Sunwhlẹvu-Pọntọ lẹ Wá Dla Jesu Pọ́n

Sunnu delẹ wá sọn Whèzẹtẹn. Sunwhlẹvu-pọntọ lẹ wẹ, yèdọ sunnu he nọ plọnnu gando fie sunwhlẹvu lẹ tin te to agahomẹ go, bo nọ dọ dọ mọwiwà nọ hẹn yé penugo nado dọna gbẹtọ lẹ nuhe nujijọ he nọ wá aimẹ to gbẹzan yetọn mẹ lẹ zẹẹmẹdo. (Isaia 47:13) To whenuena yé tin to otò yetọn mẹ to Whèzẹtẹn, yé mọ “sunwhlẹvu” de bosọ hodo e na kilomẹtlu kanweko susu lẹ wá Jelusalẹm, e ma yin Bẹtlẹhẹm.

To whenue sunwhlẹvu-pọntọ lọ lẹ jẹ finẹ, yé kanse dọmọ: “Fie wẹ ewọ he yin jiji taidi ahọlu Ju lẹ tọn lọ te? Na mí mọ sunwhlẹvu etọn to whenuena mí tin to Whèzẹtẹn, podọ míwlẹ ko wá nado litaina ẹn.”—Matiu 2:1, 2.

To whenue Hẹlọdi, ahọlu Jelusalẹm tọn sè ehe, e biọ bẹwlu sinsinyẹn mẹ. Enẹwutu, e ylọ yẹwhenọgán lẹ po sinsẹ̀ngán Ju devo lẹ po bo kanse yé fie Klisti lọ na yin jiji te. Yé na ẹn gblọndo sọn Owe-wiwe lẹ mẹ dọmọ: “To Bẹtlẹhẹm.” (Matiu 2:5; Mika 5:2) To whenẹnu, Hẹlọdi ylọ sunwhlẹvu-pọntọ lọ lẹ wá ede dè to nuglọ bo dọna yé dọmọ: “Mì yì bo yí sọwhiwhe do dín ovi pẹvi lọ, podọ eyin mì mọ ẹn, mì lẹkọwa dogbè na mi, na yẹnlọsu nido yì nado litaina ẹn.” (Matiu 2:8) Ṣigba na taun tọn, nuhe dín Hẹlọdi te wẹ nado mọ ovi pẹvi lọ nado hù i!

To whenue sunwhlẹvu-pọntọ lọ lẹ tlọ́n e dè godo, onú jiawu de jọ. “Sunwhlẹvu” he yé mọ to whenue yé tin to Whèzẹtẹn lọ jẹnukọnna yé bo to tẹnsẹ to agahomẹ. E họnwun dọ sunwhlẹvu ehe ma yin sunwhlẹvu tata de, ṣigba na taun tọn, e yin awuwlena nado deanana yé. Sunwhlẹvu-pọntọ lọ lẹ hodo e kakajẹ whenue e nọte to aga na owhé he gbè Josẹfu po Malia po tin te todin po ovi pẹvi yetọn po.

To whenue sunwhlẹvu-pọntọ lọ lẹ biọ owhé lọ gbè, yé mọ Malia po ovi pẹvi lọ Jesu po. To whenẹnu, yé litaina ẹn. Podọ yé na ẹn nunina lẹ, yèdọ sika, nuyọnwan gblingblin, po zuya po. Enẹgodo, to whenue yé jlo na lẹkọyi Hẹlọdi dè, Jiwheyẹwhe na yé avase to odlọ mẹ ma nado wàmọ. Enẹwutu, yé gbọn aliho devo bo lẹkọyi otò yetọn mẹ.

To linlẹn towe mẹ, mẹnu wẹ wleawuna “sunwhlẹvu” he deanana sunwhlẹvu-pọntọ lọ lẹ? Flindọ, sunwhlẹvu lọ ma deanana yé tlọlọ wá Jesu dè to Bẹtlẹhẹm gba. Kakatimọ, e deanana yé yì Jelusalẹm, fie yé mọ Ahọlu Hẹlọdi te, yèdọ mẹhe jlo nado hù Jesu. Podọ ahọlu lọ na ko wàmọ, eyin Jiwheyẹwhe ma dádo whẹho lọ mẹ bo na avase sunwhlẹvu-pọntọ lọ lẹ ma nado yì dọ fie Jesu te na Hẹlọdi. E họnwun dọ kẹntọ Jiwheyẹwhe tọn Satani wẹ jlo dọ Jesu ni yin hùhù, podọ e tẹnpọn nado yí aliho ehe zan nado jẹ yanwle etọn kọ̀n.