Godonọna to Akuẹzinzan Liho Gbọn Nunina sọn Ojlo mẹ Wá lẹ Dali
Azọ́n he yin zẹẹmẹ basina jẹnukọn dai lẹpo yin godonọna gbọn azọ́nwàtọ mẹdezejotọ lẹ dali, bo gbọn mọ dali do hẹn onu lẹ pọakuẹ. Lizọnyizọn whedegbe-jẹ-whedegbe tọn po mima owe lẹ tọn po nọ yin bibasi sọn ojlo mẹ wá gbọn Kunnudetọ Jehovah tọn lẹ dali. Yé nọ suahọ akuẹzinzan yede titi tọn lẹ tọn. Mẹho lẹ he nọ pọn agun lọ go, he yin alọgọna gbọn devizọnwatọ lizọnyizọnwiwa tọn lẹ dali, ma nọ mọ ahosumẹ depope yí na sinsẹnzọn yetọn lẹ gba. Yé nọ penukundo akuẹzinzan yetọn titi lẹpo go.
Mẹhe tin to Hagbẹ Anademẹtọ lọ mẹ lẹ lọsu po Kunnudetọ devo lẹ po he to azọ́n whenu gigọ tọn wà to awuwlena po zinjẹgbonu Biblu lẹ tọn po owe he sinai do Biblu ji tọn lẹ po ma nọ mọyi hugan ohọnù yetọn po núdùdù lẹ po apomẹkuẹ kleun de nado penukundo akuẹzinzan yetọn lẹ go po gba. Mọdoppolọ wẹ e te na nugopọntọ tómẹyìtọ whenu gigọ tọn lẹ do niyẹn.
Nunina kleun lẹ he nọ yin mimọyi na owe lẹ na paa tọn nọ suahọ dòdonu tọn azọnwanu lẹ tọn kẹdẹ, zinjẹgbonu, po agbàn-bladohlan-tòmẹ lẹ tọn po. Akuẹzinzan devo lẹpo nọ yin bibasi gbọn akuẹ nina sọn ojlo mẹ wá lẹ dali he yin bibasi gbọn Kunnudetọ Jehovah tọn lẹ lọsu na yede dali, gbọn nunina kavi ogu-mima sọgbe hẹ osẹ́n lẹ dali.
To opli Kunnudetọ Jehovah tọn lẹ tọn lẹpo tẹnmẹ, vlavo kọmẹ tọn kavi plidopọ lẹ, apotin nunina tọn lẹ nọ tin to aimẹ na mẹhe jlo na na nunina lẹ. Akuẹ-sinsinyan de ma nọ tin. Akuẹjọ dandan tọn kavi madao lẹ ma nọ yin nina gba. Dile na e yin didọ do to Owe wiwe lẹ mẹ, omẹ dopodopo sọgan na nunina dile e lẹn to ayiha etọn mẹ do.—2 Kọlintinu lẹ 8:12; 9:7.
• Nawẹ azọ́n Kunnudetọ Jehovah tọn lẹ tọn lẹpo nọ yin godonọna to whẹho akuẹ tọn mẹ gbọn?