Weta 7
Jesu po Sunwhlẹvuplọntọ lẹ Po
SỌHA omẹ delẹ tọn wá sọn Whèzẹtẹn. Sunwhlẹvuplọntọ lẹ wẹ yé—yèdọ mẹhe nọ sọalọakọ́n nado detana otẹn sunwhlẹvu lẹ tọn. To whenuena yé tin to whégbè to Whèzẹtẹn, yé mọ sunwhlẹvu yọyọ de, podọ yé ko hodo e na kilomẹtlu kanweko susu lẹ wá Jelusalẹm.
To whenuena sunwhlẹvuplọntọ lọ lẹ jẹ Jelusalẹm, yé kanse dọmọ: “Fie wẹ mẹhe yè ji bọ e yin ahọlu Ju lẹ tọn te? Na míwlẹ mọ sunwhlẹvu etọn to whèzizẹ dali, mí sọ wá taliai na ẹn gbé.”
To whenuena Ahọlu Hẹlodi Jelusalẹm tọn sè dogbọn ehe dali, homẹ gble e tlala. Enẹwutu e ylọ yẹwhenọ daho lẹ bo kàn fie Klisti lọ na yin jìjì te sè. To gblọndo yetọn zize sinai do Owe-wiwe lẹ ji, yé gblọn dọmọ: “To Bẹtlẹhẹm.” To enẹ sisè godo, Hẹlodi ylọ sunwhlẹvuplọntọ lọ lẹ bo dọna yé dọmọ: “Mì yì bo din ovi lọ tlala; whenuena mì mọ ẹn, mì hẹn owẹ̀n gọwa na mi, na yẹn ni wá litaina ẹn ga.” Ṣigba, na taun tọn, Hẹlodi jlo na dín ovi lọ mọ bo hú i wẹ!
To whenuena yé ko yì pó godo, nupaṣamẹ de jọ. Sunwhlẹvu he yé ko mọ to whenuena yé tin to Whèzẹtẹn jẹnukọnna yé. E họnwun dọ, ehe ma yin sunwhlẹvu tata gba, ṣigba e ko yin awuwlena tlọlọ nado deanana yé. Sunwhlẹvuplọntọ lọ lẹ to hihodo e afọsu-afọsi kaka e do nọte do họta he mẹ Malia po Josẹfu po to ninọ pẹpẹ.
To whenuena sunwhlẹvuplọntọ lọ lẹ biọ owhé lọ gbè, yé mọ Malia po viyẹyẹ etọn, Jesu po. To whenẹnu wẹ yemẹpo litai na ẹn. Podọ yé dè nunina sika, nuwhẹ́nwan, po zuya tọn lẹ po sọn apò yetọn lẹ mẹ. Enẹgodo, to whenuena yé ko wleawu nado lẹkọ bo dọ fie ovi lọ te na Hẹlodi, Jiwheyẹwhe na avase yé to odlọ mẹ ma nado wà mọ. Enẹwutu yé gbọn aliho devo yì otò yetọn titi mẹ.
Mẹnu wẹ hiẹ lẹndọ e wleawu sunwhlẹvu he to yìyì to aga nado deanana sunwhlẹvuplọntọ lọ lẹ? Flindọ, sunwhlẹvu lọ ma deanana yé tlọlọ yì Jesu dè to Bẹtlẹhẹm gba. Kakatimọ, yé yin pinplan yì Jelusalẹm fie yé mọ Ahọlu Hẹlodi te, mẹhe jlo nado hù Jesu. Podọ e na ko wà mọ eyin Jiwheyẹwhe ma ko biọ whẹho lọ mẹ bo na avase sunwhlẹvuplọntọ lọ lẹ ma nado dọ fie Jesu te na Hẹlodi. Kẹntọ Jiwheyẹwhe tọn, yèdọ Satani Lẹgba, wẹ jlo nado hù Jesu, podọ e yí sunwhlẹvu enẹ zan nado tẹnpọn nado hẹn lẹndai etọn di. Matiu 2:1-12; Mika 5:2.
▪ Etẹwẹ dohia dọ sunwhlẹvu he sunwhlẹvuplọntọ lọ lẹ mọ ma yin sunwhlẹvu tata gba?
▪ Fie wẹ Jesu tin te to whenuena sunwhlẹvuplọntọ lọ lẹ mọ ẹn?
▪ Nawẹ mí yọnẹn gbọn dọ Satani wẹ wleawuna sunwhlẹvu lọ nado deanana sunwhlẹvuplọntọ lọ lẹ?