Ẹzla Plọnmẹ Osẹ́n Jiwheyẹwhe Tọn

E ko yì nudi owhe 70 todin sọn whenue suhugan Islaelivi lẹ tọn lẹkọyi Jelusalẹm, ṣigba delẹ to yé mẹ gbẹ́ pò to awà voovo Ahọluigba Pẹlsia tọn ji. Dopo to yé mẹ wẹ yẹwhenọ de he nọ yin Ẹzla, mẹhe nọ plọnmẹ Osẹ́n Jehovah tọn. Ẹzla sè dọ mẹhe to Jelusalẹm lẹ ma to Osẹ́n lọ yìn, enẹwutu e jlo nado yì gọalọna yé. Ahọlu Pẹlsia tọn Altakẹlikesi dọna ẹn dọmọ: ‘Jiwheyẹwhe ko na we nuyọnẹn, na hiẹ nido sọgan plọnmẹ Osẹ́n etọn. Yì, bo gbọ mẹdepope he jlo ni hodo we yì.’ Ẹzla basi opli de hẹ mẹhe jlo na lẹkọyi Jelusalẹm lẹpo. Yé hodẹ̀ hlan Jehovah bo biọ dọ ewọ ni basi hihọ́na yé to aliji, enẹgodo yé dedo.

To osun ẹnẹ godo, yé jẹ Jelusalẹm. Ahọvi he to finẹ lẹ dọna Ẹzla dọmọ: ‘Islaelivi lẹ ko vẹtolina Jehovah bo dà yọnnu he nọ sẹ̀n yẹwhe lalo lẹ.’ Etẹwẹ Ẹzla wà? E jẹklo to gbẹtọ lọ lẹpo nukọn bo hodẹ̀ dọmọ: ‘Jehovah, nuhe hiẹ ko wà na mí lẹ sù taun, ṣogan míwlẹ ko waylando sọta we.’ Mẹlọ lẹ lẹnvọjọ, amọ́ yé gbẹ́ to nuhe ma sọgbe delẹ wà. Ẹzla de mẹho lẹ po whẹdatọ lẹ po nado penukundo whẹho enẹlẹ go. To osun atọ̀n he bọdego lẹ mẹ, mẹhe ma to Jehovah sẹ̀n lẹ yin yinyan dogbé.

Owhe wiawe sọ juwayi. To ojlẹ enẹ mẹ, adó Jelusalẹm tọn lẹ yin vivọ́ do. Enẹwutu, Ẹzla pli gbẹtọ lọ lẹ do tòplitẹn nado hia Osẹ́n Jiwheyẹwhe tọn na yé. Whenue Ẹzla hùn owe lọ, yemẹpo fọnṣite. E na pipà Jehovah bọ yé dlẹnalọ yetọn lẹ daga nado kọngbedopọ. Enẹgodo, Ẹzla hia Osẹ́n lọ bo basi zẹẹmẹ etọn, yé sọ dotoai po sọwhiwhe po. Yé yigbe dọ emi ko danbú sọn Jehovah dè whladopo dogọ, bosọ viavi. To wunkẹngbe, Ẹzla sọ hia adà Osẹ́n lọ tọn devo lẹ na yé. Yé sè dọ to madẹnmẹ yé dona basi Hùnwhẹ Gòhọtúntún tọn. To afọdopolọji, yé jẹ awuwledai ji na hùnwhẹ lọ.

To azán ṣinawe hùnwhẹ lọ tọn lẹpo ji, gbẹtọ lọ lẹ jaya bo dopẹna Jehovah na yé mọ jinukun susu bẹ wá whé wutu. Hùnwhẹ Gòhọtúntún tọn mọnkọtọn de ma ko yin bibasi pọ́n sọn azán Jọṣua tọn gbè. To hùnwhẹ lọ godo, gbẹtọ lọ lẹ pli bo hodẹ̀ dọmọ: ‘Jehovah, hiẹ whlẹn mí sọn kanlinmọgbenu bo na mí núdùdù to danfafa ji bosọ na mí aigba dagbe ehe. Ṣigba, whlasusu wẹ míwlẹ ko vẹtolina wẹ. A do yẹwhegán towe lẹ hlan nado na mí avase, amọ́ mí ma dotoai. Ṣogan, hiẹ fahomẹ hẹ mí. A hẹn opà he a do na Ablaham di. Todin, mí dopà dọ mí na nọ setonuna we.’ Yé basi kandai pàdido yetọn tọn bọ ahọvi lẹ, Levinu lẹ po yẹwhenọ lẹ po yí hiadonu yetọn lẹ do dohiagona ẹn.