Mẹho lẹ Emi—Mì Plọn Azọ́n Mẹdevo lẹ Nado Didá Azọngban — WESẸDOTẸN INTẸNẸT JI TỌN Watchtower Tọn

Mẹho lẹ Emi—Mì Plọn Azọ́n Mẹdevo lẹ Nado Didá Azọngban

TO AGUN Kunnudetọ Jehovah tọn lẹ tọn mẹ lẹdo aihọn pé, nuhudo niyaniya tọn tin na sunnu he sọgan wadevizọn to otẹn nukunpenugo tọn mẹ lẹ. Whẹwhinwhẹ́n tangan atọ̀n wẹ tin na ninọmẹ ehe.

Tintan, Jehovah to opagbe etọn hẹndi nado hẹn “omẹ pẹvi dopo zun akọta huhlọnnọ.” (Isaia 60:22) Gbọn lẹblanu majẹhẹ etọn gblamẹ, diblayi devi livi dopo wẹ yin bibaptizi taidi Kunnudetọ Jehovah tọn to owhe atọ̀n he wayi lẹ mẹ. Nuhudo tin na sunnu he pegan lẹ nado gọalọna mẹhe ṣẹṣẹ yin bibaptizi ehelẹ nado zindonukọn jẹ whinwhẹ́n Klistiani tọn kọ̀n.—Heblu lẹ 6:1.

Awetọ, susu mẹhe ko sẹ̀n taidi mẹho na owhe susu ko yin hinhẹn po huhlọn po gbọn yọnhowhe po nuhahun agbasalilo tọn lẹ po dali nado de azọ́n he yé to wiwà to agun lọ mẹ pò.

Atọ̀ntọ, mẹho Klistiani zohunhunnọ delẹ to sinsẹ̀nzọnwà todin taidi hagbẹ Wedegbẹ́ Whẹgbọtọ Dotowhé tọn, Wedegbẹ́ Họgbigbá Tòpọnla tọn, po Wedegbẹ́ Plitẹnhọ Plidopọ tọn lẹ po. To whẹho delẹ mẹ, yé dona nọ nọ̀ jlẹkaji gbọn azọngban he yé tindo to agun yetọn mẹ delẹ jijodo dali.

Nawẹ nuhudo niyaniya tọn na sunnu he pegan dogọ lẹ sọgan yin jijẹ e kọ̀n gbọn? Azọ́nplọnmẹ wẹ yin họ̀nhungàn lọ. Biblu na tuli Klistiani nugopọntọ lẹ nado plọnazọn ‘sunnu nugbonọ, he na pegan to godo mẹ nado plọn mẹdevo lẹ.’ (2 Timoti 2:2) Sọgbe hẹ wezẹhomẹ de, hogbe nuyiwa tọn heyin “nado plọnazọn” zẹẹmẹdo “nado plọn nado hẹn sọgbe, pegan, kavi yín azọ́nyọnẹntọ.” Mì gbọ mí ni gbadopọnna lehe mẹho lẹ sọgan plọnazọn mẹhe pegan devo lẹ do.

Mì Hodo Apajlẹ Jehovah Tọn

Na nugbo tọn Jesu Klisti ‘sọgbe, pegan, bosọ yin azọ́nyọnẹntọ’ to azọ́n etọn mẹ—podọ enẹ mayin nupaṣamẹ gba! Jehovah Jiwheyẹwhe lọsu wẹ plọnazọn ẹn. Etẹlẹ wẹ hẹn tito-to-whinnu azọ́nplọnmẹ tọn ehe tindo kọdetọn dagbe sọmọ? Jesu donù atọ̀n go, dile e yin kinkàndai to Johanu 5:20 mẹ do dọmọ: ‘Otọ́ [1] yiwanna Ovi, bosọ [2] yí nuhe ewlọsu to wiwà lẹpo hia ẹ: ewọ nasọ do [3] azọ́n he klohu ehelẹ hia ẹ.’ Dogbigbapọnna whẹwhinwhẹ́n ehelẹ dopodopo na na mí nukunnumọjẹnumẹ do whẹho azọ́nplọnmẹ tọn ji.

Doayi e go dọ Jesu dọ jẹnukọn dọ: ‘Otọ́ yiwanna Ovi.’ Sọn bẹjẹeji nudida tọn gbọ́n, kanṣiṣa zohunhunnọ de tin to Jehovah po Visunnu etọn po ṣẹnṣẹn. Howhinwhẹn lẹ 8:30 tá hinhọ́n do haṣinṣan enẹ ji dọmọ: ‘Whenẹnu yẹn [Jesu] tin to e [Jehovah Jiwheyẹwhe] dè di azọ́nwatọgan de: yẹn sọ yin homẹhun etọn egbesọegbesọ, yẹn to ayajẹ whepoponu to nukọn etọn.’ Jesu ma tindo ayihaawe depope dọ Jehovah ‘hùnhomẹ taun’ to emi mẹ gba. Podọ Jesu ma ze ayajẹ he e tindo dile e to azọ́nwa hẹ Otọ́ lọ whlá gba. Lehe e nọ yọ́n sọ eyin kanṣiṣa zohunhunnọ, he tin to nùvo de tin to Klistiani mẹho lẹ po mẹhe yé to azọ́nplọn lẹ po ṣẹnṣẹn!

Nuagokun awetọ he go Jesu donù wẹ yindọ Otọ́ ‘yí nuhe ewlọsu to wiwà lẹpo hia ẹ.’ Hogbe ehelẹ hẹn nuhe Howhinwhẹn lẹ 8:30 dọ lodo, dọ Jesu ‘tin to adà’ Jehovah tọn mẹ to whenuena wẹkẹ lọ to yinyin didá. (Gẹnẹsisi 1:26) Mẹho lẹ sọgan hodo apajlẹ dagbe enẹ gbọn azọ́nwiwa dopọ pẹkipẹki hẹ devizọnwatọ lizọnyizọnwiwa tọn lẹ dali, bo nọ do lehe yé na hẹn azọngban yetọn lẹ di to aliho dagbe mẹ do hia yé. E mayin devizọnwatọ lizọnyizọnwiwa tọn he ṣẹṣẹ yin dide lẹ kẹdẹ wẹ tindo nuhudo azọ́nplọnmẹ he to nukọnzindo tọn gba. Etẹwẹ dogbọn mẹmẹsunnu nugbonọ he ko to vivẹnudo na otẹn nugopọntọ tọn na owhe susu ṣigba he ma ko yin dide lẹ dali? (1 Timoti 3:1) Mẹho lẹ dona nọ na ayinamẹ tangan sunnu mọnkọtọn lẹ na yé nido yọ́n fie yé dona basi vọjlado te.

Di apajlẹ, devizọnwatọ lizọnyizọnwiwa tọn de sọgan yin mẹhe go yè nọ dejido, tin to tito ji, bo nọ penukundo azọngban etọn lẹ go ganji. E sọgan sọ yin mẹplọntọ dagbe. E sọgan to azọ́n dagbe susu wà to agun lọ mẹ. Ṣigba, e sọgan nọ ma yọnẹn dọ emi nọ fiẹ to nuyiwa hẹ Klistiani hatọ lẹ mẹ. Mẹho lẹ dona do “walọmimiọn nuyọnẹn tọn” hia. (Jakobu 3:13) Be e ma na yin nuyiwa homẹdagbe tọn dọ mẹho de ni dọho hẹ devizọnwatọ lizọnyizọnwiwa tọn lọ, donù nuhahun lọ go tlọlọ, na apajlẹ tangan lẹ, bo na ayinamẹ yọn-na-yizan lẹ do lehe e na basi vọjlado gbọn ji ya? Eyin mẹho lọ ‘hẹn ojẹ pé ayinamẹ etọn’ po sọwhiwhe po, e yọnbasi dọ hodidọ etọn na yin alọkẹyi. (Kọlọsinu lẹ 4:6) Na nugbo tọn, devizọnwatọ lizọnyizọnwiwa tọn lọ na hẹn azọngban mẹho lọ tọn bọawu taun gbọn hodidọ sọn ahun mẹ po alọkikẹyi ayinamẹ depope he e mọyi po dali.—Psalm 141:5.

To agun delẹ mẹ, mẹho lẹ to awuwlena azọ́nplọnmẹ yọn-na-yizan he to nukọnzindo de na devizọnwatọ lizọnyizọnwiwa tọn lẹ. Di apajlẹ, yé nọ plan devizọnwatọ lizọnyizọnwiwa tọn he pegan lẹ hẹn to whenuena yé to awutunọ kavi mẹhomẹ lẹ dlapọn. To aliho ehe mẹ, devizọnwatọ lizọnyizọnwiwa tọn lẹ nọ tindo numimọ to azọ́n lẹngbọhọtọ tọn mẹ. Nugbo wẹ dọ, nususu gbẹ́ tin he devizọnwatọ lizọnyizọnwiwa tọn de sọgan wà nado hẹn nukọnyiyi gbigbọmẹ ede tọn pọnte.—Pọ́n apotin he tin to odò he hosọ etọn yin “Nuhe Devizọnwatọ Lizọnyizọnwiwa Tọn lẹ Sọgan Wà.”

Nuagokun atọ̀ntọ he hẹn azọnpinplọn Jesu tindo kọdetọn dagbe taun wẹ yindọ Jehovah plọnazọn ẹn po nukọnyiyi sọgodo tọn po to ayiha mẹ. Jesu dọ gando Otọ́ lọ go dọ e na do ‘azọ́n he klohu ehelẹ’ hia Visunnu lọ. Numimọ he Jesu tindo to whenuena e tin to aigba ji hẹn ẹn penugo nado wleawuna jẹhẹnu he e na tindo nuhudo etọn to azọ́ndenamẹ sọgodo tọn etọn hinhẹndi mẹ lẹ. (Heblu lẹ 4:15; 5:8, 9) Di apajlẹ, azọ́ndenamẹ pinpẹn nankọtọn die Jesu na didá to madẹnmẹ—heyin mẹhe ko kú todin lẹ finfọnsọnku po whẹdida na yé po!—Johanu 5:21,22.

Mẹho lẹ dona tindo nuhudo sọgodo tọn lẹ to ayiha mẹ to whenuena yé to azọ́nplọn devizọnwatọ lizọnyizọnwiwa tọn lẹ to egbehe. Dile etlẹ sọgan taidi dọ sọha mẹho po devizọnwatọ lizọnyizọnwiwa tọn lẹ po ko pé nado penukundo nuhudo alọnu tọn lẹ go do sọ, be e na gbẹsọ yinmọ eyin agun yọyọ de yin didoai ya? Eyin agun susu yin didoai ya? To owhe atọ̀n he wayi lẹ whenu, hugan agun yọyọ 6 000 wẹ tin lẹdo aihọn pé. Nuhudo mẹho po devizọnwatọ lizọnyizọnwiwa tọn po susu wẹ tin nado penukundo agun yọyọ ehelẹ go.

Mẹho lẹ emi, be mì to apajlẹ Jehovah tọn hodo gbọn awuwiwlena haṣinṣan zohunhunnọ mẹdetiti tọn hẹ sunnu he mì to azọ́nplọn lẹ dali ya? Be mì nọ do lehe yé na hẹn azọ́n yetọn lẹ di gbọn hia yé ya? Be mí nọ tindo nuhudo sọgodo tọn lẹ to ayiha mẹ ya? Hihodo apajlẹ Jehovah tọn to lehe e plọnazọn Jesu do mẹ na dekọtọn do dona daho lẹ mẹ na mẹsusu.

Mì Dibu Nado de Azọngban na Mẹdevo lẹ Blo

Mẹho nugopetọ he ko jẹakọ hẹ azọngban sinsinyẹn susu hinhẹn dopọ lẹ sọgan nọ whleawu nado de azọngban na mẹdevo lẹ. Yé sọgan ko tẹnpọn nado wàmọ to ojlẹ he wayi lẹ mẹ ṣigba bo ma tindo kọdetọn dagbe. Enẹwutu yé sọgan wá tindo walọyizan lọ dọ, ‘Eyin hiẹ jlo dọ azọ́n de ni yin wiwà ganji, a dona wà ẹ na dewe.’ Ṣigba be walọyizan ehe sọgbe hẹ ojlo Jehovah tọn, dile Owe-wiwe dohia do, dọ sunnu he ma tindo numimọ sọmọ lẹ ni yin azọ́nplọn gbọn numimọnọ lẹ dali ya?—2 Timoti 2:2.

Apọsteli Paulu jẹflumẹ to whenuena tomẹyitọ-gbẹ́ etọn, Johanu Malku, jo azọ́ndenamẹ etọn do to Pamfilia bo lẹkọ do whégbè. (Owalọ lẹ 15:38, 39) Ṣigba, Paulu ma dike alọhẹndotenamẹ enẹ ni hẹn ẹn gbọjọ sọn azọ́npinplọn mẹdevo lẹ mẹ gba. E de mẹmẹsunnu jọja devo, yèdọ Timoti, bosọ plọn ẹn azọ́n mẹdehlan tọn.a (Owalọ lẹ 16:1-3) Mẹdehlan lọ lẹ pehẹ homẹkẹn sinsinyẹn to Belea bọ e lẹzun dandan na Paulu nado tọ́nsọn finẹ. Enẹwutu e jo agun yọyọ lọ do alọ Sila, heyin sunnu mẹho de, po Timoti po tọn mẹ nado penukundego. (Owalọ lẹ 17:13-15) Matin ayihaawe Timoti plọn nususu sọn Sila dè. To godo mẹ, to whenuena Timoti ko wleawufo nado didá azọngban dogọ lẹ, Paulu do e hlan Tẹsalonika nado na tuli agun he tin to finẹ.—1 Tẹsalonikanu lẹ 3:1-3.

Haṣinṣan he tin to Paulu po Timoti po ṣẹnṣẹn mayin hẹngogonọ, họntọn-majihẹmẹ, kavi numọtolanmẹ matindo tọn gba. Kọndopọ zohunhunnọ de tin to ṣẹnṣẹn yetọn. To whenuena e to wekanhlan agun Kọlinti tọn, Paulu dọho gando Timoti, he e basi tito nado dohlan finẹ go taidi ‘ovi yiwanna po nugbonọ to Oklunọ mẹ po’ etọn. E yidogọ dọmọ: ‘Timoti na hẹn aliho ṣie he tin to Klisti Jesu mẹ lẹ wá oflin mìtọn mẹ.’ (1 Kọlintinu lẹ 4:17) Timoti yinuwa sọgbe hẹ azọ́nplọnmẹ he e mọyi sọn Paulu dè, bosọ pegan to azọ́ndenamẹ etọn lẹ hinhẹndi mẹ. Mẹmẹsunnu jọja susu wẹ ko lẹzun devizọnwatọ lizọnyizọnwiwa tọn, mẹho, kavi etlẹ yin nugopọntọ tomẹyitọ he pegan de, na e mọaleyi sọn azọ́nplọnmẹ he e mọyi sọn mẹho mẹtọnhopọntọ lẹ dè he do ojlo nujọnu tọn hia to ewọ mẹ, dile Paulu basi do to whẹho Timoti tọn mẹ do wutu.

Mẹho lẹ Emi, Mì Plọnazọn Mẹdevo Lẹ!

Matin nuṣiwa, dọdai he tin to Isaia 60:22 mẹ to yinyin hinhẹndi to egbehe. Jehovah to ‘omẹ pẹvi dopo hẹn zun akọta huhlọnnọ de.’ Na akọta enẹ nido sọgan to “huhlọnnọ” yin zọnmii, e dona yin titobasina ganji. Mẹho lẹ emi, etẹwutu mì ma na lẹnnupọndo aliho he mẹ azọ́nplọnmẹ dogọ sọgan yin nina sunnu he ko klan yede do wiwe he jẹ nado mọ azọ́nplọnmẹ yí lẹ ji? Mì hẹn ẹn diun dọ devizọnwatọ lizọnyizọnwiwa tọn dopodopo yọ́n vọjlado he e dona basi nado sọgan yinukọn lẹ. Podọ mì mẹmẹsunnu he ko yí baptẹm lẹ, mì basi yizan dagbe ayidonugo mẹdetiti tọn depope he mì mọyi. Mì yí dotẹnmẹ hundote lẹ zan nado hẹn nugopipe, oyọnẹn, po numimọ mìtọn po jideji. Jehovah na dona tito-to-whinnu owanyinọ alọgọnamẹ tọn mọnkọtọn na jide tọn.—Isaia 61:5.

[Nudọnamẹ odò tọn]

a To godo mẹ, Paulu sọ wazọ́n hẹ Johanu Malku whladopo dogọ.—Kọlọsinu lẹ 4:10.

[Apotin to weda 30]

Nuhe Devizọnwatọ Lizọnyizọnwiwa Tọn lẹ Sọgan Wà

Dile mẹho lẹ to awuwlena azọ́nplọnmẹ na devizọnwatọ lizọnyizọnwiwa tọn lẹ, nususu tin he devizọnwatọ lizọnyizọnwiwa tọn lẹ sọgan wà nado hẹn nukọnyiyi gbigbọmẹ yede titi tọn pọnte deji.

—Devizọnwatọ lizọnyizọnwiwa tọn lẹ dona yin sọwhiwhenọ podọ mẹhe go yè sọgan dejido to nukunpipedo azọ́ndenamẹ yetọn lẹ go mẹ. Yé sọ dona wleawuna aṣa dagbe nupinplọn tọn. Jẹ obá de mẹ, nukọnyiyi nọ sinai do nupinplọn po yíyí nuhe yin pinplọn lẹ do yizan mẹ po ji.

—To whenuena devizọnwatọ lizọnyizọnwiwa tọn de wleawu nado dọ hodidọ de to opli Klistiani tọn de ji, e ma dona whleawu nado biọ ayinamẹ lẹ sọn mẹho nugopetọ de si do lehe e na ze nudọnamẹ lọ donukọnnamẹ do ji gba.

—Devizọnwatọ lizọnyizọnwiwa tọn lọ sọgan sọ biọ to mẹho de si nado doayi lehe e dọ hodidọ Biblu tọn de do go bo na ayinamẹ lẹ do nukọnyiyi ji.

Devizọnwatọ lizọnyizọnwiwa tọn lẹ dona dín, kẹalọyi, bosọ yí ayinamẹ he wá sọn mẹho lẹ dè lẹ do yizan mẹ. To aliho ehe mẹ wẹ nukọnyiyi yetọn na “diun jẹgbonu to omẹ popo dè.”—1 Timoti 4:15.