Hiẹ Sọgan Duto Aṣa Vijinu-Yido-Daihun Tọn Ji

Vijinu-yido-daihun, yèdọ aṣa he ma nọ hẹn homẹ Jiwheyẹwhe tọn hùn nọ hẹnmẹ lẹnnupọndo pekọ mẹdetiti tọn kẹdẹ ji bosọ nọ hẹn ayiha mẹtọn gblezọn.a Mẹhe nọ yí vijinu do daihun sọ sọgan nọ pọ́n mẹdevo lẹ hlan taidi mẹhe yè sọgan zanhẹ poun nado hẹn pekọwana ojlo zanhẹmẹ tọn. E ma nọ pọ́n zanhẹmẹ hlan taidi dohia owanyi tọn ba ṣigba di nuyiwa de he nọ hẹn pekọ ojlẹ gli tọn wá bosọ nọ de ojlo zogbe zanhẹmẹ tọn pò. Ṣigba ojlo enẹ nọ depò na ojlẹ vude poun wẹ. Na nugbo tọn, kakati vijinu-yido-daihun ni gọalọ nado hẹn awutugonu lẹ kú na nuhe dù “galilọ, mawé, wantuntun,” e nọ fọ́n yé dote wẹ.—Kọlọsinu lẹ 3:5.

Apọsteli Paulu wlan dọmọ: “Mẹyiwanna vivẹ emi, mì gbọ mí ni klọ míde sọn dihó agbasalan po gbigbọ tọn lẹpo po mẹ, bosọ hẹn wiwe sọgbe to osi Jiwheyẹwhe tọn mẹ.” (2 Kọlintinu lẹ 7:1) Eyin hiẹ to mimọ ẹn taidi nuhe vẹawu nado setonuna ayinamẹ ehe, ma hẹn todido bu blo. Jehovah “wleawu [to whepoponu] nado jona” we bo gọalọna we. (Psalm 86:5; Luku 11:9-13) Na nugbo tọn, ayiha towe he nọ to whẹgbledo we podọ vivẹnudido towe nado duto aṣa lọ ji—mahopọnna dọ hiẹ gbẹ́ nọ jai jẹ omọ̀ lọ mẹ to whedelẹnu—dohia dọ a tindo gbigbọ dagbe. Sọ flindọ “Jiwheyẹwhe klohu ayiha mítọn bosọ yọ́n onú popo.” (1 Johanu 3:20) E ma yin ylando mítọn lẹ kẹdẹ wẹ Jiwheyẹwhe nọ mọ; e nọ mọ nuhe mí yin to blebu mẹ. Ehe nọ hẹn ẹn penugo nado yí awuvẹmẹ do dotoaina ovẹvivẹ ahundopo tọn mítọn na lẹblanu. Enẹwutu, taidi ovi he nọ yì otọ́ etọn dè eyin e tin to nuhahun mẹ, ma dike agbọ́ ni pé we nado nọ yí whiwhẹ do lẹhlan Jiwheyẹwhe dè to odẹ̀ vẹkuvẹku mẹ gbede blo. Jehovah na na we ayihadawhẹnamẹnu wiwe de. (Psalm 51:1-12, 17; Isaia 1:18) Ṣigba, a dona ze afọdide he jẹ lẹ to kọndopọ mẹ hẹ odẹ̀ towe lẹ. Di apajlẹ, a dona tẹnpọn nado dapana wunmẹ yẹdide fẹnnuwiwa tọn lẹpo pinpọn gọna ogbẹ́ ylankan dido.b

Eyin nuhahun towe nado nọ yí vijinu do daihun gbọṣi aimẹ janwẹ, jaale bo dọhodo whẹho lọ ji hẹ mẹjitọ Klistiani de kavi họntọn he whèwhín to gbigbọ-liho bo nọ hò mẹtọn pọ́n de.c—Howhinwhẹn lẹ 1:8, 9; 1 Tẹsalonikanu lẹ 5:14; Titu 2:3-5.