Yé Ma Depà Yetọn

Jehovah dọna Mose dọmọ: ‘Hẹji wá dè e to osó lọ ji. Yẹn na kàn osẹ́n ṣie lẹ do wekan-zannu lẹ ji bo na ze yé jo na we.’ Mose sọ hẹji yì osó lọ ji bo nọ finẹ na okle 40 ozán 40. To whenue e to finẹ, Jehovah kàn Gbedide Ao lẹ do wekan-zannu awe ji bo ze yé jo na Mose.

To ojlẹ de godo, Islaelivi lẹ lẹndọ Mose ko jo yé do. Yé dọna Aalọn dọ: ‘Mí jlo dọ mẹde ni deanana mí. Basi yẹwhe de na mí!’ Aalọn dọmọ: ‘Mì bẹ sika mìtọn lẹ na mi.’ E yọ́ sika lọ lẹ bo yí yé do basi boṣiọ oyìnvu tọn de. Mẹlọ lẹ sọ dọmọ: ‘Oyìnvu ehe wẹ Jiwheyẹwhe mítọn he plan mí tọ́n sọn aigba Egipti tọn ji!’ Yé jẹ oyìnvu sika tọn lọ sẹ̀n ji bo basi hùnwhẹ de. Be nuylankan wà wẹ yé te ya? Mọwẹ, na yé ko dopà wayi dọ Jehovah kẹdẹ wẹ emi na sẹ̀n. Amọ́ todin, yé ko gbẹkọ opà enẹ go.

Jehovah mọ nuhe to jijọ lọ bo dọna Mose dọmọ: ‘Jẹte yì mẹlọ lẹ dè. Yé vẹtolina mi bo to yẹwhe lalo de sẹ̀n.’ Mose jẹte sọn osó lọ ji bo hẹn wekan-zannu awe lọ lẹ.

To whenue Mose sẹpọ osla lọ, e sè bọ mẹlọ lẹ to hànji. E sọ mọdọ yé to wedu bo to didẹ́ do odò na oyìnvu de. Adi do Mose taun. E bẹ wekan-zannu awe lọ lẹ dlan kọmẹ bọ yé gbà hányán. To afọdopolọji, e gídí oyìnvu lọ. Enẹgodo, e kanse Aalọn dọmọ: ‘Nawẹ mẹlọ lẹ wagbọn do diọlinlẹn na we nado wà nuylankan ehe?’ Aalọn dọmọ: ‘Ma gblehomẹ blo. Hiẹ lọsu yọ́n omẹ nankọ he mẹlọ lẹ yin. Yé dọ ma basi yẹwhe de na emi, bọ n’gbọ bo bẹ sika yetọn lẹ do miyọ́n mẹ nado basi oyìnvu ehe!’ Aalọn ma dona ko wàmọ. Mose lẹkọyi osó lọ ji bo vẹ̀ Jehovah dọ ni jona mẹlọ lẹ.

Jehovah jona mẹhe wleawufo nado setonuna ẹn lẹ. Be a ma mọdọ nujọnu wẹ e yin dọ Islaelivi lẹ ni nọ hodo anademẹ Mose tọn ya?