NUPINPLỌN 28

Etẹwẹ Sọgan Yin Mimọ to Nọtẹn Intẹnẹt Tọn Mítọn Ji?

Nawe de to dodinnanu basi to ọdinatẹẹ etọn ji — France

Nawe de to video tókunọ-gbè tọn pọ́n to Intẹnẹt ji — Russie

Jesu Klisti dọna hodotọ etọn lẹ dọ: “Mì dike hinhọ́n mìtọn ni họnwun to gbẹtọ lẹ nukọn, na yé nido sọgan mọ azọ́n dagbe mìtọn lẹ bo na gigo Otọ́ mìtọn he tin to olọn mẹ.” (Matiu 5:16) Enẹwutu, mí to azọ́n nuyọnẹn wintinwintin tọn egbezangbe tọn lẹ yizan, ehe bẹ Intẹnẹt hẹn. Nọtẹn Intẹnẹt tọn mítọn jw.org wẹ yin asisa dejidego Intẹnẹt ji tọn he nọ na nudọnamẹ gando nuyise po nuwiwa Kunnudetọ Jehovah tọn lẹ tọn po go. Adà tẹlẹ wẹ e bẹhẹn?

Gblọndo Biblu tọn na kanbiọ he nọ saba yin kinkanse lẹ. Hiẹ sọgan mọ gblọndo na delẹ to kanbiọ titengbe hugan he gbẹtọ ko kanse pọ́n lẹ mẹ. Di apajlẹ, alọnuwe pẹvi lọ lẹ Be Yajiji Na Wá Doalọte Gbèdopo Ya? po Be Oṣiọ lẹ Sọgan Gọwá Nọgbẹ̀ Nugbonugbo Ya? po ko tin-to-aimẹ to Intẹnẹt ji to ogbè he hugan 600 lẹ mẹ.Hiẹ sọgan sọ mọ Lẹdogbedemẹ Aihọn Yọyọ Tọn hia to ogbè he hugan 130 mẹ, po nuplọnmẹwe Biblu tọn susu po taidi Etẹwẹ Biblu Plọn Mí Taun? gọna zinjẹgbonu agọe tọn Atọ̀họ̀-Nuhihọ́ lọ Tọn po Réveillez-vous! po tọn lẹ. Susu owe ehelẹ tọn sọgan yin hihia kavi yin sisè to Intẹnẹt ji tlọlọ, kavi yé sọgan yin yíyí to wunmẹ he mẹsusu nọ saba yizan lẹ ji, taidi MP3 he yè sọgan dotó, wunmẹ PDF kavi EPUB he sọgan yin hihia lẹ. Hiẹ tlẹ sọgan zín weda delẹ jẹgbonu nado má yé hẹ jlodotọ de to ogbè etọn titi mẹ! Video lẹ tin-to-aimẹ to tókunọ-gbè susu mẹ. Hiẹ sọgan mọ hoyidokanji sinai do Biblu ji lẹ, nupinpọn-do-plọnnu lẹ po ohàn dagbedagbe lẹ po yí sọn finẹ, ehe a sọgan duvivi etọn to whedepopenu he a jlo.

Nudọnamẹ he sọgbe lẹ gando Kunnudetọ Jehovah tọn lẹ go. Linlin po video agọe tọn lẹ po gando azọ́n lẹdo aihọn pé tọn mítọn go sọ nọ yin bibẹdo nọtẹn Intẹnẹt tọn lọ ji, gọna nudọnamẹ lẹ gando Kunnudetọ Jehovah tọn lẹ po azọ́n kọgbọ hẹnwanamẹ tọn mítọn lẹ po go. Hiẹ sọgan mọ nudọnamẹ gando plidopọ he ja lẹ po adlẹsi alahọ mítọn lẹ tọn po go.

Gbọn ehelẹ gblamẹ, mí to hinhọ́n nugbo tọn hẹn họnwun kaka yì awà he dẹn hugan aigba tọn lẹ ji. Gbẹtọ lẹ sọn adà voovo aigba tọn lẹpo ji wẹ to alemọyi sọn e mẹ, yèdọ kakajẹ fie dẹn hugan to aigba ji, enẹ wẹ Antarctique. Odẹ̀ mítọn wẹ yindọ “ohó Jehovah tọn ni . . . to gbigbayipe po awuyiya po” jẹ aigba lẹpo ji, na gigo Jiwheyẹwhe tọn.—2 Tẹsalonikanu lẹ 3:1.

Nawẹ jw.org to alọgọna gbẹtọ susu dogọ nado plọn nugbo Biblu tọn gbọn?
Etẹwẹ hiẹ na jlo nado yì dín pọ́n to nọtẹn Intẹnẹt tọn mítọn ji?