GBẸZAN KLISTIANI TỌN

Lehe Yè Gán Gọalọ to Nugbajẹmẹji de Godo Do

Nugbajẹmẹji jọwamọ tọn lẹ fọ́n bo nọ to jijọ whẹwhẹ. Eyin nugbajẹmẹji de jọ, e nọ biọ dọ yè ni basi tito ganji bosọ deanana nulẹ dile e jẹ do nado penukundo hudo mẹlẹ tọn go. Enẹwutu, Hagbẹ Anademẹtọ lọ basi tito bo do Azọ́nwatẹn Kọgbọ Tọn de ai to alahọ lẹpo mẹ.

Eyin mẹmẹsunnu he nọ wazọ́n to azọ́nwatẹn enẹ lẹ sè dọ nugbajẹmẹji de jọ, yé nọ yawu dọho hẹ mẹho he to lẹdo lọ mẹ lẹ nado yọ́n nuhe sin hudo wẹnlatọ lẹ do. Eyin nugbajẹmẹji lọ hẹnnugble taun bọ wẹnlatọ he to lẹdo lọ mẹ lẹ ma gán penukundego na yede, alahọ na de mẹmẹsunnu he pegan lẹ nado deanana azọ́n kọgbọ tọn lọ. Mẹmẹsunnu enẹlẹ gán biọ alọgọ mẹdezejotọ lẹ tọn kavi biọ dọ mẹlẹ ni bayi nunina onú taun-taun delẹ tọn. E gán sọ biọ dọ yé ni họ̀ nudelẹ bo má na mẹhe do hudo etọn lẹ.

Ale susu wẹ e nọ hẹnwa eyin yè penukundo nulẹ go to aliho enẹ mẹ. Amọ́, eyin mẹdopodopo ze afọdide lẹ na ede, e gán zọ́n bọ yè na wazọ́n do awe ji, e sọ nọ hẹn bẹwlu wá bọ yè nọ hẹn akuẹ po nudevo lẹ po gú.

Mẹmẹsunnu he alahọ de lọ lẹ nọ magbe akuẹ nẹmu he azọ́n kọgbọ tọn lọ na biọ po sọha mẹdezejotọ he yé na do hudo etọn lẹ po tọn. Yé gán sọ dọho hẹ ahọluzọnwatọ lẹdo lọ tọn delẹ he gán gọalọ bọ azọ́n kọgbọ tọn lọ na yá. Enẹwutu, e ma na yọ́n dọ mẹde ni nọ ṣinyan akuẹ sọn mẹlẹ si, kavi do nunina kọgbọ tọn lẹ hlan lẹdo he mẹ nulọ jọ te kavi yì dọ́n, eyin yè ma biọ to e si.

Etomọṣo, eyin nugbajẹmẹji de jọ, ojlo mítọn wẹ nado gọalọ. (Heb 13:16) Mí yiwanna mẹmẹsunnu mítọn lẹ taun! Amọ́, etẹ mí gán wà lo? Onú titengbe hugan he mí gán wà wẹ nado hodẹ̀ do mẹhe go onú jọ do lẹ po mẹhe to azọ́n kọgbọ tọn wà lọ lẹ po tamẹ. Mí gán sọ basi nunina do azọ́n lẹdo aihọn pé tọn lọ tamẹ. To anademẹ Hagbẹ Anademẹtọ lọ tọn glọ, alahọ lẹ wẹ to otẹn dagbe mẹ nado magbe fie nunina ehelẹ na yin zinzan do hugan tọn. Eyin a jlo na do mahẹ to azọ́n lọ mẹ tlọlọ, a gán kanwe gọ́ alọdowemẹwe lọ le service local développement/construction (DC-50) nado dohia dọ emi to gbesisọ mẹ nado gọalọ.

PỌ́N VIDEO LỌ SINGIGỌ DE HE HẸNNUGBLE TAUN TO BRÉSIL, ENẸGODO NA GBLỌNDO NA KANBIỌ HE BỌDEGO:

Adà de sọn video lọ “Singigọ de He Hẹnnugble Taun to Brésil” mẹ. Yẹdide lẹdo he mẹ otọ̀ gbà owhé po atin lẹ po te tọn.

Etẹwẹ yinuwado ji we gando azọ́n kọgbọ tọn he Kunnudetọ Jehovah tọn lẹ wà to whenue otọ̀ gbà mẹlẹ to Brésil to 2020 go?

Gblọndo towe