KANBIỌ 10

Nawẹ Biblu Sọgan Gọalọna Mi Gbọn?

NUHEWUTU E DO YIN NUJỌNU

Biblu dọ dọ “Owe-wiwe lẹpo wẹ yin gbigbọdo sọn Jiwheyẹwhe dè.” (2 Timoti 3:16) Eyin ehe yin nugbo, be e dohia dọ Biblu sọgan na we anademẹ he sin nuhudo a tindo.

ETẸWẸ A NA WÀ?

Pọ́n nujijọ ehe: David to húnkun bo wá doayi e go dọ emi ma yọ́n fihe gbọn emi te lọ. Ohia alidohiamẹ tọn lẹ dohia ẹ dọ e ma yin fihe e dona te to ojlẹ enẹ mẹ niyẹn. David mọdọ emi buali wẹ. Aliklan de ji wẹ e na ko ṣì ali ze te.

Eyin hiẹ wẹ yin David, etẹwẹ a na wà?

YIAGBỌJI BO LẸNNUPỌN!

Afọdide susu wẹ a sọgan ze:

Kàn ali biọ.
Pọ́n yẹdide alidohiamẹ tọn ji.
Zindonukọn po linlẹn lọ po dọ a na wá mọ ali towe to nukọn.

E họnwun dọ afọdide C lọ ma na tindo kọdetọn dagbe sọmọ.

Afọdide B lọ na hẹn kọdetọn dagbe wá hú tintan lọ. Na yẹdide alidohiamẹ tọn lọ na to alọmẹ na we kakajẹ vivọnu gbejizọnlin lọ tọn bo na to alọgọna we nado mọ ali he a na gbọn.

Biblu sọgan gọalọna we to aliho dopolọ mẹ!

Owe he disa hugan ehe sọgan

deanana we to nuhahun gbẹzan tọn lẹ mẹ
gọalọna we nado plọnnu gando dewe go bo hẹn gbẹzan towe pọnte dogọ
do lehe a sọgan zan gbẹzan he yọ́n hugan lọ do hia we

GBLỌNDO NA KANBIỌ DAHO HUGAN GBẸ̀MẸ TỌN LẸ

Tlolo he mí jẹ hodọ ji wẹ mí nọ jẹ kanbiọ lẹ kanse ji.

Naegbọn jiwhé do tindo sinmẹ juju?
Etẹwẹ yè yí do basi sunwhlẹvu lẹ?

To nukọn mẹ, mí nọ jẹ hokanse ji gando nuhe lẹdo mí lẹ go.

Naegbọn nuylankan lẹ do nọ jọ?
Naegbọn gbẹtọ do nọ kú?

Etẹwẹ lo eyin gblọndo kanbiọ enẹlẹ tọn ko tin to Biblu mẹ sọn ojlẹ dindẹn die?

Mẹsusu nọ dọ dọ otàngblo kẹdẹ wẹ gọ́ Biblu mẹ podọ e ko dohó, kavi dọ e vẹawu gbau nado mọnukunnujẹemẹ. Ṣigba, be Biblu wẹ yin nuhahun lọ nugbonugbo ya, kavi nuhe gbẹtọ lẹ sè gando Biblu go? Be vlavo onú agọ̀ wẹ yé sè ya?

Di apajlẹ, gbẹtọ lẹ nọ lẹndọ Biblu dọ dọ Jiwheyẹwhe wẹ to anadena aihọn lọ. Ṣigba, nawẹ e sọgan yinmọ gbọn? Aihọn ehe ko ylan pete! E gọ́ na awufiẹsa po yajiji po, azọ̀n po okú po, huvẹ po nugbajẹmẹji po. Nawẹ Jiwheyẹwhe owanyinọ de sọgan yin adọ̀ onú ehe lẹpo tọn gbọn?

Be e na jlo we nado mọ gblọndo lọ ya? Nuhe Biblu dọ gando mẹhe to anadena aihọn lọ go sọgan paṣa we!

A na ko mọdọ Biblu ji wẹ ayinamẹ he a mọyi to alọnuwe ehe mẹ lẹ sinai do. Kunnudetọ Jehovah tọn lẹ kudeji dọ Biblu yin asisa dejidego de na anademẹ. Na e yin “gbigbọdo sọn Jiwheyẹwhe dè bo yin alenu na mẹpinplọn, na wọhẹmẹ, na nulẹ hinhẹn sọgbe.” (2 Timoti 3:16, 17) E na yọ́n dọ a ni plọn owe hoho—he gbẹ́ yọ́n-na-yizan ehe!