Jọṣua po Gibeọninu lẹ Po

Linlin nuhe jọ do Jẹliko go tọn gbayipe kakajẹ akọta Kenani tọn he pò lẹ dè. Ahọlu yetọn lẹ magbe nado nọpọ́ do tọ́nawhàn Islaelivi lẹ. Amọ́, Gibeọninu lẹ basi tito devo. Yé do awù he ko dohó lẹ bo yì Jọṣua dè bosọ dọmọ: ‘Fidindẹn wẹ mí wá sọn. Mí ko sèhó gando Jehovah go bosọ sè nuhe e wà do ota mìtọn mẹ to Egipti podọ to Moabi. Mì dopà na mí dọ mì ma na tọ́nawhàn mí, míwlẹ nasọ lẹzun devizọnwatọ mìtọn lẹ.’

Jọṣua yí yé sè bo yigbe ma nado tọ́nawhàn yé. To azán atọ̀n godo, e wá doayi e go dọ yé ma wá sọn fidindẹn. Aigba Kenani tọn ji wẹ yé wá sọn. Jọṣua kanse Gibeọninu lẹ dọ: ‘Naegbọn mìwlẹ do dolalo na mí?’ Yé sọ gblọn dọmọ: ‘Na mí dibu wutu wẹ! Mí yọnẹn dọ Jehovah Jiwheyẹwhe mìtọn wẹ to avùnho na mì. Mì jaale bo ma hù mí blo.’ Jọṣua depà etọn bo pò yé dogbẹ̀.

To ojlẹ de godo, ahọlu Kenani tọn atọ́n po awhànpa yetọn lẹ po tọ́nawhàn Gibeọninu lẹ. Jọṣua po awhànpa etọn po sọ yí ozán lọ blebu do zinzọnlin yì dọ́n nado whlẹn yé. Awhàn lọ bẹ to wunkẹngbe afọnnu fuu. Kenaninu lẹ gbàdo bo jẹ hinhọ̀n ji pànta awà lẹpo ji. Ṣigba, mahopọnna fidepope he yé họ̀nwezun dedo, Jehovah nọ hẹn kẹ́nsu dahodaho lẹ ja do yé ji. Whenẹnu wẹ Jọṣua biọ to Jehovah si dọ ni hẹn owhè nọte guun. Naegbọn e nado biọ to Jehovah si dọ ni wàmọ to whenuena e yindọ owhè ma ko nọte guun pọ́n gbede? Na Jọṣua dejido Jehovah go wutu wẹ. Owhè ma yihọ na azán dopo blebu kakajẹ whenue Islaelivi lẹ ko gbawhàn ahọlu Kenaninu lẹ po awhànpa yetọn lẹ po tọn godo.