WETA 12

Godoninọna Azọ́n Ahọluduta lọ Tọn to Agun mẹ Podọ Lẹdo Aihọn Pé

NADO hẹn dọdai Jesu tọn gando azán godo tọn lẹ go di, Kunnudetọ Jehovah tọn lẹ ko dọyẹwheho wẹndagbe lọ tọn “kaka yì awà he dẹn hugan aigba tọn lẹ ji.” (Owalọ 1:8; Mat. 24:14) Nado wà enẹ, yé ko yí whenu po huhlọn yetọn lẹ po zan nado tindo mahẹ to onú gbigbọ tọn lẹ mẹ. Na yé dejido Jehovah go dọ e na penukundo azọ́nwatọ hatọ etọn lẹ go wutu, yé nọ zindonukọn nado to Ahọluduta Jiwheyẹwhe tọn zedo otẹn tintan mẹ to gbẹzan yetọn mẹ. (Mat. 6:25-34; 1 Kọl. 3:5-9) Kọdetọn lọ lẹ do alọkẹyi po dona Jehovah tọn po hia hezeheze.

NUKUNPIPEDO AZỌ́N AHỌLUDUTA LỌ TỌN LẸ GO LẸDO AIHỌN PÉ

² Eyin mẹdelẹ doayi aliho yẹwhehodidọ tọn mítọn lẹ go bo mọdọ mí nọ má Biblu po owe sinai do Biblu ji lẹ po matin akuẹ de bibiọ, yé nọ kanse dọmọ: “Nawẹ ehe lẹpo yọnbasi gbọn?” Na nugbo tọn, e nọ biọ akuẹzinzan susu nado wleawuna Biblu po owe sinai do Biblu ji lẹ po bo zín yé jẹgbonu. E sọ nọ biọ akuẹ susu nado gbá bosọ penukundo owhé Bẹtẹli tọn lẹ go, yèdọ fie lizọnyizọnwatọ he nọ zan maṣinu wezinzin tọn lẹ, mẹhe nọ penukundo azọ́n yẹwhehodidọ tọn go lẹ po mẹhe nọ wà sinsẹ̀nzọn to aliho devo mẹ na nukọnyiyi wẹndagbe lọ tọn lẹ po nọ wazọ́n te. Humọ, nugopọntọ lẹdo tọn lẹ, mẹdehlan he to aigba-denamẹ ji lẹ, gbehosọnalitọ titengbe lẹ po mẹdevo he to sinsẹ̀nzọn whenu-gigọ́ tọn vonọtaun mẹ lẹ po nọ mọ alọgọ yí to agbasa-liho nado zindonukọn to azọ́n lọ mẹ. E họnwun dọ, godoninọna azọ́n yẹwheho wẹndagbe lọ tọn didọ to azán mítọn gbè, vlavo to agun mítọn lẹ mẹ kavi lẹdo aihọn pé, nọ biọ akuẹ susu zinzan. Fie wẹ akuẹ lọ lẹpo nọ wá sọn?

³ Susu mẹhe yọ́n pinpẹn azọ́n Biblu pinplọnmẹ tọn Kunnudetọ Jehovah tọn lẹ tọn nọ hùnhomẹ nado basi nunina na azọ́n lẹdo aihọn pé tọn lọ. Ṣigba jẹnukọn whẹ́, Kunnudetọ lẹ lọsu wẹ nọ nọgodona azọ́n mítọn bọ delẹ to yé mẹ nọ do nunina sọn ojlo mẹ wá lẹ hlan wekantẹn alahọ Kunnudetọ Jehovah tọn lẹ tọn he to otò yetọn mẹ. Yé nọ do gbigbọ ojlo tintindo tọn hia kẹdẹdi devizọnwatọ hohowhenu tọn Jiwheyẹwhe tọn lẹ he yí alọtútlú do nọgodona nọtẹn sinsẹ̀n-bibasi tọn Jehovah tọn gbigbá. (Eks. 35:20-29; 1 Otàn. 29:9) Nunina daho delẹ nọ yin mimọyi taidi ogú lẹ zizejo, bọ nunina he mẹde, agun lẹ po lẹdo lẹ po basi lẹ nọ saba yin nunina akuẹ tọn kleun-kleun lẹ. To whenuena nunina ehe lẹpo yin bibẹpli, yé nọ pé nado nọgodona lizọnyizọn lọ.

Kunnudetọ Jehovah tọn lẹ nọ pọ́n ẹn taidi lẹblanulọkẹyi de nado yí akuẹ yetọn po nutindo yetọn devo lẹ po do nọgodona nukọnyiyi azọ́n yẹwhehodidọ lọ tọn

⁴ Kunnudetọ Jehovah tọn lẹ nọ mọdọ lẹblanulọkẹyi de wẹ e yin nado yí akuẹ yetọn po nutindo yetọn devo lẹ po do nọgodona nukọnyiyi azọ́n yẹwhehodidọ tọn lọ tọn. Jesu po devi etọn lẹ po tindo apotin akuẹ tọn de, ehe mẹ akuẹ nọ yin didesọn nado penukundo akuẹzinzan lẹ go. (Joh. 13:29) Biblu dọho nawe delẹ tọn na mí he yilizọn na Jesu po devi etọn lẹ po. (Malku 15:40, 41; Luku 8:3) Apọsteli Paulu yí homẹhunhun do kẹalọyi nunina agbasa tọn he mẹhe tindo ojlo na nukọnyiyi wẹndagbe lọ tọn bo jlo na nọgodona lizọnyizọn etọn lẹ gbọn owanyi dali na ẹn lẹ. (Flp. 4:14-16; 1 Tẹs. 2:9) Kunnudetọ Jehovah tọn lẹ zindonukọn nado to hihodo apajlẹ hohowhenu tọn ehelẹ he yin sinsẹ̀nzọn zohunhunnọ po nunina sọn ojlo mẹ wá tọn po. Gbọnmọ dali, e sọgan yọnbasi nado na “osin ogbẹ̀ tọn vọnu” ahunjijlọnọ lẹ to filẹpo.—Osọ. 22:17.

NUKUNPIPEDO NUHUDO AGUN TỌN LẸ GO

⁵ Nunina sọn ojlo mẹ wá lẹ wẹ nọ yin yiyizan nado penukundo akuẹzinzan agun tọn lẹ go ga. Akuẹjọ depope ma nọ yin yíyí; akuẹ sọha de ma nọ yin gbigbò na mẹdopodopo nado na, mọjanwẹ akuẹ ma nọ yin bibiọ gbọzangbọzan do niyẹn. Apotin nunina tọn lẹ nọ yin awuwlena do fie opli nọ yin bibasi te lẹ na mẹdopodopo nido sọgan tindo mahẹ to nunina lọ mẹ “kẹdẹdile e ko magbe etọn to ahun etọn mẹ do.”—2 Kọl. 9:7.

⁶ Jẹnukọn whẹ́, akuẹ he yin mimọyi gbọn nunina dali lọ lẹ nọ saba yin yiyizan na nukunpipedo Plitẹnhọ Ahọluduta tọn lọ go. Pipli mẹho lẹ tọn sọgan basi dide dọ apadewhe akuẹ lọ tọn sọgan yin didohlan wekantẹn alahọ Kunnudetọ Jehovah tọn lẹ tọn he to otò lọ mẹ nado yin yiyizan na nukọnyiyi azọ́n lẹdo aihọn pé tọn lọ tọn. Agun lọ wẹ na basi pàdido de gando ehe go. To aliho ehe mẹ, agun susu nọ na nunina to gbesisọ mẹ nado nọgodona azọ́n lẹdo aihọn pé tọn. Eyin mẹlẹpo nọ tin to aṣeji gando nuhudo agun lọ tọn lẹ he nọ fọndote sọn ojlẹ de mẹ jẹ devo mẹ go, e ma na nọ yin dandan nado nọ basi nulila gbọzangbọzan gando nunina lẹ go gba.

NUKUNPIPEDO NUNINA LẸ GO

⁷ To opli dopodopo godo, mẹmẹsunnu awe na nọ bẹ akuẹ he ko yin nunina etọn basi do apotin nunina tọn mẹ lẹpo sẹ̀ bo nọ basi kandai etọn. (2 Ahọ. 12:9, 10; 2 Kọl. 8:20) Pipli mẹho lẹ tọn na basi tito he jẹ lẹ nado basi hihọ́na akuẹ ehelẹ kakajẹ whenue yé na yin didohlan wekantẹn alahọ tọn kavi yin zinzan na nuhudo agun tọn lẹ. Mẹmẹsunnu he nọ penukundo akuẹ agun lọ tọn go nọ wleawuna kandai sunmẹsunmẹ tọn de he nọ yin hihia na agun lọ. Podọ anadenanutọ to pipli mẹho lẹ tọn mẹ nọ basi tito na kandai akuẹzinzan tọn agun lọ tọn nido yin gbigbejepọn to osun atọ̀n lẹpo godo.

AKUẸZINZAN LẸDO TỌN LẸ

⁸ Nunina he Kunnudetọ he tin to lẹdo lọ mẹ lẹ basi wẹ nọ yin yiyizan nado penukundo akuẹ he yin zinzan to plidopọ lẹ whenu lẹ po akuẹzinzan lẹdo lọ tọn devo lẹ po go. Apotin nunina tọn lẹ nọ yin awuwlena do nọtẹn plidopọ tọn lẹ ji, na nunina sọn ojlo mẹ wá lẹ nido sọgan yin bibasi na lẹdo lọ. Humọ, nado penukundo akuẹzinzan he nuhudo etọn nọ fọ́n bo nọ to tintin lẹ go, agun lẹ sọgan basi nunina to ojlẹ devo lẹ mẹ.

⁹ Nuhe na yọ́n hugan wẹ yindọ lẹdo lẹ ni nọ penukundo akuẹzinzan depope he nuhudo etọn tin go, podọ akuẹ he lán lọ sọgan yin yiyizan nado basi nunina na azọ́n lẹdo aihọn pé tọn lọ. Eyin akuẹ he to aimẹ na lẹdo lọ ma pé nado suahọ akuẹ he yin zinzan to plidopọ lọ whenu lẹ tọn kavi nado penukundo akuẹzinzan plidopọ he na bọdego lọ tọn go, taidi ahọsusu na nọtẹn he na yin yiyizan lọ, nugopọntọ lẹdo tọn sọgan na ayinamẹ dọ yè ni dọhona agun lẹ gando lẹblanulọkẹyi lọ nado basi nunina go. Pipli mẹho lẹ tọn dopodopo na dọhodo whẹho lọ ji bo na magbe nunina he agun lọ na penugo nado basi tọn nado gọalọna lẹdo lọ. Enẹgodo, yé na basi pàdido de nado penukundo ehe go.

¹⁰ Eyin whẹho akuẹzinzan tọn lẹ fọndote bo biọ ayidonugo mẹho lẹdo lọ tọn lẹ tọn, opli mẹho lẹdo lọ tọn lẹ tọn de na yin bibasi to azán plidopọ lẹdo tọn de ji. Gbọnvona nudide he gando akuẹ he yin zinzan to lẹdo lọ mẹ lẹ go lẹ, nudide akuẹzinzan tọn lẹpo dona yin bibasi sọgbe hẹ gbemima he kọ̀n mẹho lẹ wá. Sọha akuẹ he na yin zinzan na gbemima ehelẹ tọn pẹpẹ wẹ dona yin kinkandai bo dona nọ yin alọkẹyi to whedepopenu he akuẹ lẹdo lọ tọn na yin zinzan.

¹¹ Tito nọ yin bibasi sọn ojlẹ de mẹ jẹ devo mẹ nado gbeje akuẹzinzan lẹdo lọ tọn lẹ pọ́n.

NUKUNPIPEDO WAMỌNỌ LẸ GO

¹² Dopo to lẹndai apotin akuẹ tọn he Jesu po devi etọn lẹ po tindo tọn lẹ mẹ wẹ nado gọalọna wamọnọ lẹ. (Malku 14:3-5; Joh. 13:29) Azọngban Klistiani tọn ehe gbẹ́ to nukọnzindo, na Jesu dọmọ: “Wamọnọ lẹ tin to mì dè to whepoponu.” (Malku 14:7) Nawẹ Kunnudetọ Jehovah tọn lẹ nọ penukundo azọngban ehe go to egbehe gbọn?

¹³ To whedelẹnu, mẹhe yin nugbonọ to agun lọ mẹ delẹ sọgan tindo nuhudo alọgọ tọn to agbasa-liho, na yọnhowhe, madogán kavi nugbajẹmẹji he zẹ̀ nugopipe yetọn go delẹ wutu. Hagbẹ whẹndo tọn, hẹnnumẹ po mẹdevo lẹ po he sè dogbọn nuhudo mọnkọtọn lẹ dali sọgan yin whinwhàn nado gọalọ. Ehe sọgbe hẹ hogbe apọsteli Johanu tọn lẹ dọmọ: “Mẹdepope he tindo nutindo agbasa tọn aihọn ehe tọn lẹ bo mọ mẹmẹsunnu etọn to nuhudo mẹ, ṣogan bo gbẹ́ nado do awuvẹmẹ hia ẹ, nawẹ owanyi Jiwheyẹwhe tọn gbọṣi ewọ mẹ gbọn lo? Yọpọ lẹ emi, mí ma dona nọ yiwannamẹ to ohó mẹ kavi po odẹ́ po kẹdẹ gba, ṣigba to walọ po nugbo po mẹ.” (1 Joh. 3:17, 18; 2 Tẹs. 3:6-12) Sinsẹ̀n-bibasi nugbo bẹ nukunpipedo omẹ nugbonọ he tindo nuhudo to agbasa-liho lẹ go hẹn.—Jak. 1:27; 2:14-17.

¹⁴ To wekanhlanmẹ tintan apọsteli Paulu tọn hlan Timoti mẹ, e basi zẹẹmẹ lehe yè gán wleawu alọgọ tọn to agbasa-liho na mẹhe jẹ lẹ do tọn. Hiẹ sọgan hia ayinamẹ etọn to 1 Timoti 5:3-21 mẹ. Na taun tọn, azọngban Klistiani dopodopo tọn wẹ e yin nado penukundo nuhudo whédo etọn titi tọn lẹ go. Yọnhonọ kavi madogánnọ lẹ dona mọ alọgọ yí sọn ovi, ovivi, kavi hẹnnumẹ sẹpọmẹ yetọn devo lẹ dè. To whedelẹnu, tito he ahọlu kavi otò zedai delẹ nọ wleawu alọgọ agbasanu lẹ tọn namẹ, enẹwutu hẹnnumẹ lẹ kavi mẹdevo lẹ sọgan gọalọna mẹhe tin to nuhudo mẹ lọ nado biọ alọgọ mọnkọtọn. Ninọmẹ de sọgan fọ́n he na hẹn ẹn zun dandan na agun lọ blebu to pọmẹ nado lẹnnupọndo alọgigọna mẹmẹsunnu po mẹmẹyọnnu delẹ po ji, he ko yin nugbonọ to sinsẹ̀nzọn yetọn mẹ na owhe susu bo tin to nuhudo mẹ. Eyin hagbẹ whẹndo tọn kavi hẹnnumẹ depope ma tin nado gọalọna omẹ mọnkọtọn lẹ bọ alọgọ he pé de ma tin sọn tito he ahọlu zedai lẹ dè, pipli mẹho lẹ tọn sọgan basi tito he jẹ lẹ nado wleawu alọgọ delẹ tọn. Klistiani lẹ nọ pọ́n ẹn taidi lẹblanulọkẹyi de nado má nutindo agbasa tọn yetọn lẹ hẹ mẹhe tin to nuhudo mẹ lẹ.

¹⁵ Susu mẹmẹsunnu mítọn lẹ tọn wẹ sọgan biọ nuhudo mẹ, na homẹkẹn, awhàn, aigba sisọsisọ, singigọ, huvẹ, kavi nugbajẹmẹji devo lẹ he gbayipe to ojlẹ awusinyẹn tọn ehelẹ mẹ wutu. (Mat. 24:7-9) Agun lẹdo lọ tọn lẹ sọgan nọma tindo nudepope nado má hẹ ode awetọ, enẹwutu Hagbẹ Anademẹtọ lọ nọ deanana vivẹnudido mẹmẹsunnu lẹ tọn to fidevo lẹ nado wleawu alọgọ he nuhudo etọn tin lẹ tọn. Ehe sọgbe hẹ aliho he mẹ Klistiani he tin to Asia Pẹvi lẹ wleawu núdùdù tọn na mẹmẹsunnu he tin to Jude lẹ te to whenue huvẹ de tọ́n. (1 Kọl. 16:1-4; 2 Kọl. 9:1-5) Gbọn apajlẹ yetọn hihodo dali, mí nọ do owanyi mítọn hia mẹmẹsunnu mítọn lẹ bosọ nọ do mídelẹ hia di devi Jesu Klisti tọn lẹ nugbonugbo.—Joh. 13:35.

OWE LẸ MIMÁ

¹⁶ Biblu po owe sinai do Biblu ji lẹ po yin adà titengbe de to owẹ̀n Ahọluduta lọ tọn hinhẹn gbayipe mẹ. To paa mẹ, pipli mẹho lẹ tọn nọ deazọ́nna devizọnwatọ lizọnyizọnwiwa tọn de nado penukundo owe he agun lọ tindo to aimẹ lẹ go. Mẹmẹsunnu he azọ́n ehelẹ yin didena lẹ nọ ylọ azọngban yetọn lẹ dọ nujọnu. Yé nọ basi kandai dagbe lẹ, na owe he pemẹnu nido tin-to-aimẹ nado sọgan penukundo nuhudo agun lọ tọn go.

¹⁷ Taidi Klistiani klandowiwe lẹ, mí yọnẹn dọ whenu mítọn, nugopipe apọ̀nmẹ tọn po agbasa tọn lẹ po, azọ́nyinyọnẹn, gọna nutindo agbasa tọn mítọn lẹ, etlẹ yin ogbẹ̀ mítọn, popolẹpo wẹ yin nunina lẹ sọn Jiwheyẹwhe dè, ehe e jlo dọ mí ni yizan to sinsẹ̀nzọn etọn mẹ. (Luku 17:10; 1 Kọl. 4:7) Gbọn nutindo mítọn lẹpo yiyizan to aliho he sọgbe mẹ dali, mí nọ do lehe owanyi mítọn na Jehovah siso sọ hia. Ojlo mítọn wẹ nado gbògbéna Jehovah po nuhọakuẹ mítọn lẹpo po, na mí yọnẹn dọ nunina depope he yin nina taidi dohia mẹdezejo ahundopo tọn nọ hùnhomẹ na ẹn. (Howh. 3:9; Malku 14:3-9; Luku 21:1-4; Kol. 3:23, 24) Jesu dọmọ: “Vọnu wẹ mì mọyi, vọnu wẹ mì ni namẹ.” (Mat. 10:8) Taidi kọdetọn de, eyin mí ze míde po nutindo mítọn lẹ po jo to sinsẹ̀nzọn Jehovah tọn mẹ, mí na tindo ayajẹ daho.—Owalọ 20:35.