Kẹtẹkẹtẹ Balaami Tọn Dọho

Islaelivi lẹ ko yí nudi owhe 40 zan to danfafa ji. Yé ko gbawhàn tòdaho gángán susu tọn. Todin he yé whèsla do danfafa Moabi tọn ji to whèzẹtẹn-waji Tọ̀sisa Jọdani tọn, ojlẹ ko sọ̀ na yé nado biọ Aigba Pagbe tọn lọ ji. Balaki, ahọlu Moabi tọn, to budi dọ yé na yí aigba emitọn. Enẹwutu, e ylọ dawe de he nọ yin Balaami nado wá Moabi bo hodẹ̀do Islaelivi lẹ.

Ṣigba, Jehovah dọna Balaami dọ: ‘Hiẹ ma dona hodẹ̀do Islaelivi lẹ.’ Enẹwutu, Balaami gbẹ́ nado yì. Ahọlu Balaki sọ ylọ ẹ whla awetọ bo dopà dọ emi na na ẹn nudepope he jlo e. Ṣogan, Balaami gbẹ́. Enẹgodo, Jiwheyẹwhe dọmọ: ‘A sọgan yì, ṣigba, nuhe n’dọna we dọ a ni dọ lẹ kẹdẹ wẹ a dona dọ.’

Balaami hẹ kẹtẹkẹtẹ etọn ji bo dedo hùwaji Moabi tọn. Linlẹn etọn wẹ nado hodẹ̀do Islaelivi lẹ, dile etlẹ yindọ Jehovah ko gbẹna ẹn ma nado wàmọ. Angẹli Jehovah tọn sọawuhia whla atọ̀n to aliho lọ ji. Balaami ma gán mọ angẹli lọ, amọ́ kẹtẹkẹtẹ etọn mọ ẹn. Jẹnukọn whẹ́, kẹtẹkẹtẹ lọ zẹ̀ sọn aliho lọ ji biọ glemẹ. Enẹgodo, kẹtẹkẹtẹ lọ yì adó zannu tọn de kọ̀n bo finyọ́n afọ Balaami tọn do adó lọ go. To godo mẹ, kẹtẹkẹtẹ lọ họ́ mlọnai do aliho lọ ṣẹnṣẹn. To ninọmẹ ehelẹ dopodopo mẹ, Balaami nọ lì opò kẹtẹkẹtẹ lọ.

Whla atọ̀ntọ he e linú kẹtẹkẹtẹ lọ godo, Jehovah hẹn kẹtẹkẹtẹ lọ nado dọho. Kẹtẹkẹtẹ lọ kanse Balaami dọmọ: ‘Naegbọn a do to nuli mi?’ Balaami sọ dọmọ: ‘Na a ko yí mi do davlẹ wutu wẹ. Eyin ohí de ko to alọmẹ na mi wẹ, n’na ko hù we.’ Kẹtẹkẹtẹ lọ gblọn dọmọ: ‘Hiẹ ko kùn mi na owhe susu. Be n’ko yinuwa hẹ we domọ pọ́n ya?’

Enẹgodo, Jehovah dike bọ Balaami mọ angẹli lọ. Angẹli lọ dọmọ: ‘Jehovah ko na we avase dọ a ma dona hodẹ̀do Islaeli.’ Balaami sọ dọmọ: ‘N’ko ṣinuwa. N’na gọyì whégbè.’ Amọ́, angẹli lọ dọmọ: ‘A sọgan yì Moabi, ṣigba nuhe Jehovah dọna we lẹ kẹdẹ wẹ a dona dọ.’

Be Balaami plọnnu sọn ehe mẹ ya? Lala. To enẹgodo, Balaami tẹnpọn nado hodẹ̀do Islaelivi lẹ whla atọ̀n, ṣigba Jehovah hẹn ẹn nado dona yé whla atọ̀n lọ lẹpo. To godo mẹ, Islaelivi lẹ tọ́nawhàn Moabi bọ Balaami yin hùhù. Be e ma na ko pọnte eyin Balaami ko dotoaina Jehovah dai ya?