Awhànpa Miyọ́nnọ Jehovah Tọn

Ahọlu Silia tọn, Bẹni-hadadi, nọ to awhàn-tọ́n Islaeli mapote. Ṣigba whedepopenu he e ja, yẹwhegán Eliṣa ko nọ na avase ahọlu Islaeli tọn jẹnukọn bọ e nọ penugo nado họ̀ngán. Enẹwutu, Bẹni-hadadi magbe nado wle Eliṣa. E wá mọdọ tòdaho Dotani tọn mẹ wẹ Eliṣa te, e sọ do awhànpa Silia tọn hlan nado wle e.

Silianu lẹ wá Dotani to zánmẹ. To wunkẹngbe, devizọnwatọ Eliṣa tọn tọ́njẹgbonu bo mọdọ awhànpa daho de ko lẹdo tòdaho lọ pé. Obu jẹ e ji bọ e dawhá dọmọ: ‘Eliṣa, etẹ mí na wà?’ Eliṣa sọ dọna ẹn dọmọ: ‘Mẹhe to adà mítọn mẹ lẹ sù hú mẹhe to adà yetọn mẹ lẹ.’ To whenẹnu, Jehovah hunnukun na devizọnwatọ Eliṣa tọn bọ e mọdọ osó he lẹdo tòdaho lọ pé lẹpo wẹ gọ́ na osọ́ lẹ po osọ́-kẹkẹ miyọ́nnọ lẹ po.

Whenue awhànfuntọ Silia tọn lẹ tẹnpọn nado wle Eliṣa, e hodẹ̀ dọmọ: ‘Jehovah, jaale bo tọ́nnukunna yé.’ To ajiji mẹ, awhànfuntọ lọ lẹ masọ yọ́n fihe yé te ba, dile etlẹ yindọ yé to numọ. Eliṣa dọna yé dọmọ: ‘E ma yin tòdaho lọ die. Mì hodo mi, n’na plan mì yì dawe he dín mì te lọ dè.’ Yé sọ hodo Eliṣa kaka yì Samalia, yèdọ fihe ahọlu Islaeli tọn nọ nọ̀.

Whenu ko fẹ́ whẹpo Silianu lẹ do wá yọ́n fihe yé te. Ahọlu Islaeli tọn kanse Eliṣa dọmọ: ‘Yẹn ni hù yé wẹ ya?’ Be Eliṣa yí dotẹnmẹ ehe zan nado yiahọsu to mẹhe ko tẹnpọn nado gbleawuna ẹn lọ lẹ go wẹ ya? Lala. Eliṣa dọmọ: ‘Ma hù yé blo. Na yé núdùdù, bo jo yé do na yé ni yì.’ Enẹwutu, ahọlu lọ basi hùnwhẹ daho de na yé bo do yé hlan whé.