Eliṣa Mọ Awhàn-Kẹkẹ Miyọ́n Tọn lẹ—Hiẹ Lo?

Ahọlu Silia tọn to ogbé yẹwhegán Jiwheyẹwhe tọn Eliṣa tọn yàn bo dómọna ẹn kaka wá tòdaho Dotani tọn mẹ, ehe tin to osó de ji bọ adó yin dido lẹdo. To zánmẹ, ahọlu Silia tọn do osọ́ lẹ, awhàn-kẹkẹ lẹ po awhànfuntọ lẹ po hlan Dotani. To afọnnu, awhànfuntọ etọn lẹ ko lẹdo tòdaho lọ pé.—2 Ahọ. 6:13, 14.

To whenue devizọnwatọ Eliṣa tọn fọ́n bo yì kọho ji, e mọ kẹntọ he jlo na wle yẹwhegán lọ lẹ. Enẹwutu, e dawhá dọmọ: “Ṣo, mẹmẹnu ṣie! Na mí na wà do?” Eliṣa gblọnna ẹn dọmọ: “A dibu blo: na yé he tin to mí dè yin susu hú yé he tin to yé dè.” Enẹgodo, yẹwhegán lọ hodẹ̀ dọmọ: “Yẹn vẹ̀ we, OKLUNỌ, hùn nukun etọn lẹ, na e nido mọ.” Kandai lọ zindonukọn dọmọ: “OKLUNỌ sọ hùn nukun yọpọ sunnu lọ tọn lẹ; ewọ sọ mọ: bo doayi e go, osó lọ tin gọ́ na osọ́ po kẹkẹ miyọ́n tọn lẹ po, lẹdo Eliṣa pé.” (2 Ahọ. 6:15-17) Etẹwẹ mí sọgan plọn sọn nujijọ he wá aimẹ to gbẹzan Eliṣa tọn mẹ ehe po devo lẹ po mẹ?

Eliṣa ma dibu to whenue e pannukọn awhànpa Silia tọn, na e dejido Jehovah go bo mọdọ Jiwheyẹwhe to huhlọn etọn yizan nado basi hihọ́na emi. Mí ma nọ donukun azọ́njiawu lẹ to egbehe, ṣigba mí nọ yí nukun homẹ tọn do mọdọ Jehovah to hihọ́ basina omẹ etọn lẹ taidi pipli de. To linlẹn de mẹ, kẹkẹ miyọ́n tọn po awhàn-kẹkẹ lẹ po lẹdo mílọsu. Eyin mí “mọ” po nukun yise tọn po bo nọ dejido Jiwheyẹwhe go to whelẹponu, mí na ‘tin to hihọ́ mẹ’ bo na mọ dona Jehovah tọn. (Ps. 4:8) Todin, mì gbọ mí ni gbadopọnna lehe mí sọgan mọaleyi sọn nujijọ devo lẹ he wá aimẹ to gbẹzan Eliṣa tọn mẹ do mẹ.

ELIṢA JẸ DEVIZỌN WÀ NA ELIJA JI

To gbèdopo, whenue Eliṣa to ogle pọ̀, yẹwhegán Elija dọnsẹpọ ẹ bo dlan awugbó etọn titi do ewọ ji. Eliṣa yọ́n nuhe ehe zẹẹmẹdo. Enẹwutu, e basi hùnwhẹ de bo dọ e zun whedenu na otọ́ po onọ̀ etọn po, bo tọ́n sọn whégbè nado yì wadevizọn na Elija. (1 Ahọ. 19:16, 19-21) Na Eliṣa ze ede jo nado wadevizọn na Jiwheyẹwhe to gigọ́ mẹ wutu, ewọ lẹzun azọ́nwanu de to alọ Jehovah tọn mẹ podọ to godo mẹ, ewọ sẹ̀n taidi yẹwhegán de to otẹn Elija tọn mẹ.

Eliṣa wadevizọn na Elija na nudi owhe ṣidopo. To ojlẹ enẹ mẹ, Eliṣa wẹ nọ “kọ̀n osin do alọ Elija tọn lẹ go.” (2 Ahọ. 3:11) To whenẹnu, alọ wẹ gbẹtọ lẹ do nọ dùnú, matin ṣivi, ohí kavi nuyizan devo lẹ. To núdùdù godo, devizọnwatọ de nọ kọ̀n osin do alọ mẹmẹnu etọn lẹ tọn go nado klọ yé. Enẹwutu, delẹ to azọ́n he Eliṣa nọ wà lẹ mẹ sọgan taidi nuhe demẹpò. Etomọṣo, ewọ nọ mọdọ lẹblanulọkẹyi de wẹ e yin na emi nado wadevizọn na Elija.

Mọdopolọ to egbehe, Klistiani susu nọ doalọ to sinsẹ̀nzọn whenu-gigọ́ tọn wunmẹ voovo lẹ mẹ. Etẹwutu? Na yé tindo yise to Jehovah mẹ bosọ jlo nado wà nuhe go yé pé lẹpo to sinsẹ̀nzọn etọn mẹ. Azọ́ndenamẹ delẹ sọgan biọ dọ yé ni tọ́n sọn whégbè nado wà sinsẹ̀nzọn to Bẹtẹli, to azọ́n họ̀gbigbá tọn mẹ po mọmọ po, yèdọ azọ́n he mẹdelẹ nọ pọnhlan taidi nuhe demẹpò. Klistiani depope ma dona nọ pọ́n sinsẹ̀nzọn mọnkọtọn lẹ hlan taidi nuhe ma yin nujọnu kavi demẹpò gba, na azọ́n enẹlẹ họakuẹ taun to nukun Jehovah mẹ.—Heb. 6:10.

ELIṢA TẸDO AZỌ́NDENAMẸ ETỌN GO

Whẹpo Jiwheyẹwhe do ‘ze Elija to jẹhọn-lẹpenọ de mẹ yì olọn mẹ,’ ewọ do yẹwhegán lọ hlan sọn Gilgali yì Bẹtẹli. Elija dọna azọ́nwatọgbẹ́ etọn dọ ni ma hodo emi blo, ṣigba Eliṣa gblọn dọmọ: “Yẹn ma na jo we do gba.” Dile yé zindonukọn to gbejizọnlin lọ mẹ, whla awe wẹ Elija na tuli Eliṣa nado gbọṣi ai, ṣigba ewọ gbẹ́. (2 Ahọ. 2:1-6) Eliṣa tẹdo Elija go dile Luti tẹdo Naomi go do. (Luti 1:8, 16, 17) Etẹwutu? Na Eliṣa yọ́n pinpẹn azọ́ndenamẹ he e mọyi sọn Jiwheyẹwhe dè nado wadevizọn na Elija tọn wutu.

Eliṣa ze apajlẹ dagbe de dai na mí. Eyin mí mọ lẹblanulọkẹyi sinsẹ̀nzọn tọn de yí to titobasinanu Jiwheyẹwhe tọn mẹ, mí na yọ́n pinpẹn etọn taun eyin mí hẹn do ayiha mẹ dọ Jehovah wẹ mí to sinsẹ̀n. Gbégbò de ma sọ hugan mọ.—Ps. 65:4; 84:10.

“BIỌ NUHE YẸN NA WÀ NA WE”

Dile sunnu awe ehelẹ to gbejizọnlin ji, Elija dọna Eliṣa dọmọ: “Biọ nuhe yẹn na wà na we, whẹpo yẹn do yin zize sọn dè we.” Dile obiọ he Sọlomọni basi to owhe delẹ jẹnukọn sinai do ojlo Jiwheyẹwhe tọn wiwà ji do, mọ wẹ Eliṣa tọn lọsu sinai do nudopolọ ji do. E biọ dọ ‘mimá yẹndawe gbigbọ Elija tọn ni tin to emi ji.’ (1 Ahọ. 3:5, 9; 2 Ahọ. 2:9) To Islaeli, visunnu plọnji de wẹ nọ mọ yẹndawe ogú tọn yí. (Deut. 21:15-17) Enẹwutu, nuhe biọ Eliṣa te wẹ nado jẹ otẹn Elija tọn mẹ taidi yẹwhegán de. Humọ, e họnwun dọ Eliṣa jlo na tindo adọgbigbo dopolọ taidi Elija, mẹhe “yin awuwhànnọ tlala na OKLUNỌ.”—1 Ahọ. 19:13, 14.

Nawẹ Elija yinuwa hlan obiọ devi etọn tọn gbọn? Yẹwhegán lọ dọmọ: “Hiẹ ko biọ onú sinsinyẹn de: ṣogan, eyin hiẹ mọ mi whenuena yè to zize mi sọn dè we e na yinmọ hlan we; ṣigba eyin lala, e ma na yinmọ gba.” (2 Ahọ. 2:10) E họnwun dọ gblọndo Elija tọn do onú titengbe awe hia. Tintan, Jiwheyẹwhe kẹdẹ wẹ sọgan magbe etọn eyin vlavo Eliṣa na mọ obiọ etọn yí. Awetọ, eyin Eliṣa na mọ obiọ etọn yí, ewọ dona gbọṣi Elija dè, mahopọnna nudepope he sọgan jọ.

NUHE ELIṢA MỌ

Be Jiwheyẹwhe na gblọndo obiọ Eliṣa tọn ya? Kandai lọ dọmọ: “E sọ wá jọ, le yé gbẹ́ sọ to yìyì, bo to hodọ, wẹ, doayi e go, kẹkẹ miyọ́n tọn de sọawuhia to finẹ po osọ́ miyọ́n tọn lẹ po he dá yé omẹ awe lẹ to ṣẹnṣẹn; Elija sọ hẹji gbọn jẹhọn-lẹpenọ de dali yì biọ olọn mẹ. Eliṣa sọ mọ ẹn.”a Enẹ wẹ yin gblọndo Jehovah tọn na obiọ he Eliṣa basi. Eliṣa mọ whenue Elija yin zize sọn e dè bo mọ yẹndawe gbigbọ Elija tọn yí, bosọ lẹzun yẹwhegán to otẹn Elija tọn mẹ.—2 Ahọ. 2:11-14.

Eliṣa ze awugbó vonọtaun Elija tọn he flẹ sọn e go lọ do. Awugbó enẹ do Eliṣa hia taidi yẹwhegán Jiwheyẹwhe tọn. Kunnudenu devo he dohia dọ ewọ yin dide do otẹn enẹ mẹ họnwun to whenue e wà azọ́njiawu de gbọn Tọ̀sisa Jọdani mimá do awe dali.

Matin ayihaawe, to whenue jẹhọn-lẹpenọ lọ ze Elija yì, nuhe Eliṣa mọ yinuwado e ji taun. To popolẹpo mẹ, awujinu wẹ e na yin na mẹde nado mọ awhàn-kẹkẹ lẹ po osọ́ miyọ́n tọn lẹ po! Ohia de wẹ ehe yin dọ Jehovah na gblọndo obiọ Eliṣa tọn. Eyin Jiwheyẹwhe na gblọndo odẹ̀ mítọn lẹ, mí ma nọ mọ awhàn-kẹkẹ po osọ́ miyọ́n tọn lẹ po. Ṣigba, mí sọgan mọdọ Jiwheyẹwhe to huhlọn daho etọn yizan nado hẹn ẹn diun dọ ojlo etọn yin wiwà. Podọ, eyin mí doayi e go dọ Jehovah to didona adà aigba ji tọn titobasinanu etọn tọn, be awhàn-kẹkẹ olọn mẹ tọn etọn he to nukọnzindo lọ “mọ” wẹ mí te niyẹn.—Ezek. 10:9-13.

Eliṣa tindo numimọ susu he hẹn ẹn kudeji dọ Jehovah tindo huhlọn he jiawu. Na nugbo tọn, gbigbọ wiwe Jiwheyẹwhe tọn gọalọna ẹn nado basi azọ́njiawu 16, yèdọ nuhe yí whla awe do hugan dehe Elija wà.b Whla awetọ he Eliṣa mọ osọ́ lẹ po awhàn-kẹkẹ miyọ́n tọn lẹ po wẹ yin nujijọ he wá aimẹ to Dotani, ehe yin nùdego to bẹjẹeji hosọ ehe tọn.

ELIṢA DEJIDO JEHOVAH GO

Dile etlẹ yindọ kẹntọ lẹ lilẹdo e pé to Dotani, Eliṣa ma dibu. Etẹwutu? Na e wleawuna yise dolido to Jehovah mẹ wutu. Mílọsu tindo nuhudo yise mọnkọtọn tọn. Enẹwutu, mì gbọ mí ni nọ biọ gbigbọ wiwe Jiwheyẹwhe tọn to odẹ̀ mẹ, na mí nido sọgan nọ do yise po adà sinsẹ́n gbigbọ lọ tọn devo lẹ po hia.—Luku 11:13; Gal. 5:22, 23.

Nujijọ he wá aimẹ to Dotani sọ na whẹwhinwhẹ́n dolido de Eliṣa nado dejido Jehovah po awhànpa mayinukundomọ hihọ́-basinamẹ tọn etọn lẹ po go. Yẹwhegán lọ doayi e go dọ Jiwheyẹwhe ko do angẹli susugege hlan nado lẹdo tòdaho lọ po mẹgbeyantọ lọ lẹ po. Jiwheyẹwhe yí nukun tintọ́n do hò kẹntọ enẹlẹ nado sọgan whlẹn Eliṣa po devizọnwatọ etọn po. (2 Ahọ. 6:17-23) To ojlẹ awusinyẹn tọn enẹ po devo lẹ po mẹ, Eliṣa do yise hia bo dejido Jehovah go mlẹnmlẹn.

Taidi Eliṣa, mì gbọ mí ni nọ dejido Jehovah Jiwheyẹwhe go. (Howh. 3:5, 6) Eyin mí wàmọ, “Jiwheyẹwhe [na] wàlẹblanuna mí, bo dona mí.” (Ps. 67:1) Nugbo wẹ dọ mí ma sọgan mọdọ awhàn-kẹkẹ po osọ́ miyọ́n tọn lẹ po lẹdo mí pé. Ṣigba, to “nukunbibia daho” he ja lọ whenu, Jehovah na basi hihọ́na mí taidi pipli mẹmẹsunnu lẹ tọn de lẹdo aihọn pé. (Mat. 24:21; Osọ. 7:9, 14) Kakajẹ whenẹnu, mì gbọ mí ni nọ flin to whepoponu dọ “Jiwheyẹwhe wẹ fibẹtado de na mí.”—Ps. 62:8.

[Nudọnamẹ odò tọn lẹ]

[Apotin to weda 30]

OWHẸ̀ DELẸ HE JI MÍ DUTE TO AGỌE

243 — Sọha owhẹ̀ he ji Kunnudetọ Jehovah tọn lẹ dù te to whẹdatẹn daho lẹ lẹdo aihọn pé tọn

France — Nudi 4 181 061 595 F CFA

Akuẹ enẹ yin súsú na Kunnudetọ Jehovah tọn lẹ to 11 décembre 2012 gbọn gandudu France tọn dali, to whenue yé dọ̀n whẹho de to whẹdatẹn na owhe 15 godo

Grèce — Whẹdatẹn Daho Otò lọ tọn

Whẹdatẹn Daho Otò lọ tọn kẹalọyi to 2 novembre 2012 dọ Kunnudetọ Jehovah tọn lẹ, yèdọ sinsẹ̀n Klistiani tọn he yin yinyọnẹn ganji de, do jlọjẹ nado tindo ohọ̀ sinsẹ̀n-bibasi tọn lẹ

20 — Sọha he ji owhẹ̀ he ji mí dù te tọn to Whẹdatẹn Europe Tọn Na Jlọjẹ Gbẹtọvi lẹ tọn sọn avril 2000

Corée du Sud — Nudide Wedegbẹ́ Plidopọ Akọta lẹ Tọn He Nọ Yiavùnlọna Jlọjẹ Gbẹtọvi lẹ Tọn

To 25 octobre 2012, Corée du Sud yin whẹdana nado suahọ Kunnudetọ 388, na gandudu lọ tùnafọ jlọjẹ yetọn ji, to whenue yé gbẹ́ nado tindo mahẹ to awhànfunfun mẹ na yise yetọn wutu