Hodọdopọ Tadona Tọn hẹ Mẹhe Jlo Na Yí Baptẹm Lẹ

Baptẹm-yíyí nọ saba yin bibasi to plidopọ lẹdo tọn po plidopọ daho he Kunnudetọ Jehovah tọn lẹ nọ basi lẹ po ji. To vivọnu hodidọ baptẹm tọn lọ tọn, hodọtọ lọ na dọna mẹhe jlo na yí baptẹm lẹ nado fọnṣite bo na gblọndo na kanbiọ awe he bọdego lẹ po ogbè he yiaga de po:

1. Be a ko lẹnvọjọ sọn ylando towe lẹ mẹ, klan dewe do wiwe hlan Jehovah, bo ko kẹalọyi aliho whlẹngán tọn etọn gbọn Jesu Klisti gblamẹ ya?

2. Be a mọnukunnujẹemẹ dọ baptẹm towe do we hia taidi dopo to Kunnudetọ Jehovah tọn lẹ mẹ to kọndopọ mẹ hẹ titobasinanu Jehovah tọn ya?

Gblọndo mọwẹ nina na kanbiọ ehelẹ nọtena “gbeyiyi gbangba tọn” mẹhe jlo na yí baptẹm lọ lẹ tọn dọ yé tindo yise to ofligọ lọ mẹ, bo ko sọ klan yede do wiwe petepete hlan Jehovah. (Lom. 10:9, 10) Enẹwutu, mẹhe jlo na yí baptẹm lẹ dona biọ alọgọ to odẹ̀ mẹ bo lẹnnupọndo kanbiọ ehelẹ ji jẹnukọn, na yé nido sọgan na gblọndo to gbesisọ mẹ hẹ nujikudo mẹdetiti tọn yetọn.

Be a ko klan dewe do wiwe hlan Jehovah to odẹ̀ mẹ, bo dopà nado basi sinsẹ̀n hlan ewọ kẹdẹ, podọ nado nọ pọ́n ojlo etọn wiwà hlan taidi nujọnu hugan to gbẹzan towe mẹ ya?

Be hiẹ kudeji mlẹnmlẹn todin dọ a dona yí baptẹm to dotẹnmẹ hundote he na bọdego tlolo whenu ya?

Nusisọ́ tẹ nkọ wẹ sọgbe na baptẹm-yíyí? (1 Tim. 2:9, 10; Joh. 15:19; Flp. 1:10)

Mí dona nọ yí “mẹdehihọ́ po wunza po” do doaṣọ́na míde nado do ‘mẹdezejo mítọn na Jiwheyẹwhe’ hia. Enẹwutu, e ma na yọ́n dọ mẹhe to baptẹm yí lẹ ni do tọlẹwu he nọ de omẹ́ hia lẹ, kavi avọ̀ he go yè kàn aṣagbe lẹ kavi hogbe devo lẹ do gba. Nusisọ́ yetọn dona mẹ́sin, dọnmẹdogo bosọ sọgbe hẹ nujijọ lọ.

Nawẹ mẹde dona yinuwa gbọn to whenuena e to baptẹm yí? (Luku 3:21, 22)

Baptẹm-yíyí Jesu tọn yin apajlẹ he Klistiani lẹ dona hodo to egbehe. E mọnukunnujẹemẹ dọ baptẹm-yíyí yin afọdide nujọnu tọn de, podọ ehe sọawuhia to walọ po nuyiwa etọn lẹ po mẹ. Enẹwutu, baptẹm-yitẹn lọ ma na yin otẹn fànfún didọ he ma sọgbe lẹ tọn, aihundida tọn, tọ̀lilẹ tọn, kavi walọ depope he na fẹayihasẹnamẹ sọn nujọnu-yinyin nuwiwa lọ tọn ji tọn gba; mọjanwẹ Klistiani yọyọ de ma na yinuwa taidi dọ e ko gbawhàn daho de wẹ nkọ do niyẹn. Dile etlẹ yindọ baptẹm-yíyí yin nujijọ ayajẹ tọn de, ayajẹ enẹ dona yin didohia to aliho yẹyi tọn de mẹ.

Nawẹ opli lẹ yìyì to gbesisọ mẹ po gbẹdido hẹ agun lọ po na gọalọna we nado hẹn klandowiwe towe hlan Jehovah di gbọn?

To whenue hiẹ ko yí baptẹm godo, naegbọn e na yin nujọnu na we nado tẹdo tito oplọn mẹdetiti tọn dagbe de go podọ nado nọ tindo mahẹ to lizọnyizọn lọ mẹ to gbesisọ mẹ?

NUDỌNAMẸ LẸ NA MẸHO AGUN TỌN LẸ

To whenue wẹnlatọ he ma ko yí baptẹm de hẹn ojlo etọn nado yí baptẹm zun yinyọnẹn, tuli dona yin nina ẹn nado yí sọwhiwhe do gbadopọnna “Kanbiọ lẹ Na Mẹhe Jlo Na Yí Baptẹm Lẹ,” he tin to weda 185-207 owe ehe tọn. Ayidonugo etọn dona yin dindọn wá “Nudọnamẹ de Na Wẹnlatọ He Ma Ko Yí Baptẹm” ji, he bẹsọn weda 182, ehe basi zẹẹmẹ lehe ewọ sọgan wleawuna hodọdopọ he mẹho lẹ na tindo hẹ ẹ lọ do tọn. Dile e yin didohia to finẹ do, mẹhe to nukọnpọnhlan nado yí baptẹm lọ sọgan yí kandai mẹdetiti tọn he e basi lẹ zan bosọ hùn owe ehe do nùvo to hodọdopọ lọ lẹ whenu. Ṣigba, mẹdevo ma dona gbadopọnna kanbiọ lọ lẹ hẹ ẹ jẹnukọnna aisinsin etọn hẹ mẹho lẹ gba.

Mẹdepope he jlo na yí baptẹm dona dọna anadenanutọ to pipli mẹho lẹ tọn mẹ. To whenuena mẹhe to jijlo nado yí baptẹm lọ ko yí whenu zan nado gbadopọnna “Kanbiọ lẹ Na Mẹhe Jlo Na Yí Baptẹm Lẹ” godo, anadenanutọ to pipli mẹho lẹ tọn mẹ na kanse mẹlọ eyin e ko basi klandowiwe mẹdetiti tọn de hlan Jehovah to odẹ̀ mẹ nado wà ojlo Etọn. Eyin mẹlọ ko basi klandowiwe, to whenẹnu anadenanutọ to pipli mẹho lẹ tọn mẹ na basi tito, na awe to mẹho lẹ mẹ nido dọhodopọ hẹ mẹlọ do “Kanbiọ lẹ Na Mẹhe Jlo Na Yí Baptẹm Lẹ” ji. Mẹho voovo lẹ wẹ dona yin azọ́ndena nado penukundo adà awe lọ lẹ dopodopo go. E ma yin dandan nado nọte kakajẹ whenue plidopọ lẹdo tọn de kavi plidopọ daho de yin lilá whẹpo hodọdopọ ehelẹ nido yin bibasi gba.

Adà awe lọ lẹ sọgan yin nukunpedego to aisinsin voovo awe whenu, ehe dopodopo yetọn gán dẹn na nudi gànhiho dopo, ṣigba e ma jẹagọ nado yí whenu zan humọ gba, eyin e biọ domọ. Adà lọ lẹ dopodopo dona bẹjẹeji bosọ yin tadona po odẹ̀ po. Mẹhe jlo na yí baptẹm lọ kavi mẹho lẹ ma dona to plaplaji to dogbigbapọnna kanbiọ lọ lẹ whenu. Mẹho he yin dide lẹ dona yawu dín whenu na hodọdopọ ehe.

E nọ saba yọ́n hugan nado gbadopọnna kanbiọ lọ lẹ hẹ dopodopo mẹhe jlo na yí baptẹm lẹ tọn, kakati nido yin hẹ mẹhe jlo na yí baptẹm lẹpo dopọ. Eyin mẹhe jlo na yí baptẹm lọ na gblọndo kanbiọ lọ lẹpo tọn, mẹho lẹ na mọ lehe nukunnumọjẹnumẹ etọn siso sọ, bọ e na họnwun na yé eyin mẹlọ pegan na baptẹm. Humọ, mẹhe jlo na yí baptẹm lọ sọgan voawu nado na gblọndo ganji to ninọmẹ mọnkọtọn mẹ. Asu po asi po de sọgan yin hokanse dopọ.

Eyin mẹhe jlo na yí baptẹm lọ yin yọnnu de, hodọdopọ lọ dona yin bibasi to aliho de mẹ bọ mẹdevo lẹ sọgan to yé mọ hlan, ṣigba bo ma na sè nuhe dọ yé te. Eyin e biọ dọ mẹdevo de ni gọ́ na yé, be mẹlọ dona yin mẹho de kavi devizọnwatọ lizọnyizọnwiwa tọn de, sọgbe hẹ adà he yé jlo na gbadopọnna, dile e yin didohia to hukan he bọdego mẹ do.

To agun he mẹ sọha mẹho lẹ tọn ma sù te, devizọnwatọ lizọnyizọnwiwa tọn he pegan, bo nọ do lẹnpọn dagbenọ-yinyin po wuntuntun po hia lẹ, sọgan gbadopọnna kanbiọ baptẹm tọn he to “Adà 1: Nuyise Klistiani Tọn Lẹ” mẹ lẹ hẹ mẹhe jlo na yí baptẹm de. Amọ́, mẹho agun tọn lẹ kẹdẹ wẹ dona nọ gbadopọnna “Adà 2: Gbẹzan Klistiani Tọn.” Eyin mẹmẹsunnu he pegan lẹ ma sù to agun de mẹ, yé sọgan dọnsẹpọ nugopọntọ lẹdo tọn nado yọnẹn eyin agun he to yakẹ de sọgan wá gọalọ.

Eyin mẹhe jlo na yí baptẹm lọ yin yọpọvu kavi ovi he ma ko whẹ́n mẹho de, mẹjitọ etọn Klistiani dopo (kavi awe lẹ) dona nọ dogbapọn lọ lẹ tẹnmẹ. Eyin depope to mẹjitọ lọ lẹ mẹ ma penugo nado nọ otẹn lọ mẹ, to whenẹnu mẹho awe (kavi mẹho dopo po devizọnwatọ lizọnyizọnwiwa tọn de po, sọgbe hẹ adà he jlo na yin gbadopọnna lọ) dona penukundo adà lọ lẹ dopodopo go.

Mẹho lẹ na hẹn ẹn diun dọ mẹhe jlo na yí baptẹm de tindo nukunnumọjẹnumẹ gando nuplọnmẹ dodonu Biblu tọn lẹ go jẹ obá he sọgbe hẹ lẹnpọn dagbe de mẹ. Humọ, yé dona dindona eyin mẹlọ yọ́n pinpẹn nugbo lọ tọn sisosiso bo nọ do sisi he sọgbe hia na titobasinanu Jehovah tọn. Eyin mẹlọ ma mọnukunnujẹ nuplọnmẹ dodonu Biblu tọn lẹ mẹ, mẹho lẹ na basi tito, na e nido mọ alọgọ he jẹ yí nado sọgan pegan na baptẹm to nukọn mẹ. E sọgan biọ dọ whenu ni yin nina mẹdevo lẹ, na yé nido sọgan dohia dogọ dọ yé yọ́n nujọnu-yinyin sinsẹ̀nzọn kunnudegbe tọn kavi taliliaina tito yẹwhehọluduta tọn lẹ tọn. Mẹho lẹ lọsu wẹ dona de lehe yé na yí nudi gànhiho dopo he yé tindo nado gbadopọnna adà dopodopo zan do, nado sọgan dindona to gigọ́ mẹ eyin mẹhe jlo na yí baptẹm lọ ko wleawufo na baptẹm kavi lala. Dile etlẹ yindọ whenu susu sọgan yin yiyizan to kanbiọ delẹ ji hú devo lẹ, kanbiọ lọ lẹpo wẹ dona yin dogbapọnna.

Mẹho he gbadopọnna kanbiọ lọ lẹ hẹ mẹhe jlo na yí baptẹm lẹ na pli to adà awetọ lọ godo nado basi dide eyin mẹlọ na yin alọkẹyi na baptẹm kavi lala. Mẹho lọ lẹ na lẹnnupọndo fie mẹhe jlo na yí baptẹm lọ whẹ́n te, nugopipe etọn, po ninọmẹ devo lẹ po ji. Yanwle yetọn wẹ nado yọnẹn eyin mẹlọ ko lẹ́ ahun etọn hlan Jehovah dè bo ko sọ mọnukunnujẹ nugbo dodonu Biblu tọn lẹ mẹ. Po alọgọ owanyinọ mìtọn po, mẹhe to baptẹm yí lẹ na wleawu ganji nado basi wadotana azọ́ndenamẹ titengbe yetọn tọn taidi lizọnyizọnwatọ wẹndagbe lọ tọn lẹ.

Enẹgodo, dopo to mẹho he yin dide lọ lẹ mẹ kavi yé omẹ awe lẹ dona pli hẹ mẹlọ bo dọna ẹn eyin e pegan nado yí baptẹm kavi lala. Eyin mẹlọ pegan, mẹho lẹ dona gbadopọnna “Hodọdopọ Tadona Tọn hẹ Mẹhe Jlo Na Yí Baptẹm Lẹ,” he tin to weda 206-207 ji hẹ ẹ. Eyin mẹhe jlo na yí baptẹm lọ ma ko dotana owe lọ Duvivi Ogbẹ̀ Tọn Kakadoi! pinplọn, mẹho lẹ dona na ẹn tuli nado wàmọ to baptẹm etọn godo. Mì dọna mẹhe jlo na yí baptẹm lọ dọ azán he gbè e yí baptẹm na yin kinkando Kalti Kandai Wẹnlatọ tọn etọn ji. Mì flin in dọ mẹho lẹ na yí nudọnamẹ mẹdetiti tọn ehe to e si, na titobasinanu lọ nido sọgan zindonukọn nado to nukunpedo nuwiwa sinsẹ̀n-bibasi tọn Kunnudetọ Jehovah tọn lẹ tọn go lẹdo aihọn pé, podọ na ewọ nido sọgan nọ tindo mahẹ to nuwiwa gbigbọmẹ tọn lẹ mẹ bosọ nọ mọ alọgọ yí to gbigbọ-liho. Humọ, mẹho lẹ sọgan flinnu wẹnlatọ yọyọ lẹ dọ nudọnamẹ mẹdetiti tọn depope nọ yin nukunpedego sọgbe hẹ Règles mondiales des Témoins de Jéhovah en matière de protection des données [Nujinọtedo He Kunnudetọ Jehovah Tọn lẹ Nọ Hodo Lẹdo Aihọn Pé Nado Basi Hihọ́na Nudọnamẹ Lẹ] ehe tin to jw.org ji. To paa mẹ, nukunwhiwhe ao kavi whè humọ, ko pé na hodọdopọ ehe.

Owhe dopo to baptẹm wẹnlatọ lọ tọn godo, mẹho awe na pli hẹ ẹ nado na ẹn tuli bo na ẹn ayinamẹ delẹ he na gọalọna ẹn. Dopo to mẹho lọ lẹ mẹ dona yin nugopọntọ pipli kunnudegbe tọn etọn. Eyin mẹyọyọ lọ yin ovi he ma ko whẹ́n mẹho de, mẹjitọ Klistiani etọn dopo (kavi awe lẹ) dona tin to finẹ. Mẹho lọ lẹ dona do owanyi hia bosọ na tulimẹ taun to aisinsin lọ whenu. Yé na dọhodo obá he mẹ mẹlọ ko yinukọn dogọ to gbigbọ-liho jẹ ji bo na na ẹn ayinamẹ yọ́n-na-yizan delẹ, yèdọ lehe e sọgan zindonukọn to aṣa dagbe oplọn mẹdetiti tọn de mẹ, Biblu hihia egbesọegbesọ tọn, sinsẹ̀n-bibasi whẹndo tọn to sẹmẹsẹmẹ, opli lẹ yìyì to gbesisọ mẹ gọna mahẹ tintindo to yé mẹ, po tintọ́n na sinsẹ̀nzọn kunnudegbe tọn to sẹmẹsẹmẹ po mẹ do. (Efe. 5:15, 16) Eyin e ma ko dotana owe lọ Plọn Mí po owe Hẹn Dewe Do Owanyi Jiwheyẹwhe Tọn Mẹ po pinplọn, mẹho lẹ dona basi tito hẹ mẹde nado gọalọna ẹn nado wàmọ. Mẹho lọ lẹ dona yí owanyi do na ẹn pipà. To paa mẹ, ayinamẹ lẹ nina do onú dopo kavi awe poun ji ko pé.