WETA 6

Devizọnwatọ Lizọnyizọnwiwa Tọn lẹ Nọ Wadevizọn He Họakuẹ

APỌSTELI Paulu wlanwe hlan agun he to Filipi dọmọ: “Paulu po Timoti po, afanumẹ Klisti Jesu tọn lẹ, to wekanhlan omẹ wiwe lẹpo he to Filipi bo to kọndopọ mẹ hẹ Klisti Jesu, gọna nugopọntọ lẹ po devizọnwatọ lizọnyizọnwiwa tọn lẹ po.” (Flp. 1:1) Doayi e go dọ e donù devizọnwatọ lizọnyizọnwiwa tọn lẹ go to nudọdomẹ etọn mẹ. Matin ayihaawe, sunnu ehelẹ yí adà titengbe de wà to alọgigọna mẹho agun tọn lẹ mẹ to agun lọ mẹ to whenẹnu. Mọdopolọ wẹ e te do to egbehe. Yé nọ wadevizọn susu lẹ he nọ gọalọna nugopọntọ lẹ bosọ nọ gọalọ nado hẹn nulẹ do tito ji to agun lọ mẹ.

² Be hiẹ yọ́n devizọnwatọ lizọnyizọnwiwa tọn he tin to agun towe mẹ lẹ ya? Be hiẹ yọ́n azọ́n he yé nọ wà na dagbe towe podọ na dagbe agun lọ pete tọn ya? E họnwun dọ Jehovah nọ yọ́n pinpẹn vivẹnudido sunnu mọnkọtọn lẹ tọn. Paulu wlan dọmọ: “Sunnu he nọ yilizọn to aliho dagbe mẹ lẹ to awuwlena teninọ dagbe de po awuvivo hodidọ tọn daho de po na yede to yise mẹ to kọndopọ mẹ hẹ Klisti Jesu.”—1 Tim. 3:13.

NUBIỌTOMẸSI OWE-WIWE TỌN LẸ NA DEVIZỌNWATỌ LIZỌNYIZỌNWIWA TỌN LẸ

³ Devizọnwatọ lizọnyizọnwiwa tọn lẹ nọ yin nukundo nado zan gbẹzan Klistiani tọn he sọgbe, bo yin sunnu he go yè sọgan dejido lẹ, bosọ dona nọ penukundo azọ́ndenamẹ lẹ go ganji. Ehe họnwun dogọ to whenuena mí gbadopọnna nuhe Paulu dọ to wekanhlanmẹ etọn hlan Timoti mẹ gando jẹhẹnu devizọnwatọ lizọnyizọnwiwa tọn lẹ tọn go dọmọ: “Devizọnwatọ lizọnyizọnwiwa tọn lẹ dona whèwhín, e ma yin dẹgbèawenọ, e ma yin mẹhe nọ jo yede na ovẹn susu, e ma yin mẹhe nọ yí nukunkẹn do dín ale mawadodo tọn, yé dona yin mẹhe nọ tẹdo aṣli wiwe yise lọ tọn go po ayihadawhẹnamẹnu wiwe de po. Humọ, omẹ ehelẹ ni yin tintẹnpọn whẹ́ nado pọ́n eyin yé jẹ; to whenẹnu, yé ni wadevizọn taidi lizọnyizọnwatọ lẹ, to whenuena e yindọ yé tin matin whẹsadokọnamẹ. Na devizọnwatọ lizọnyizọnwiwa tọn lẹ ni yin asu yọnnu dopo tọn, he nọ penukundo ovi yetọn lẹ podọ whédo yetọn titi lẹ go to aliho dagbe mẹ.” (1 Tim. 3:8-10, 12) Titẹdo nubiọtomẹsi yiaga he yin zizedai na sunnu ehelẹ go nọ basi hihọ́na agun lọ bọ mẹde ma sọgan tindo whẹwhinwhẹ́n nado sawhẹdokọna mẹhe azọngban vonọtaun lẹ yin zizedo alọmẹ na lẹ.

⁴ Vlavo yé yin jọja kavi mẹhomẹ, yé nọ yin zohunhunnọ to lizọnyizọn lọ mẹ to osun dopodopo mẹ. To apajlẹ Jesu tọn hihodo mẹ, yé nọ yí zohunhun do tindo mahẹ to lizọnyizọn lọ mẹ. Po zohunhun mọnkọtọn po, yé nọ do ojlo Jehovah tọn nado whlẹn gbẹtọvi lẹ gán hia.—Isa. 9:7.

⁵ Devizọnwatọ lizọnyizọnwiwa tọn lẹ sọ nọ ze apajlẹ dagbe dai to aṣọ́dido, nusisọ́, hodidọ, walọyizan po nuyiwa yetọn lẹ po mẹ. Yé nọ yin lẹnpọn dagbenọ, ehe nọ zọ́n bọ yé nọ mọ sisi mẹdevo lẹ tọn yí. Humọ, yé nọ yí nukun nujọnu tọn do pọ́n haṣinṣan yetọn hẹ Jehovah po lẹblanulọkẹyi sinsẹ̀nzọn tọn lẹ he yé tindo to agun lọ mẹ po.—Titu 2:2, 6-8.

⁶ Sunnu ehelẹ ko “yin tintẹnpọn whẹ́ nado pọ́n eyin yé jẹ.” Whẹpo yé tlẹ do yin dide, yé ko do yedelẹ hia nado yin sunnu he ko klan yede do wiwe nugbonugbo lẹ. Yé ko dohia dọ yé ze Ahọluduta lọ do otẹn tintan mẹ to gbẹzan yetọn mẹ bo to vivẹnudo na dotẹnmẹ lẹblanulọkẹyi sinsẹ̀nzọn tọn depope he sọgan hundote na yé. Na nugbo tọn, yé nọ yin apajlẹ he mẹdevo lẹ sọgan hodo to agun lọ mẹ.—1 Tim. 3:10.

LEHE YÉ NỌ WADEVIZỌN DO

⁷ Devizọnwatọ lizọnyizọnwiwa tọn lẹ nọ wadevizọn dagbe voovo lẹ do ota mẹmẹsunnu po mẹmẹyọnnu yetọn lẹ po tọn mẹ, bọ gbọnmọ dali yé nọ na dotẹnmẹ nugopọntọ lẹ nado yí whenu susu zan to nukunpipedo azọngban mẹpinplọn tọn po lẹngbọhọtọ tọn po go mẹ. To azọngban lẹ dide na yé whenu, mẹho agun tọn lẹ nọ lẹnnupọndo nugopipe dopodopo yetọn lẹ tọn ji gọna nuhudo agun lọ tọn lẹ.

Devizọnwatọ lizọnyizọnwiwa tọn lẹ nọ wadevizọn dagbe voovo lẹ, gbọnmọ dali yé nọ na dotẹnmẹ nugopọntọ lẹ nado yí whenu susu zan to nukunpipedo azọngban mẹpinplọn tọn po lẹngbọhọtọ tọn po go mẹ

⁸ Lẹnnupọndo delẹ to azọngban yetọn lẹ mẹ ji: Devizọnwatọ lizọnyizọnwiwa tọn dopo sọgan yin azọ́ndena nado nọ penukundo owe agun tọn lẹ go, na mí nido nọ mọ owe lẹ yí na yizan mẹdetiti tọn podọ na sinsẹ̀nzọn kunnudegbe tọn. Devo lẹ nọ yin azọ́ndena nado penukundo kandai akuẹzinzan agun tọn kavi kandai aigba-denamẹ lẹ tọn go. Mẹdelẹ nọ yin azọ́ndena nado hẹn miklo lẹ, nado penukundo zomọ gbèzeyiaga tọn lẹ go, nado yin aisinnunamẹtọ lẹ, kavi nado gọalọna mẹho agun tọn lẹ to aliho devo lẹ mẹ. Azọ́n susu wẹ nọ yin wiwà nado penukundo Plitẹnhọ Ahọluduta tọn go bo hẹn ẹn do wiwe ji, enẹwutu devizọnwatọ lizọnyizọnwiwa tọn lẹ nọ saba yin oylọ-basina nado gọalọ to nukunpipedo azọngban ehelẹ go mẹ.

⁹ To agun delẹ mẹ, e sọgan yọnbasi nado de azọngban ehelẹ dopodopo na devizọnwatọ lizọnyizọnwiwa tọn voovo lẹ. Ṣigba to agun devo lẹ mẹ, devizọnwatọ lizọnyizọnwiwa tọn dopo sọgan penukundo azọ́ndenamẹ voovo lẹ go. To ninọmẹ delẹ mẹ, devizọnwatọ lizọnyizọnwiwa tọn hugan dopo sọgan penukundo azọ́n tangan de go. Eyin yé ma sù sọmọ nado penukundo delẹ to azọngban ehelẹ mẹ go, pipli mẹho lẹ tọn sọgan basi tito nado de mẹmẹsunnu devo lẹ he ko yí baptẹm bo tindo apajlẹ dagbe nado penukundo delẹ to azọ́n ehelẹ mẹ go. Gbọnmọ dali, yé na tindo numimọ he na yọ́n-na-yizan to nukọn mẹ to whenue yé na wá pegan nado yin dide taidi devizọnwatọ lizọnyizọnwiwa tọn lẹ. Eyin mẹmẹsunnu lẹ ma tin, mẹmẹyọnnu apajlẹ dagbenọ delẹ sọgan yin didọna nado nọ gọalọ to onú delẹ mẹ, dile etlẹ yindọ yé ma na yin dide taidi devizọnwatọ lizọnyizọnwiwa tọn lẹ. Mẹhe yin apajlẹ dagbenọ wẹ mẹhe walọyizan po aliho sinsẹ̀n-bibasi tọn etọn po sọgbe bọ yè gán hodo apajlẹ etọn. Opli yìyì to gbesisọ mẹ etọn, mahẹ tintindo to sinsẹ̀nzọn lọ mẹ, gbẹzan whẹndo tọn, nudide ayidedai tọn lẹ, aṣọ́dido po nusisọ́ etọn po, po mọmọ po sọyi nọ yin apajlẹ dagbe na mẹdevo lẹ.

¹⁰ To agun he ma tindo mẹho susu lẹ mẹ, devizọnwatọ lizọnyizọnwiwa tọn nugopetọ lẹ sọgan yin dide nado gbadopọnna kanbiọ baptẹm tọn he dọhodo sinsẹ̀n-nuplọnmẹ ji lẹ hẹ mẹhe jlo na yí baptẹm lẹ. Kanbiọ ehelẹ tin to Nudọnamẹ Dogọ lẹ mẹ: “Adà 1—Nuyise Klistiani Tọn Lẹ.” Na “Adà 2—Gbẹzan Klistiani Tọn” lọ bẹ whẹho mẹdetiti tọn lẹ hẹn wutu, mẹho de wẹ dona nọ gbadopọnna ehe.

¹¹ Sọn ojlẹ de mẹ jẹ devo mẹ, eyin whẹwhinwhẹ́n dagbe tin, pipli mẹho lẹ tọn sọgan mọdọ e na yin alenu nado diọ devizọnwatọ lizọnyizọnwiwa tọn delẹ sọn azọ́ndenamẹ de ji jẹ devo ji. Ṣigba, ale susu wẹ tin to e mẹ nado dike yé ni zindonukọn nado to nukunpedo azọ́ndenamẹ dopolọ lẹ go na ojlẹ de nado sọgan yọ́n azọ́n lọ ganji bo tindo numimọ to e mẹ.

¹² Sọgbe hẹ ninọmẹ agun dopodopo tọn, azọ́n devo lẹ sọgan tin he sọgan yin didena devizọnwatọ lizọnyizọnwiwa tọn lẹ he nukọnyiyi yetọn “họnwun hezeheze na gbẹtọ lẹpo.” (1 Tim. 4:15) Eyin sọha mẹho agun tọn lẹ tọn ma sù sọmọ, devizọnwatọ lizọnyizọnwiwa tọn de sọgan yin yiyizan taidi alọgọtọ na nugopọntọ pipli kunnudegbe tọn de, kavi to ninọmẹ delẹ mẹ taidi devizọnwatọ pipli kunnudegbe tọn, to anademẹ mẹho lẹ tọn glọ. Yé sọgan sọ yin azọ́ndena nado nọ penukundo adà delẹ go to Opli Gbẹzan po Lizọnyizọn Mítọn po tọn ji, gọna Biblu Pinplọn Agun tọn eyin nuhudo tin, podọ nado nọ na togunmẹho lẹ. Lẹblanulọkẹyi devo lẹ sọgan yin nina devizọnwatọ lizọnyizọnwiwa tọn delẹ to whenue nuhudo titengbe de tin bọ yé jẹ nubiọtomẹsi azọ́ndenamẹ lọ tọn lẹ kọ̀n. (1 Pita 4:10) Yé dona nọ ze yede jo sọn ojlo mẹ nado gọalọna mẹho agun tọn lẹ.

¹³ Dile etlẹ yindọ azọ́n yetọn gbọnvona mẹho agun tọn lẹ tọn, adà sinsẹ̀nzọn wiwe tọn de wẹ e yin hlan Jiwheyẹwhe bosọ yin azọ́n titengbe de na nukọnyiyi agun lọ tọn. Eyin devizọnwatọ lizọnyizọnwiwa tọn lẹ penukundo azọngban yetọn lẹ go ganji bosọ pegan nado wadevizọn taidi lẹngbọhọtọ po mẹplọntọ lẹ po, yé sọgan wá yin pipà nado wadevizọn taidi mẹho agun tọn lẹ.

¹⁴ Eyin mẹmẹsunnu jọja aflanmẹ de wẹ a yin kavi a ṣẹṣẹ yí baptẹm, be hiẹ to vivẹnudo nado pegan bo lẹzun devizọnwatọ lizọnyizọnwiwa tọn de ya? (1 Tim. 3:1) Na mẹsusu wẹ to nugbo lọ mẹ biọ to owhe dopodopo mẹ wutu, nuhudo sunnu gbigbọnọ he pegan lẹ tọn tin nado penukundo azọngban agun tọn lẹ go. Hiẹ sọgan pegan eyin a wleawuna ojlo lọ nado gọalọna mẹdevo lẹ. Aliho dopo nado wà ehe wẹ nado lẹnayihamẹpọn do apajlẹ dagbe Jesu tọn ji. (Mat. 20:28; Joh. 4:6, 7; 13:4, 5) Ojlo towe na jideji dile hiẹ to numimọ ayajẹ he nọ wá sọn nunina mẹdevo lẹ mẹ tọn tindo. (Owalọ 20:35) Enẹwutu, ze dewe jo nado nọ gọalọna mẹdevo lẹ, nado penukundo Plitẹnhọ Ahọluduta tọn go, kavi nado nọ wà azọ́ndenamẹ wehọmẹvi he ma wá lẹ tọn to Opli Gbẹzan po Lizọnyizọn Mítọn po tọn ji. Vivẹnudido nado pegan sọ nọ biọ dọ yè ni wleawuna jẹhẹnu gbigbọmẹ tọn lẹ gbọn aṣa oplọn mẹdetiti tọn dagbe de tintindo dali. (Salm. 1:1, 2; Gal. 5:22, 23) Humọ, mẹmẹsunnu he to vivẹnudo de dona yin mẹhe go yè sọgan dejido bosọ nọ yin nugbonọ na nuhe dù nukunpipedo azọ́ndenamẹ lẹ go to agun mẹ.—1 Kọl. 4:2.

¹⁵ Devizọnwatọ lizọnyizọnwiwa tọn lẹ nọ yin dide gbọn gbigbọ wiwe dali, na dagbe agun lọ tọn. Mẹhe to agun lọ mẹ lẹpo sọgan nọ do pinpẹn-nutọn yetọn hia na azọ́n sinsinyẹn he wà yé te gbọn gbekinkọndopọ hẹ yé dile yé to nukunpedo azọ́ndenamẹ yetọn lẹ go dali. To aliho ehe mẹ, agun lọ nọ to didohia dọ yé yọ́n pinpẹn-nutọn na tito he Jehovah wleawuna nado hẹn whédo lọ tin to kannukannu.—Gal. 6:10.