Jesu Setonu to Whepoponu

Be e nọ bọawuna we nado setonuna mẹjitọ towe lẹ to whepoponu ya?— Nugbo wẹ dọ, e nọ vẹawu to whedelẹnu. Be a yọnẹn dọ Jesu setonuna Jehovah po mẹjitọ etọn lẹ po ya?— Apajlẹ etọn sọgan gọalọna we nado nọ setonuna mẹjitọ towe lẹ eyin etlẹ vẹawuna we nado wàmọ. Gbọ mí ni dọhodo ewọ ji.

Whẹpo Jesu do wá aigba ji, ewọ ko nọpọ́ hẹ Otọ́ etọn Jehovah to olọn mẹ. Amọ́ Jesu sọ tindo mẹjitọ lẹ to aigba ji. Yinkọ mẹjitọ lọ lẹ tọn wẹ Josẹfu po Malia po. Be a yọ́n lehe yé lẹzun mẹjitọ Jesu tọn lẹ gbọn ya?—

Jehovah ze ogbẹ̀ Jesu tọn sọn olọn mẹ bo yí i do ohò Malia tọn mẹ, na Jesu nido sọgan yin jiji bo nọgbẹ̀ to aigba ji. Azọ́njiawu de wẹ ehe yin! Jesu whẹ́n to ohò Malia tọn mẹ dile viyẹyẹ lẹpo nọ whẹ́n to onọ̀ yetọn lẹ sin homẹ do. To nudi osun ṣinẹnẹ godo, Jesu yin jiji. Lehe Malia po asu etọn Josẹfu po lẹzun mẹjitọ Jesu tọn lẹ to aigba ji do niyẹn.

To whenue Jesu tindo owhe 12, e wà nude he dohia dọ e yiwanna Otọ́ etọn Jehovah taun. Whenue Jesu po mẹjitọ etọn lẹ po basi gbejizọnlin gaa de yì Jelusalẹm na hùnwhẹ Juwayi tọn wẹ nulọ jọ. To whenue yé lẹkọja whé, Josẹfu po Malia po ma mọ Jesu. Be a yọ́n fie Jesu yì ya?—

Josẹfu po Malia po yawu lẹkọyi Jelusalẹm nado dín Jesu mọ. Yé dibu taun na yé ma mọ ẹn wutu. Amọ́ to azán atọ̀n godo, yé wá mọ ẹn to tẹmpli mẹ! Be a yọ́n nuhewutu Jesu do yì tẹmpli lọ mẹ ya?— Na e yọnẹn dọ emi sọgan plọnnu gando Otọ́ emitọn Jehovah go to finẹ. E yiwanna Jehovah bo jlo na plọn lehe e sọgan hẹn homẹ etọn hùn do. To whenue Jesu tlẹ whẹ́n mẹho, e setonuna Jehovah to whepoponu. Jesu setonu etlẹ yin to whenue mọwiwà vẹawuna ẹn bo biọ dọ ewọ ni jiya. Be Jesu setonuna Josẹfu po Malia po ya?— Mọwẹ, Biblu dọ dọ e wàmọ.

Etẹwẹ a sọgan plọn sọn apajlẹ Jesu tọn mẹ?— A dona nọ setonuna mẹjitọ towe lẹ eyin etlẹ vẹawuna we nado wàmọ. Be a na wàmọ ya?—