Lehe Mì Sọgan Nọ Didẹ Nuhahun lẹ Do

To whenue hiẹ po alọwlemẹ towe po jẹpọ, nuhahun voovo lẹ wẹ sọgan fọ́n, na aliho voovo mẹ wẹ mì nọ lẹnnupọn te bosọ nọ tindo numọtolanmẹ po pọndohlan he gbọnvo lẹ po. Humọ, nuhahun mìtọn lẹ sọgan sọ wá sọn mẹdevo lẹ dè kavi sọn nujijọ madonukun lẹ mẹ.

Mì sọgan jai jẹ omọ̀ lọ mẹ ma nado nọ dọhodopọ do nuhahun lẹ ji, ṣigba Biblu na mí ayinamẹ nado nọ didẹ nuhahun mítọn lẹ. (Matiu 5:23, 24) Mì na mọ pọngbọ dagbe hugan lẹ na nuhahun mìtọn lẹ eyin mì nọ yí nunọwhinnusẹ́n Biblu tọn lẹ do yizan mẹ.

1 MÌ NỌ DỌHODOPỌ DO NUHAHUN LỌ JI

NUHE BIBLU DỌ: “Whenu abọẹninọ tọn de” tin. (Yẹwhehodọtọ 3:7) Mì hẹn ẹn diun dọ mì yí whenu zan nado dọhodo nuhahun lọ ji. Nọ yí ahundopo do dọ numọtolanmẹ towe po nuhe a lẹn gando whẹho lọ go po na alọwlemẹ towe. Nọ “dọ nugbo” hẹ alọwlemẹ towe to whepoponu. (Efesunu lẹ 4:25) Mahopọnna lehe numọtolanmẹ mìtọn lẹ na sinyẹn sọ, mì dapana ojlo lọ nado hoavùn. Gblọndo he yin nina po ogbè dẹẹdẹ po sọgan gọalọ bọ hodọdopọ de ma na lẹzun avùn.—Howhinwhẹn lẹ 15:4; 26:20.

Eyin a tlẹ gblehomẹ, nọ wà dẹẹdẹ, bo ma wọn gbede nado nọ do owanyi po sisi po hia alọwlemẹ towe blo. (Kọlọsinu lẹ 4:6) Mì nọ tẹnpọn nado didẹ whẹho lọ to niyaniya mẹ bo ma nọ doalọtena hodidọ hẹ ode awetọ blo.—Efesunu lẹ 4:26.

NUHE A SỌGAN WÀ:

• De ojlẹ he sọgbe de na mì nido dọhodo nuhahun lọ ji

• Whenue alọwlemẹ towe na to hodọ, dotoaina ẹn bo ma gbòhódonù na ẹn blo. Ojlẹ hiẹ lọsu tọn na wá nado dọho

2 NỌ DOTOAI BO NỌ MỌNUKUNNUJẸNUMẸ

NUHE BIBLU DỌ: “Mì tindo owanyi sisosiso na ode awetọ. Mì yin nukọntọ to gbégbò didohia ode awetọ mẹ.” (Lomunu lẹ 12:10) Lehe a nọ dotoai do yin nujọnu taun. Tẹnpọn nado nọ mọnukunnujẹ pọndohlan alọwlemẹ towe tọn mẹ bo nọ do ‘mẹtọnhopọn po whiwhẹ po’ hia. (1 Pita 3:8; Jakọbu 1:19) Ma nọ yinuwa poun taidi mẹhe to todoai blo. Eyin e yọnbasi, jo nuhe wà a te do whẹ́ bo na ayidonugo gigọ́ alọwlemẹ towe, kavi kanse e eyin mì sọgan dọhodo whẹho lọ ji to ojlẹ devo mẹ. Eyin a ma nọ pọ́n alọwlemẹ towe hlan taidi kẹntọ, ṣigba taidi azọ́nwatọgbẹ́ towe, a ma na nọ ‘yawu gblehomẹ.’—Yẹwhehodọtọ 7:9.

NUHE A SỌGAN WÀ:

• Eyin nuhe alọwlemẹ towe to didọ ma tlẹ hẹn homẹ towe hùn, zindonukọn nado to todoai po ahundopo po

• Nọ mọnukunnujẹ nuhe na dọ alọwlemẹ towe te taun mẹ. Nọ doayi awusọhia nukunta tọn po kọnugbè etọn po go

3 MÌ NỌ YINUWA SỌGBE HẸ GBÈTA HE KỌ̀N MÌ WÁ

NUHE BIBLU DỌ: “To tuklajẹ lẹpo mẹ wẹ ale te: ṣigba hodidọ nùmẹ tọn, vọ́tọ wẹ.” (Howhinwhẹn lẹ 14:23) Gbekinkọndopọ do pọngbọ dagbe de ji kẹdẹ ma ko pé. Mì dona nọ yinuwa sọgbe hẹ gbèta he kọ̀n mì omẹ awe lẹ wá. Ehe sọgan biọ dọ mì ni wazọ́n sinsinyẹn bo dovivẹnu susu, ṣigba mọwiwà nọ hẹn ale wá. (Howhinwhẹn lẹ 10:4) Eyin mì nọ wazọ́n dopọ, mì na “tindo ale dagbe de” na azọ́n sinsinyẹn mìtọn.—Yẹwhehodọtọ 4:9.

NUHE A SỌGAN WÀ:

• Mì nọ dọhodo afọdide yọ́n-na- yizan he dopodopo mìtọn na ze nado didẹ nuhahun lọ lẹ ji

• Sọn ojlẹ de mẹ jẹ devo mẹ, mì nọ dindona lehe mì to nukọnyiyi basi do