Lehe Agun Nọ Yin Tito-Basina bo Nọ Yin Anadena Do

TO WEKANHLANMẸ tintan apọsteli Paulu tọn hlan Kọlintinu lẹ mẹ, e dọ nugbo titengbe de gando Jiwheyẹwhe go. Paulu dọmọ: “Jiwheyẹwhe ma yin Jiwheyẹwhe bẹwlu tọn de gba, ṣigba jijọho tọn.” Enẹgodo, to zẹẹmẹ-bibasi yinukọn dogọ gando opli agun tọn lẹ go mẹ, e dọmọ: “Mì gbọ nulẹpo ni nọ yin wiwà dile e jẹ do podọ to titoji.”—1 Kọl. 14:33, 40.

² To bẹjẹeji wekanhlanmẹ ehe dopolọ tọn, apọsteli lọ na ayinamẹ gando kinklan he tin to agun Kọlinti tọn mẹ lẹ go. Paulu dotuhomẹna mẹmẹsunnu he nọ nọ̀ finẹ lẹ nado “nọ dọ nudopolọ” podọ nado “tin to kọndopọ mẹ mlẹnmlẹn to ayiha dopolọ mẹ podọ to aliho nulẹnpọn tọn dopolọ mẹ.” (1 Kọl. 1:10, 11) Enẹgodo, e na ayinamẹ yé gando whẹho voovo he to pọninọ agun lọ tọn hẹngble lẹ go. E yí agbasa gbẹtọ tọn zan taidi apajlẹ, nado do nujọnu-yinyin pọninọ po gbekọndopọ po tọn hia. E dotuhomẹna mẹhe to agun Klistiani tọn mẹ lẹpo, mahopọnna azọngban yetọn, nado nọ hò ode awetọ tọn pọ́n to owanyi mẹ. (1 Kọl. 12:12-26) Gbekọndopọ mọnkọtọn to mẹhe to agun lọ mẹ lẹ ṣẹnṣẹn nọ biọ dọ nulẹ ni yin tito-basina.

³ Ṣigba, nawẹ agun Klistiani tọn dona yin tito-basina gbọn? Mẹnu wẹ na basi tito na ẹn? Awusọhia nankọ wẹ e na tindo? Mẹnu lẹ wẹ na sẹ̀n to otẹn azọngban tọn lẹ mẹ? Eyin mí dike Biblu deanana mí, mí na mọ gblọndo he họnwun na kanbiọ ehelẹ.—1 Kọl. 4:6.

LEHE E YIN TITO-BASINA TO YẸWHEHỌLUDUTA-LIHO DO

⁴ Agun Klistiani tọn yin didoai to owhe 33 W.M. to azán hùnwhẹ Pẹntikọsti tọn gbè. Etẹwẹ mí sọgan plọn dogbọn agun owhe kanweko tintan tọn dali? E yin tito-basina bo yin anadena to yẹwhehọluduta-liho, enẹ wẹ, to gandudu (Glẹki, kraʹtos) Jiwheyẹwhe (the·osʹ) tọn glọ. Hogbe awe ehelẹ sọawuhia to 1 Pita 5:10, 11 mẹ. Kandai gbọdo nuhe jọ to Jelusalẹm lẹ tọn diblayi owhe 2 000 die, dohia hezeheze dọ Jiwheyẹwhe wẹ do agun Klistiani yiamisisadode lẹ tọn ai. (Owalọ 2:1-47) Ohọ̀, kavi whédo etọn wẹ. (1 Kọl. 3:9; Efe. 2:19) Aliho he mẹ nulẹ nọ yin tito-basina bo nọ yin anadena te to owhe kanweko tintan whenu pẹpẹ wẹ agun Klistiani tọn nọ hodo to egbehe.

⁵ Agun tintan lọ bẹjẹeji po nudi devi 120 po. Omẹ ehelẹ ji wẹ gbigbọ wiwe yin kinkọnjẹgbonu do jẹnukọn taidi hẹndi dọdai Joẹli 2:28, 29 tọn. (Owalọ 2:16-18) Ṣigba, to azán enẹ dopolọ gbè, nudi gbẹtọ 3 000 devo lẹ yin bibaptizi to osin mẹ bo yin hinhẹn biọ agun mẹhe yin jiji gbọn gbigbọ dali lẹ tọn mẹ. Yé ko kẹalọyi ohó he yin didọ gando Klisti go lọ bo “to yedelẹ zejo na nuplọnmẹ apọsteli lẹ tọn.” Enẹgodo, “Jehovah zindonukọn nado to gbẹtọ lẹ yidogọna yé egbesọegbesọ to aliho whlẹngán tọn lọ ji.”—Owalọ 2:41, 42, 47.

⁶ Jideji agun he tin to Jelusalẹm lọ tọn sù sọmọ bọ yẹwhenọ daho Juvi lẹ tọn wule dọ devi lẹ ko hẹn Jelusalẹm gọ́ po nuplọnmẹ yetọn po. Devi yọyọ Jelusalẹm tọn lẹ wá bẹ yẹwhenọ Juvi susu he lẹzun apadewhe agun lọ tọn lẹ hẹn.—Owalọ 5:27, 28; 6:7.

⁷ Jesu dọmọ: “Mìwlẹ na yin kunnudetọ ṣie to Jelusalẹm, to Jude po Samalia lẹpo po, podọ kaka yì awà he dẹn hugan aigba tọn lẹ ji.” (Owalọ 1:8) Podọ nuhe jọ pẹpẹ niyẹn, na to whenue homẹkẹn sinsinyẹn de fọ́n to Jelusalẹm to okú Stefani tọn godo, devi he nọ nọ̀ finẹ lẹ gbàpe gbọn Jude po Samalia po mẹ. Ṣigba, fidepope he yé yì, yé nọ zindonukọn to wẹndagbe lọ lilá mẹ bosọ nọ to mẹsusu hẹn zun devi, yèdọ sọn Samalianu lẹ mẹ ga. (Owalọ 8:1-13) To nukọn mẹ, yẹwheho wẹndagbe lọ tọn yin didọ po kọdetọn dagbe po to akọta he mayin Juvi, bo ma gboadà lẹ ṣẹnṣẹn. (Owalọ 10:1-48) Nuwiwa yẹwhehodidọ tọn ehe lẹpo dekọtọn do gbẹtọ susu hinhẹn zun devi lẹ mẹ bọ agun yọyọ lẹ yin didoai to gbonu Jelusalẹm tọn.—Owalọ 11:19-21; 14:21-23.

⁸ Tito tẹlẹ wẹ yin bibasi nado mọdọ dopodopo agun yọyọ he yin didoai lẹ tọn yin tito-basina bo yin anadena sọgbe hẹ aliho Jiwheyẹwhe tọn—yèdọ to yẹwhehọluduta-liho? Gbọn anademẹ gbigbọ Jiwheyẹwhe tọn gblamẹ, tito yin bibasi na lẹngbọhọtọ pẹvi lẹ nido penukundo apó lọ go. To agun he Paulu po Balnaba po dlapọn to gbejizọnlin mẹdehlan tọn yetọn tintan whenu lẹ mẹ, yé de mẹho lẹ. (Owalọ 14:23) Luku he kàn apadewhe Biblu tọn na linlin gando opli he Paulu basi hẹ mẹho agun Efesu tọn lẹ go. Paulu dọna yé dọmọ: “Mì payi mìde po apó lọ pete po go, ehe mẹ gbigbọ wiwe ko de mì nado yin nugopọntọ lẹ te, nado nọ yìn agun Jiwheyẹwhe tọn, ehe e yí ohùn Visunnu etọn titi tọn do họ̀.” (Owalọ 20:17, 28) Omẹ ehelẹ pegan nado yin mẹho lẹ, na yé jẹ nubiọtomẹsi Owe-wiwe tọn lẹ kọ̀n wutu. (1 Tim. 3:1-7) Aṣẹ yin nina azọ́nwatọgbẹ́ Paulu tọn Titu nado de mẹho lẹ to agun Klete tọn lẹ mẹ.—Titu 1:5.

⁹ Dile agun susu dogọ lẹ yin didoai, apọsteli lẹ po mẹho he tin to Jelusalẹm lẹ po zindonukọn nado to sinsẹ̀n taidi nugopọntọ nukundeji lẹ to agun akọjọpli tọn Klistiani lẹ tọn he to gbigblodeji to owhe kanweko tintan whenu lọ mẹ. Yé yinuwa taidi hagbẹ anademẹtọ na agun lẹ.

¹⁰ To wekanhlanmẹ apọsteli Paulu tọn hlan agun Efesu tọn mẹ, e basi zẹẹmẹ dọ eyin agun Klistiani tọn kọngbedopọ hẹ gbigbọ Jiwheyẹwhe tọn, e sọgan gbọṣi pọninọ mẹ gbọn alọkikẹyi tatọ́-yinyin Jesu Klisti tọn dali. Apọsteli lọ dotuhomẹna Klistiani he nọ nọ̀ finẹ lẹ nado wleawuna whiwhẹ podọ nado hẹn “dopo-yinyin gbigbọ tọn” go to gbẹdido jijọho tọn mẹ hẹ mẹhe to agun lọ mẹ lẹpo. (Efe. 4:1-6) Enẹgodo, e yihodọ sọn Salmu lẹ 68:18 mẹ bo yí i zan na awuwledainanu he Jehovah basi nado yí sunnu he pegan to gbigbọ-liho lẹ zan taidi apọsteli lẹ, yẹwhegán lẹ, wẹndagbe-jlatọ lẹ, lẹngbọhọtọ lẹ po mẹplọntọ lẹ po nado penukundo nuhudo agun lọ tọn lẹ go. Sunnu mọnkọtọn lẹ, taidi nunina lẹ sọn Jehovah dè, bo na hẹn agun lọ blebu lodo jẹ gigọ́-yinyin gbigbọmẹ tọn kọ̀n, ehe na hẹn homẹ Jiwheyẹwhe tọn hùn.—Efe. 4:7-16.

AGUN EGBEHE TỌN LẸ NỌ HODO APAJLẸ HE APỌSTELI LẸ ZEDAI

¹¹ Apajlẹ titobasinanu tọn dopolọ wẹ nọ yin hihodo to egbehe to agun Kunnudetọ Jehovah tọn lẹ tọn lẹpo mẹ. Agun ehelẹ to pọmẹ wleawuna agun lẹdo aihọn pé tọn he mẹ pọninọ tin te de, ehe yin zize sinai do pipli mẹyiamisisadode gbọn gbigbọ dali lẹ tọn ji. (Zek. 8:23) Jesu Klisti wẹ hẹn ehe yọnbasi. Dile e ko dopagbe etọn do, e ko yí nugbonọ-yinyin do gbọṣi devi yiamisisadode etọn lẹ dè “to azán lẹpo gbè kakajẹ vivọnu titonu lọ tọn.” Mẹhe yin hinhẹnwa agun he to jijideji to egbehe lọ mẹ lẹ yin mẹhe kẹalọyi wẹndagbe Jiwheyẹwhe tọn, bo klan gbẹzan yetọn do wiwe mlẹnmlẹn na Jehovah, bosọ yin bibaptizi taidi devi Jesu tọn lẹ. (Mat. 28:19, 20; Malku 1:14; Owalọ 2:41) Yé yọ́n “lẹngbọhọtọ dagbe lọ,” Jesu Klisti, taidi Tatọ́ apó lọ pete tọn, ehe bẹ Klistiani yiamisisadode lẹ po “lẹngbọ devo lẹ” po hẹn. (Joh. 10:14, 16; Efe. 1:22, 23) “Apó dopo” enẹ nọ hẹn pọninọ etọn go gbọn alọkikẹyi tatọ́-yinyin Klisti tọn po nugbonọ-yinyin po dali, gọna taliliaina asisa he gblamẹ ewọ to tito-basina nulẹ gbọn lọ, yèdọ “afanumẹ nugbonọ podọ nuyọnẹntọ lọ” he Klisti ko de. Mì gbọ mí ni zindonukọn nado to jide mlẹnmlẹn do asisa he yizan e te to egbehe enẹ go.—Mat. 24:45.

YIZAN AZỌ́NWATẸN SINSẸ̀N TỌN LẸ

¹² Nado sọgan wleawuna núdùdù gbigbọmẹ tọn to ojlẹ sisọ mẹ bosọ lá wẹndagbe Ahọluduta lọ tọn lẹdo pé whẹpo opodo lọ nido wá, azọ́nwatẹn delẹ ko yin didoai. Azọ́nwatẹn ehelẹ yin yinyọnẹn gbọn osẹ́n dali to otò voovo lẹ mẹ, podọ yé nọ kọngbedopọ hẹ yedelẹ. Yé nọ hẹn yẹwheho wẹndagbe lọ tọn didọ lẹdo aihọn pé bọawu.

TITO ALAHỌ TỌN

¹³ Whedepopenu he wekantẹn alahọ tọn de yin didoai, Wedegbẹ́ Alahọ tọn he nọ bẹ mẹho atọ̀n kavi humọ hẹn de nọ yin dide nado deanana azọ́n lọ to otò lọ mẹ kavi to otò he go alahọ enẹlọ nọ penukundo lẹ mẹ. Dopo to hagbẹ wedegbẹ́ lọ tọn lẹ mẹ nọ yinuwa taidi azinponọ Wedegbẹ́ Alahọ tọn lọ tọn.

¹⁴ Agun he tin to alahọ dopodopo glọ lẹ nọ yin mimá do lẹdo voovo lẹ mẹ. Kiklo lẹdo lẹ tọn nọ gbọnvona yedelẹ, sọgbe hẹ ninọmẹ otò lọ tọn po ogbè he nọ yin dido to awà lọ ji po, gọna sọha agun he tin to awà he yin dide na alahọ lọ mẹ lẹ ji. Nugopọntọ lẹdo tọn de nọ yin dide nado dla agun he tin to lẹdo dopodopo mẹ lẹ pọ́n. Wekantẹn alahọ tọn nọ na anademẹ lẹ nugopọntọ lẹdo tọn gando lehe e na penukundo azọngban etọn lẹ go do go.

¹⁵ Agun lẹ nọ kẹalọyi tito he titobasinanu lọ wleawuna lẹ, ehe nọ hẹn ale wá na mẹlẹpo. Yé nọ kẹalọyi mẹho he yin dide lẹ, he nọ penukundo azọ́n lọ go to alahọ lẹ, lẹdo lẹ po agun lẹ po mẹ. Yé nọ ganjẹ afanumẹ nugbonọ podọ nuyọnẹntọ lọ go na núdùdù gbigbọmẹ tọn to ojlẹ sisọ mẹ. Mọdopolọ to egbehe, afanumẹ nugbonọ lọ nọ litai mlẹnmlẹn na tatọ́-yinyin Klisti tọn, bo nọ tẹdo nunọwhinnusẹ́n Biblu tọn lẹ go, bosọ nọ hodo anademẹ gbigbọ wiwe tọn. Eyin mímẹpo nọ wazọ́n dopọ to kọndopọ mẹ, kọdetọn lọ nọ yin nudopolọ taidi dehe agun owhe kanweko tintan whenu tọn lẹ tindo numimọ etọn, ehe dọmọ: “Na nugbo tọn, agun lẹ to yinyin hinhẹn lodo zọnmii bo to jijideji to sọha mẹ egbesọegbesọ.”—Owalọ 16:5.