ, fẹnnuwiwa, afinyọnnuwiwa, po walọ gblezọn devo lẹ po ko gbayipe tlala bo lẹzun owùnu de na ovi lẹ. Enẹwutu yé tindo nuhudo hihọ́-basinamẹ tọn, ehe owe ehe gọalọnamẹ nado wleawuna to aliho yẹyi tọn he to tlọlọ de mẹ. Etomọṣo, ovi lẹ na taun tọn dona yin anadena hlan Asisa nuyọnẹn lẹpo tọn, yèdọ Otọ́ olọn mẹ tọn mítọn, Jehovah Jiwheyẹwhe dè. Ehe wẹ Mẹplọntọ Daho lọ, Jesu wà to whepoponu. Mí deji dọ owe ehe na gọalọna hiẹ po whẹndo towe po nado wleawuna gbẹzan mìtọn nado sọgan hẹn homẹ Jehovah tọn hùn, bọ mì na do mọ dona mavọmavọ lẹ.