NUPINPLỌN 18

Nawẹ Mí Nọ Gọalọna Mẹmẹsunnu lẹ to Nugbajẹmẹji Whenu Gbọn?

Kunnudetọ Jehovah tọn lẹ bẹ agbàn wá na mẹhe go nugbajẹmẹji jọ do lẹ to République dominicaine — République dominicaine

Azọ́nwatọ kọgbọ tọn lẹ to Plitẹnhọ Ahọluduta tọn de vọ́ gbá to Japon — Japon

Kunnudetọ Jehovah tọn de to homẹmiọnna mẹde to nugbajẹmẹji de godo to Haïti — Haïti

Eyin nugbajẹmẹji de jọ, Kunnudetọ Jehovah tọn lẹ nọ wleawuna alọgọ nado hẹn kọgbọ wá na mẹmẹsunnu yetọn he go nugbajẹmẹji lọ gando lẹ to afọdopolọji. Vivẹnudido mọnkọtọn lẹ nọ dohia dọ mí tindo owanyi nujọnu tọn na ode awetọ. (Johanu 13:34, 35; 1 Johanu 3:17, 18) Aliho tẹlẹ mẹ wẹ mí nọ gọalọ te?

Mí nọ basi nunina akuẹ tọn. To whenue huvẹ daho de tọ́n to Jude, Klistiani dowhenu tọn he tin to Antioku lẹ do akuẹ hlan nado gọalọna mẹmẹsunnu yetọn lẹ. (Owalọ lẹ 11:27-30) Mọdopolọ, eyin mí sè dọ mẹmẹsunnu mítọn he to awà aihọn lọ tọn devo ji lẹ to pipehẹ nugbajẹmẹji de, mí nọ do nunina lẹ hlan gbọn agun mítọn gblamẹ nado gọalọna mẹhe to nuhudo sinsinyẹn mẹ lọ lẹ to agbasa-liho.—2 Kọlintinu lẹ 8:13-15.

Mí nọ gọalọ to aliho he yọ́n-na-yizan lẹ mẹ. Mẹho agun tọn he tin to fihe nugbajẹmẹji lọ jọ te lẹ nọ dín hagbẹ agun lọ tọn lẹ dopodopo mọ nado hẹn ẹn diun dọ yé tin to hihọ́ mẹ. Wedegbẹ́ kọgbọ tọn de sọgan hẹn ẹn diun dọ núdùdù, osin nùnù dagbe, avọ̀, adọtẹn po nukunpedomẹgo dotowhé tọn po yin nina mẹhe tin to nuhudo mẹ lẹ. Susu Kunnudetọ he yọ́n azọ́n he nuhudo etọn tin lẹ tọn wẹ nọ ze yede jo bo nọ dohún na yede nado yì gọalọ to azọ́n kọgbọ tọn lọ mẹ kavi nado jla owhé po Plitẹnhọ Ahọluduta tọn he ko yin hinhẹngble lẹ po do. Pọninọ he mí nọ duvivi etọn taidi titobasinanu de po numimọ he mí ko tindo to azọ́nwadopọ mẹ po nọ hẹn mí penugo nado yawu gọalọ to ojlẹ nuhudo tọn lẹ mẹ. Dile etlẹ yindọ mí nọ gọalọna “mẹhe gando mí go to yise mẹ lẹ,” mí sọ nọ gọalọna mẹdevo lẹ ga eyin e yọnbasi, mahopọnna sinsẹ̀n yetọn.—Galatianu lẹ 6:10.

Mí nọ gọalọ to gbigbọ-liho podọ to numọtolanmẹ-liho. Mẹhe go nugbajẹmẹji jọ do lẹ nọ tindo nuhudo homẹmiọnnamẹ tọn taun. To ojlẹ mọnkọtọn lẹ mẹ, mí nọ mọ huhlọn yí sọn Jehovah, “Jiwheyẹwhe homẹmimiọn lẹpo tọn” dè. (2 Kọlintinu lẹ 1:3, 4) Homẹ mítọn nọ hùn nado lá opagbe Biblu tọn lẹ na mẹhe jẹflumẹ lẹ, bo nọ hẹn yé deji dọ Ahọluduta Jiwheyẹwhe tọn na doalọtena nugbajẹmẹji he nọ hẹn awufiẹsa po awubla po wá lẹpo to madẹnmẹ.—Osọhia 21:4.

Naegbọn Kunnudetọ lẹ do nọ penugo nado yawu yinuwa to nugbajẹmẹji lẹ whenu?
Nawẹ mí sọgan miọnhomẹna mẹhe go nugbajẹmẹji jọ do lẹ to gbigbọ-liho gbọn?