Mẹnu Wẹ to Gandu do Aihọn ji Taun?

NUHE BIBLU DỌ

“Aihọn lọ pete tin to huhlọn mẹylankan lọ tọn glọ.”—1 Johanu 5:19.

“Visunnu Jiwheyẹwhe tọn ko yin hinhẹn sọawuhia . . . nado gbà azọ́n Lẹgba tọn lẹ.”—1 Johanu 3:8, Lẹdogbedevomẹ Aihọn Yọyọ Tọn.

ALE HE ENẸ SỌGAN HẸNWA NA WE

E na zọ́n bọ hiẹ na yọ́n fie nuhahun aihọn tọn lẹ wá sọn.—Osọhia 12:12.

E na zọ́n bọ hiẹ na deji dọ ninọmẹ aihọn ehe tọn na wá pọnte.—1 Johanu 2:17.

BE MÍ SỌGAN YÍ NUHE BIBLU DỌ SÈ NUGBONUGBO YA?

Mọwẹ, e whè gbau na whẹwhinwhẹ́n atọ̀n ehelẹ wutu:

• Gandudu Satani tọn ma na nọ aimẹ dẹn. Jehovah ko magbe nado hẹn aṣẹpipa Satani tọn do gbẹtọvi lẹ ji wá opodo. E dopagbe nado ‘hẹn Lẹgba zun ovọ́” bo vọ́ nuhe Satani ko hẹngble lẹpo jlado.—Heblu lẹ 2:14.

• Jiwheyẹwhe ko de Jesu Klisti nado dugán do aihọn ji. Jesu gbọnvo pete na ogán aihọn tọn ehe, he yin kanylantọ podọ goyitọ. Jiwheyẹwhe dopagbe gando gandudu Jesu tọn go dọmọ: “Ewọ na tindo lẹblanu to oyanọ po agbátọnọ po ji; . . . ewọ na fli ayiha yetọn sọn awusinyẹn po [danuwiwa] po mẹ.”—Psalm 72:13, 14.

• Jiwheyẹwhe ma gán dolalo. Biblu dọ tlọlọ dọmọ: “E glo Jiwheyẹwhe nado dolalo.” (Heblu lẹ 6:18) Eyin Jehovah dopagbe nado wà nude, e nọ wà ẹ janwẹ! (Isaia 55:10, 11) “Ogán aihọn ehe tọn na yin yinyan jẹgbonu.”—Johanu 12:31.