Jonatani Yin Adọgbotọ Podọ Nugbonọ

Visunnu mẹho Ahọlu Sauli tọn, Jonatani, yin awhànfuntọ adọgbotọ de. Davidi dọ dọ Jonatani nọ yawu hú akùn bo dohuhlọn hú kinnikinni. To gbèdopo, Jonatani mọ awhànfuntọ Filistinu 20 hlan osó de ji. E dọna gbaja hẹntọ etọn dọmọ: ‘Mí ma na tọ́navùn yé adavo Jehovah na mí ohia de whẹ́. Eyin Filistinu lọ lẹ dọna mí dọ mí ni hẹji wá, whenẹnu mí na yọnẹn dọ mí dona tọ́navùn yé.’ Filistinu lọ lẹ sọ dawhá dọmọ: ‘Mì wá hoavùn hẹ mí!’ Enẹwutu, yé omẹ awe lẹ hẹ osó lọ ji bo duto awhànfuntọ lọ lẹ ji.

Na Jonatani wẹ yin visunnu mẹho Sauli tọn wutu, ewọ wẹ to otẹn dagbe mẹ nado duahọlu bọdego. Amọ́, Jonatani yọnẹn dọ Jehovah ko de Davidi nado yin ahọlu Islaeli tọn he na bọdego; etomọṣo, e ma whànwu. Jonatani po Davidi po lẹzun họntọn vivẹ́. Yé dopà nado nọ yiavùnlọ bosọ nọ basi hihọ́na ode awetọ. Jonatani na awù etọn titi Davidi, gọna ohí, ogá po gbànnú etọn po taidi ohia de na họntọnjiji yetọn.

Whenue Davidi to hinhọ̀nna Sauli, Jonatani yì e dè bo dọna ẹn dọmọ: ‘Yin huhlọnnọ bo gboadọ. Jehovah ko de we nado yin ahọlu. Otọ́ ṣie lọsu yọnẹn domọ.’ Be e jlo we nado tindo họntọn dagbe de taidi Jonatani ya?

Whlasusu wẹ Jonatani ze ogbẹ̀ etọn do owù mẹ nado gọalọna họntọn etọn. E yọnẹn dọ Ahọlu Sauli jlo na hù Davidi, enẹwutu e dọna otọ́ etọn dọmọ: ‘Ylando de wẹ e na yin nado hù Davidi; e ma ṣì nude wà.’ Homẹgble Sauli taun do Jonatani go. To owhe delẹ godo, Sauli po Jonatani po kú to awhàngbenu.

To okú Jonatani tọn godo, Davidi dín visunnu etọn Mẹfiboṣẹti mọ. To whenue Davidi mọ Mẹfiboṣẹti, e dọna ẹn dọmọ: ‘Na họntọn dagbe de wẹ otọ́ towe yin na mi wutu, n’na penukundo gowe to gbẹzan towe lẹpo mẹ. Họ̀nmẹ ṣie wẹ a na nọ nọ̀ bo na nọ dùnú to tafo ṣie ji.’ Davidi ma wọn họntọn etọn Jonatani gbede.