Hinhẹn Jijọho po Wiwejininọ Agun lọ Tọn po Go

TO HẸNDI mẹ na dọdai Biblu tọn, gbẹtọ fọtọ́n susu lẹ wẹ nọ wọ̀ biọ ohọ̀ sinsẹ̀n-bibasi wiwe-ṣeke Jehovah tọn mẹ to owhe dopodopo mẹ. (Mika 4:1, 2) Lehe homẹ mítọn nọ hùn nado dokuavọna yé wá “agun Jiwheyẹwhe tọn” mẹ do sọ! (Owalọ 20:28) Yé nọ yọ́n pinpẹn dotẹnmẹ hundote he yé tindo nado sẹ̀n Jehovah dopọ hẹ mí tọn podọ nado duvivi ninọmẹ paladisi gbigbọmẹ tọn mítọn he wé bo gọ́ na jijọho tọn. Gbigbọ wiwe Jehovah tọn po ayinamẹ nuyọnẹn tọn he tin to Ohó etọn mẹ lẹ po wẹ nọ gọalọna mí nado hẹn jijọho go bo hẹn agun lọ do wiwe ji.—Salm. 119:105; Zek. 4:6.

² Nunọwhinnusẹ́n Biblu tọn lẹ yíyí-do-yizan mẹ nọ gọalọna mí nado ze “gbẹtọ-yinyin yọyọ lọ” dogo. (Kol. 3:10) Mí nọ miọnnukundo dẹ́sọ-dẹ́mẹ lẹ po gbemanọpọ flinflin lẹ po. Pọndohlan Jehovah tọn gando whẹho lẹ go tintindo nọ gọalọna mí nado duto nuyiwadomẹji aihọn tọn he nọ hẹn kinklan wá lẹ ji bo nọ wazọ́n dopọ to owanyi mẹ taidi mẹmẹsunnu lẹdo aihọn pé lẹ.—Owalọ 10:34, 35.

³ Etomọṣo, nuhahun lẹ nọ fọndote sọn ojlẹ de mẹ jẹ devo mẹ bo nọ yinuwado jijọho po pọninọ agun lọ tọn po ji. Etẹwẹ nọ hẹn ehelẹ wá? To whẹho susu mẹ, awugbopo nado yí ayinamẹ Biblu tọn lẹ do yizan mẹ wẹ. Mí gbẹsọ dona pehẹ ayilinlẹn gbẹtọvi mapenọ tọn mítọn lẹ. Mímẹpo wẹ yin ylandonọ. (1 Joh. 1:10) Mẹde sọgan ṣì afọ ze, ehe sọgan hẹn walọ mawé kavi dihó gbigbọmẹ tọn biọ agun lọ mẹ. Ohó po nuyiwa mẹtọnmahopọn tọn mítọn lẹ po sọgan zọ́n bọ mí na hẹn homẹgble mẹde, kavi mílọsu sọgan dahli na nuhe mẹde dọ kavi wà wutu. (Lom. 3:23) To ninọmẹ mọnkọtọn lẹ mẹ, etẹwẹ mí sọgan wà nado didẹ nuhahun lọ lẹ?

⁴ Jehovah ko gbọn owanyi dali wleawuna alọgọ to ninọmẹ ehe lẹpo mẹ. Ohó etọn namẹ ayinamẹ do nuhe sọgan yin wiwà ji to whenue nuhahun lẹ fọ́n. Alọgọ lẹ nọ wá sọn lẹngbọhọtọ owanyinọ gbigbọnọ lẹ, yèdọ mẹho lẹ dè. Ayinamẹ yetọn he nọ sinai do Owe-wiwe ji lẹ yíyí-do-yizan mẹ sọgan hẹn mí nado vọ́ haṣinṣan dagbe de tindo hẹ mẹdevo lẹ bosọ tindo teninọ dagbe de to Jehovah nukọn. Eyin mí mọ mẹplọnlọ kavi wọhẹ yí na ylanwiwa delẹ wutu, mí sọgan deji dọ alọgọ mọnkọtọn yin dohia owanyi Otọ́ mítọn olọn mẹ tọn.—Howh. 3:11, 12; Heb. 12:6.

GBEMANỌPỌ FLINFLIN LẸ DIDỌGBÒ

⁵ Dẹ́sọ-dẹ́mẹ kavi nuhahun flinflin lẹ sọgan fọ́n to mẹhe to agun lọ mẹ lẹ ṣẹnṣẹn to whedelẹnu. Ehe dona yin didọgbò to niyaniya mẹ to gbigbọ owanyi mẹmẹsunnu tọn mẹ. (Efe. 4:26; Flp. 2:2-4; Kol. 3:12-14) Matin ayihaawe, hiẹ na mọdọ nuhahun he hiẹ nọ tindo hẹ Klistiani hatọ lẹ sọgan yin dididẹ gbọn ayinamẹ apọsteli Pita tọn yíyí-do-yizan mẹ dali, enẹ wẹ nado “tindo owanyi sisosiso na ode awetọ, na owanyi nọ ṣinyọnnudo ylando susugege.” (1 Pita 4:8) Biblu dọmọ: “Mímẹpo wẹ nọ ṣinuwa whlasusu.” (Jak. 3:2) Eyin mí nọ yí Osẹ́n Sika tọn lọ do yizan mẹ, enẹ wẹ nado nọ wà na mẹdevo lẹ nudepope he mí na jlo dọ yé ni wà na mí, mí sọgan nọ jo nuṣiwa flinflin lẹ namẹ bo nọ wọnji yé go.—Mat. 6:14, 15; 7:12.

⁶ Eyin hiẹ doayi e go dọ nuhe a dọ kavi wà de gbleawuna mẹde, a dona ze afọdide tintan nado dín jijọho madọngbàn. Flindọ e sọ gando haṣinṣan towe hẹ Jehovah go ga. Jesu na ayinamẹ devi etọn lẹ dọmọ: “To whelọnu lo, eyin hiẹ hẹn nunina towe ja agbà lọ kọ̀n bo flin to finẹ dọ mẹmẹsunnu towe tindo nude sọta we, jo nunina towe do finẹ to agbà lọ nukọn, bo tọ́nyi. Yì dín jijọho hẹ mẹmẹsunnu towe whẹ́, podọ to enẹgodo, lẹkọwa bo wá na nunina towe.” (Mat. 5:23, 24) Wiwọ́ de sọgan ko tin to mì ṣẹnṣẹn. Eyin mọ wẹ, dovivẹnu na hodọdopọ dagbe nido tin. Hodọdopọ dagbe to mẹlẹpo ṣẹnṣẹn to agun lọ mẹ nọ gọalọ taun nado glọnalina wiwọ́ lẹ podọ nado didẹ nuhahun he mape gbẹtọvi tọn nọ hẹnwa lẹ.

AYINAMẸ OWE-WIWE TỌN HE JẸ LẸ NINA

⁷ Nugopọntọ lẹ sọgan mọ to whedelẹnu dọ e yin dandan nado na ayinamẹ mẹde nado vọ́ pọndohlan etọn jlado. Ehe ma nọ bọawu to whepoponu gba. Apọsteli Paulu wlanwe hlan Klistiani he to Galatia lẹ dọmọ: “Mẹmẹsunnu lẹ emi, eyin mẹde tlẹ ṣì afọ ze whẹpo do wá yọ́n ẹn, mì mẹhe pegan to gbigbọ-liho lẹ ni tẹnpọn nado gọ̀ omẹ mọnkọtọn do otẹn etọn mẹ to gbigbọ walọmimiọn tọn mẹ.”—Gal. 6:1.

⁸ Gbọn lẹngbọpa lọ yìnyìn dali, nugopọntọ lẹ sọgan basi hihọ́na agun lọ sọn owù gbigbọmẹ tọn susu lẹ mẹ bo sọgan glọnalina nuhahun sinsinyẹn lẹ. Mẹho lẹ nọ dovivẹnu nado nọ yinuwa hẹ agun lọ sọgbe hẹ opagbe he Jehovah do gbọn Isaia gblamẹ dọmọ: “Mẹdopodopo nasọ taidi bẹtẹn de sọn jẹhọn nù, yèdọ fiwhiwhlá de sọn yujẹhọn nù, taidi asisa osin tọn lẹ to aigba húhú de ji, podọ taidi oyẹ̀ osé daho de tọn to aigba-klo de ji.”—Isa. 32:2.

PIPAYI BẸWLUNỌ LẸ GO

⁹ Apọsteli Paulu na avase gando mẹdelẹ go he sọgan tindo nuyiwadomẹji ylankan do mẹdevo lẹ ji to agun lọ mẹ. Paulu dọmọ: “Mí to anademẹ lẹ na mì . . . nado nọ nọla na mẹmẹsunnu depope he to nuyiwa to aliho bẹwlu tọn mẹ bọ e ma yin sọgbe hẹ aṣa he mì mọyi sọn mí dè.” E hẹn nuhe dọ e te họnwun to whenue e wlan dọmọ: “Eyin mẹdepope ma setonuna ohó mítọn he tin to wekanhlanmẹ ehe mẹ, mì payi omẹ ehe go bo masọ dogbẹ́ hẹ ẹ ba blo, na winyan nido hù i. Etomọṣo, mì pọ́n ẹn taidi kẹntọ de blo, ṣigba mì zindonukọn nado nọ to tudohomẹna ẹn taidi mẹmẹsunnu.”—2 Tẹs. 3:6, 14, 15.

¹⁰ To whedelẹnu, mẹde sọgan nọma hùwhẹ ylando sinsinyẹn he wutu e sọgan yin didesẹ sọn agun mẹ de tọn, amọ́ e nọ do sisi matindo hia na nujinọtedo Jiwheyẹwhe tọn he nọ deanana Klistiani lẹ. Ehe sọgan bẹ adidọ kavi homọdọdomẹgo zẹjlẹgo hẹn, kavi mẹhe kudiho zẹjlẹgo to agbasa-liho. Mẹlọ sọgan nọ to “didá do nuhe ma dù [i] mẹ.” (2 Tẹs. 3:11) Kavi e sọgan yin mẹhe nọ to ayiha kàn nado tafu mẹdevo lẹ kavi nọ tindo mahẹ to ayidedai he e họnwun dọ e ma sọgbe lẹ mẹ. Whẹho sinsinyẹn de wẹ nuyiwa to aliho bẹwlu tọn mẹ yin bo sọgan tindo nuyiwadomẹji ylankan do agun lọ ji bosọ sọgan bẹpla Klistiani devo lẹ.

¹¹ Jẹnukọn whẹ́, mẹho lẹ na tẹnpọn nado gọalọna bẹwlunọ lọ gbọn ayinamẹ sinai do Biblu ji lẹ nina ẹn dali. Ṣigba, eyin e gbẹsọ zindonukọn to sisi matindo na nunọwhinnusẹ́n Biblu tọn lẹ mẹ mahopọnna dọ ayinamẹ ko yin nina ẹn pludopludo, mẹho agun tọn lẹ sọgan basi dide dọ hodidọ avase tọn de ni yin didọna agun lọ. Mẹho lẹ na yí wuntuntun zan nado yọnẹn eyin ninọmẹ de ko sinyẹn jẹ obá lọ mẹ bo to tuklado mẹdevo lẹ, bọ e na biọ dọ hodidọ avase tọn de ni yin nina. Hodọtọ lọ na na ayinamẹ he jẹ lẹ gando walọ he nọ hẹn bẹwlu wá lọ go, amọ́ yinkọ bẹwlunọ lọ tọn ma na yin yiylọ gba. Gbọnmọ dali, mẹhe doayi ninọmẹ he yè basi zẹẹmẹ etọn to hodidọ lọ mẹ go lẹ na yinuwa nado dapana gbẹdido hẹ omẹ mọnkọtọn, dile etlẹ yindọ yé na zindonukọn to nuwiwa gbigbọmẹ tọn lẹ mẹ hẹ ẹ bo na “to tudohomẹna ẹn taidi mẹmẹsunnu.”

¹² Todido tin dọ teninọ nujikudo tọn he Klistiani nugbonọ lẹ ze na zọ́n bọ winyan na hù bẹwlunọ lọ bọ e na lẹnvọjọ. To whenuena e họnwun hezeheze dọ mẹlọ ko gbẹ́ aliho bẹwlu tọn etọn dai, e ma nasọ yin dandannu nado yinuwa hẹ ẹ taidi mẹhe go yè na payi de ba.

NUKUNPIPEDO YLANDO SINSINYẸN DELẸ GO

¹³ Ojlo tintindo nado miọnnukundo nuṣiwa lẹ podọ nado jonamẹ ma zẹẹmẹdo dọ mí nọ yí nukunpẹvi do pọ́n ylanwiwa lẹ kavi kẹalọyi yé gba. E ma yin ylanwiwa lẹpo wẹ sọgan nọ yin zizepla-dokọna mape he mí dugu etọn gba; mọdopolọ e ma na sọgbe nado yí nukunpẹvi do pọ́n ylanwiwa he sinyẹn hú nuṣiwa flinflin lẹ. (Lev. 19:17; Salm. 141:5) Alẹnu Osẹ́n tọn lọ dohia dọ ylando delẹ nọ sinyẹn hú devo lẹ, podọ nudopolọ wẹ e yin to tito Klistiani tọn mẹ ga.—1 Joh. 5:16, 17.

¹⁴ Jesu basi todohukanji aliho tangan de tọn, he mẹ nuhahun sinsinyẹn he sọgan fọ́n to Klistiani hatọ lẹ ṣẹnṣẹn sọgan yin didọgbò te. Doayi afọdide he e slẹ lọ lẹ go: “Eyin mẹmẹsunnu towe waylando de, [1] yì bo do nuṣiwa etọn hia ẹ to hiẹ po ewọ po kẹdẹ ṣẹnṣẹn. Eyin e sè towe, be hiẹ ko duale mẹmẹsunnu towe tọn. Ṣigba, eyin e ma sè, [2] plan mẹdopo kavi awe dogọ dewe, na whẹho lẹpo nido yin hinhẹn lodo to dodonu kunnudide kunnudetọ awe kavi atọ̀n tọn ji. Eyin e ma sè yetọn, [3] dọ ẹ na agun. Eyin e masọ sè agun tọn ga, gbọ e ni tin hlan we kẹdẹdi omẹ akọta lẹ tọn de podọ di tòkuẹ-ṣinyantọ de.”—Mat. 18:15-17.

¹⁵ Eyin mí lẹnnupọndo apajlẹ devo he Jesu na bọdego, he yin kinkandai to Matiu 18:23-35 mẹ ji, e taidi dọ dopo to ylando he hodọ Matiu 18:15-17 te lẹ mẹ wẹ ylando he gando whẹho akuẹ kavi nutindo tọn lẹ go, taidi awugbopo nado suahọ he yin dùdù de kavi mẹhodu. Kavi ylando lọ sọgan yin mẹnudidọ mẹhẹngble tọn, ehe nọ hẹn yinkọ mẹtọn gble taun.

¹⁶ Eyin hiẹ tindo kunnudenu dọ mẹde to agun lọ mẹ ko waylando mọnkọtọn de sọta we, ma whlẹndo nado yì dọna mẹho agun tọn lẹ nado wá dádo whẹho lọ mẹ blo. Sọgbe hẹ ayinamẹ Jesu tọn, dọho hẹ mẹhe ṣinuwa do we lọ whẹ́. Tẹnpọn nado didẹ whẹho lọ to mì omẹ awe lẹ kẹdẹ ṣẹnṣẹn. Hẹn do ayiha mẹ dọ Jesu ma dọ dọ ‘yì whladopo poun bo do nuṣiwa etọn hia ẹ’ gba. Enẹwutu, eyin mẹlọ ma yigbe na nuṣiwa etọn bo biọ jona, e sọgan yọ́n hugan nado dọnsẹpọ ẹ whladopo dogọ to godo mẹ. Eyin whẹho lọ sọgan yin didọgbò to aliho ehe mẹ, e na vivi na mẹhe waylando lọ dọ hiẹ ma ko jla ylando etọn na mẹdevo lẹ kavi hẹn yinkọ dagbe etọn gble to agun lọ mẹ. Hiẹ na ko “duale mẹmẹsunnu towe tọn.”

¹⁷ Eyin mẹhe waylan lọ kẹalọyi nuṣiwa etọn, bo biọ jona, bosọ ze afọdide lẹ nado jla nuhe e ṣiwà lọ do, nuhudo ma nasọ tin nado ze afọdide awetọ ba. Dile etlẹ yindọ ylanwiwa sinsinyẹn de wẹ, whẹho ehe sọgan yin didọgbò to mẹhe go e gando lọ lẹ kẹdẹ ṣẹnṣẹn.

¹⁸ Eyin hiẹ ma penugo nado duale mẹmẹsunnu towe tọn gbọn nuṣiwa etọn didohia ẹ “to hiẹ po ewọ po kẹdẹ ṣẹnṣẹn” dali, to whenẹnu hiẹ sọgan basi dile Jesu dọ do, “plan mẹdopo kavi awe dogọ dewe” bo dọho hẹ mẹmẹsunnu towe whladopo dogọ. Mẹhe hiẹ plan yì lẹ lọsu dona tindo yanwle lọ nado duale mẹmẹsunnu towe tọn. E na yọ́n hugan dọ yé ni yin kunnudetọ ylanwiwa lọ tọn lẹ, ṣigba eyin kunnudetọ de ma tin, hiẹ sọgan basi dide nado biọ to mẹdopo kavi awe dogọ si nado yin kunnudetọ na hodọdopọ lọ. Yé sọgan yin mẹhe tindo numimọ gando whẹho he to aimẹ lọ go bo sọgan yọnẹn eyin nuhe jọ lọ yin ylanwiwa de nugbo kavi lala. Mẹho agun tọn he yin hinhẹn yì nado yinuwa taidi kunnudetọ lẹ ma to afọ agun tọn zedai gba, to whenuena e yindọ pipli mẹho lẹ tọn ma ko de yé tlọlọ nado penukundo whẹho lọ go.

¹⁹ Eyin hiẹ dopo kẹdẹ ko dọho hẹ mẹlọ bo ko sọ plan mẹdopo kavi awe yì e dè, ṣogan bọ whẹho lọ ma ko yin didọgbò mahopọnna afọdide debọdo-dego he yin zize lẹ, bọ hiẹ mọdọ a ma sọgan jo whẹho lọ do domọ poun, whenẹnu hiẹ dona dọ ẹ na nugopọntọ agun tọn lẹ. Flindọ yanwle yetọn wẹ nado hẹn jijọho po wiwejininọ agun lọ tọn po go. To whẹho lọ zizedo alọmẹ na mẹho agun tọn lẹ godo, hiẹ dona jo whẹho lọ do alọmẹ na yé bo dejido Jehovah go. Hiẹ ma dona dike walọ mẹdevo tọn ni hẹn we dahli kavi hẹn ayajẹ towe to Jehovah sinsẹ̀n mẹ bu gbede.—Salm. 119:165.

²⁰ Lẹngbọhọtọ apó lọ tọn lẹ na dindona whẹho lọ. Eyin e họnwun dọ mẹlọ ko waylando sinsinyẹn de sọta we nugbonugbo bo ma lẹnvọjọ bo masọ jlo nado basi vọjlado he jẹ bosọ sọgbe hẹ lẹnpọn dagbe lẹ, e sọgan lẹzun dandan na wedegbẹ́ nugopọntọ lẹ tọn de nado de ylanwatọ lọ sẹ̀ sọn agun mẹ. Gbọnmọ dali, yé na basi hihọ́na apó lọ bo hẹn agun lọ do wiweji.—Mat. 18:17.

NUKUNPIPEDO WHẸHO YLANWIWA SINSINYẸN TỌN LẸ GO

²¹ Ylando sinsinyẹn delẹ taidi fẹnnuwiwa zanhẹmẹ tọn, ayọdide, zanhẹmẹ to mẹhe tindo vijinu dopolọ lẹ ṣẹnṣẹn, nùzinzan, atẹṣiṣi, boṣiọ-sinsẹ̀n po ylando sinsinyẹn mọnkọtọn devo lẹ po, ma yin nuhe mẹhe yè wà oylan lọ do sọgan jonamẹ poun gba. (1 Kọl. 6:9, 10; Gal. 5:19-21) Na ylando sinsinyẹn ehelẹ sọgan ze wiwejininọ agun lọ tọn to gbigbọ-liho podọ to walọyizan-liho do owù mẹ wutu, yé dona yin didọna mẹho agun tọn lẹ bọ yewlẹ dona penukundego. (1 Kọl. 5:6; Jak. 5:14, 15) Mẹdelẹ sọgan dọnsẹpọ mẹho agun tọn lẹ vlavo nado yigbe ylando yedetiti tọn kavi nado jẹwhẹ ylanwiwa mẹdevo lẹ tọn he yé yọnẹn tọn. (Lev. 5:1; Jak. 5:16) Mahopọnna aliho he mẹ mẹho lẹ sèhó gando ylanwiwa sinsinyẹn Kunnudetọ he ko yí baptẹm de tọn go te, mẹho awe dona basi dodinnanu de whẹ́. Eyin yé mọdọ owhẹ̀ he yin jijẹ lọ yin nugbo bọ kunnudenu lẹ tin he dohia dọ ylando sinsinyẹn de ko yin wiwà nugbonugbo, pipli mẹho lẹ tọn na wleawuna wedegbẹ́ whẹdida tọn de he na bẹ e whè gbau mẹho atọ̀n hẹn nado penukundo whẹho lọ go.

²² Mẹho lẹ nọ penukundo apó lọ go po sọwhiwhe po, bo nọ tẹnpọn nado basi hihọ́na ẹn sọn nudepope he sọgan hẹn owù wá to gbigbọ-liho si. Yé sọ nọ dovivẹnu nado yí Ohó Jiwheyẹwhe tọn zan po azọ́nyinyọnẹn po nado wọhẹ mẹdepope he ṣinuwa bo hẹnazọ̀ngbọna ẹn to gbigbọ-liho. (Juda 21-23) Ehe sọgbe hẹ ayinamẹ he apọsteli Paulu na Timoti dọmọ: “Yẹn degbena we vivẹvivẹ to Jiwheyẹwhe nukọn podọ to Klisti Jesu nukọn, yèdọ mẹhe na dawhẹna mẹhe to ogbẹ̀ po oṣiọ lẹ po, . . . Nọ yí homẹfa po azọ́nyinyọnẹn mẹpinplọn tọn lẹpo po do wọhẹmẹ, do gbẹnunamẹ, do dotuhomẹnamẹ.” (2 Tim. 4:1, 2) Mọwiwà sọgan biọ whenu susu, ṣigba ehe yin apadewhe azọ́n sinsinyẹn he mẹho lẹ nọ wà tọn. Agun lọ nọ yọ́n pinpẹn vivẹnudido yetọn lẹ tọn bo nọ pọ́n yé hlan nado “jẹna gbégbò whla awe.”—1 Tim. 5:17.

²³ To ninọmẹ lẹpo he mẹ yè mọ te dọ mẹlọ hùwhẹ, vivẹnu tintan nugopọntọ lẹ tọn wẹ nado hẹnazọ̀ngbọna ylanwatọ lọ to gbigbọ-liho. Eyin ewọ lẹnvọjọ sọn ahun mẹ bọ yé penugo nado gọalọna ẹn, wọhẹ he yé na ẹn, vlavo to nuglọ kavi to kunnudetọ depope he wá dekunnu to aisinsin whẹdida tọn lọ whenu lẹ nukọn, na yin mẹplọnlọdomẹgo de na ẹn bo nasọ hẹn mẹhe yọnẹn dogbọn whẹho lọ dali lẹ sinú. (2 Sam. 12:13; 1 Tim. 5:20) Whedepopenu he wedegbẹ́ whẹdida tọn de wọhẹmẹ, alọhẹndotenamẹ lẹ nọ yin nina ylanwatọ lọ. Gbọnmọ dali, ylanwatọ lọ sọgan yin alọgọna nado de “ali jijlọ lẹ” na afọ etọn to enẹgodo. (Heb. 12:13) To ojlẹ delẹ godo, alọhẹndotenamẹ lọ lẹ nọ yin didesẹ dile vọjlado he mẹlọ to bibasi to gbigbọ-liho lẹ to wunhọ́n.

WỌHẸ LẸ LILÁ

²⁴ Eyin wedegbẹ́ whẹdida tọn de mọdọ ylanwatọ lọ lẹnvọjọ, ṣogan bọ whẹho lọ sọgan wá jẹ gbangba to agun lọ mẹ kavi to lẹdo lọ mẹ, kavi eyin e biọ dọ avase ni yin nina agun gando ylanwatọ he lẹnvọjọ lọ go, nulila kleun de na yin bibasi to Opli Gbẹzan po Lizọnyizọn Mítọn po tọn whenu. Nulila lọ dona dọmọ: “[Yinkọ mẹlọ tọn] ko yin wiwọhẹ.”

EYIN NUDIDE LỌ YIN MẸDESẸ SỌN AGUN MẸ

²⁵ To whẹho delẹ mẹ, ylanwatọ lọ nọ lẹzun tasinyẹntọ to ylanwiwa etọn mẹ bo na gbọnmọ dali gboawupo nado kẹalọyi alọ he yè to gigọ́ na ẹn. “Azọ́n he jẹna lẹnvọjọ lẹ” sọgan nọma yin mimọ to aisinsin wedegbẹ́ lọ tọn whenu. (Owalọ 26:20) Etẹwẹ na yin bibasi to whenẹnu? To whẹho mọnkọtọn lẹ mẹ, e na yin dandannu nado de ylanwatọ he ma lẹnvọjọ lọ sẹ̀ sọn agun mẹ, bo gbọnmọ dali glọnalina ẹn ma nado nọ dogbẹ́ hẹ omẹ wiwe Jehovah tọn lẹ. Nuyiwadomẹji ylankan ylanwatọ lọ tọn nọ yin didesẹ sọn agun lọ mẹ, bọ ehe nọ basi hihọ́na wiwejininọ agun lọ tọn to walọyizan-liho podọ to gbigbọ-liho, humọ oyín dagbe agun lọ tọn sọ nọ yin hinhẹn dote. (Deut. 21:20, 21; 22:23, 24) To whenuena apọsteli Paulu sèhó gando walọ he huwinyan he mẹde zan to agun Kọlinti tọn mẹ go, e na ayinamẹ mẹho agun tọn lẹ nado “ze dawe mọnkọtọn do alọmẹ na Satani, . . .  na gbigbọnọ-yinyin agun lọ tọn nido sọgan yin hinhẹn dote.” (1 Kọl. 5:5, 11-13) Paulu sọ dọho gando didesẹ sọn agun mẹ mẹdevo lẹ he ṣiatẹ sọta nugbo lọ to owhe kanweko tintan whenu tọn go.—1 Tim. 1:20.

²⁶ To whenue wedegbẹ́ whẹdida tọn de wá tadona lọ kọ̀n dọ ylanwatọ he ma lẹnvọjọ de dona yin didesẹ sọn agun mẹ, yé dona dọ nudide lọ na ẹn, bo do whẹwhinwhẹ́n Owe-wiwe tọn (lẹ) he wutu e dona yin didesẹ sọn agun mẹ hia ẹ hezeheze. To whenue wedegbẹ́ whẹdida tọn lọ to nudide yetọn dọna ylanwatọ lọ, yé na dọna ẹn dọ eyin e mọdọ nuṣiwa sinsinyẹn de ko yin bibasi to whẹdida lọ mẹ bọ e jlo nado vọ́ owhẹ̀ ylọ, e sọgan wàmọ gbọn wekanhlanmẹ de didohlan yé dali bo dọ whẹwhinwhẹ́n he wutu e do to whẹ̀-vọ́-ylọ lẹ hezeheze. Azán ṣinawe na yin nina ẹn nado wà ehe, bẹsọn ojlẹ he mẹ nudide wedegbẹ́ lọ tọn yin didọna ẹn. Eyin obiọ whẹ̀-vọ́-ylọ tọn de yin mimọyi, pipli mẹho lẹ tọn dona dọna nugopọntọ lẹdo tọn, bọ ewọ na de mẹho agun tọn he pegan lẹ he na nọ wedegbẹ́ whẹ̀-vọ́-ylọ tọn lọ mẹ nado vọ́ whẹho lọ gbeje pọ́n. Yé na dovivẹnu lẹpo nado basi aisinsin whẹ̀-vọ́-ylọ tọn lọ to osẹ dopo gblamẹ to wekanhlanmẹ lọ mimọyi godo. Eyin owhẹ̀ yin vivọ́ ylọ, nulila mẹdesẹ sọn agun mẹ tọn lọ na yin sisẹdo nukọn. To ojlẹ ehelẹ gblamẹ, mẹhe yin whẹsadokọna lọ na yin alọhẹndotena sọn gblọndonina po dẹ̀hiho to opli lẹ ji po mẹ kavi sọn lẹblanulọkẹyi sinsẹ̀nzọn tọn vonọtaun devo lẹ mẹ.

²⁷ Dotẹnmẹ whẹ̀-vọ́-ylọ tọn nọ yin nina mẹhe yin whẹsadokọna lọ taidi dohia homẹdagbe tọn, na whẹho etọn nido yin vivọ́ gbeje pọ́n. Enẹwutu, eyin e desọn ojlo mẹ bo ma wá aisinsin whẹ̀-vọ́-ylọ tọn lọ tẹnmẹ, nudide mẹdesẹ sọn agun mẹ tọn lọ na yin lilá to whenuena vivẹnu ko yin dido jẹ obá de mẹ nado mọ ẹn bọ e glo.

²⁸ Eyin ylanwatọ lọ ma jlo nado vọ́ owhẹ̀ ylọ, wedegbẹ́ whẹdida tọn lọ na basi zẹẹmẹ nuhe e sọgan wà nado lẹnvọjọ tọn na ẹn gọna afọdide he e sọgan ze nado yin gigọyí to nukọn mẹ lẹ. Ehe na yin alọgọnamẹ po homẹdagbe didohia ẹ po, bo dona yin bibasi po todido lọ po dọ e na lẹnvọjọ bosọ pegan to nukọn mẹ nado lẹkọwa titobasinanu Jehovah tọn mẹ.—2 Kọl. 2:6, 7.

NULILA MẸDESẸ SỌN AGUN MẸ TỌN

²⁹ To whenuena e lẹzun dandan nado de ylanwatọ he ma lẹnvọjọ de sẹ̀ sọn agun mẹ, nulila kleun de nọ yin bibasi dọmọ: “[Yinkọ mẹlọ tọn] masọ yin dopo to Kunnudetọ Jehovah tọn lẹ mẹ ba.” Ehe na yin avase de na nugbonọ he to agun lọ mẹ lẹ nado doalọtena gbẹdido hẹ omẹ enẹ.—1 Kọl. 5:11.

MẸDETITI DIDESẸ SỌN AGUN MẸ

³⁰ Hogbe lọ “mẹdetiti didesẹ sọn agun mẹ” nọ yin yiyizan nado dlẹnalọdo nuyiwa Kunnudetọ de tọn he desọn ojlo mẹ nado mọ́n teninọ etọn taidi Klistiani gbọn didọ dali dọ emi masọ jlo na yin pinpọnhlan kavi yin yinyọnẹn taidi dopo to Kunnudetọ Jehovah tọn lẹ mẹ ba. Kavi e sọgan mọ́n Klistiani-yinyin etọn gbọn nuyiwa etọn lẹ dali, taidi lilẹzun hagbẹ titobasinanu aihọn tọn de tọn, ehe yanwle etọn lẹ jẹagọdo nuplọnmẹ Biblu tọn lẹ bo gbọnmọ dali tin to hukan ji na whẹdida Jehovah Jiwheyẹwhe tọn.—Isa. 2:4; Osọ. 19:17-21.

³¹ Apọsteli Johanu wlan gando mẹhe mọ́n yise Klistiani tọn yetọn to azán etọn gbè lẹ go dọmọ: “Yé tọ́nyi sọn mí mẹ, ṣigba yé ma yin míwlẹ nkọ; na eyin yé ko yin míwlẹ nkọ wẹ, yé na ko gbọṣi mí dè.”—1 Joh. 2:19.

³² Eyin mẹde de ede sẹ̀ sọn agun mẹ, ninọmẹ etọn to Jehovah nukọn gbọnvo tlala na Klistiani he gbọjọ bo masọ nọ tindo mahẹ to lizọnyizọn kunnudegbe tọn mẹ ba de tọn. Mẹde sọgan gbọjọ, na e gboawupo nado nọ plọn Ohó Jiwheyẹwhe tọn to gbesisọ mẹ wutu. Kavi nuhahun po homẹkẹn he e to pipehẹ lẹ po wẹ na ko zọ́n bọ zohunhun etọn na Jehovah sinsẹ̀n sọgan ko miọn. Mẹho agun tọn lẹ po hagbẹ agun lọ tọn devo lẹ po na zindonukọn nado to alọgọ gbigbọmẹ tọn he jẹ lẹ na Klistiani de he gbọjọ.—Lom. 15:1; 1 Tẹs. 5:14; Heb. 12:12.

³³ To vogbingbọn mẹ, eyin mẹhe yin Klistiani de basi dide nado de ede sẹ̀ sọn agun mẹ, nulila kleun de na yin bibasi na agun, dọmọ: “[Yinkọ mẹlọ tọn] masọ yin dopo to Kunnudetọ Jehovah tọn lẹ mẹ ba.” Omẹ mọnkọtọn nọ yin nuyiwa hẹ to aliho dopolọ mẹ taidi mẹdesẹ sọn agun mẹ de.

MẸGIGỌYÍ

³⁴ Mẹhe yin didesẹ sọn agun mẹ kavi mẹhe de ede sẹ̀ sọn agun mẹ de sọgan yin gigọyí do agun mẹ to whenuena kunnudenu lẹ dohia hezeheze dọ e ko lẹnvọjọ, bo ko dohia to ojlẹ he sọgbe hẹ lẹnpọn dagbe de gblamẹ dọ e ko jo aliho ylando tọn etọn do. E dona dohia dọ emi jlo na tindo haṣinṣan dagbe hẹ Jehovah. Mẹho lẹ dona yí sọwhiwhe zan nado dike ojlẹ he pé ni juwayi whẹ́—vlavo osun susu, owhe dopo kavi humọ, sọgbe hẹ ninọmẹ lẹ—na mẹlọ nido dohia dọ lẹnvọjọ etọn yin nujọnu tọn. To whenue pipli mẹho lẹ tọn mọ wekanhlanmẹ obiọ mẹgigọyí tọn de yí, wedegbẹ́ mẹgigọyí tọn de na dọho hẹ mẹlọ. Wedegbẹ́ lọ na gbadopọnna kunnudenu “azọ́n he jẹna lẹnvọjọ lẹ” tọn gando mẹlọ go bosọ magbe vlavo eyin ylanwatọ lọ na yin gigọyí to ojlẹ ehe mẹ kavi lala.—Owalọ 26:20.

³⁵ Eyin agun devo mẹ wẹ mẹhe to obiọ mẹgigọyí tọn basi lọ ko yin didesẹ sọn agun mẹ te, wedegbẹ́ mẹgigọyí tọn de to agun he mẹlọ to awukọndopọ hẹ todin mẹ na sinai hẹ mẹlọ bo lẹnnupọndo obiọ etọn ji. Eyin mẹhe to wedegbẹ́ mẹgigọyí tọn agun ehe tọn mẹ lẹ mọdọ e dona yin gigọyí, yé na do tadona he kọ̀n yé wá hlan pipli mẹho lẹ tọn agun he penukundo whẹho lọ go to bẹjẹeji tọn. Wedegbẹ́ awe lọ lẹ na wazọ́n to kọndopọ mẹ nado hẹn ẹn diun dọ whẹho lọ lẹpo yin gbigbejepọn, na nudide he sọgbe de nido yin bibasi. Ṣigba, wedegbẹ́ mẹgigọyí tọn he to agun he penukundo whẹho lọ go to bẹjẹeji mẹ wẹ dona basi nudide bọ mẹlọ nado yin gigọyí.

NULILA MẸGIGỌYÍ TỌN

³⁶ To whenue wedegbẹ́ mẹgigọyí tọn lọ kudeji dọ mẹhe yin didesẹ sọn agun mẹ kavi de ede sẹ̀ sọn agun mẹ lọ ko lẹnvọjọ sọn ahun mẹ bo dona yin gigọyí, nulila mẹgigọyí tọn lọ na yin bibasi to agun he penukundo whẹho lọ go to bẹjẹeji mẹ. Eyin agun devo wẹ mẹlọ to awukọndopọ hẹ todin, nulila lọ na yin bibasi to finẹ ga. E dona yin lilá poun dọmọ: “[Yinkọ mẹlọ tọn] ko yin gigọyí taidi dopo to Kunnudetọ Jehovah tọn lẹ mẹ.”

WHẸHO HE GANDO YỌPỌVU HE KO YÍ BAPTẸM LẸ GO

³⁷ Eyin yọpọvu he ko yí baptẹm lẹ waylando sinsinyẹn de, e dona yin didọna mẹho agun tọn lẹ. Eyin mẹho lẹ to nukunpedo whẹho ylanwiwa sinsinyẹn yọpọvu lẹ tọn go, e na yọ́n hugan dọ mẹjitọ ovi lọ tọn he ko yí baptẹm lẹ ni tin to finẹ. Yé na jlo nado kọngbedopọ hẹ wedegbẹ́ whẹdida tọn lọ, e ma yin nado tẹnpọn bo ṣinyọ́nalọ ovi he waylando lọ ji ma nado mọ mẹplọnlọ he jẹ yí wẹ gba. Kẹdẹdile e nọ yin bibasi hẹ ylanwatọ he ko whẹ́n mẹho lẹ do, wedegbẹ́ whẹdida tọn lọ na dovivẹnu nado wọhẹ ylanwatọ lọ bo gọ̀ ẹ do otẹn etọn mẹ. Ṣigba, eyin ovi jọja lọ ma lẹnvọjọ, e na yin didesẹ sọn agun mẹ.

EYIN WẸNLATỌ HE MA KO YÍ BAPTẸM LẸ WAYLANDO

³⁸ Eyin wẹnlatọ he ma ko yí baptẹm lẹ wá jẹ ylanwiwa sinsinyẹn de mẹ lo? Na yé ma yin Kunnudetọ he ko yí baptẹm wutu, yé ma sọgan yin didesẹ sọn agun mẹ. Ṣigba, e sọgan yindọ yé ma mọnukunnujẹ nujinọtedo Biblu tọn lẹ mẹ wẹ, enẹwutu ayinamẹ he yin nina po homẹdagbe po lẹ sọgan gọalọna yé nado de “ali jijlọ lẹ” na afọ yetọn.—Heb. 12:13.

³⁹ Eyin wẹnlatọ he ma ko yí baptẹm de ma lẹnvọjọ to whenue mẹho agun tọn awe ko sinai hẹ ẹ bo tẹnpọn nado gọalọna ẹn godo, to whenẹnu e na lẹzun dandannu nado dọna agun. Nulila kleun de na yin bibasi, dọmọ: “[Yinkọ mẹlọ tọn] masọ yin pinpọnhlan taidi wẹnlatọ he ma ko yí baptẹm ba.” Enẹgodo, agun lọ na nọ pọ́n ylanwatọ lọ hlan taidi aihọnmẹnu de. Dile etlẹ yindọ ylanwatọ lọ ma yin didesẹ sọn agun mẹ, Klistiani lẹ na họ́ yedelẹ gando gbẹdido depope hẹ ẹ go. (1 Kọl. 15:33) Linlin sinsẹ̀nzọn kunnudegbe tọn depope ma na yin alọkẹyi sọn e dè.

⁴⁰ To nukọn mẹ, mẹhe ma ko yí baptẹm bo yin didesẹ sọn hukan wẹnlatọ tọn ji de sọgan jlo nado lẹzun wẹnlatọ whladopo dogọ. To ninọmẹ enẹ mẹ, mẹho agun tọn awe na sinai hẹ ẹ bo dindona nukọnyiyi gbigbọmẹ tọn etọn. Eyin e pegan, nulila kleun de na yin bibasi, dọmọ: “[Yinkọ mẹlọ tọn] ko yin alọkẹyi whladopo dogọ taidi wẹnlatọ he ma ko yí baptẹm.”

JEHOVAH NỌ DONA SINSẸ̀N-BIBASI WIWE, JIJỌHO MẸ TỌN

⁴¹ Mẹhe to gbẹdo hẹ agun Jiwheyẹwhe tọn to egbehe lẹpo sọgan jaya, na ninọmẹ hihọ́ gbigbọmẹ tọn he Jehovah ko na omẹ etọn lẹ wutu. Núdùdù gbigbọmẹ tọn mítọn ko yin hinhẹn jideji taun, podọ osin kọfanamẹ nugbo lọ tọn susugege ko yin nina mí. Mí ko sọ mọ hihọ́ nukunpedomẹgo Jehovah tọn gbọn tito yẹwhehọluduta tọn etọn gblamẹ to anademẹ Klisti tọn glọ. (Salm. 23; Isa. 32:1, 2) Paladisi gbigbọmẹ tọn he mẹ mí te to azán godo tọn he gọ́ na tukla ehelẹ mẹ ko hẹn mí tindo numọtolanmẹ hihọ́ tọn.

⁴² Eyin mí hẹn jijọho po wiwejininọ po go to agun mẹ, mí na zindonukọn nado dike hinhọ́n nugbo Ahọluduta lọ tọn ni to wunhọ́n zọnmii. (Mat. 5:16; Jak. 3:18) Po dona Jehovah tọn po, mí na tindo ayajẹ lọ nado mọ mẹsusu dogọ nado wá yọ́n Jehovah bo kọnawudopọ hẹ mí to ojlo Jiwheyẹwhe tọn wiwà mẹ.