Nudọnamẹ Dogọ Lẹ

Nudọnamẹ de Na Mẹjitọ Klistiani Lẹ:

Taidi mẹjitọ lẹ, ojlo mìtọn wẹ nado gọalọna ovi vivẹ́ mìtọn lẹ nado yiwanna Jehovah bosọ klan yede do wiwe na ẹn. Etẹwẹ mì sọgan wà nado gọalọna yé nado pegan na baptẹm? Whetẹnu wẹ yé na wleawufo nado ze afọdide titengbe ehe?

Jesu dọna hodotọ etọn lẹ dọmọ: “Mì . . . hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé.” (Mat. 28:19) Sọgbe hẹ anademẹ ehe, nubiọtomẹsi tintan nado yí baptẹm wẹ nado lẹzun devi de—yèdọ mẹde he mọnukunnujẹ nuplọnmẹ Klisti tọn lẹ mẹ bo yí yé sè bosọ nọ hodo yé pẹkipẹki. Nubiọtomẹsi he kọ̀n yọpọvu lẹ lọsu tlẹ sọgan jẹ wẹ.

Ze apajlẹ dagbe dai na ovi towe lẹ, bo yí sọwhiwhe do dó nuplọnmẹ Jehovah tọn lẹ do ahun mẹ na yé. (Deut. 6:6-9) Ehe sọ biọ dọ hiẹ ni yí nudọnamẹ he tin to owe lọ Duvivi Ogbẹ̀ Tọn Kakadoi! mẹ lẹ do plọn yé nugbo dodonu Biblu tọn lẹ, podọ nado gọalọna yé nado nọ lẹnayihamẹpọn do nunọwhinnusẹ́n Biblu tọn lẹ ji bosọ nọ nọgbẹ̀ sọgbe hẹ yé. Gọalọna ovi towe lẹ, na yé nido penugo nado nọ basi zẹẹmẹ nuyise yetọn lẹ tọn to hogbe yetọn titi lẹ mẹ. (1 Pita 3:15) Oyọnẹn po tulinamẹ po he yé mọyi sọn dè we, podọ sọn oplọn mẹdetiti tọn, sinsẹ̀n-bibasi whẹndo tọn, opli agun tọn lẹ po gbẹdido dagbe lẹ po mẹ na gọalọna yé nado yinukọn jẹ baptẹm kọ̀n podọ to baptẹm godo. Nọ ze yanwle gbigbọmẹ tọn lẹ donukọnna yé.

Howhinwhẹn lẹ 20:11 dọmọ: “Etlẹ yin yọpọvu de wẹ, gbọn nuyiwa etọn lẹ dali wẹ e nọ yin yinyọnẹn, eyin walọ etọn lẹ wé-ṣeke bo sọgbe.” Nuyiwa tẹlẹ wẹ na dohia dọ ovi de, yèdọ sunnu kavi yọnnu, ko lẹzun devi Jesu Klisti tọn bo ko wleawufo nado yí baptẹm?

Ovi he to nukọnyiyi basi nado yí baptẹm de dona nọ setonuna mẹjitọ etọn lẹ. (Owalọ 5:29; Kol. 3:20) Biblu dọ gando Jesu go to whenue e tindo owhe 12 dọ, ewọ “to mẹmẹglọ yin hlan [mẹjitọ etọn lẹ] zọnmii.” (Luku 2:51) Nugbo wẹ dọ mì ma sọgan donukun dọ ovi mìtọn ni yin mẹpipe gba. Etomọṣo, ovi he jlo na yí baptẹm dona dovivẹnu nado hodo apajlẹ Jesu tọn bosọ dona yin yinyọnẹn taidi mẹde he nọ yin mẹmẹglọ na mẹjitọ etọn lẹ.

Humọ, e dona tindo ojlo nado nọ plọn nugbo Biblu tọn lẹ. (Luku 2:46) Be ovi towe nọ jlo nado yì opli lẹ bo tindo mahẹ to yé mẹ ya? (Salm. 122:1) Be e nọ tindo ojlo nado plọn Biblu bosọ basi oplọn mẹdetiti tọn to gbesisọ mẹ ya?—Mat. 4:4.

Ovi he to nukọnyiyi basi nado yí baptẹm de dona dovivẹnu nado ze azọ́n Ahọluduta lọ tọn do otẹn tintan mẹ. (Mat. 6:33) E nọ yọnẹn dọ azọngban emitọn wẹ nado má nuyise emitọn hẹ mẹdevo lẹ. E nọ tindo mahẹ to adà voovo lizọnyizọn lọ tọn lẹ mẹ podọ obu ma nọ di i nado dohia mẹplọntọ etọn lẹ po wehọmẹvigbẹ́ etọn lẹ po dọ Kunnudetọ Jehovah tọn de wẹ emi yin. E nọ ylọ azọ́ndenamẹ he e mọyi to Opli Gbẹzan po Lizọnyizọn Mítọn po tọn ji lẹ dọ nujọnu.

E sọ dona dovivẹnu nado gbọṣi wiweji to walọyizan-liho gbọn didapana gbẹdido ylankan lẹ dali. (Howh. 13:20; 1 Kọl. 15:33) Ehe na nọ sọawuhia to nudide he e nọ basi gando nuhiho, sinima, tito-to-whinnu televiziọn tọn, aihundida video ji tọn lẹ po Intẹnẹt yiyizan po go mẹ.

Ovi susu wẹ ko kẹalọyi vivẹnudido vẹkuvẹku mẹjitọ yetọn lẹ tọn, bo ko hẹn nugbo lọ zun yedetiti tọn, bosọ pegan na baptẹm to ovu whenu. Na Jehovah ni dona mì dile mì to ovi mìtọn lẹ plọn nado jẹ yanwle titengbe hugan ehe kọ̀n to haṣinṣan yetọn hẹ Jehovah mẹ.

Nudọnamẹ de Na Wẹnlatọ He Ma Ko Yí Baptẹm:

Lẹblanulọkẹyi de wẹ e yin nado wadevizọn hẹ agun taidi wẹnlatọ he ma ko yí baptẹm de. Hiẹ jẹna pipà, na nukọnyiyi gbigbọmẹ tọn towe. Hiẹ ko wá yọ́n Jiwheyẹwhe gbọn ohó etọn pinplọn dali podọ a ko do yise hia to opagbe etọn lẹ mẹ.—Joh. 17:3; Heb. 11:6.

Whẹpo hiẹ do jẹ nuplọn hẹ Kunnudetọ Jehovah tọn lẹ ji, a sọgan ko nọ kọnawudopọ hẹ titobasinanu sinsẹ̀n tọn de dai kavi a sọgan nọma tindo mahẹ to nuwiwa sinsẹ̀n tọn de mẹ pọ́n. Vlavo a sọgan ko doalọ to nuwiwa de mẹ he jẹagọdo nunọwhinnusẹ́n Biblu tọn lẹ. Ṣigba, hiẹ ko do yise towe hia todin gbọn linlẹnvọjọ dali, ehe zẹẹmẹdo dọ ylanwiwa towe dai tọn lẹ vẹ́ na we taun, podọ a ko sọ diọ mlẹnmlẹn, ehe zẹẹmẹdo gbigbẹ́ aliho gbẹzan towe dai tọn he ma sọgbe lọ dai bo magbe nado wà nuhe jlọ to nukun Jiwheyẹwhe tọn mẹ.—Owalọ 3:19.

To alọ devo mẹ, vlavo a ko yọ́n kandai wiwe lẹ “sọn ovu whenu gbọ́n.” Podọ ehe ko basi hihọ́na we ma nado tindo mahẹ to walọ he ma jẹna Klistiani lẹ po ylanwiwa sinsinyẹn lẹ po mẹ. (2 Tim. 3:15) Hiẹ ko plọn nado duto kọgbidinamẹ hagbẹ tọn po oklọ devo lẹ nado wà nuhe ylan to nukun Jehovah tọn mẹ lẹ po ji. Hiẹ ko do yise towe hia gbọn tenọgligo-hinhẹn na sinsẹ̀n-bibasi nugbo lọ dali podọ gbọn nuyise Klistiani tọn lẹ lilá na mẹdevo lẹ dali. Hiẹ ko yin azọ́nplọn to lizọnyizọn Klistiani tọn mẹ. Todin, a ko basi nudide mẹdetiti tọn nado sẹ̀n Jehovah taidi wẹnlatọ he ma ko yí baptẹm de.

Depope he whẹho lọ yin, vlavo a wá yọ́n Jehovah to godo mẹ kavi aliho Jehovah tọn lẹ ko yin pinplọn we sọn ovu whenu gbọ́n wẹo, a sọgan ko to nulẹnpọn todin do afọdide awe devo lẹ ji he na yidogọna nukọnyiyi gbigbọmẹ tọn towe—yèdọ klandowiwe po baptẹm po. Klandowiwe nọ yin bibasi hlan Jehovah gbọn nudide towe nado ze dewe jo na ẹn mlẹnmlẹn kakadoi didọna ẹn to odẹ̀ mẹ dali. (Mat. 16:24) Nado do klandowiwe enẹ hia, hiẹ na yí baptẹm gbọn yinyin yinylọ́n do sinmẹ dali. (Mat. 28:19, 20) Gbọn klandowiwe po baptẹm po gblamẹ, hiẹ na lẹzun lizọnyizọnwatọ dide Jehovah Jiwheyẹwhe tọn de. Lẹblanulọkẹyi jiawu nankọ die!

Ṣigba, dile Biblu pinplọn towe ko dohia do, hiẹ na pehẹ avùnnukundiọsọmẹnu voovo lẹ. Flindọ, ojlẹ vude to baptẹm Jesu tọn godo, “gbigbọ plan Jesu yì danfafa ji na e nido yin whiwhlepọn gbọn Lẹgba dali.” (Mat. 4:1) To baptẹm towe godo taidi devi Klisti tọn de, hiẹ sọgan donukun whlepọn devo lẹ. (Joh. 15:20) Yé na wá to aliho voovo lẹ mẹ. Hiẹ sọgan pehẹ nukundiọsọmẹ sọn whẹndo mẹ. (Mat. 10:36) Azọ́nwatọgbẹ́ towe lẹ, wehọmẹvigbẹ́ lẹ po họntọn towe dai tọn lẹ po sọgan nọ vlẹ we kò. Nọ flin hogbe Jesu tọn he tin to Malku 10:29, 30 mẹ lẹ to whepoponu dọmọ: “Nugbo wẹ yẹn dọna mì dọ, mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do, na yẹn tọn podọ na wẹndagbe lọ tọn wutu he ma na mọ donu 100 to ojlẹ ehe mẹ todin—owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ po aigba lẹ po, gọna homẹkẹn lẹ—podọ ogbẹ̀ madopodo to titonu he ja mẹ.” Enẹwutu, to vivẹnudo zọnmii nado dọnsẹpọ Jehovah podọ nado nọgbẹ̀ sọgbe hẹ nujinọtedo dodo etọn lẹ.

Eyin hiẹ jlo na yí baptẹm, dọna anadenanutọ to pipli mẹho lẹ tọn mẹ. Kanbiọ he bọdo nudọnamẹ ehe go lẹ na yin dehe mẹho lẹ na yizan nado dọhodopọ hẹ we nado sọgan yọnẹn eyin hiẹ pegan na baptẹm. Hiẹ sọgan jẹ dogbapọnna kanbiọ ehelẹ ji na dewe taidi apadewhe tito oplọn mẹdetiti tọn gbesisọ mẹ tọn towe.

To whenue a to awuwlena hodọdopọ ehe, yí whenu zan nado hia alọdlẹndonu Owe-wiwe tọn he yin sislẹ lẹ bosọ lẹnnupọndo yé ji. Hiẹ sọgan basi kandai mẹdetiti tọn do owe ehe mẹ kavi do wema devo de ji. A sọgan yí kandai enẹlẹ zan bosọ hùn owe ehe do nùvo to hodọdopọ towe hẹ mẹho lẹ whenu. Eyin e vẹawuna we nado mọnukunnujẹ depope to kanbiọ lọ lẹ mẹ, voawu nado biọ alọgọ sọn mẹhe nọ plọn Biblu hẹ we kavi sọn mẹho agun tọn lẹ dè.

To hodọdopọ hẹ mẹho lẹ whenu, ma lẹndọ emi dona na gblọndo gaa kavi he gẹdẹ lẹ na kanbiọ lọ lẹ blo. Gblọndo he bọawu bo to tlọlọ lẹ nina to hogbe towe titi mẹ nọ yọ́n hugan. To gblọndo towe nina na suhugan kanbiọ lọ lẹ tọn whenu, e nasọ yin alenu nado nọ dlẹnalọdo wefọ Biblu tọn dopo kavi awe nado nọ ze gblọndo towe sinai do Owe-wiwe ji.

Eyin oyọnẹn towe gando nuplọnmẹ dodonu Biblu tọn lẹ go gbẹ́ whè, mẹho lẹ na basi tito na hiẹ nido mọ alọgọ yí nado sọgan penugo bo na gblọndo lẹ to hogbe towe titi mẹ sọgbe hẹ nukunnumọjẹnumẹ Owe-wiwe tọn towe bosọ pegan nado yí baptẹm to nukọn mẹ.

[Ayidonugo na mẹho agun tọn lẹ: Nudọnamẹ lẹ do lehe hodọdopọ lẹ na yin bibasi hẹ mẹhe jlo na yí baptẹm lẹ do ji sọawuhia to weda 208-212.]