Nukun Tẹwẹ Hiẹ Nọ Yí Do Pọ́n Biblu?

NUHE BIBLU DỌ

“Owe-wiwe lẹpo wẹ yin gbigbọdo sọn Jiwheyẹwhe dè.”—2 Timoti 3:16, Lẹdogbedevomẹ Aihọn Yọyọ Tọn.

ALE HE ENẸ SỌGAN HẸNWA NA WE

E na na we gblọndo pekọhẹnwanamẹ tọn lẹ na kanbiọ titengbe gbẹ̀mẹ tọn lẹ.—Howhinwhẹn lẹ 2:1-5.

E na na we anademẹ dejidego lẹ na gbẹzan egbesọegbesọ tọn towe.—Psalm 119:105.

E na na we todido nujọnu tọn de na sọgodo.—Lomunu lẹ 15:4.

BE MÍ SỌGAN YÍ NUHE BIBLU DỌ SÈ NUGBONUGBO YA?

Mọwẹ, e whè gbau na whẹwhinwhẹ́n atọ̀n ehelẹ wutu:

• Gbesisọ ayidego tọn. Biblu yin kinkan to nuhe hugan owhe 1 600 gblamẹ gbọn omẹ voovo 40 delẹ dali. Suhugan yetọn ma nọgbẹ̀ to ojlẹ dopolọ mẹ. Ṣogan, gbesisọ tin to nuhe owe lọ blebu bẹhẹn lẹ mẹ, bọ e sọ tindo hosọ tangan dopo!

• Whenuho he sọgbe. Whenuho-kantọ paa lẹ nọ saba ṣinyọnnudo awugbopo omẹ yetọn lẹ tọn. To vogbingbọn mẹ, mẹhe kàn Biblu lẹ yí nugbonọ-yinyin do basi kandai awugbopo yetọn titi lẹ po akọta yetọn lẹ po tọn.—2 Otannugbo lẹ 36:15, 16; Psalm 51:1-4.

• Dọdai dejidego. Biblu ko dọ dọdai vasudo tòdaho Babilọni hohowhenu tọn to nudi owhe 200 jẹnukọn. (Isaia 13:17-22) E ma yin aliho he mẹ Babilọni na jai te kẹdẹ wẹ e dọ gba, ṣigba e tlẹ dọ yinkọ mẹhe na gbawhàn etọn tọn!—Isaia 45:1-3.

  Dọdai Biblu tọn susu devo lẹ wẹ sọ mọ hẹndi to gigọ́ mẹ. Na nugbo tọn, be e ma yin nuhe mí dona donukun sọn Ohó Jiwheyẹwhe tọn si niyẹn ya?—2 Pita 1:21.