HOSỌ OPLỌN TỌN 34
OHÀN 107 Apajlẹ Owanyi Jiwheyẹwhe Tọn
Owanyi po Lẹblanu po Didohia Mẹhe Waylando Lẹ
“Jiwheyẹwhe to tintẹnpọn nado hẹn we jẹ lẹnvọjọ kọ̀n to homẹdagbe etọn mẹ.”—LOM. 2:4.
NUHE E BẸHẸN
Lehe mẹho agun tọn lẹ nọ tẹnpọn nado gọalọna mẹhe jai jẹ ylando sinsinyẹn mẹ to agun mẹ lẹ do.
1. Etẹwẹ gán yin wiwà na mẹhe jai jẹ ylando sinsinyẹn mẹ delẹ?
TO HOSỌ he wayi mẹ, mí mọ lehe apọsteli Paulu didẹ whẹho ylanwiwa sinsinyẹn tọn de do to Kọlinti. Ylanwatọ lọ ma lẹnvọjọ bo dona yin didesẹ sọn agun mẹ. Amọ́, dile wefọ he ji hosọ mítọn sinai do dohia do, mẹhe jai jẹ ylando sinsinyẹn mẹ delẹ gán mọ alọgọ yí bo yin hinhẹn jẹ lẹnvọjọ kọ̀n. (Lom. 2:4) Nawẹ mẹho lẹ gán gọalọna yé nado lẹnvọjọ gbọn?
2, 3. Etẹwẹ mí dona wà eyin mí doayi e go dọ yisenọ hatọ de jai jẹ ylando sinsinyẹn mẹ, podọ etẹwutu?
2 Whẹpo mẹho lẹ nido gọalọ, yé dona yọ́n whẹho lọ whẹ́. Enẹwutu, etẹwẹ mí dona wà eyin mí doayi e go dọ yisenọ hatọ de jai jẹ ylando sinsinyẹn mẹ, ehe gán zọ́n bọ e na yin didesẹ sọn agun mẹ? Mí dona na tuli ylanwatọ lọ nado yì biọ alọgọ mẹho lẹ tọn.—Isa. 1:18; Owalọ 20:28; 1 Pita 5:2.
3 Amọ́ etẹwẹ lo eyin ylanwatọ lọ gbẹ́ nado yì dọ whẹho lọ na mẹho lẹ? To whenẹnu, mílọsu na yì mọ mẹho lẹ bo hẹn ẹn diun dọ mẹlọ na mọ alọgọ he jẹ yí. Dohia owanyi tọn wẹ, na mí ma jlo na hẹn mẹmẹsunnu kavi mẹmẹyọnnu mítọn bu. Eyin ylanwatọ lọ ma diọ, e na hẹn haṣinṣan etọn hẹ Jehovah gble dogọ. E gán sọ bẹpla yinkọ dagbe agun lọ tọn. Enẹwutu, owanyi he mí do na Jehovah podọ na ylanwatọ lọ wẹ nọ whàn mí nado yí adọgbigbo do yinuwa.—Salm. 27:14.
LEHE MẸHO LẸ NỌ GỌALỌNA MẸHE WAYLANDO SINSINYẸN LẸ DO
4. Etẹwẹ yin yanwle mẹho lẹ tọn whenue yé sinai hẹ mẹhe waylando sinsinyẹn de?
4 Whenue mẹde waylando sinsinyẹn to agun mẹ, pipli mẹho lẹ tọn nọ de mẹmẹsunnu he pegan atọ̀n to ṣẹnṣẹn yetọn nado wleawuna wedegbẹ́ de.a Sunnu ehelẹ dona nọ nọ̀ jlẹkaji bosọ yin whiwhẹnọ. Dile yé to tintẹnpọn nado gọalọna mẹhe danbú lọ nado lẹnvọjọ, yé nọ yọnẹn dọ yé ma gán hẹn mẹde po huhlọn po nado diọ. (Deut. 30:19) Mẹho lẹ nọ yọnẹn dọ e ma yin ylanwatọ lẹpo wẹ na yinuwa to aliho dagbe mẹ dile Ahọlu Davidi wà do. (2 Sam. 12:13) Ylanwatọ delẹ gán de nado dovọ́na ayinamẹ Jehovah tọn. (Jen. 4:6-8) Etomọṣo, yanwle mẹho lẹ tọn wẹ nado wà nuhe go yé pé lẹpo nado plan ylanwatọ lọ jẹ lẹnvọjọ kọ̀n. Nunọwhinnusẹ́n tẹlẹ wẹ nọ deanana yé whenue yé sinai hẹ ylanwatọ lọ?
5. Ayinamẹ tẹwẹ mẹho lẹ na hẹn do ayiha mẹ whenue yé sinai hẹ ylanwatọ de? (2 Timoti 2:24-26) (Sọ pọ́n yẹdide lọ.)
5 Mẹho lẹ nọ pọ́n ylanwatọ lọ hlan taidi lẹngbọ họakuẹ he bu de. (Luku 15:4, 6) Enẹwutu, whenue yé sinai hẹ mẹlọ, yé ma nọ ylangbè na ẹn kavi duadi; mọ yé ma nọ pọ́n aisinsin lọ hlan taidi nuwiwa mọmọ tọn de, ehe whenu yé nọ hodo afọdide he yin zizedai de te poun. Kakatimọ, yé nọ do jẹhẹnu he to 2 Timoti 2:24-26 mẹ lẹ hia. (Hia.) Mẹho lẹ nọ do walọmimiọn hia bosọ nọ jọmẹ dile yé to tintẹnpọn nado jẹ ahun ylanwatọ lọ tọn mẹ.
Kẹdẹdi lẹngbọhọtọ hohowhenu tọn lẹ, mẹho lẹ nọ dovivẹnu nado gọalọna lẹngbọ he bu de (Pọ́n hukan 5tọ)
6. Nawẹ mẹho lẹ nọ wleawuna ahun yetọn titi whẹpo do sinai hẹ ylanwatọ de gbọn? (Lomunu lẹ 2:4)
6 Mẹho lẹ nọ wleawuna ahun yetọn titi. Yé nọ tẹnpọn nado hodo apajlẹ Jehovah tọn whenue yé to nuyiwa hẹ ylanwatọ de, bo nọ flin hogbe Paulu tọn lẹ he dọmọ: “Jiwheyẹwhe to tintẹnpọn nado hẹn we jẹ lẹnvọjọ kọ̀n to homẹdagbe etọn mẹ.” (Hia Lomunu lẹ 2:4.) Hú popolẹpo, mẹho lẹ dona nọ flindọ lẹngbọhọtọ lẹ wẹ yé yin to anademẹ Klisti tọn glọ. (Isa. 11:3, 4; Mat. 18:18-20) Whẹpo wedegbẹ́ lọ nido sinai hẹ ylanwatọ lọ, yé dona hodẹ̀ bo lẹnnupọndo yanwle yetọn ji, enẹ wẹ nado plan ylanwatọ lọ jẹ lẹnvọjọ kọ̀n. Yé na basi dodinnanu to Owe-wiwe lẹ po owe mítọn lẹ po mẹ bo na hodẹ̀ nado biọ wuntuntun. Yé na lẹnnupọndo ninọmẹ he mẹ mẹlọ whẹ́n te ji, yèdọ nuhe na ko yinuwado nulẹnpọn po walọyizan etọn po ji lẹ.—Howh. 20:5.
7, 8. Nawẹ mẹho lẹ gán hodo apajlẹ homẹfa Jehovah tọn whenue yé sinai hẹ ylanwatọ de gbọn?
7 Mẹho lẹ nọ hodo apajlẹ homẹfa Jehovah tọn. Yé nọ flin lehe Jehovah yinuwa hẹ ylanwatọ lẹ do to hohowhenu. Di apajlẹ, Jehovah gbọn homẹfa dali yihojlẹdohogo hẹ Kaini bo na ẹn avase gando kọdetọn ylando tọn lẹ go bosọ dọ emi na dona ẹn eyin e setonu. (Jen. 4:6, 7) Jehovah yí yẹwhegán Natani zan nado gbẹnuna Davidi, yèdọ mẹhe yí apajlẹ de do jẹ ahun ahọlu lọ tọn mẹ. (2 Sam. 12:1-7) Jehovah sọ to yẹwhegán etọn lẹ “dohlan” akọta Islaeli tọn tasinyẹntọ lọ ‘mapote, yèdọ whlasusu.’ (Jel. 7:24, 25) E ma nọte dọ omẹ etọn lẹ ni lẹnvọjọ whẹpo do gọalọna yé. Kakatimọ, e ze afọdide tintan lọ bo dotuhomẹna yé nado lẹnvọjọ.
8 Mẹho lẹ nọ hodo apajlẹ Jehovah tọn whenue yé to tintẹnpọn nado gọalọna mẹhe waylando sinsinyẹn lẹ. Dile 2 Timoti 4:2 dọ do, yé “nọ yí homẹfa . . . lẹpo” do yihojlẹdohogo whenue yé to nuyiwa hẹ yisenọ hatọ he jẹflumẹ de. Enẹwutu, mẹho de dona nọ wà dẹẹdẹ bo nọ fahomẹ whepoponu nado penugo bo gọalọna ylanwatọ de, na e nido tindo ojlo nado wà nuhe sọgbe. Eyin mẹho lọ gblehomẹ kavi jẹ adidu ji, mẹlọ gán nọma dotoaina ayinamẹ lọ kavi gbẹ́ nado lẹnvọjọ.
9, 10. Nawẹ mẹho lẹ gán gọalọna ylanwatọ de nado lẹnnupọndo walọyizan etọn ji gbọn?
9 Mẹho lẹ nọ tẹnpọn nado yọ́n ninọmẹ he plan mẹlọ jẹ ylando kọ̀n lẹ. Di apajlẹ, be Klistiani lọ vọgán to gbigbọ-liho vudevude na e dovọ́na oplọn mẹdetiti tọn kavi lizọnyizọn lọ wutu wẹ ya? Be na e ma nọ hodẹ̀ hlan Jehovah whẹwhẹ kavi nọ wàmọ to aliho mọmọ tọn mẹ wutu wẹ ya? Be e ko na dotẹnmẹ ojlo he ma sọgbe lẹ nado deanana ẹn wẹ ya? Be e basi nudide nulú tọn lẹ na nuhe dù gbẹdido kavi ayidedai etọn lẹ wẹ ya? Nawẹ nudide mọnkọ lẹ gán ko bẹpla ahun etọn gbọn? Be e mọ lehe nudide he e basi to agọe lẹ gọna lehe nuyiwa etọn lẹ yinuwado Otọ́ etọn Jehovah ji do ya?
10 Eyin mẹho lẹ yí kanbiọ mẹhẹnlẹnnupọn tọn lẹ zan ṣogan bo ma dín tlintlindo do whẹho mẹdetiti tọn lẹ ji, yé na yí homẹdagbe do dọ̀n nuhe to ahun ylanwatọ lọ tọn mẹ tọ́n bosọ gọalọna ẹn nado lẹnnupọndo walọyizan etọn ji. (Howh. 20:5) Humọ, yé gán yí apajlẹ lẹ do hẹn mẹlọ lẹnnupọn na e nido mọ obá he mẹ nuyiwa etọn lẹ ylan jẹ, dile Natani wà do na Davidi. Vlavo to aisinsin tintan lọ whenu, nuhe mẹlọ wà lọ gán jẹ vivẹna ẹn ji taun. E tlẹ gán lẹnvọjọ.
11. Nawẹ Jesu yinuwa hẹ ylanwatọ lẹ gbọn?
11 Mẹho lẹ nọ dovivẹnu nado hodo apajlẹ Jesu tọn. Whenue Jesu he yin finfọnsọnku lọ to nuyiwa hẹ Saulu Talsu tọn, e kàn kanbiọ mẹhẹnlẹnnupọn tọn de sè e dọmọ: “Saulu, Saulu, naegbọn hiẹ do to homẹkẹndo mi?” Gbọnmọ dali, Jesu gọalọna ẹn nado lẹnnupọndo walọyizan ylankan etọn ji. (Owalọ 9:3-6) Podọ to whẹho “yọnnu enẹ, yèdọ Jezebẹli” tọn mẹ, Jesu dọmọ: “Yẹn sọ na ẹn dotẹnmẹ nado lẹnvọjọ.”—Osọ. 2:20, 21.
12, 13. Nawẹ mẹho lẹ gán na whenu ylanwatọ de nado lẹnvọjọ gbọn? (Sọ pọ́n yẹdide lọ.)
12 Mẹho lẹ nọ hodo apajlẹ Jesu tọn bo ma nọ yawu wá tadona kọ̀n dọ ylanwatọ de ma na lẹnvọjọ. Dile etlẹ yindọ mẹdelẹ gán lẹnvọjọ whenue wedegbẹ́ lọ sinai hẹ yé whla tintan, mẹdevo lẹ gán do hudo whenu tọn dogọ. Enẹwutu, mẹho lẹ gán basi tito nado sinai hẹ ylanwatọ lọ hugan whladopo. Vlavo to aisinsin tintan lọ godo, Klistiani he to dindanbu lọ na jẹ nulẹnpọn ji sisosiso do nuhe ko yin didọna ẹn ji. E gán gbọn whiwhẹ dali dọnsẹpọ Jehovah to odẹ̀ mẹ. (Salm. 32:5; 38:18) Gbọnmọ dali, to aisinsin he bọdego de whenu, ylanwatọ lọ gán do gbigbọ devo hia he gbọnvona dehe e dohia to tintan whenu.
13 Mẹho lẹ nọ yí awuvẹmẹ po homẹdagbe po do gọalọna ylanwatọ lọ jẹ lẹnvọjọ kọ̀n. Yé nọ hodẹ̀ bosọ nọ do todido dọ Jehovah na dona vivẹnudido yetọn lẹ, podọ dọ Klistiani he to dindanbu lọ gán gọ̀ biọ ede mẹ bo lẹnvọjọ.—2 Tim. 2:25, 26.
Mẹho lẹ gán sinai hẹ ylanwatọ de hugan whladopo nado na ẹn whenu nado lẹnvọjọ (Pọ́n hukan 12tọ)
14. Mẹnu wẹ pipà lọ jẹna eyin ylanwatọ de lẹnvọjọ, podọ etẹwutu?
14 Eyin ylanwatọ lọ lẹnvọjọ, ehe nọ hẹn ayajẹ daho wá! (Luku 15:7, 10) Mẹnu wẹ pipà lọ jẹna? Mẹho lẹ wẹ ya? Flin nuhe apọsteli Paulu kàn gando ylanwatọ lẹ go dọmọ: “Vlavo Jiwheyẹwhe sọgan na yé lẹnvọjọ.” (2 Tim. 2:25) Enẹwutu, Jehovah wẹ gọalọna Klistiani lọ nado diọ nulẹnpọn po nuyiwa etọn lẹ po, e ma yin gbẹtọvi depope. Paulu basi zẹẹmẹ nudagbe he nọ jọ whenue ylanwatọ de ko lẹnvọjọ lẹ tọn. Omẹ enẹ gán tindo oyọnẹn he pegan nugbo lọ tọn dogọ, gọ̀ biọ ede mẹ bo gán dapana omọ̀ Satani tọn lẹ.—2 Tim. 2:26.
15. Nawẹ mẹho lẹ gán zindonukọn nado to alọgọna ylanwatọ he lẹnvọjọ de gbọn?
15 Whenue ylanwatọ de lẹnvọjọ, wedegbẹ́ lọ na basi tito dlapọn lẹngbọhọtọ tọn delẹ tọn, na mẹlọ nido sọgan to alọgọ he e do hudo etọn mọyi zọnmii bo nọavùnte sọta omọ̀ Satani tọn lẹ bosọ deali jijlọ lẹ na afọ etọn lẹ. (Heb. 12:12, 13) E họnwun dọ mẹho lẹ ma nọ má nudọnamẹ he gando ylanwatọ lọ go lẹ hẹ mẹdepope. Amọ́, etẹwẹ agun lọ dona yọnẹn?
‘NỌ WỌHẸMẸ TO GBẸTỌ LẸPO NUKỌN’
16. Sọgbe hẹ 1 Timoti 5:20, mẹnu lẹ wẹ Paulu ylọdọ “gbẹtọ lẹpo”?
16 Hia 1 Timoti 5:20. Paulu wẹ kàn hogbe ehelẹ hlan mẹho hatọ etọn Timoti gando lehe whẹho “mẹhe hẹn ylando zun aṣa lẹ” tọn na nọ yin dididẹ do go. Etẹ na dọ wẹ e te? E ma to alọdlẹndo agun lọ blebu taidi “gbẹtọ lẹpo” dandan. Kakatimọ, omẹ kleun he gán ko sèhó gando ylando lọ go lẹ wẹ e to alọdlẹndo. Yé gán ko yin kunnudetọ jọnun kavi mẹhe ylanwatọ lọ dọhona gando ylando lọ go lẹ. Mẹho lẹ na yí zinzin do hẹn zun yinyọnẹn na yé dọ whẹho lọ ko yin nukunpedego, bọ yè ko domẹplọnlọ ylanwatọ lọ go.
17. Eyin ylando sinsinyẹn de yin yinyọnẹn gbayipe to agun mẹ kavi gán wá yin yinyọnẹn, nulila tẹwẹ na yin bibasi, podọ etẹwutu?
17 To ninọmẹ delẹ mẹ, mẹsusu gán ko sèhó gando ylanwiwa lọ go to agun mẹ kavi e yọnbasi dọ ni wá yin yinyọnẹn. To ninọmẹ mọnkọ mẹ, “gbẹtọ lẹpo” na bẹ agun lọ blebu hẹn. Enẹwutu, mẹho de na lá na agun lọ dọ mẹmẹsunnu kavi mẹmẹyọnnu lọ ko yin wiwọhẹ. Etẹwutu? Paulu dọmọ: “Taidi avase de na mẹhe pò lẹ” ma nado jai jẹ ylando mẹ.
18. Nawẹ mẹho lẹ na didẹ whẹho ovi pẹvi he ko yí baptẹm lẹ tọn gbọn? (Sọ pọ́n yẹdide lọ.)
18 Etẹwẹ lo na nuhe dù ovi he ko yí baptẹm lẹ—he ma ko do owhe 18—bo waylando sinsinyẹn? Pipli mẹho lẹ tọn na basi tito na mẹho awe nido mọ ovi pẹvi lọ po mẹjitọ etọn Klistiani lẹ po.b Mẹho lẹ na gbadopọnna afọdide voovo he mẹjitọ lẹ ko ze nado gọalọna ovi yetọn nado lẹnvọjọ. Eyin ovi lọ yinuwa to aliho dagbe mẹ bọ mẹjitọ lẹ ko gọalọna ẹn, mẹho awe lọ lẹ gán basi dide dọ e ma yin dandan nado dlẹnkanna whẹho lọ. To popolẹpo mẹ, mẹjitọ lẹ wẹ Jiwheyẹwhe deazọ́nna nado yí owanyi do domẹplọnlọ ovi yetọn lẹ go. (Deut. 6:6, 7; Howh. 6:20; 22:6; Efe. 6:2-4) Mẹho lẹ na nọ dọho hẹ mẹjitọ lọ lẹ sọn ojlẹ de mẹ jẹ devo mẹ nado hẹn ẹn diun dọ ovi lọ to alọgọ he e do hudo etọn mọyi. Bọ eyin ovi pẹvi he yí baptẹm de ma lẹnvọjọ bo zindonukọn to walọ gblezọn mẹ lo? To ninọmẹ mọnkọ mẹ, wedegbẹ́ mẹho lẹ tọn de na mọ ewọ po mẹjitọ etọn Klistiani lẹ po.
Whenue ovi de waylando sinsinyẹn, mẹho awe na mọ ewọ po mẹjitọ etọn lẹ po (Pọ́n hukan 18tọ)
“JEHOVAH TINDO OWANYI SISOSISO BOSỌ YIN LẸBLANUNỌ”
19. Nawẹ mẹho lẹ nọ dovivẹnu nado hodo apajlẹ Jehovah tọn whenue yé to nuyiwa hẹ ylanwatọ lẹ gbọn?
19 Mẹho he to wedegbẹ́ de mẹ lẹ tindo azọngban lọ to Jehovah nukọn nado hẹn agun lọ do wiweji. (1 Kọl. 5:7) Yé sọ nọ jlo dọ ylanwatọ lọ ni yin whinwhàn nado lẹnvọjọ eyin e yọnbasi. Enẹwutu, mẹho lẹ nọ hẹn pọndohlan dagbe go, bo ma nọ hẹn todido bu. Etẹwutu? Na yé nọ jlo na hodo apajlẹ Jehovah tọn, mẹhe “tindo owanyi sisosiso bosọ yin lẹblanunọ.” (Jak. 5:11) Doayi lehe apọsteli mẹhomẹ lọ Johanu do gbigbọ mọnkọ hia do go. E wlan dọmọ: “Yọpọ ṣie lẹ emi, yẹn to onú ehelẹ kàn hlan mì, na mìwlẹ ma nado waylando. Ṣogan, eyin mẹdepope waylando, mí tindo alọgọtọ de to Otọ́ dè, yèdọ Jesu Klisti, dodonọ de.”—1 Joh. 2:1.
20. Etẹ ji wẹ mí na dọhodo to hosọ he gbọngodo lọ mẹ?
20 E blawu dọ to whedelẹnu, Klistiani de gán gbẹ́ nado lẹnvọjọ. Eyin enẹ jọ, e dona yin didesẹ sọn agun mẹ. Nawẹ mẹho lẹ nọ penukundo whẹho sinsinyẹn mọnkọ lẹ go gbọn? Mí na dọhodo kanbiọ enẹ ji to hosọ he gbọngodo to hosọ debọdo-dego ehe mẹ.
OHÀN 103 Lẹngbọhọtọ lẹ—Sunnu lẹ Di Nunina
a To dai, pipli ehelẹ nọ yin yiylọdọ wedegbẹ́ whẹdida tọn. Amọ́, na adà azọ́n yetọn tọn dopo poun wẹ whẹdida yin wutu, mí ma nasọ nọ yí hogbe enẹlẹ zan ba. Kakatimọ, mí na nọ dlẹnalọdo pipli ehe taidi wedegbẹ́ mẹho lẹ tọn de poun.
b Nuhe yin didọ gando mẹjitọ lẹ go sọ gando mẹgopọntọ he osẹ́n kẹalọyi kavi mẹdevo he tindo azọngban mẹjitọ tọn do ovi de ji lẹ go.