Be Yajiji Na Wá Doalọte Gbèdopo Ya?

NUHE BIBLU DỌ

“Jiwheyẹwhe . . . nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—Osọhia 21:3, 4, Lẹdogbedevomẹ Aihọn Yọyọ Tọn.

ALE HE ENẸ SỌGAN HẸNWA NA WE

E na hẹn we deji dọ e ma yin Jiwheyẹwhe wẹ nọ hẹn nuhahun mítọn lẹ wá.—Jakọbu 1:13.

E na miọnhomẹna we nado yọnẹn dọ Jiwheyẹwhe nọ vẹawu mí to whenue mí to yaji.—Zekalia 2:8.

E na hẹn we tindo todido dọ yajiji lẹpo na wá doalọte.—Psalm 37:9-11.

BE MÍ SỌGAN YÍ NUHE BIBLU DỌ SÈ NUGBONUGBO YA?

Mọwẹ, e whè gbau na whẹwhinwhẹ́n awe ehelẹ wutu:

• Jiwheyẹwhe gbẹwanna yajiji po mawadodo po. Lẹnnupọndo numọtolanmẹ Jehovah Jiwheyẹwhe tọn ji to whenue omẹ etọn lẹ yin nuyiwa hẹ po kanyinylan po to hohowhenu. Biblu dọ dọ Jiwheyẹwhe blawu, na mẹhe “to nukunbiana yé” lẹ tọn wutu.—Whẹdatọ 2:18.

  Jiwheyẹwhe gbẹwanna mẹhe nọ wà danú do mẹdevo lẹ. Di apajlẹ, Biblu dọ dọ “alọ he to ohùn homẹvọnọ tọn kọ̀n dai” yin osùnú de na ẹn.—Howhinwhẹn lẹ 6:16, 17.

• Jiwheyẹwhe nọ hò dopodopo mítọn tọn pọ́n. Nugbo wẹ dọ mẹdopodopo wẹ yọ́n “nudotuklamẹ etọn titi po awubla etọn titi po,” ṣigba Jehovah lọsu sọ yọnẹn ga!—2 Otannugbo lẹ 6:29, 30.

  To madẹnmẹ, Jehovah na hẹn yajiji mẹdopodopo tọn wá opodo gbọn Ahọluduta etọn gblamẹ. (Matiu 6:9, 10) Ṣigba todin whẹ́, e nọ gbọn homẹdagbe dali miọnhomẹna mẹhe nọ yí ahundopo do dín in lẹ.—Owalọ lẹ 17:27; 2 Kọlintinu lẹ 1:3, 4.